Apple ਨੇ ਐਪ ਸਟੋਰ ਤੇ ਬੈਨ ਕੀਤੇ 1,35,000 ਐਪਸ, ਹੁਣ ਤੱਕ ਦੀ ਸਭ ਤੋਂ ਵੱਡੀ ਕਾਰਵਾਈ ਨਾਲ ਦੁਨੀਆ ਵਿੱਚ ਖਲਬਲੀ
Apple Ban 135000 Apps: ਐਪਲ ਦੇ ਐਪ ਸਟੋਰ ਵਿੱਚ ਲੱਖਾਂ ਐਪਸ ਉਪਲਬਧ ਹਨ, ਪਰ ਇੱਕੋ ਵਾਰ ਵਿੱਚ 135,000 ਐਪਸ ਨੂੰ ਹਟਾਉਣਾ ਇੱਕ ਅਸਾਧਾਰਨ ਕਦਮ ਹੈ। ਇਹ ਦਰਸਾਉਂਦਾ ਹੈ ਕਿ ਐਪਲ ਆਪਣੀਆਂ ਨੀਤੀਆਂ ਅਤੇ ਯੂਰਪੀ ਸੰਘ ਦੇ ਨਿਯਮਾਂ ਦੀ ਪਾਲਣਾ ਨੂੰ ਯਕੀਨੀ ਬਣਾਉਣ ਲਈ ਕਿੰਨੀ ਗੰਭੀਰਤਾ ਨਾਲ ਕੰਮ ਕਰ ਰਿਹਾ ਹੈ।ਇਸ ਸਮੇਂ, ਇਹ ਬੈਨ ਸਿਰਫ਼ ਯੂਰਪੀ ਸੰਘ ਖੇਤਰ ਵਿੱਚ ਲਾਗੂ ਹੈ। ਹਾਲਾਂਕਿ, ਇਹ ਸੰਭਵ ਹੈ ਕਿ ਐਪਲ ਭਵਿੱਖ ਵਿੱਚ ਹੋਰ ਬਾਜ਼ਾਰਾਂ ਵਿੱਚ ਵੀ ਇਸੇ ਤਰ੍ਹਾਂ ਦੀ ਕਾਰਵਾਈ ਕਰ ਸਕਦਾ ਹੈ।
ਤਕਨਾਲੋਜੀ ਦੀ ਦੁਨੀਆ ਵਿੱਚ ਇੱਕ ਵੱਡੀ ਹਲਚਲ ਮਚਾਉਂਦਿਆਂ, ਐਪਲ ਨੇ ਆਪਣੇ ਐਪ ਸਟੋਰ ਤੋਂ 135,000 ਤੋਂ ਵੱਧ ਐਪਸ ‘ਤੇ ਪਾਬੰਦੀ ਲਗਾ ਦਿੱਤੀ ਹੈ। ਇਹ ਕਦਮ ਯੂਰਪੀਅਨ ਯੂਨੀਅਨ (EU) ਵਿੱਚ ਡਿਜੀਟਲ ਸੇਵਾਵਾਂ ਐਕਟ (DSA) ਦੇ ਨਵੇਂ ਨਿਯਮਾਂ ਦੀ ਪਾਲਣਾ ਨੂੰ ਯਕੀਨੀ ਬਣਾਉਣ ਲਈ ਚੁੱਕਿਆ ਗਿਆ ਹੈ। ਇਸਨੂੰ ਹੁਣ ਤੱਕ ਐਪਸ ਨੂੰ ਹਟਾਉਣ ਦੀ ਸਭ ਤੋਂ ਵੱਡੀ ਕਾਰਵਾਈ ਮੰਨਿਆ ਜਾ ਰਿਹਾ ਹੈ।
ਕਿਉਂ ਹਟਾਏ ਗਏ 135,000 ਐਪਸ ?
ਐਪਲ ਨੇ ਇਨ੍ਹਾਂ ਐਪਸ ‘ਤੇ ਇਸ ਲਈ ਬੈਨ ਲਗਾਇਆ ਕਿਉਂਕਿ ਇਹ ਯੂਜ਼ਰਸ ਨੂੰ ਲੋੜੀਂਦੀ ਵਪਾਰੀ ਜਾਣਕਾਰੀ ਪ੍ਰਦਾਨ ਕਰਨ ਵਿੱਚ ਅਸਫਲ ਰਹੀਆਂ। ਨਵੇਂ EU ਨਿਯਮਾਂ ਦੇ ਤਹਿਤ, ਐਪ ਡਿਵੈਲਪਰਸ ਨੂੰ ਖਪਤਕਾਰਾਂ ਲਈ ਪਾਰਦਰਸ਼ਤਾ ਅਤੇ ਸੁਰੱਖਿਆ ਪ੍ਰਦਾਨ ਕਰਨ ਲਈ ਆਪਣਾ ਪਤਾ, ਫ਼ੋਨ ਨੰਬਰ ਅਤੇ ਈਮੇਲ ਜਾਣਕਾਰੀ ਪ੍ਰਦਾਨ ਕਰਨੀ ਹੋਵੇਗੀ। TechCrunch ਰਾਹੀਂ Appfigures ਦੇ ਅੰਕੜਿਆਂ ਅਨੁਸਾਰ, ਇਹ ਐਪ ਸਟੋਰ ਦੇ ਲਾਂਚ ਤੋਂ ਬਾਅਦ ਦਾ ਸਭ ਤੋਂ ਵੱਡਾ ਕਦਮ ਹੈ। ਐਪਲ ਨੇ ਆਪਣੀ ਅਧਿਕਾਰਤ ਵੈੱਬਸਾਈਟ ‘ਤੇ ਕਿਹਾ ਕਿ ਜਿਨ੍ਹਾਂ ਐਪਸ ਕੋਲ ਵਪਾਰੀ ਦਾ ਦਰਜਾ ਰਜਿਸਟਰਡ ਨਹੀਂ ਸੀ, ਉਨ੍ਹਾਂ ਨੂੰ ਹਟਾ ਦਿੱਤਾ ਗਿਆ ਹੈ।
EU ਡਿਜੀਟਲ ਸੇਵਾਵਾਂ ਐਕਟ ਦਾ ਅਸਰ
ਯੂਰਪੀਅਨ ਯੂਨੀਅਨ ਦੁਆਰਾ ਲਾਗੂ ਕੀਤੇ ਗਏ ਡਿਜੀਟਲ ਸੇਵਾਵਾਂ ਐਕਟ (DSA) ਦਾ ਉਦੇਸ਼ ਖਪਤਕਾਰਾਂ ਦੀ ਸੁਰੱਖਿਆ ਨੂੰ ਵਧਾਉਣਾ ਅਤੇ ਔਨਲਾਈਨ ਪਲੇਟਫਾਰਮਸ ਦੀ ਪਾਰਦਰਸ਼ਤਾ ਨੂੰ ਬਿਹਤਰ ਬਣਾਉਣਾ ਹੈ। ਇਹ ਨਿਯਮ ਅਗਸਤ 2023 ਵਿੱਚ ਅਸਥਾਈ ਤੌਰ ‘ਤੇ ਲਾਗੂ ਕੀਤਾ ਗਿਆ ਸੀ ਅਤੇ 17 ਫਰਵਰੀ, 2024 ਤੋਂ ਪੂਰੀ ਤਰ੍ਹਾਂ ਲਾਗੂ ਹੋ ਗਿਆ ਸੀ। DSA ਦੇ ਆਰਟੀਕਲ 30 ਅਤੇ 31 ਦੇ ਤਹਿਤ, ਐਪ ਡਿਵੈਲਪਰਸ ਨੂੰ EU ਵਿੱਚ ਉਪਭੋਗਤਾਵਾਂ ਨੂੰ ਆਪਣੀਆਂ ਐਪਾਂ ਜਾਂ ਐਪ ਅੱਪਡੇਟ ਪ੍ਰਦਾਨ ਕਰਨ ਲਈ ਆਪਣੀ ਵਪਾਰੀ ਜਾਣਕਾਰੀ ਸਾਂਝੀ ਕਰਨੀ ਹੋਵੇਗੀ।
Apple ਦੀ ਚੇਤਾਵਨੀ ਅਤੇ ਕਾਰਵਾਈ
ਐਪਲ ਨੇ ਪਹਿਲਾਂ ਹੀ ਡਿਵੈਲਪਰਸ ਨੂੰ ਚੇਤਾਵਨੀ ਦਿੱਤੀ ਸੀ ਕਿ ਜੇਕਰ ਉਨ੍ਹਾਂ ਨੇ 17 ਫਰਵਰੀ ਤੱਕ ਆਪਣੀ ਵਪਾਰੀ ਜਾਣਕਾਰੀ ਜਮ੍ਹਾਂ ਨਹੀਂ ਕਰਵਾਈ, ਤਾਂ ਉਨ੍ਹਾਂ ਦੀਆਂ ਐਪਸ ਨੂੰ ਐਪ ਸਟੋਰ ਤੋਂ ਹਟਾ ਦਿੱਤਾ ਜਾਵੇਗਾ। ਹੁਣ, ਇਸ ਚੇਤਾਵਨੀ ‘ਤੇ ਕਾਰਵਾਈ ਕਰਦੇ ਹੋਏ, ਕੰਪਨੀ ਨੇ ਹਜ਼ਾਰਾਂ ਐਪਸ ‘ਤੇ ਪਾਬੰਦੀ ਲਗਾ ਦਿੱਤੀ ਹੈ।
ਮੈਮਥ ਐਪ ਵੀ ਹਟਾਈ ਗਈ
ਐਪਲ ਦੀ ਇਸ ਕਾਰਵਾਈ ਨਾਲ ਕਈ ਮਸ਼ਹੂਰ ਐਪਸ ਵੀ ਪ੍ਰਭਾਵਿਤ ਹੋਏ ਹਨ, ਜਿਨ੍ਹਾਂ ਵਿੱਚ ਮੈਮਥ ਐਪ ਵੀ ਸ਼ਾਮਲ ਹੈ। ਇਹ ਐਪ ਟਵਿੱਟਰ ਦੇ ਵਿਕਲਪ ਵਜੋਂ ਉੱਭਰ ਰਹੀ ਸੀ, ਪਰ ਵਪਾਰੀ ਜਾਣਕਾਰੀ ਨਾ ਦੇਣ ਕਾਰਨ, ਇਸਨੂੰ ਵੀ ਐਪ ਸਟੋਰ ਤੋਂ ਵੀ ਹਟਾ ਦਿੱਤਾ ਗਿਆ।
ਇਹ ਵੀ ਪੜ੍ਹੋ
ਵਪਾਰੀ ਸੰਪਰਕ ਜਾਣਕਾਰੀ ਕੀ ਹੈ ਅਤੇ ਕਿਉਂ ਜਰੂਰੀ ਹੈ?
ਐਪਲ ਦੇ ਅਨੁਸਾਰ, ਵਪਾਰੀ ਸੰਪਰਕ ਜਾਣਕਾਰੀ ਵਿੱਚ ਹੇਠ ਲਿਖੇ ਵੇਰਵੇ ਸ਼ਾਮਲ ਹੁੰਦੇ ਹਨ:
ਕਾਰੋਬਾਰੀ ਪਤਾ ਜਾਂ ਪੀ.ਓ ਬਾਕਸ
ਫੋਨ ਨੰਬਰ
ਈਮੇਲ ਪਤਾ
ਐਪਲ ਦੇ ਨਵੇਂ ਨਿਯਮਾਂ ਦੇ ਤਹਿਤ, ਇਹ ਵੇਰਵੇ ਤਸਦੀਕ ਤੋਂ ਬਾਅਦ ਐਪ ਸਟੋਰ ‘ਤੇ ਪ੍ਰਕਾਸ਼ਿਤ ਕੀਤੇ ਜਾਣਗੇ, ਤਾਂ ਜੋ ਖਪਤਕਾਰ ਕਿਸੇ ਵੀ ਸ਼ੱਕ ਦੀ ਸੂਰਤ ਵਿੱਚ ਸਿੱਧੇ ਵਪਾਰੀ ਨਾਲ ਸੰਪਰਕ ਕਰ ਸਕਣ। ਇਹ ਪਾਰਦਰਸ਼ਤਾ ਨੂੰ ਯਕੀਨੀ ਬਣਾਉਣ ਅਤੇ ਉਪਭੋਗਤਾਵਾਂ ਨੂੰ ਧੋਖਾਧੜੀ ਤੋਂ ਬਚਾਉਣ ਲਈ ਜ਼ਰੂਰੀ ਹੈ।
ਨਿੱਜੀ ਅਤੇ ਸੰਗਠਨਾਤਮਕ ਐਪਸ ‘ਤੇ ਅਸਰ
ਨਿੱਜੀ ਅਤੇ ਸੰਗਠਨਾਤਮਕ ਐਪਸ ਲਈ ਵੱਖ-ਵੱਖ ਨਿਯਮ ਲਾਗੂ ਹੁੰਦੇ ਹਨ।
ਵਿਅਕਤੀਗਤ ਐਪ ਡਿਵੈਲਪਰਾਂ ਨੂੰ ਆਪਣੇ ਨਿੱਜੀ ਪਤੇ/ਪੀ.ਓ. ਬਾਕਸ, ਫ਼ੋਨ ਨੰਬਰ, ਅਤੇ ਈਮੇਲ ਪਤਾ ਜਮ੍ਹਾਂ ਕਰਵਾਉਣਾ ਲਾਜ਼ਮੀ ਹੈ
ਸੰਸਥਾਵਾਂ ਨੂੰ ਆਡੇਟਾ ਯੂਨੀਵਰਸਲ ਨੰਬਰਿੰਗ ਸਿਸਟਮ (DUNS) ਨੰਬਰ ਨਾਲ ਜੁੜੇ ਫੋਨ ਨੰਬਰ ,ਈਮੇਲ ਅਤੇ ਪਤੇ ਦੀ ਜਾਣਕਾਰੀ ਦੇਣੀ ਹੋਵੇਗੀ।
ਡਿਵੈਲਪਰਸ ਨੂੰ ਕੀ ਕਰਨਾ ਚਾਹੀਦਾ ਹੈ?
ਜਿਨ੍ਹਾਂ ਡਿਵੈਲਪਰਸ ਨੇ ਅਜੇ ਤੱਕ ਆਪਣੀ ਵਪਾਰੀ ਸਥਿਤੀ ਦਾ ਐਲਾਨ ਨਹੀਂ ਕੀਤਾ ਹੈ, ਉਨ੍ਹਾਂ ਨੂੰ ਜਲਦੀ ਤੋਂ ਜਲਦੀ ਲੋੜੀਂਦੀ ਜਾਣਕਾਰੀ ਜਮ੍ਹਾਂ ਕਰਾਉਣੀ ਚਾਹੀਦੀ ਹੈ, ਤਾਂ ਜੋ ਉਨ੍ਹਾਂ ਦੀਆਂ ਐਪਾਂ ਨੂੰ ਐਪ ਸਟੋਰ ‘ਤੇ ਦੁਬਾਰਾ ਸੂਚੀਬੱਧ ਕੀਤਾ ਜਾ ਸਕੇ।
ਐਪਲ ਵੱਲੋਂ ਚੁੱਕਿਆ ਗਿਆ ਇਹ ਵੱਡਾ ਕਦਮ ਇਹ ਸਪੱਸ਼ਟ ਕਰਦਾ ਹੈ ਕਿ ਕੰਪਨੀ ਨਵੇਂ EU ਨਿਯਮਾਂ ਦੀ ਪਾਲਣਾ ਕਰਨ ਲਈ ਪੂਰੀ ਤਰ੍ਹਾਂ ਵਚਨਬੱਧ ਹੈ। ਇਸ ਕਾਰਵਾਈ ਨੂੰ ਖਪਤਕਾਰਾਂ ਦੀ ਸੁਰੱਖਿਆ ਅਤੇ ਐਪ ਸਟੋਰ ਦੀ ਪਾਰਦਰਸ਼ਤਾ ਬਣਾਈ ਰੱਖਣ ਲਈ ਬਹੁਤ ਮਹੱਤਵਪੂਰਨ ਮੰਨਿਆ ਜਾ ਰਿਹਾ ਹੈ। ਹੁਣ ਇਹ ਦੇਖਣਾ ਦਿਲਚਸਪ ਹੋਵੇਗਾ ਕਿ ਹੋਰ ਤਕਨੀਕੀ ਕੰਪਨੀਆਂ ਇਸ ਦਿਸ਼ਾ ਵਿੱਚ ਕੀ ਕਦਮ ਚੁੱਕਦੀਆਂ ਹਨ ਅਤੇ ਆਉਣ ਵਾਲੇ ਸਮੇਂ ਵਿੱਚ ਐਪ ਈਕੋਸਿਸਟਮ ਵਿੱਚ ਕੀ ਬਦਲਾਅ ਆਉਂਦੇ ਹਨ।
