IPL 2024 ‘ਚੋਂ ਰਾਜਸਥਾਨ ਬਾਹਰ, 6 ਸਾਲ ਬਾਅਦ ਫਾਈਨਲ ‘ਚ ਪਹੁੰਚਿਆ ਹੈਦਰਾਬਾਦ, ਕੋਲਕਾਤਾ ਨਾਲ ਹੋਵੇਗੀ ਖਿਤਾਬੀ ਜੰਗ
Sunrisers Hyderabad vs Rajasthan Royals, Qualifier 2: ਆਈਪੀਐਲ 2024 ਦੇ ਦੂਜੇ ਕੁਆਲੀਫਾਇਰ ਵਿੱਚ ਸਨਰਾਈਜ਼ਰਜ਼ ਹੈਦਰਾਬਾਦ ਨੇ ਰਾਜਸਥਾਨ ਰਾਇਲਜ਼ ਨੂੰ ਹਰਾਇਆ। ਇਸ ਨਾਲ ਉਸ ਨੇ ਆਈਪੀਐਲ ਦੇ ਫਾਈਨਲ ਵਿੱਚ ਪ੍ਰਵੇਸ਼ ਕੀਤਾ। 26 ਮਈ ਨੂੰ ਹੈਦਰਾਬਾਦ ਅਤੇ ਕੋਲਕਾਤਾ ਵਿਚਾਲੇ ਖਿਤਾਬੀ ਮੁਕਾਬਲਾ ਹੋਵੇਗਾ।
IPL 2024 ਦੇ ਦੂਜੇ ਕੁਆਲੀਫਾਇਰ ਮੈਚ ਵਿੱਚ ਸਨਰਾਈਜ਼ਰਜ਼ ਹੈਦਰਾਬਾਦ ਨੇ ਸ਼ਾਨਦਾਰ ਪ੍ਰਦਰਸ਼ਨ ਕਰਦੇ ਹੋਏ ਰਾਜਸਥਾਨ ਰਾਇਲਜ਼ ਨੂੰ 36 ਦੌੜਾਂ ਨਾਲ ਹਰਾਇਆ। ਚੇਨਈ ਦੇ ਐੱਮ ਚਿਦੰਬਰਮ ਸਟੇਡੀਅਮ ‘ਚ ਖੇਡੇ ਗਏ ਨਾਕ ਆਊਟ ਮੈਚ ‘ਚ ਹੈਦਰਾਬਾਦ ਨੇ ਪਹਿਲਾਂ ਬੱਲੇਬਾਜ਼ੀ ਕਰਦੇ ਹੋਏ 20 ਓਵਰਾਂ ‘ਚ 175 ਦੌੜਾਂ ਬਣਾਈਆਂ। ਜਵਾਬ ਵਿੱਚ ਰਾਜਸਥਾਨ ਦੀ ਟੀਮ ਇਸ ਟੀਚੇ ਨੂੰ ਹਾਸਲ ਨਹੀਂ ਕਰ ਸਕੀ। ਇਸ ਨਾਲ ਸਨਰਾਈਜ਼ਰਜ਼ ਹੈਦਰਾਬਾਦ ਨੇ ਤੀਜੀ ਵਾਰ ਆਈਪੀਐਲ ਫਾਈਨਲ ਵਿੱਚ ਥਾਂ ਬਣਾਈ ਹੈ ਅਤੇ ਹੁਣ ਇਸ ਟੀਮ ਦਾ ਖ਼ਿਤਾਬੀ ਮੁਕਾਬਲਾ 26 ਮਈ ਨੂੰ ਕੋਲਕਾਤਾ ਨਾਈਟ ਰਾਈਡਰਜ਼ ਨਾਲ ਹੋਵੇਗਾ।
ਸਨਰਾਈਜ਼ਰਜ਼ ਹੈਦਰਾਬਾਦ ਦੀ ਜਿੱਤ ਦੇ ਹੀਰੋ ਸਨ ਹੇਨਰਿਕ ਕਲਾਸੇਨ, ਅਭਿਸ਼ੇਕ ਸ਼ਰਮਾ ਅਤੇ ਸ਼ਾਹਬਾਜ਼ ਅਹਿਮਦ। ਹੇਨਰਿਕ ਕਲਾਸੇਨ ਨੇ ਚੇਨਈ ਦੀ ਮੁਸ਼ਕਿਲ ਹਾਲਾਤਾਂ ‘ਚ 34 ਗੇਂਦਾਂ ‘ਚ 50 ਦੌੜਾਂ ਦੀ ਪਾਰੀ ਖੇਡੀ। ਉਸ ਦੇ ਬੱਲੇ ਤੋਂ ਚਾਰ ਛੱਕੇ ਲੱਗੇ। ਗੇਂਦਬਾਜ਼ੀ ‘ਚ ਸ਼ਾਹਬਾਜ਼ ਅਹਿਮਦ ਨੇ 4 ਓਵਰਾਂ ‘ਚ 23 ਦੌੜਾਂ ਦੇ ਕੇ 3 ਵਿਕਟਾਂ ਲਈਆਂ। ਬੱਲੇ ਨਾਲ ਤਬਾਹੀ ਮਚਾਉਣ ਵਾਲੇ ਅਭਿਸ਼ੇਕ ਸ਼ਰਮਾ ਨੇ 4 ਓਵਰਾਂ ‘ਚ 24 ਦੌੜਾਂ ਦੇ ਕੇ 2 ਅਹਿਮ ਵਿਕਟਾਂ ਲਈਆਂ।
ਨਾਕਾਮ ਰਹੀ ਰਾਜਸਥਾਨ ਦੀ ਬੱਲੇਬਾਜ਼ੀ
ਦੂਜੇ ਕੁਆਲੀਫਾਇਰ ਵਿੱਚ ਰਾਜਸਥਾਨ ਰਾਇਲਜ਼ ਦੀ ਬੱਲੇਬਾਜ਼ੀ ਨਾਕਾਮ ਰਹੀ। ਯਸ਼ਸਵੀ ਜੈਸਵਾਲ ਨੇ 21 ਗੇਂਦਾਂ ਵਿੱਚ 42 ਅਤੇ ਧਰੁਵ ਜੁਰੇਲ ਨੇ ਅਰਧ ਸੈਂਕੜਾ ਜੜਿਆ। ਇਨ੍ਹਾਂ ਦੋਵਾਂ ਤੋਂ ਇਲਾਵਾ ਕੋਈ ਵੀ ਬੱਲੇਬਾਜ਼ ਕੁਝ ਨਹੀਂ ਕਰ ਸਕਿਆ। ਸੰਜੂ ਸੈਮਸਨ ਸਿਰਫ਼ 10 ਦੌੜਾਂ ਹੀ ਬਣਾ ਸਕੇ। ਰਿਆਨ ਪਰਾਗ 6 ਦੌੜਾਂ ਬਣਾ ਸਕੇ। ਹੇਟਮਾਇਰ ਸਿਰਫ਼ 4 ਦੌੜਾਂ ਅਤੇ ਪਾਵੇਲ ਸਿਰਫ਼ 6 ਦੌੜਾਂ ਦਾ ਯੋਗਦਾਨ ਪਾ ਸਕਿਆ। ਰਾਜਸਥਾਨ ਦੀ ਟੀਮ 20 ਓਵਰਾਂ ਵਿੱਚ 139 ਦੌੜਾਂ ਹੀ ਬਣਾ ਸਕੀ।
ਰਾਜਸਥਾਨ ਦੀ ਹਾਰ ਦਾ ਵੱਡਾ ਕਾਰਨ
ਰਾਜਸਥਾਨ ਦੀ ਹਾਰ ਦਾ ਵੱਡਾ ਕਾਰਨ ਚੇਨਈ ਦਾ ਮੌਸਮ ਰਿਹਾ। ਦਰਅਸਲ, ਚੇਨਈ ਵਿੱਚ ਰਾਤ ਨੂੰ ਤ੍ਰੇਲ ਪੈਂਦੀ ਹੈ ਪਰ ਸ਼ੁੱਕਰਵਾਰ ਰਾਤ ਨੂੰ ਅਜਿਹਾ ਨਹੀਂ ਹੋਇਆ। ਤ੍ਰੇਲ ਦੀ ਘਾਟ ਕਾਰਨ ਚੇਨਈ ਦੀ ਪਿੱਚ ਹੌਲੀ ਹੋ ਗਈ ਅਤੇ ਬੱਲੇਬਾਜ਼ਾਂ ਲਈ ਸਪਿਨਰਾਂ ਦੇ ਖਿਲਾਫ ਦੌੜਾਂ ਬਣਾਉਣੀਆਂ ਮੁਸ਼ਕਲ ਹੋ ਗਈਆਂ। ਹੈਦਰਾਬਾਦ ਦੇ ਦੋ ਖੱਬੇ ਹੱਥ ਦੇ ਸਪਿਨਰਾਂ ਸ਼ਾਹਬਾਜ਼ ਅਹਿਮਦ ਅਤੇ ਅਭਿਸ਼ੇਕ ਸ਼ਰਮਾ ਨੇ ਮਿਲ ਕੇ 5 ਵਿਕਟਾਂ ਲਈਆਂ। ਸ਼ਾਹਬਾਜ਼ ਦਾ ਇਕਨਾਮੀ ਰੇਟ 5.6 ਰਿਹਾ, ਜਦੋਂ ਕਿ ਅਭਿਸ਼ੇਕ ਨੇ ਪ੍ਰਤੀ ਓਵਰ 6 ਦੌੜਾਂ ਖਰਚ ਕੀਤੀਆਂ। ਸੰਜੂ ਸੈਮਸਨ ਨੇ ਇਸ ਨੂੰ ਹਾਰ ਦਾ ਮੁੱਖ ਕਾਰਨ ਦੱਸਿਆ। ਸੈਮਸਨ ਨੇ ਮੰਨਿਆ ਕਿ ਮੱਧ ਓਵਰਾਂ ‘ਚ ਸਪਿਨਰਾਂ ਦੇ ਖਿਲਾਫ ਉਨ੍ਹਾਂ ਕੋਲ ਕੋਈ ਜਵਾਬ ਨਹੀਂ ਸੀ।
ਹੈਦਰਾਬਾਦ 6 ਸਾਲ ਬਾਅਦ IPL ਫਾਈਨਲ ‘ਚ
ਸਨਰਾਈਜ਼ਰਸ ਹੈਦਰਾਬਾਦ 6 ਸਾਲ ਬਾਅਦ ਫਾਈਨਲ ‘ਚ ਪਹੁੰਚੀ ਹੈ। 2018 ਵਿੱਚ, ਇਹ ਟੀਮ ਆਈਪੀਐਲ ਫਾਈਨਲ ਵਿੱਚ ਪਹੁੰਚੀ ਸੀ ਅਤੇ ਉਪ ਜੇਤੂ ਵਜੋਂ ਸੰਤੁਸ਼ਟ ਹੋਣਾ ਪਿਆ ਸੀ। ਇਸ ਤੋਂ ਬਾਅਦ ਇਹ ਟੀਮ 2019 ਅਤੇ 2020 ਵਿੱਚ ਪਲੇਆਫ ਵਿੱਚ ਪਹੁੰਚੀ। ਇਸ ਤੋਂ ਬਾਅਦ ਟੀਮ ਨੂੰ ਲਗਾਤਾਰ 3 ਸਾਲ ਲੀਗ ਪੜਾਅ ‘ਤੇ ਹੀ ਸਬਰ ਕਰਨਾ ਪਿਆ। ਹੁਣ ਅਸਫਲਤਾਵਾਂ ਦੀ ਹੈਟ੍ਰਿਕ ਤੋਂ ਬਾਅਦ ਹੈਦਰਾਬਾਦ ਦੀ ਟੀਮ ਫਾਈਨਲ ‘ਚ ਪਹੁੰਚ ਗਈ ਹੈ। ਸਨਰਾਈਜ਼ਰਸ ਹੈਦਰਾਬਾਦ ਨੇ 2016 ਵਿੱਚ ਆਈਪੀਐਲ ਜਿੱਤੀ ਸੀ ਅਤੇ ਹੁਣ ਉਸ ਕੋਲ ਇੱਕ ਹੋਰ ਟਰਾਫੀ ਜਿੱਤਣ ਦਾ ਮੌਕਾ ਹੈ।
