ਸੰਜੂ ਸੈਮਸਨ ਨੇ ਜੜਿਆ ਤੂਫਾਨੀ ਸੈਂਕੜਾ, MS ਧੋਨੀ ਨੂੰ ਛੱਡਿਆ ਪਿੱਛੇ

Sanju Samson: ਭਾਰਤ ਅਤੇ ਦੱਖਣੀ ਅਫਰੀਕਾ ਵਿਚਾਲੇ 4 ਮੈਚਾਂ ਦੀ ਟੀ-20 ਸੀਰੀਜ਼ ਦਾ ਪਹਿਲਾ ਮੈਚ ਡਰਬਨ ਦੇ ਕਿੰਗਸਮੀਡ ਕ੍ਰਿਕਟ ਸਟੇਡੀਅਮ ‘ਚ ਖੇਡਿਆ ਜਾ ਰਿਹਾ ਹੈ। ਟਾਸ ਹਾਰ ਕੇ ਪਹਿਲਾਂ ਬੱਲੇਬਾਜ਼ੀ ਕਰਨ ਆਏ ਸਲਾਮੀ ਬੱਲੇਬਾਜ਼ ਸੰਜੂ ਸੈਮਸਨ ਨੇ ਟੀਮ ਇੰਡੀਆ ਨੂੰ ਸ਼ਾਨਦਾਰ ਸ਼ੁਰੂਆਤ ਦਿੱਤੀ। ਸੰਜੂ ਸੈਮਸਨ ਨੂੰ ਹਾਲ ਹੀ ਵਿੱਚ ਓਪਨਿੰਗ ਦੀ ਜ਼ਿੰਮੇਵਾਰੀ ਦਿੱਤੀ ਗਈ ਹੈ ਅਤੇ ਉਹ ਭਰੋਸੇ ‘ਤੇ ਖਰੇ ਉਤਰੇ ਹਨ। ਉਨ੍ਹਾਂ ਨੇ ਦੱਖਣੀ ਅਫਰੀਕਾ ਖਿਲਾਫ ਇਸ ਮੈਚ ‘ਚ ਸ਼ਾਨਦਾਰ ਬੱਲੇਬਾਜ਼ੀ ਕੀਤੀ ਅਤੇ ਖਾਸ ਸੂਚੀ ‘ਚ ਐੱਮਐੱਸ ਧੋਨੀ ਨੂੰ ਪਿੱਛੇ ਛੱਡ ਦਿੱਤਾ।

ਇਸ ਮੈਚ ਵਿੱਚ ਸੰਜੂ ਸੈਮਸਨ ਨੇ 27 ਗੇਂਦਾਂ ਵਿੱਚ 50 ਦੌੜਾਂ ਦਾ ਅੰਕੜਾ ਛੂਹਿਆ ਅਤੇ ਫਿਰ 47 ਗੇਂਦਾਂ ਵਿੱਚ ਆਪਣਾ ਸੈਂਕੜਾ ਪੂਰਾ ਕੀਤਾ। ਉਨ੍ਹਾਂ ਨੇ 50 ਗੇਂਦਾਂ ‘ਤੇ ਕੁੱਲ 107 ਦੌੜਾਂ ਬਣਾਈਆਂ। ਇਸ ਦੌਰਾਨ ਸੰਜੂ ਸੈਮਸਨ ਨੇ 7 ਚੌਕੇ ਅਤੇ 10 ਛੱਕੇ ਲਗਾਏ। ਤੁਹਾਨੂੰ ਦੱਸ ਦੇਈਏ ਕਿ ਸੰਜੂ ਸੈਮਸਨ ਦੇ ਟੀ-20 ਕਰੀਅਰ ਦਾ ਇਹ ਦੂਜਾ ਸੈਂਕੜਾ ਹੈ। ਸੰਜੂ ਸੈਮਸਨ ਨੇ ਆਪਣੇ ਟੀ-20 ਕਰੀਅਰ ਦੌਰਾਨ ਕੁੱਲ 3 ਵਾਰ ਵਿਕਟਕੀਪਰ ਵਜੋਂ 50+ ਦੌੜਾਂ ਬਣਾਈਆਂ ਹਨ। ਇਸ ਨਾਲ ਵਿਕਟਕੀਪਰਾਂ ਦੀ ਸੂਚੀ ਵਿੱਚ ਐਮਐਸ ਧੋਨੀ ਨੂੰ ਪਿੱਛੇ ਛੱਡ ਦਿੱਤਾ ਹੈ। ਦਰਅਸਲ, ਇੱਕ ਵਿਕਟਕੀਪਰ ਦੇ ਰੂਪ ਵਿੱਚ, ਐਮਐਸ ਧੋਨੀ ਨੇ ਟੀ-20 ਵਿੱਚ ਦੋ ਵਾਰ 50+ ਦੌੜਾਂ ਬਣਾਈਆਂ ਸਨ। ਇਸ ਦੇ ਨਾਲ ਹੀ ਸੰਜੂ ਸੈਮਸਨ ਨੇ ਹੁਣ ਇੱਕ ਵਿਕਟਕੀਪਰ ਵਜੋਂ ਟੀ-20 ਵਿੱਚ ਤਿੰਨ 50+ ਸਕੋਰ ਬਣਾਏ ਹਨ।

ਸੰਜੂ ਸੈਮਸਨ ਹੁਣ ਭਾਰਤ ਲਈ ਵਿਕਟਕੀਪਰ ਵਜੋਂ ਟੀ-20 ਵਿੱਚ ਸਭ ਤੋਂ ਵੱਧ 50+ ਸਕੋਰ ਬਣਾਉਣ ਦੇ ਮਾਮਲੇ ਵਿੱਚ ਈਸ਼ਾਨ ਕਿਸ਼ਨ ਦੇ ਨਾਲ ਸਾਂਝੇ ਤੌਰ ‘ਤੇ ਪਹਿਲੇ ਸਥਾਨ ‘ਤੇ ਪਹੁੰਚ ਗਿਆ ਹੈ। ਈਸ਼ਾਨ ਕਿਸ਼ਨ ਨੇ ਵੀ ਇੱਕ ਵਿਕਟਕੀਪਰ ਦੇ ਤੌਰ ‘ਤੇ ਭਾਰਤ ਲਈ ਟੀ-20 ਵਿੱਚ ਤਿੰਨ ਵਾਰ 50 ਤੋਂ ਵੱਧ ਦੌੜਾਂ ਬਣਾਈਆਂ ਹਨ। ਜਦਕਿ ਕੇਐਲ ਰਾਹੁਲ, ਰਿਸ਼ਭ ਪੰਤ ਅਤੇ ਧੋਨੀ ਨੇ 2-2 ਵਾਰ ਇਹ ਉਪਲਬਧੀ ਹਾਸਲ ਕੀਤੀ ਹੈ। ਅਜਿਹੇ ‘ਚ ਸੰਜੂ ਸੈਮਸਨ ਕੋਲ ਹੁਣ ਇਸ ਸੀਰੀਜ਼ ਦੌਰਾਨ ਇਸ ਖਾਸ ਸੂਚੀ ‘ਚ ਸਾਰੇ ਭਾਰਤੀ ਵਿਕਟਕੀਪਰਾਂ ਨੂੰ ਪਿੱਛੇ ਛੱਡਣ ਦਾ ਮੌਕਾ ਹੋਵੇਗਾ।

ਅਜਿਹਾ ਕਰਨ ਵਾਲੇ ਦੂਜੇ ਭਾਰਤੀ ਵਿਕਟਕੀਪਰ

ਤੁਹਾਨੂੰ ਦੱਸ ਦੇਈਏ ਕਿ ਸੰਜੂ ਸੈਮਸਨ ਦੱਖਣੀ ਅਫਰੀਕਾ ਵਿੱਚ ਟੀ-20 ਵਿੱਚ 50 ਦੌੜਾਂ ਦੇ ਅੰਕੜੇ ਨੂੰ ਛੂਹਣ ਵਾਲੇ ਭਾਰਤ ਦੇ ਦੂਜੇ ਵਿਕਟਕੀਪਰ ਹਨ। ਇਸ ਤੋਂ ਪਹਿਲਾਂ ਧੋਨੀ ਨੇ ਸਾਲ 2018 ‘ਚ ਦੱਖਣੀ ਅਫਰੀਕਾ ‘ਚ ਇਹ ਉਪਲੱਬਧੀ ਹਾਸਲ ਕੀਤੀ ਸੀ। ਯਾਨੀ ਕਿ 6 ਸਾਲ ਬਾਅਦ ਕਿਸੇ ਭਾਰਤੀ ਵਿਕਟਕੀਪਰ ਨੇ ਦੱਖਣੀ ਅਫਰੀਕਾ ‘ਚ ਟੀ-20 ਫਾਰਮੈਟ ‘ਚ ਅਰਧ ਸੈਂਕੜਾ ਲਗਾਇਆ ਹੈ। ਸੰਜੂ ਸੈਮਸਨ ਦੇ ਟੀ-20 ਕਰੀਅਰ ਦਾ ਇਹ 34ਵਾਂ ਮੈਚ ਹੈ ਪਰ ਵਿਕਟਕੀਪਰ ਦੇ ਤੌਰ ‘ਤੇ ਇਹ ਉਨ੍ਹਾਂ ਦਾ ਸਿਰਫ 15ਵਾਂ ਮੈਚ ਹੈ।