ਜੇਲ੍ਹ ਵਾਪਸੀ ਤੋਂ ਇੱਕ ਦਿਨ ਪਹਿਲਾਂ ਰਾਮ ਰਹੀਮ ਨੇ ਡੇਰੇ ਦੇ ਨਵੇਂ ਲੁੱਕ ਦਾ ਕੀਤਾ ਉਦਘਾਟਨ, ਹਨੀਪ੍ਰੀਤ ਵੀ ਰਹੀ ਮੌਜੂਦ

ਰਾਮ ਰਹੀਮ ਨੇ ਹਨੀਪ੍ਰੀਤ ਨਾਲ ਡੇਰੇ ਦੇ ਨਵੇਂ ਲੁੱਕ ਦਾ ਕੀਤਾ ਉਦਘਾਟਨ, ਅੱਜ ਹੋ ਰਹੀ ਜੇਲ੍ਹ ਵਾਪਸੀ

ਸਿਰਸਾ ਦੇ ਡੇਰਾ ਸੱਚਾ ਸੌਦਾ ਦਾ ਮੁਖੀ ਗੁਰਮੀਤ ਰਾਮ ਰਹੀਮ ਨੇ ਆਪਣੀ 30 ਦਿਨਾਂ ਦੀ ਪੈਰੋਲ ਖ਼ਤਮ ਹੋਣ ਤੋਂ ਇੱਕ ਦਿਨ ਪਹਿਲਾਂ ਹੀ ਰੈਨੋਵੇਟ (ਮੁਰੰਮਤ, ਨਵੀਨੀਕਰਣ) ਕੀਤੇ ਪੁਰਾਣੇ ਡੇਰਾ ਕੰਪਲੈਕਸ ਦਾ ਉਦਘਾਟਨ ਕੀਤਾ। ਇਸ ਸਮਾਗਮ ਦੌਰਾਨ, ਰਾਮ ਰਹੀਮ ਆਪਣੇ ਸ਼ਰਧਾਲੂਆਂ ਨਾਲ ਸ਼ਾਮਲ ਹੋਇਆ। ਉਸ ਦੇ ਨਾਲ ਗੋਦ ਲਈ ਧੀ, ਹਨੀਪ੍ਰੀਤ ਵੀ ਮੌਜੂਦ ਰਹੀ। ਹਨੀਪ੍ਰੀਤ ਲੰਬੇ ਸਮੇਂ ਬਾਅਦ ਰਾਮ ਰਹੀਮ ਨਾਲ ਦਿਖਾਈ ਦਿੱਤੀ।

ਹਨੀਪ੍ਰੀਤ ਪੂਰੇ ਪ੍ਰੋਗਰਾਮ ਦੌਰਾਨ ਸਭ ਤੋਂ ਅੱਗੇ ਦਿਖਾਈ ਦਿੱਤੀ। ਦੂਜੇ, ਪਾਸੇ ਪੈਰੋਲ ‘ਤੇ ਰਿਹਾਈ ਤੋਂ ਬਾਅਦ ਰਾਮ ਰਹੀਮ ਦੀ ਪਹਿਲੀ ਜਨਤਕ ਐਂਟਰੀ ਸੀ। ਪਹਿਲਾਂ, ਉਹ ਡੇਰਾ ਕੰਪਲੈਕਸ ਦੇ ਅੰਦਰ ਹੀ ਰਹਿੰਦਾ ਸੀ ਤੇ ਆਪਣੀ ਪੈਰੋਲ ਦੀ ਮਿਆਦ ਦੌਰਾਨ ਵੀਡੀਓ ਸੰਦੇਸ਼ਾਂ ਰਾਹੀਂ ਪੈਰੋਕਾਰਾਂ ਨੂੰ ਉਪਦੇਸ਼ ਦਿੰਦਾ ਸੀ।

ਪੁਰਾਣੇ ਡੇਰਾ ਕੰਪਲੈਕਸ ਨੂੰ ਨਵਾਂ ਰੂਪ ਮਿਲਿਆ

ਨਵੀਨੀਕਰਣ ਕਰਦੇ ਹੋਏ ਡੇਰਾ ਕੰਪਲੈਕਸ ‘ਚ ਕਈ ਨਵੀਆਂ ਸਹੂਲਤਾਂ ਜੋੜੀਆਂ ਗਈਆਂ ਹਨ। ਇਸ ਤਹਿਤ ਤਿੰਨ ਸ਼ਾਨਦਾਰ ਪ੍ਰਵੇਸ਼ ਦੁਆਰ ਬਣਾਏ ਗਏ ਹਨ, ਜਿਨ੍ਹਾਂ ‘ਚ ਹਾਥੀ ਦੀਆਂ ਮੂਰਤੀਆ ਲਗਾਈਆਂ ਗਈਆਂ ਹਨ। ਸ਼ਰਧਾਲੂਆਂ ਦੇ ਰਹਿਣ ਲਈ ਇੱਕ ਹੋਟਲ ਬਣਾਇਆ ਗਿਆ ਹੈ ਤੇ ਕੰਪਲੈਕਸ ਦੇ ਨੇੜੇ ਇੱਕ ਆਧੁਨਿਕ ਕੰਟੀਨ ਬਣਾਈ ਗਈ ਹੈ। ਹਾਲਾਂਕਿ, ਉਸਾਰੀ ਦਾ ਕੰਮ ਅਜੇ ਪੂਰੀ ਤਰ੍ਹਾਂ ਪੂਰਾ ਨਹੀਂ ਹੋਇਆ ਹੈ, ਪਰ ਕੰਪਲੈਕਸ ਸ਼ਰਧਾਲੂਆਂ ਲਈ ਖੋਲ੍ਹ ਦਿੱਤਾ ਗਿਆ ਹੈ।

ਅੱਜ ਸੁਨਾਰੀਆ ਜੇਲ੍ਹ ‘ਚ ਵਾਪਸੀ

ਗੁਰਮੀਤ ਰਾਮ ਰਹੀਮ ਨੂੰ 26 ਮਈ, 2026 ਨੂੰ ਰੋਹਤਕ ਦੀ ਸਨਾਰੀਆ ਜੇਲ੍ਹ ਤੋਂ 30 ਦਿਨਾਂ ਦੀ ਪੈਰੋਲ ‘ਤੇ ਰਿਹਾਅ ਕੀਤਾ ਗਿਆ ਸੀ। ਜੇਲ੍ਹ ਤੋਂ ਰਾਮ ਰਹੀਮ ਸਿੱਧਾ ਸਿਰਸਾ ਡੇਰੇ ਪਹੁੰਚਿਆ ਤੇ ਉਦੋਂ ਤੋਂ ਉਸਾਰੀ ਦੇ ਕੰਮ ਦੀ ਨਿਗਰਾਨੀ ਕਰ ਰਿਹਾ ਸੀ। ਹੁਣ ਪੈਰੋਲ ਖ਼ਤਮ ਹੋਣ ਦੇ ਨਾਲ ਅੱਜ ਉਸ ਨੂੰ ਸੁਨਾਰੀਆ ਜੇਲ੍ਹ ਵਾਪਸ ਲਿਆਂਦਾ ਜਾਵੇਗਾ।

ਪੈਰੋਲ ਦੌਰਾਨ ਨਿਰਮਾਣ ਕਾਰਜ ਦੀ ਨਿੱਜੀ ਤੌਰ ‘ਤੇ ਨਿਗਰਾਨੀ

26 ਮਈ, 2026 ਨੂੰ 30 ਦਿਨਾਂ ਦੀ ਪੈਰੋਲ ‘ਤੇ ਜੇਲ੍ਹ ਤੋਂ ਰਿਹਾਅ ਹੋਣ ਤੋਂ ਬਾਅਦ ਰਾਮ ਰਹੀਮ ਨੇ ਪੁਰਾਣੇ ਡੇਰਾ ਕੰਪਲੈਕਸ ‘ਚ ਨਵੀਨੀਕਰਨ ਦੇ ਕੰਮ ਨੂੰ ਤੇਜ਼ ਕੀਤਾ। ਉਸ ਨੇ ਨਿੱਜੀ ਤੌਰ ‘ਤੇ ਸਾਰੀ ਉਸਾਰੀ ਪ੍ਰਕਿਰਿਆ ਦੀ ਨਿਗਰਾਨੀ ਕੀਤੀ। ਇਸ ਸਮੇਂ ਦੌਰਾਨ ਨਿਰਮਾਣ ਕਾਰਜ ਦੇ ਆਲੇ-ਦੁਆਲੇ ਸਕ੍ਰੀਨਾਂ ਲਗਾਈਆਂ ਗਈਆਂ ਸਨ, ਤੇ ਸ਼ਰਧਾਲੂਆਂ ਨੂੰ ਮੋਬਾਈਲ ਫੋਨ ਦੀ ਵਰਤੋਂ ਕਰਕੇ ਫੋਟੋਆਂ ਜਾਂ ਵੀਡੀਓ ਲੈਣ ਤੋਂ ਵਰਜਿਤ ਕੀਤਾ ਗਿਆ ਸੀ।

ਸ਼ਾਹ ਮਸਤਾਨਾ ਦੇ ਸਮੇਂ ਬਣਾਇਆ ਗਿਆ ਪੁਰਾਣਾ ਡੇਰਾ

ਪੁਰਾਣਾ ਡੇਰਾ ਕੰਪਲੈਕਸ ਅਸਲ ‘ਚ ਸ਼ਾਹ ਮਸਤਾਨਾ ਦੇ ਸਮੇਂ ਬਣਾਇਆ ਗਿਆ ਸੀ। ਬਾਅਦ ‘ਚ, ਸ਼ਾਹ ਸਤਨਾਮ ਵੀ ਇਸ ਕੰਪਲੈਕਸ ਨਾਲ ਜੁੜੇ ਰਹੇ। ਰਾਮ ਰਹੀਮ ਦੇ ਮੁਖੀ ਬਣਨ ਤੋਂ ਬਾਅਦ ਥੋੜ੍ਹੀ ਦੂਰੀ ‘ਤੇ ਇੱਕ ਨਵਾਂ ਡੇਰਾ ਕੰਪਲੈਕਸ ਬਣਾਇਆ ਗਿਆ। ਹਾਲਾਂਕਿ, ਰਾਮ ਰਹੀਮ ਦੀ ਕੈਦ ਤੋਂ ਬਾਅਦ,ਪੁਰਾਣਾ ਡੇਰਾ ਇੱਕ ਵਾਰ ਫਿਰ ਪੈਰੋਕਾਰਾਂ ਲਈ ਇੱਕ ਕੇਂਦਰ ਬਣ ਗਿਆ।