ਸਰਹਿੰਦ ਨਹਿਰ ‘ਚ ਡਿੱਗੀ ਕਾਰ ‘ਚ ਸਵਾਰ ਪਤੀ-ਪਤਨੀ ਲਾਪਤਾ, NDRF ਦਾ ਸਰਚ ਆਪ੍ਰੇਸ਼ਨ
ਜਾਣਕਾਰੀ ਮੁਤਾਬਕ ਨਹਿਰ ਡੁੱਬਣ ਵਾਲੇ ਪਤੀ-ਪਤਨੀ ਫਿੱਡੇ ਕਲਾ ਰਿਸ਼ਤੇਦਾਰੀ 'ਚ ਆਏ ਸਨ ਤੇ ਘਰ ਵਾਪਸੀ ਦੌਰਾਨ ਇਹ ਹਾਦਸਾ ਵਾਪਰ ਗਿਆ। ਕਾਰ 'ਚ ਡੁੱਬਣ ਵਾਲਾ ਨੌਜਵਾਨ ਬਲਜੀਤ ਸਿੰਘ ਫੌਜ 'ਚ ਸੇਵਾ ਨਿਭਾ ਰਿਹਾ ਹੈ ਤੇ ਛੁੱਟੀ 'ਤੇ ਘਰ ਆਇਆ ਹੋਇਆ। ਉਸ ਨੇ ਇੱਕ ਦਿਨ ਬਾਅਦ ਵਾਪਸ ਡਿਊਟੀ 'ਤੇ ਜਾਣਾ ਸੀ, ਪਰ ਇਹ ਹਾਦਸਾ ਵਾਪਰ ਗਿਆ।
ਕੱਲ੍ਹ ਦੇਰ ਸ਼ਾਮ ਫਰੀਦਕੋਟ ਦੇ ਪਿੰਡ ਫਿੱਡੇ ਕਲਾ ਕੋਲ ਇੱਕ ਆਲਟੋ ਕਾਰ ਸਰਹਿੰਦ ਨਹਿਰ ‘ਚ ਡਿੱਗ ਗਈ। ਇਸ ਕਾਰ ‘ਚ ਪਤੀ-ਪਤਨੀ ਸਵਾਰ ਸਨ, ਜਿਨ੍ਹਾਂ ਦੀ ਪਹਿਚਾਣ ਪਤੀ ਬਲਜੀਤ ਸਿੰਘ ਤੇ ਉਸ ਦੀ ਪਤਨੀ ਮਨਦੀਪ ਕੌਰ (ਨਿਵਾਸੀ ਸਾਧਾਵਾਲਾ, ਫਰੀਦਕੋਟ) ਵਜੋਂ ਹੋਈ ਹੈ।
ਜਿਸ ਵੇਲੇ ਇਹ ਹਾਦਸਾ ਹੋਇਆ ਤਾਂ ਮੌਕੇ ‘ਤੇ ਮੌਜੂਦ ਲੋਕਾਂ ਨੇ ਨਜ਼ਦੀਕੀ ਪਿੰਡ ਦੇ ਲੋਕਾਂ ਨੂੰ ਜਾਣਕਾਰੀ ਦਿੱਤੀ। ਲੋਕ ਇਕੱਠੇ ਹੇ ਗਏ, ਪਰ ਉਸ ਸਮੇਂ ਤੱਕ ਪਾਣੀ ਦੇ ਤੇਜ਼ ਵਹਾਅ ਦੇ ਚੱਲਦੇ ਕਾਰ ਨਹਿਰ ‘ਚ ਡੁੱਬ ਗਈ ਤੇ ਕਾਰ ‘ਚ ਸਵਾਰ ਪਤੀ-ਪਤਨੀ ਲਾਪਤਾ ਹੋ ਗਏ।
NDRF ਦੀ ਟੀਮ ਕਰ ਰਹੀ ਸਰਚ ਆਪ੍ਰੇਸ਼ਨ
ਸੂਚਨਾ ਮਿਲਣ ‘ਤੇ ਪੰਜਾਬ ਪੁਲਿਸ ਦੀ ਟੀਮ ਵੀ ਮੌਕੇ ‘ਤੇ ਪੁਹੁੰਚੀ, ਪਰ ਕਾਰ ਸਬੰਧੀ ਕੋਈ ਜਾਣਕਾਰੀ ਨਾ ਮਿਲੀ। ਜਿਸ ਤੋਂ ਬਾਅਦ NDRF ਦੀ ਟੀਮ ਨੂੰ ਬੁਲਾਇਆ ਗਿਆ, ਜੋ ਰਾਤ ਕਰੀਬ ਤਿੰਨ ਘੰਟੇ ਕਾਰ ਦੀ ਤਲਾਸ਼ ਕਰਦੀ ਰਹੀ। ਪਰ ਕਾਰ ਦਾ ਕੋਈ ਪਤਾ ਨਹੀਂ ਲੱਗਾ ਤੇ ਅੱਜ ਮੁੜ ਸਰਚ ਆਪ੍ਰੇਸ਼ਨ ਜਾਰੀ ਕਰ ਕਾਰ ਦੀ ਤਲਾਸ਼ ਕੀਤੀ ਜਾ ਰਹੀ ਹੈ ।
ਡੁੱਬਣ ਵਾਲਾ ਨੌਜਵਾਨ ਸੀ ਫੌਜੀ, ਇੱਕ ਦਿਨ ਬਾਅਦ ਵਾਪਸ ਜਾਣਾ ਸੀ ਡਿਊਟੀ
ਜਾਣਕਾਰੀ ਮੁਤਾਬਕ ਨਹਿਰ ਡੁੱਬਣ ਵਾਲੇ ਪਤੀ-ਪਤਨੀ ਫਿੱਡੇ ਕਲਾ ਰਿਸ਼ਤੇਦਾਰੀ ‘ਚ ਆਏ ਸਨ ਤੇ ਘਰ ਵਾਪਸੀ ਦੌਰਾਨ ਇਹ ਹਾਦਸਾ ਵਾਪਰ ਗਿਆ। ਕਾਰ ‘ਚ ਡੁੱਬਣ ਵਾਲਾ ਨੌਜਵਾਨ ਬਲਜੀਤ ਸਿੰਘ ਫੌਜ ‘ਚ ਸੇਵਾ ਨਿਭਾ ਰਿਹਾ ਹੈ ਤੇ ਛੁੱਟੀ ‘ਤੇ ਘਰ ਆਇਆ ਹੋਇਆ ਸੀ। ਉਸ ਨੇ ਇੱਕ ਦਿਨ ਬਾਅਦ ਵਾਪਸ ਡਿਊਟੀ ‘ਤੇ ਜਾਣਾ ਸੀ, ਪਰ ਇਹ ਹਾਦਸਾ ਵਾਪਰ ਗਿਆ।
ਨਹਿਰ ਦੀ ਕਿਨਾਰੇ ਸੜਕ ਦੀ ਖ਼ਰਾਬ ਹਾਲਤ, ਨਹਿਰ ਪੱਕੀ ਕਰਨ ਦਾ ਚੱਲ ਰਿਹਾ ਸੀ ਕੰਮ
ਸਥਾਨਕ ਲੋਕਾਂ ਦਾ ਕਹਿਣਾ ਹੈ ਕਿ ਨਹਿਰ ਦੇ ਕਿਨਾਰੇ ਸੜਕ ਦੀ ਹਾਲਤ ਬਹੁੱਤ ਖ਼ਰਾਬ ਹੈ ਤੇ ਦੂਜੇ ਪਾਸੇ ਬੀਤੇ ਦਿਨੀਂ ਨਹਿਰ ਨੂੰ ਪੱਕਾ ਕਰਨ ਦਾ ਕੰਮ ਚੱਲ ਰਿਹਾ ਸੀ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਨਹਿਰ ਦੇ ਕਿਨਾਰਿਆਂ ਨੂੰ ਸਹੀ ਢੰਗ ਨਾਲ ਨਹੀਂ ਬਣਾਇਆ ਗਿਆ ਸੀ, ਜਿਸ ਦੇ ਕਾਰਨ ਹੀ ਇਹ ਹਾਦਸਾ ਵਾਪਰ ਗਿਆ। ਸਥਾਨਕ ਲੋਕਾਂ ਨੇ ਮੰਗ ਕੀਤੀ ਹੈ ਕਿ ਨਹਿਰ ਦੇ ਕਿਨਾਰਿਆਂ ਦੇ ਨਾਲ-ਨਾਲ ਚਾਰ ਤੋਂ ਪੰਜ ਫੁੱਟ ਉੱਚੀ ਫੈਂਸਿੰਗ ਬਣਾਈ ਜਾਵੇ ਤਾਂ ਜੋ ਅਜਿਹੇ ਹਾਦਸੇ ਨਾ ਵਾਪਰਨ।
