Chandigarh Hockey Player Murder: ਭੂਆ ਦੇ ਮੁੰਡੇ ਨੇ ਚਾਕੂ ਮਾਰ ਕੇ ਕੀਤਾ ਮਹਿਲਾ ਹਾਕੀ ਖਿਡਾਰੀ ਦਾ ਕਤਲ, ਚੰਡੀਗੜ੍ਹ ਵਿੱਚ ਖੂਨੀ ਖੇਡ
ਚੰਡੀਗੜ੍ਹ ਦੇ ਸੈਕਟਰ 38 ਵਿੱਚ, ਰਾਜ ਪੱਧਰੀ ਹਾਕੀ ਖਿਡਾਰਨ ਤਾਨੀਆ ਦੀ ਉਸਦੇ ਭੂਆ ਦੇ ਮੁੰਡੇ ਨੇ ਚਾਕੂ ਮਾਰ ਕੇ ਹੱਤਿਆ ਕਰ ਦਿੱਤੀ। ਤਾਨੀਆ ਅੱਜ ਇੱਕ ਟੂਰਨਾਮੈਂਟ ਵਿੱਚ ਖੇਡਣ ਵਾਲੀ ਸੀ ਅਤੇ ਉਹ ਰਾਸ਼ਟਰੀ ਪੱਧਰ ਦੀ ਤਿਆਰੀ ਕਰ ਰਹੀ ਸੀ। ਪੁਲਿਸ ਨੇ ਛੇ ਲੋਕਾਂ ਵਿਰੁੱਧ ਮਾਮਲਾ ਦਰਜ ਕਰਕੇ ਮੁਲਜ਼ਮਾਂ ਦੀ ਭਾਲ ਸ਼ੁਰੂ ਕਰ ਦਿੱਤੀ ਹੈ।
ਚੰਡੀਗੜ੍ਹ ਦੇ ਸੁੰਦਰ ਸ਼ਹਿਰ ਸੈਕਟਰ 38 ਤੋਂ ਇੱਕ ਦਿਲ ਦਹਿਲਾ ਦੇਣ ਵਾਲੀ ਖ਼ਬਰ ਸਾਹਮਣੇ ਆਈ ਹੈ। ਰਾਜ ਪੱਧਰੀ ਮਹਿਲਾ ਹਾਕੀ ਖਿਡਾਰਨ ਤਾਨੀਆ ਦਾ ਨਿੱਜੀ ਝਗੜੇ ਵਿੱਚ ਚਾਕੂ ਮਾਰ ਕੇ ਕਤਲ ਕਰ ਦਿੱਤਾ ਗਿਆ। ਦੋਸ਼ੀ ਤਾਨੀਆ ਦੇ ਭੂਆ ਦਾ ਮੁੰਡਾ ਹੈ। ਤਾਨੀਆ ਸ਼ੁੱਕਰਵਾਰ ਨੂੰ ਇੱਕ ਮਹੱਤਵਪੂਰਨ ਟੂਰਨਾਮੈਂਟ ਵਿੱਚ ਖੇਡਣ ਵਾਲੀ ਸੀ, ਪਰ ਮੈਦਾਨ ‘ਤੇ ਉਤਰਨ ਤੋਂ ਪਹਿਲਾਂ ਹੀ ਉਸਦੀ ਹੱਤਿਆ ਕਰ ਦਿੱਤੀ ਗਈ।
ਪੁਲਿਸ ਜਾਂਚ ਦੇ ਅਨੁਸਾਰ, ਇਹ ਪੂਰੀ ਘਟਨਾ ਘਰ ਦੀ ਮਾਲਕੀ ਨੂੰ ਲੈ ਕੇ ਹੋਏ ਝਗੜੇ ਕਾਰਨ ਹੋਈ ਹੈ। ਤਾਨੀਆ ਦੇ ਪਿਤਾ, ਰਵੀ, ਪੇਸ਼ੇ ਤੋਂ ਇੱਕ ਆਟੋ ਡਰਾਈਵਰ ਹਨ। ਉਹ ਆਪਣੇ ਪਰਿਵਾਰ ਨਾਲ ਸੈਕਟਰ 38 ਦੇ ਇੱਕ ਘਰ ਵਿੱਚ ਰਹਿੰਦੇ ਹਨ। ਉਸ ਦੀ ਭੈਣ (ਤਾਨੀਆ ਦੀ ਭੂਆ) ਦਾ ਪਰਿਵਾਰ ਘਰ ਦੀ ਪਹਿਲੀ ਮੰਜ਼ਿਲ ‘ਤੇ ਰਹਿੰਦਾ ਹੈ। ਘਰ ਦੀ ਮਾਲਕੀ ਨੂੰ ਲੈ ਕੇ ਦੋਵਾਂ ਪਰਿਵਾਰਾਂ ਵਿਚਕਾਰ ਲੰਬੇ ਸਮੇਂ ਤੋਂ ਵਿਵਾਦ ਚੱਲ ਰਿਹਾ ਸੀ।
ਪਿਤਾ ਰਵੀ ਦੀ ਸ਼ਿਕਾਇਤ ਦੇ ਅਨੁਸਾਰ, ਵੀਰਵਾਰ ਦੁਪਹਿਰ ਘਰ ਨੂੰ ਲੈ ਕੇ ਉਸਦਾ ਆਪਣੇ ਭਾਂਜੇ ਕ੍ਰਿਸ਼ਨਾ ਨਾਲ ਝਗੜਾ ਹੋਇਆ ਸੀ। ਇਹ ਝਗੜਾ ਇਸ ਹੱਦ ਤੱਕ ਵੱਧ ਗਿਆ ਕਿ ਕ੍ਰਿਸ਼ਨਾ ਅਤੇ ਉਸਦੇ ਪਰਿਵਾਰ ਦੇ ਛੇ ਮੈਂਬਰਾਂ ਨੇ ਤਾਨੀਆ ‘ਤੇ ਹਮਲਾ ਕਰ ਦਿੱਤਾ। ਜਿਵੇਂ ਹੀ ਤਾਨੀਆ ਬਚਾਵ ਕਰਨ ਲਈ ਜਾਂ ਉੱਪਰ ਵਲ ਜਾ ਰਹੀ ਸੀ , ਉਹਦੋਂ ਹੀ ਕ੍ਰਿਸ਼ਨਾ ਨੇ ਉਸਦੀ ਕਮਰ ਦੇ ਨੇੜੇ ਚਾਕੂ ਨਾਲ ਵਾਰ ਕਰ ਦਿੱਤਾ। ਬਹੁਤ ਜ਼ਿਆਦਾ ਖੂਨ ਵਹਿ ਰਹੀ ਤਾਨੀਆ ਨੂੰ ਹਸਪਤਾਲ ਲਿਜਾਇਆ ਗਿਆ, ਜਿੱਥੇ ਡਾਕਟਰਾਂ ਨੇ ਉਸਨੂੰ ਮ੍ਰਿਤਕ ਐਲਾਨ ਕਰ ਦਿੱਤਾ।
ਨੈਸ਼ਨਲ ਲੈਵਲ ਦੀ ਕਰ ਰਹੀ ਸੀ ਤਿਆਰੀ
ਤਾਨੀਆ ਨਾ ਸਿਰਫ਼ ਇੱਕ ਹੋਣਹਾਰ ਵਿਦਿਆਰਥਣ ਸੀ, ਸਗੋਂ ਚੰਡੀਗੜ੍ਹ ਯੂਟੀ ਹਾਕੀ ਟੀਮ ਲਈ ਇੱਕ ਮਜ਼ਬੂਤ ਫਾਰਵਰਡ ਖਿਡਾਰੀ ਵੀ ਸੀ। ਉਹ ਗ੍ਰੈਜੂਏਸ਼ਨ ਦੇ ਆਪਣੇ ਆਖਰੀ ਸਾਲ ਵਿੱਚ ਸੀ ਅਤੇ ਪੰਜਾਬ ਯੂਨੀਵਰਸਿਟੀ ਦੇ ਮੈਦਾਨ ਵਿੱਚ ਅਭਿਆਸ ਕਰਦੀ ਸੀ। ਇੱਕ ਸੀਨੀਅਰ ਖਿਡਾਰੀ ਹੋਣ ਦੇ ਨਾਤੇ, ਉਸਨੇ ਜੂਨੀਅਰਾਂ ਨੂੰ ਹਾਕੀ ਦੇ ਹੁਨਰ ਵੀ ਸਿਖਾਏ। ਸ਼ੁੱਕਰਵਾਰ ਨੂੰ, ਉਸਨੇ ਇੱਕ ਰਾਸ਼ਟਰੀ ਟੂਰਨਾਮੈਂਟ ਲਈ ਕਰਨਾਟਕ ਰਵਾਨਾ ਹੋਣਾ ਸੀ, ਪਰ ਇਸ ਦੁਖਾਂਤ ਨੇ ਉਸ ਤੋਂ ਪਹਿਲਾਂ ਹੀ ਸਭ ਕੁਝ ਖਤਮ ਕਰ ਦਿੱਤਾ।
6 ਮੁਲਜ਼ਮਾਂ ਖ਼ਿਲਾਫ਼ ਕੇਸ ਦਰਜ
ਤਾਨੀਆ ਦੇ ਪਿਤਾ ਵੱਲੋਂ ਦਰਜ ਕਰਵਾਈ ਗਈ ਸ਼ਿਕਾਇਤ ਦੇ ਆਧਾਰ ‘ਤੇ, ਸੈਕਟਰ 39 ਥਾਣੇ ਦੇ ਪੁਲਿਸ ਸਟੇਸ਼ਨ ਨੇ ਕ੍ਰਿਸ਼ਨਾ, ਰਵੀ, ਗਗਨ, ਅਨਿਕੇਤ, ਨਵੀਨ ਅਤੇ ਟੀਨਾ ਖ਼ਿਲਾਫ਼ ਕਤਲ ਦਾ ਕੇਸ ਦਰਜ ਕੀਤਾ ਹੈ। ਅਪਰਾਧ ਕਰਨ ਤੋਂ ਬਾਅਦ ਸਾਰੇ ਮੁਲਜ਼ਮ ਆਪਣੇ ਘਰੋਂ ਭੱਜ ਗਏ। ਪੁਲਿਸ ਟੀਮਾਂ ਮੁਲਜ਼ਮਾਂ ਨੂੰ ਗ੍ਰਿਫ਼ਤਾਰ ਕਰਨ ਲਈ ਛਾਪੇਮਾਰੀ ਕਰ ਰਹੀਆਂ ਹਨ।
ਇਹ ਵੀ ਪੜ੍ਹੋ
