ਬਠਿੰਡਾ ‘ਚ ਪੇਂਟਰ ਦੀ ਲੱਗੀ 31 ਲੱਖ ਦੀ ਲਾਟਰੀ, 100 ਰੁਪਏ ਦੀ ਟਿਕਟ ਨੇ ਬਦਲੀ ਜ਼ਿੰਦਗੀ; ਇਲਾਕੇ ‘ਚ ਚਰਚਾ
ਬਠਿੰਡਾ ਦੇ ਪੇਂਟਰ ਹਾਮਿਲ ਖ਼ਾਨ ਦੀ ਕਿਸਮਤ ਰਾਤੋ-ਰਾਤ ਬਦਲ ਗਈ ਜਦੋਂ ਉਨ੍ਹਾਂ ਦੀ 100 ਰੁਪਏ ਦੀ ਰਾਜਸ਼੍ਰੀ ਲਾਟਰੀ ਟਿਕਟ 'ਤੇ 31 ਲੱਖ ਰੁਪਏ ਦਾ ਪਹਿਲਾ ਇਨਾਮ ਨਿਕਲਿਆ। ਇਸ ਮੌਕੇ ਕੰਪਨੀ ਵੱਲੋਂ ਵਿਸ਼ੇਸ਼ ਸਨਮਾਨ ਸਮਾਰੋਹ ਕਰਵਾ ਕੇ ਜੇਤੂ ਹਾਮਿਲ ਖ਼ਾਨ ਅਤੇ ਟਿਕਟ ਵਿਕਰੇਤਾ ਵਿਕਰਮਜੀਤ ਸਿੰਘ ਦਾ ਵਿਸ਼ੇਸ਼ ਸਨਮਾਨ ਕੀਤਾ ਗਿਆ।
ਕਿਹਾ ਜਾਂਦਾ ਹੈ ਕਿ ਕਿਸਮਤ ਬਦਲਣ ਲਈ ਕੋਈ ਸਮਾਂ ਤੈਅ ਨਹੀਂ ਹੁੰਦਾ, ਕਦੋਂ ਕਿਸੇ ਦੀ ਤਕਦੀਰ ਦਾ ਸਿਤਾਰਾ ਚਮਕ ਜਾਵੇ, ਇਸ ਬਾਰੇ ਕੁਝ ਕਿਹਾ ਨਹੀਂ ਜਾ ਸਕਦਾ। ਅਜਿਹਾ ਹੀ ਇੱਕ ਹੈਰਾਨ ਕਰਨ ਵਾਲਾ ਮਾਮਲਾ ਬਠਿੰਡਾ ਤੋਂ ਸਾਹਮਣੇ ਆਇਆ ਹੈ, ਜਿੱਥੇ ਪੇਸ਼ੇ ਵਜੋਂ ਪੇਂਟਰ ਦਾ ਕੰਮ ਕਰਨ ਵਾਲੇ ਹਾਮਿਲ ਖ਼ਾਨ ਦੀ ਕਿਸਮਤ ਨੇ ਅਜਿਹੀ ਪਲਟੀ ਮਾਰੀ ਕਿ ਮਹਿਜ਼ 100 ਰੁਪਏ ਦੀ ਲਾਟਰੀ ਟਿਕਟ ਨੇ ਉਨ੍ਹਾਂ ਨੂੰ 31 ਲੱਖ ਰੁਪਏ ਦਾ ਮਾਲਕ ਬਣਾ ਦਿੱਤਾ। ਗੋਆ ਸਰਕਾਰ ਵੱਲੋਂ ਚਲਾਈ ਜਾਂਦੀ ‘ਰਾਜਸ਼੍ਰੀ 100 ਗਾਰੰਟੀਡ ਲਾਟਰੀ’ ਦੇ 18 ਨਵੰਬਰ ਨੂੰ ਕੱਢੇ ਗਏ ਡਰਾਅ ਵਿੱਚ ਹਾਮਿਲ ਖ਼ਾਨ ਨੇ ਇਹ ਪਹਿਲਾ ਇਨਾਮ ਜਿੱਤਿਆ ਹੈ। ਇਸ ਵੱਡੀ ਖ਼ੁਸ਼ੀ ਦੇ ਮੌਕੇ ‘ਤੇ ਲਾਟਰੀ ਕੰਪਨੀ ਵੱਲੋਂ ਇੱਕ ਵਿਸ਼ੇਸ਼ ਸਨਮਾਨ ਸਮਾਰੋਹ ਵੀ ਕਰਵਾਇਆ ਗਿਆ।
ਬੀਵੀ ਵਾਲਾ ਚੌਕ ਸਥਿਤ ਕਾਊਂਟਰ ਤੋਂ ਖ਼ਰੀਦੀ ਸੀ ਟਿਕਟ
ਬਠਿੰਡਾ ਦੇ ਬੀਵੀ ਵਾਲਾ ਚੌਕ ਵਿਖੇ ਸਥਿਤ ਬੀ.ਕੇ.ਜੀ. ਲਾਟਰੀ ਕਾਊਂਟਰ ਤੋਂ ਖ਼ਰੀਦੀ ਗਈ 100 ਰੁਪਏ ਦੀ ਟਿਕਟ ਨੇ ਪੇਂਟਰ ਹਾਮਿਲ ਖ਼ਾਨ ਦੀ ਜ਼ਿੰਦਗੀ ਬਦਲ ਕੇ ਰੱਖ ਦਿੱਤੀ ਹੈ। ‘ਰਾਜਸ਼੍ਰੀ 100 ਗਾਰੰਟੀਡ ਲਾਟਰੀ’ ਦੇ 18 ਨਵੰਬਰ ਵਾਲੇ ਡਰਾਅ ਵਿੱਚ ਹਾਮਿਲ ਖ਼ਾਨ ਨੇ 31 ਲੱਖ ਰੁਪਏ ਦਾ ਪਹਿਲਾ ਇਨਾਮ ਆਪਣੇ ਨਾਮ ਕੀਤਾ। ਜਿਵੇਂ ਹੀ ਹਾਮਿਲ ਖ਼ਾਨ ਨੂੰ ਆਪਣੀ ਇਸ ਵੱਡੀ ਜਿੱਤ ਬਾਰੇ ਜਾਣਕਾਰੀ ਮਿਲੀ, ਤਾਂ ਉਨ੍ਹਾਂ ਦੀ ਖ਼ੁਸ਼ੀ ਦਾ ਕੋਈ ਟਿਕਾਣਾ ਨਾ ਰਿਹਾ। ਦੂਜਿਆਂ ਦੇ ਘਰਾਂ ਨੂੰ ਆਪਣੇ ਹੱਥਾਂ ਨਾਲ ਰੰਗਾਂ ਜ਼ਰੀਏ ਸਜਾਉਣ ਵਾਲੇ ਪੇਂਟਰ ਹਾਮਿਲ ਖ਼ਾਨ ਦੇ ਆਪਣੇ ਘਰ ਹੁਣ ਖ਼ੁਸ਼ੀਆਂ ਨੇ ਦਸਤਕ ਦਿੱਤੀ ਹੈ।
ਕੰਪਨੀ ਨੇ ਰੱਖਿਆ ਵਿਸ਼ੇਸ਼ ਸਨਮਾਨ ਸਮਾਰੋਹ
ਇਸ ਖ਼ਾਸ ਮੌਕੇ ‘ਤੇ ਰਾਜਸ਼੍ਰੀ ਲਾਟਰੀ ਪਰਿਵਾਰ ਵੱਲੋਂ ਇੱਕ ਵਿਸ਼ੇਸ਼ ਸਨਮਾਨ ਸਮਾਰੋਹ ਕਰਵਾਇਆ ਗਿਆ। ਇਸ ਦੌਰਾਨ ਕੰਪਨੀ ਦੇ ਅਧਿਕਾਰੀ ਰਾਜਕੁਮਾਰ ਵਰਮਾ, ਭਗਤ ਸਿੰਘ ਪੰਵਾਰ ਅਤੇ ਵਿਰੇਸ਼ ਹਿਮਾਨੀ ਵੱਲੋਂ ਲਾਟਰੀ ਦੇ ਜੇਤੂ ਹਾਮਿਲ ਖ਼ਾਨ ਅਤੇ ਟਿਕਟ ਵੇਚਣ ਵਾਲੇ ਵਿਕਰੇਤਾ ਵਿਕਰਮਜੀਤ ਸਿੰਘ ਦਾ ਫੁੱਲਾਂ ਦੇ ਹਾਰ ਪਾ ਕੇ ਅਤੇ ਗੁਲਦਸਤਾ ਭੇਟ ਕਰਕੇ ਨਿੱਘਾ ਸਵਾਗਤ ਕੀਤਾ ਗਿਆ। ਇਸ ਮੌਕੇ ਲੱਡੂ ਖੁਆ ਕੇ ਦੋਵਾਂ ਨੂੰ ਮੁਬਾਰਕਬਾਦ ਵੀ ਦਿੱਤੀ ਗਈ।
ਇਸ ਤੋਂ ਇਲਾਵਾ ਲਾਟਰੀ ਟਿਕਟ ਵੇਚਣ ਵਾਲੇ ਵਿਕਰੇਤਾ ਵਿਕਰਮਜੀਤ ਸਿੰਘ ਨੂੰ ਕੰਪਨੀ ਵੱਲੋਂ ਢਾਈ ਲੱਖ ਰੁਪਏ ਦਾ ਇਨਸੈਂਟਿਵ ਚੈੱਕ ਅਤੇ ਟਰਾਫ਼ੀ ਦੇ ਕੇ ਵਿਸ਼ੇਸ਼ ਤੌਰ ‘ਤੇ ਸਨਮਾਨਿਤ ਕੀਤਾ ਗਿਆ।
ਇਨ੍ਹਾਂ ਸ਼ਹਿਰਾਂ ‘ਚ ਨਿਕਲੇ ਇੱਕ-ਇੱਕ ਲੱਖ ਦੇ 3 ਹੋਰ ਇਨਾਮ
ਜ਼ਿਕਰਯੋਗ ਹੈ ਕਿ ਇਸੇ ਡਰਾਅ ਵਿੱਚ 31 ਲੱਖ ਰੁਪਏ ਦੇ ਪਹਿਲੇ ਇਨਾਮ ਤੋਂ ਇਲਾਵਾ ਇੱਕ-ਇੱਕ ਲੱਖ ਰੁਪਏ ਦੇ ਤਿੰਨ ਹੋਰ ਇਨਾਮ ਵੀ ਨਿਕਲੇ ਹਨ। ਇਨ੍ਹਾਂ ਵਿੱਚੋਂ ਪਹਿਲਾ ਇੱਕ ਲੱਖ ਰੁਪਏ ਦਾ ਇਨਾਮ ਲੁਧਿਆਣਾ ਦੇ ‘ਅੰਸ਼ਵੀਰ ਲਾਟਰੀ’ ਵੱਲੋਂ ਵੇਚੀ ਗਈ ਟਿਕਟ ‘ਤੇ, ਦੂਜਾ ਇਨਾਮ ਬਰੇਟਾ ਦੇ ‘ਗੁੱਡਲੱਕ ਲਾਟਰੀ’ ਵੱਲੋਂ ਵੇਚੀ ਗਈ ਟਿਕਟ ‘ਤੇ ਅਤੇ ਤੀਜਾ ਇਨਾਮ ‘ਸਾਈਂ ਕ੍ਰਿਪਾ ਲਾਟਰੀ’ ਵੱਲੋਂ ਵੇਚੀ ਗਈ ਟਿਕਟ ‘ਤੇ ਨਿਕਲਿਆ ਹੈ।
ਇਹ ਵੀ ਪੜ੍ਹੋ
ਫ਼ਿਲਹਾਲ 100 ਰੁਪਏ ਦੀ ਟਿਕਟ ਨਾਲ 31 ਲੱਖ ਰੁਪਏ ਦਾ ਵੱਡਾ ਇਨਾਮ ਜਿੱਤਣ ਵਾਲੇ ਹਾਮਿਲ ਖ਼ਾਨ ਦੀ ਇਸ ਕਾਮਯਾਬੀ ਦੀ ਚਰਚਾ ਪੂਰੇ ਇਲਾਕੇ ਵਿੱਚ ਹੋ ਰਹੀ ਹੈ। ਉੱਥੇ ਹੀ ਰਾਜਸ਼੍ਰੀ ਲਾਟਰੀ ਪਰਿਵਾਰ ਵੱਲੋਂ ਵੀ ਸਾਰੇ ਜੇਤੂਆਂ ਨੂੰ ਵਧਾਈ ਦਿੱਤੀ ਗਈ ਹੈ।
