West Bengal Election 2026: ਦੂਜੇ ਪੜਾਅ ‘ਚ 142 ਸੀਟਾਂ ਲਈ ਅੱਜ ਵੋਟਿੰਗ, ਕੇਂਦਰੀ ਬਲਾਂ ਵੱਲੋਂ ਸਖ਼ਤ ਸੁਰੱਖਿਆ; ਇਨ੍ਹਾਂ ਦਿੱਗਜਾਂ ਵਿਚਕਾਰ ਮੁੱਖ ਮੁਕਾਬਲਾ
ਪੱਛਮੀ ਬੰਗਾਲ ਚੋਣਾਂ ਦੇ ਦੂਜੇ ਪੜਾਅ 'ਚ 142 ਸੀਟਾਂ ਲਈ ਅੱਜ ਵੋਟਿੰਗ ਹੋਣੀ ਹੈ। ਇਸ ਪੜਾਅ 'ਚ, 3.21 ਕਰੋੜ ਵੋਟਰ 1,448 ਉਮੀਦਵਾਰਾਂ ਦੀ ਕਿਸਮਤ ਦਾ ਫੈਸਲਾ ਕਰਨਗੇ। ਬੰਗਾਲ 'ਚ ਕੁੱਲ 294 ਸੀਟਾਂ 'ਤੇ ਦੋ ਪੜਾਵਾਂ 'ਚ ਚੋਣਾਂ ਕਰਵਾਈਆਂ ਜਾ ਰਹੀਆਂ ਹਨ। ਪਹਿਲੇ ਪੜਾਅ 'ਚ ਭਾਰੀ ਵੋਟਿੰਗ ਹੋਈ। ਹੁਣ ਸਾਰਿਆਂ ਦੀਆਂ ਨਜ਼ਰਾਂ ਦੂਜੇ ਪੜਾਅ 'ਤੇ ਟਿਕੀਆਂ ਹਨ।
ਪੱਛਮੀ ਬੰਗਾਲ ਵਿਧਾਨ ਸਭਾ ਚੋਣਾਂ ਦੇ ਦੂਜੇ ਤੇ ਆਖਰੀ ਪੜਾਅ ਤਹਿਤ ਅੱਜ ਵੋਟਾਂ ਪੈਣਗੀਆਂ। ਇਹ ਪੜਾਅ ਇਹ ਨਿਰਧਾਰਤ ਕਰੇਗਾ ਕਿ ਤ੍ਰਿਣਮੂਲ ਕਾਂਗਰਸ ਦੱਖਣੀ ਬੰਗਾਲ ‘ਚ ਆਪਣਾ ਗੜ੍ਹ ਬਰਕਰਾਰ ਰੱਖ ਸਕਦੀ ਹੈ ਜਾਂ ਭਾਰਤੀ ਜਨਤਾ ਪਾਰਟੀ (ਭਾਜਪਾ) ਇਸ ਖੇਤਰ ‘ਚ ਆਪਣਾ ਰਾਹ ਬਣਾਏਗੀ ਤੇ ਕੀ ਸੱਤਾ ਹਾਸਲ ਕਰਨ ‘ਚ ਸਫਲ ਹੋ ਸਕਦੀ ਹੈ? ਚੋਣਾਂ ਦੇ ਦੂਜੇ ਪੜਾਅ ਦੇ ਤਹਿਤ, ਅੱਜ ਵਿਧਾਨ ਸਭਾ ਦੀਆਂ 142 ਸੀਟਾਂ ਲਈ ਵੋਟਾਂ ਪੈਣਗੀਆਂ।
ਪੱਛਮੀ ਬੰਗਾਲ ‘ਚ 23 ਅਪ੍ਰੈਲ ਨੂੰ ਹੋਈ ਵੋਟਿੰਗ ਦੇ ਪਹਿਲੇ ਪੜਾਅ ‘ਚ ਪਰਖ ਹੋਈ ਕਿ ਕੀ ਭਾਜਪਾ ਉੱਤਰੀ ਬੰਗਾਲ ਤੇ ਆਲੇ ਦੁਆਲੇ ਦੇ ਜ਼ਿਲ੍ਹਿਆਂ ‘ਚ ਆਪਣੀ ਰਵਾਇਤੀ ਲੀਡ ਬਰਕਰਾਰ ਰੱਖ ਸਕਦੀ ਹੈ। ਹੁਣ, ਦੂਜੇ ਪੜਾਅ ‘ਚ, ਨਜ਼ਰਾਂ ਤ੍ਰਿਣਮੂਲ ਕਾਂਗਰਸ ਦੇ ਗੜ੍ਹ- ਕੋਲਕਾਤਾ, ਹਾਵੜਾ, ਉੱਤਰੀ ਤੇ ਦੱਖਣੀ 24 ਪਰਗਨਾ, ਨਦੀਆ, ਹੁਗਲੀ ਤੇ ਪੂਰਬੀ ਬਰਧਮਾਨ ਦੇ ਮੁਕਾਬਲਿਆਂ ‘ਤੇ ਟਿਕੀਆਂ ਹੋਈਆਂ ਹਨ।
ਦੂਜੇ ਪੜਾਅ ‘ਚ 142 ਸੀਟਾਂ ‘ਤੇ ਵੋਟਿੰਗ
ਦੂਜੇ ਪੜਾਅ ‘ਚ ਵੋਟਿੰਗ ਲਈ ਨਿਰਧਾਰਤ 142 ਸੀਟਾਂ ‘ਚੋਂ, ਤ੍ਰਿਣਮੂਲ ਕਾਂਗਰਸ ਨੇ 2021 ‘ਚ 123 ਜਿੱਤੀਆਂ, ਜਦੋਂ ਕਿ ਭਾਜਪਾ ਨੇ ਸਿਰਫ 18 ਪ੍ਰਾਪਤ ਕੀਤੀਆਂ ਤੇ ਇੰਡੀਅਨ ਸੈਕੂਲਰ ਫਰੰਟ (ਆਈਐਸਐਫ) ਨੇ ਇੱਕ ਸੀਟ ਜਿੱਤੀ। ਹਾਲਾਂਕਿ, ਇਸ ਚੋਣ ਮੁਕਾਬਲੇ ਦੇ ਵਿਚਕਾਰ, ਭਬਾਨੀਪੁਰ ਸੀਟਕੇਂਦਰ ਬਿੰਦੂ ਬਣੀ ਹੋਈ ਹੈ। ਇਸਨੂੰ ਨੰਦੀਗ੍ਰਾਮ ਵਾਂਗ ਹੀ ਦੇਖਿਆ ਜਾ ਰਿਹਾ ਹੈ, ਜਿੱਥੇ ਸੁਵੇਂਦੂ ਅਧਿਕਾਰੀ ਨੇ 2021 ‘ਚ ਮਮਤਾ ਬੈਨਰਜੀ ਨੂੰ ਹਰਾਇਆ ਸੀ। ਹੁਣ, ਪੰਜ ਸਾਲ ਬਾਅਦ, ਇਹ ਰਾਜਨੀਤਿਕ ਲੜਾਈ ਤ੍ਰਿਣਮੂਲ ਕਾਂਗਰਸ ਮੁਖੀ ਦੇ ਗੜ੍ਹ ਤੱਕ ਪਹੁੰਚ ਗਈ ਹੈ।
ਭਬਾਨੀਪੁਰ: ਸਭ ਤੋਂ ਹਾਈ-ਪ੍ਰੋਫਾਈਲ ਸੀਟ
ਤ੍ਰਿਣਮੂਲ ਕਾਂਗਰਸ ਲਈ, ਭਬਾਨੀਪੁਰ ਸੀਟ ‘ਤੇ ਪਕੜ ਬਣਾਈ ਰੱਖਣਾ ਪ੍ਰਤੀਸ਼ਠਾ ਦਾ ਮਾਮਲਾ ਹੈ ਤੇ ਮਮਤਾ ਬੈਨਰਜੀ ਦੀ ਰਾਜਨੀਤਿਕ ਪਕੜ ਬਣਾਈ ਰੱਖਣ ਲਈ ਮਹੱਤਵਪੂਰਨ ਹੈ। ਇਸ ਦੇ ਉਲਟ, ਭਾਜਪਾ ਲਈ, ਇਸ ਕਿਲ੍ਹੇ ਨੂੰ ਤੋੜਨ ਦਾ ਅਰਥ ਬੰਗਾਲ ਦੇ ਸਭ ਤੋਂ ਸ਼ਕਤੀਸ਼ਾਲੀ ਨੇਤਾ ਦੀ ‘ਅਜਿੱਤ’ ਦੀ ਮਿੱਥ ਨੂੰ ਤੋੜਨਾ ਹੋਵੇਗਾ। ਕੋਲਕਾਤਾ ਨਗਰ ਨਿਗਮ ਦੇ ਅੱਠ ਵਾਰਡਾਂ ‘ਚ ਫੈਲੇ, ਭਬਾਨੀਪੁਰ ਹਲਕੇ ਨੂੰ ਅਕਸਰ ‘ਮਿੰਨੀ ਭਾਰਤ’ ਕਿਹਾ ਜਾਂਦਾ ਹੈ, ਜਿਸ ‘ਚ ਬੰਗਾਲੀ, ਗੁਜਰਾਤੀ, ਮਾਰਵਾੜੀ, ਜੈਨ, ਸਿੱਖ, ਮੁਸਲਮਾਨ, ਬਿਹਾਰ ਤੇ ਝਾਰਖੰਡ ਦੇ ਪ੍ਰਵਾਸੀ ਭਾਈਚਾਰਿਆਂ ਦੀ ਵਿਭਿੰਨ ਆਬਾਦੀ ਰਹਿੰਦੀ ਹੈ।
ਦੂਜੇ ਪੜਾਅ ‘ਚ 3.21 ਕਰੋੜ ਵੋਟਰ
ਬੰਗਾਲ ਚੋਣਾਂ ਦੇ ਦੂਜੇ ਪੜਾਅ ‘ਚ 32,173,837 ਵੋਟਰ ਸ਼ਾਮਲ ਹਨ। ਇਸ’ਚ 16,435,627 ਪੁਰਸ਼ ਵੋਟਰ, 15,737,418 ਮਹਿਲਾ ਵੋਟਰ ਤੇ 792 ਤੀਜੇ ਲਿੰਗ ਦੇ ਵੋਟਰ ਸ਼ਾਮਲ ਹਨ। ਇਸ ਪੜਾਅ ‘ਚ 41,001 ਪੋਲਿੰਗ ਸਟੇਸ਼ਨਾਂ ‘ਤੇ ਵੋਟਿੰਗ ਹੋਵੇਗੀ ਤੇ ਸਾਰੇ ਸਥਾਨਾਂ ‘ਤੇ ਵੈਬਕਾਸਟਿੰਗ ਸਹੂਲਤਾਂ ਪ੍ਰਦਾਨ ਕੀਤੀਆਂ ਜਾਣਗੀਆਂ। ਕੇਂਦਰੀ ਬਲਾਂ ਦੀਆਂ 2,321 ਕੰਪਨੀਆਂ ਤਾਇਨਾਤ ਹਨ
ਇਹ ਵੀ ਪੜ੍ਹੋ
ਚੋਣ ਕਮਿਸ਼ਨ ਨੇ ਸਖ਼ਤ ਸੁਰੱਖਿਆ ਉਪਾਅ ਲਾਗੂ ਕੀਤੇ ਹਨ, ਸੱਤ ਜ਼ਿਲ੍ਹਿਆਂ ‘ਚ ਕੇਂਦਰੀ ਬਲਾਂ ਦੀਆਂ 2,321 ਕੰਪਨੀਆਂ ਤਾਇਨਾਤ ਕੀਤੀਆਂ ਹਨ। ਕੁੱਲ 142 ਜਨਰਲ ਆਬਜ਼ਰਵਰ, 95 ਪੁਲਿਸ ਆਬਜ਼ਰਵਰ ਤੇ 100 ਖਰਚਾ ਆਬਜ਼ਰਵਰ ਤਾਇਨਾਤ ਕੀਤੇ ਗਏ ਹਨ। ਇਸ ਤੋਂ ਇਲਾਵਾ, ਚੋਣ ਪ੍ਰਕਿਰਿਆ ਦੀ ਨਿਗਰਾਨੀ ਲਈ ਕੈਮਰੇ ਨਾਲ ਲੈਸ ਡਰੋਨ ਦੀ ਵਰਤੋਂ ਕੀਤੀ ਜਾ ਰਹੀ ਹੈ। ਕੋਲਕਾਤਾ ‘ਚ ਸਭ ਤੋਂ ਵੱਧ ਤਾਇਨਾਤੀ ਹੈ, ਸ਼ਹਿਰ ‘ਚ ਕੇਂਦਰੀ ਬਲਾਂ ਦੀਆਂ 273 ਕੰਪਨੀਆਂ ਤਾਇਨਾਤ ਹਨ।
ਭਾਗੜ ‘ਚ ਸਭ ਤੋਂ ਵੱਧ 19 ਉਮੀਦਵਾਰ
ਇਸ ਪੜਾਅ ‘ਚ ਵੋਟਾਂ ਪੈਣ ਵਾਲੇ ਹਲਕਿਆਂ ‘ਚੋਂ, ਭਾਂਗਰ ‘ਚ ਸਭ ਤੋਂ ਵੱਧ 19 ਉਮੀਦਵਾਰ ਚੋਣ ਮੈਦਾਨ ‘ਚ ਹਨ, ਜਦੋਂ ਕਿ ਗੋਘਾਟ ‘ਚ ਸਭ ਤੋਂ ਘੱਟ 5 ਉਮੀਦਵਾਰ ਹਨ। ਇਸ ਪੜਾਅ ‘ਚ ਪ੍ਰਮੁੱਖ ਉਮੀਦਵਾਰਾਂ ‘ਚ ਮੁੱਖ ਮੰਤਰੀ ਮਮਤਾ ਬੈਨਰਜੀ ਸ਼ਾਮਲ ਹਨ, ਜੋ ਭਬਾਨੀਪੁਰ ਤੋਂ ਦੁਬਾਰਾ ਚੋਣ ਲੜਨ ਦੀ ਕੋਸ਼ਿਸ਼ ਕਰ ਰਹੇ ਹਨ। ਇਸ ਪੜਾਅ ਦੇ ਸਭ ਤੋਂ ਹਾਈ-ਪ੍ਰੋਫਾਈਲ ਮੁਕਾਬਲਿਆਂ ‘ਚੋਂ ਇੱਕ ‘ਚ, ਉਨ੍ਹਾਂ ਨੂੰ ਸੀਨੀਅਰ ਭਾਜਪਾ ਨੇਤਾ ਸੁਵੇਂਦੂ ਅਧਿਕਾਰੀ ਦੀ ਚੁਣੌਤੀ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ।
ਇਸ ਦੌਰਾਨ, ਕੋਲਕਾਤਾ ਪੋਰਟ ਹਲਕੇ ‘ਚ, ਸੀਨੀਅਰ ਟੀਐਮਸੀ ਨੇਤਾ ਫਿਰਹਾਦ ਹਕੀਮ ਭਾਜਪਾ ਉਮੀਦਵਾਰ ਰਾਕੇਸ਼ ਸਿੰਘ ਦੇ ਵਿਰੁੱਧ ਚੋਣ ਲੜ ਰਹੇ ਹਨ। ਮੱਧ ਕੋਲਕਾਤਾ ‘ਚ ਇਹ ਘੱਟ ਗਿਣਤੀ-ਪ੍ਰਭਾਵਸ਼ਾਲੀ ਸੀਟ ਸੱਤਾਧਾਰੀ ਪਾਰਟੀ ਲਈ ਮਹੱਤਵਪੂਰਨ ਮੰਨੀ ਜਾਂਦੀ ਹੈ। ਇਨ੍ਹਾਂ ਤੋਂ ਇਲਾਵਾ, ਇਸ ਪੜਾਅ ‘ਚ ਹੋਰ ਮੁੱਖ ਹਲਕੇ ਭਾਟਪਾਰਾ, ਜਗਤਦਲ, ਬੈਰਕਪੁਰ, ਬੋਨਗਾਓਂ, ਦਮਦਮ, ਸੰਦੇਸ਼ਖਲੀ, ਹਿੰਗਲਗੰਜ, ਰਾਣਾਘਾਟ ਉੱਤਰੀ ਤੇ ਦੱਖਣੀ, ਰਾਸ਼ਬਿਹਾਰੀ, ਜਾਦਵਪੁਰ ਤੇ ਬਾਲੀਗੰਜ ਸ਼ਾਮਲ ਹਨ।
