ਉੱਤਰ ਭਾਰਤ ‘ਚ ਕਦੋਂ ਪਹੁੰਚੇਗਾ ਮਾਨਸੂਨ? IMD ਨੇ ਦਿੱਤਾ ਅਪਡੇਟ

ਰਾਜਧਾਨੀ ਦਿੱਲੀ ਸਮੇਤ ਉੱਤਰ-ਭਾਰਤ ‘ਚ ਗਰਮੀ ਆਪਣੇ ਸਿਖਰ ‘ਤੇ ਹੈ ਤੇ ਹਰ ਕੋਈ ਮਾਨਸੂਨ ਦੀ ਉਡੀਕ ਕਰ ਰਿਹਾ ਹੈ। ਦੱਖਣ-ਪੱਛਮੀ ਮਾਨਸੂਨ, ਜੋ ਕਿ ਆਪਣੀ ਆਮ ਤਾਰੀਖ ਤੋਂ ਤਿੰਨ ਦਿਨ ਬਾਅਦ ਕੇਰਲ ‘ਚ ਪਹੁੰਚਿਆ, ਹੂਣ ਸਮੇਂ ਸਿਰ ਮਹਾਰਾਸ਼ਟਰ ਪਹੁੰਚਿਆ ਹੈ। ਇਸ ਨਾਲ ਉਮੀਦਾਂ ਵਧ ਗਈਆਂ ਹਨ ਕਿ ਇਹ ਇਸ ਮਹੀਨੇ ਦੇ ਅੰਤ ‘ਚ ਆਪਣੇ ਆਮ ਸਮਾਂ-ਸਾਰਣੀ ਦੇ ਆਸ-ਪਾਸ ਦਿੱਲੀ ਪਹੁੰਚੇਗਾ। ਮਾਨਸੂਨ 4 ਜੂਨ ਨੂੰ ਕੇਰਲ ਪਹੁੰਚਿਆ, ਜੋ ਕਿ 1 ਜੂਨ ਦੀ ਆਪਣੀ ਆਮ ਤਾਰੀਖ ਤੋਂ ਕੁੱਝ ਦਿਨ ਬਾਅਦ ਤੇ IMD ਦੇ ਪਹਿਲਾਂ ਦੇ ਅਨੁਮਾਨ (26 ਮਈ) ਤੋਂ ਲਗਭਗ ਇੱਕ ਹਫ਼ਤਾ ਬਾਅਦ ਹੈ। ਹਾਲਾਂਕਿ, ਇਹ ਬਾਅਦ ‘ਚ ਤੇਜ਼ੀ ਨਾਲ ਅੱਗੇ ਵਧਿਆ, 5 ਜੂਨ ਤੱਕ ਗੋਆ ਤੱਕ ਪੱਛਮੀ ਤੱਟ ਦੇ ਵੱਡੇ ਹਿੱਸੇ ਨੂੰ ਕਵਰ ਕੀਤਾ ਤੇ 6 ਜੂਨ ਨੂੰ ਮਹਾਰਾਸ਼ਟਰ ‘ਚ ਦਾਖਲ ਹੋਇਆ।

ਹੁਣ, ਹਰ ਕੋਈ ਜਾਣਨਾ ਚਾਹੁੰਦਾ ਹੈ ਕਿ ਮਾਨਸੂਨ ਦਿੱਲੀ ਕਦੋਂ ਪਹੁੰਚੇਗਾ। IMD ਦੇ ਮਾਨਸੂਨ ਟਰੈਕਿੰਗ ਮੈਪ ਦੇ ਅਨੁਸਾਰ, ਮਾਨਸੂਨ 25 ਜੂਨ ਤੋਂ 30 ਜੂਨ ਦੇ ਵਿਚਕਾਰ ਦਿੱਲੀ ਤੇ ਰਾਸ਼ਟਰੀ ਰਾਜਧਾਨੀ ਖੇਤਰ (NCR) ‘ਚ ਪਹੁੰਚਣ ਦੀ ਉਮੀਦ ਹੈ। ਨੋਇਡਾ, ਗੁਰੂਗ੍ਰਾਮ, ਗਾਜ਼ੀਆਬਾਦ ਤੇ ਉੱਤਰੀ ਭਾਰਤ ਦੇ ਹੋਰ ਹਿੱਸਿਆਂ ਵਰਗੇ ਨੇੜਲੇ ਖੇਤਰਾਂ ਲਈ ਵੀ ਇਹੀ ਸਮਾਂ ਸੀਮਾ ਹੋਣ ਦੀ ਉਮੀਦ ਹੈ।

25 ਜੂਨ ਤੋਂ ਬਾਅਦ ਉੱਤਰ ਭਾਰਤ ਨੂੰ ਮਿਲ ਸਕਦੀ ਗਰਮੀ ਤੋਂ ਰਾਹਤ

ਦਿੱਲੀ ਪਹੁੰਚਣ ਤੋਂ ਬਾਅਦ, ਮਾਨਸੂਨ ਦੇ ਉੱਤਰ-ਪੱਛਮ ਵੱਲ ਹਰਿਆਣਾ, ਪੰਜਾਬ, ਚੰਡੀਗੜ੍ਹ, ਹਿਮਾਚਲ ਪ੍ਰਦੇਸ਼, ਲੱਦਾਖ ਤੇ ਜੰਮੂ-ਕਸ਼ਮੀਰ ਦੇ ਕੁੱਝ ਹਿੱਸਿਆਂ ‘ਚ ਅੱਗੇ ਵਧਣ ਦੀ ਉਮੀਦ ਹੈ। ਪਿਛਲੇ ਸਾਲ, ਦੱਖਣ-ਪੱਛਮੀ ਮਾਨਸੂਨ 29 ਜੂਨ ਨੂੰ ਦਿੱਲੀ ਪਹੁੰਚਿਆ, ਜੋ ਕਿ 27 ਜੂਨ ਦੀ ਆਪਣੀ ਆਮ ਆਮਦ ਮਿਤੀ (1961-2019 ਦੇ ਔਸਤ ਦੇ ਆਧਾਰ ‘ਤੇ) ਦੇ ਮੁਕਾਬਲੇ ਦੋ ਦਿਨ ਦੀ ਦੇਰੀ ਨਾਲ ਸੀ।

ਅਗਲੇ 3 ਦਿਨਾਂ ਲਈ ਇਸ ਤਰ੍ਹਾਂ ਰਹੇਗਾ ਮੌਸਮ

ਫਾਜ਼ਿਲਕਾ, ਮੁਕਤਸਰ, ਬਠਿੰਡਾ ਤੇ ਮਾਨਸਾ ਦੇ ਕੁੱਝ ਇਲਾਕਿਆਂ ‘ਚ ਲੂ ਦੇ ਅਲਰਟ ਦੀ ਉਮੀਦ ਹੈ, ਜਦੋਂ ਕਿ ਪਠਾਨਕੋਟ, ਗੁਰਦਾਸਪੁਰ, ਅੰਮ੍ਰਿਤਸਰ, ਤਰਨਤਾਰਨ, ਹੁਸ਼ਿਆਰਪੁਰ, ਨਵਾਂਸ਼ਹਿਰ, ਕਪੂਰਥਲਾ, ਜਲੰਧਰ, ਫਿਰੋਜ਼ਪੁਰ, ਫਰੀਦਕੋਟ, ਮੋਗਾ, ਲੁਧਿਆਣਾ, ਬਰਨਾਲਾ, ਸੰਗਰੂਰ, ਫਤਿਹਗੜ੍ਹ ਸਾਹਿਬ, ਰੂਪਨਗਰ, ਪਟਿਆਲਾ ਤੇ ਐਸਏਐਸ ਨਗਰ (ਮੋਹਾਲੀ) ਲਈ ਕਿਸੇ ਵੀ ਤਰ੍ਹਾਂ ਦੇ ਅਲਰਟ ਦ ਉਮੀਦ ਨਹੀਂ ਹੈ। ਇਸ ਦੌਰਾਨ ਮੌਸਮ ਖੁਸ਼ਕ ਰਹਿਣ ਦੀ ਸੰਭਾਵਨਾ ਹੈ। Source: TV9Hindi.com