ਦਿੱਲੀ ਏਅਰਪੋਰਟ ‘ਤੇ ਵੱਡਾ ਜਹਾਜ਼ ਹਾਦਸਾ ਟਲਿਆ, ਦੋ ਜਹਾਜ਼ਾਂ ਦੇ ਵਿੰਗਸ ਟਕਰਾਏ

SpiceJet Akasa Planes Collide: ਦਿੱਲੀ ਹਵਾਈ ਅੱਡੇ ‘ਤੇ ਇੱਕ ਵੱਡਾ ਜਹਾਜ਼ ਹਾਦਸਾ ਹੋਣ ਤੋਂ ਬਚ ਗਿਆ। ਦੋ ਜਹਾਜ਼ਾਂ ਦੇ ਵਿੰਗਸ ਆਪਸ ਵਿੱਚ ਟਕਰਾ ਗਏ। ਸਾਰੇ ਯਾਤਰੀਆਂ ਨੂੰ ਬਾਹਰ ਕੱਢ ਲਿਆ ਗਿਆ ਅਤੇ ਜਹਾਜ਼ਾਂ ਨੂੰ ਗ੍ਰਾਉਂਡ ਕਰ ਦਿੱਤਾ ਗਿਆ। ਸਪਾਈਸਜੈੱਟ ਅਤੇ ਅਕਾਸਾ ਏਅਰ ਦੇ ਵਿੰਗਸ ਆਪਸ ਵਿੱਚ ਟਕਰਾ ਗਏ। ਅਕਾਸਾ ਏਅਰ ਫਲਾਈਟ (QP 1406) ਦਿੱਲੀ ਤੋਂ ਹੈਦਰਾਬਾਦ ਜਾ ਰਹੀ ਸੀ, ਜਦੋਂ ਕਿ ਸਪਾਈਸਜੈੱਟ ਫਲਾਈਟ (B737-700) ਲੇਹ ਤੋਂ ਆ ਰਹੀ ਸੀ।

ਇਹ ਘਟਨਾ ਟਰਮੀਨਲ 1 ਦੇ ਨੇੜੇ ਵਾਪਰੀ ਜਦੋਂ ਅਕਾਸਾ ਏਅਰ ਦਾ ਜਹਾਜ਼ (QP 1406) ਪੁਸ਼ਬੈਕ ਤੋਂ ਬਾਅਦ ਖੜ੍ਹਾ ਸੀ ਅਤੇ ਲੇਹ ਤੋਂ ਆ ਰਹੀ ਸਪਾਈਸਜੈੱਟ ਦੀ ਉਡਾਣ (B737-700) ਨਾਲ ਟਕਰਾ ਗਿਆ। ਕਥਿਤ ਤੌਰ ‘ਤੇ ਟੱਕਰ ਨਾਲ ਸਪਾਈਸਜੈੱਟ ਜਹਾਜ਼ ਦੇ ਸੱਜੇ ਵਿੰਗ ਅਤੇ ਅਕਾਸਾ ਏਅਰ ਜਹਾਜ਼ ਦੇ ਖੱਬੇ ਸਟੈਬੀਲਾਈਜ਼ਰ ਨੂੰ ਨੁਕਸਾਨ ਪਹੁੰਚਿਆ ਹੈ। ਖੁਸ਼ਕਿਸਮਤੀ ਨਾਲ, ਕੋਈ ਵੀ ਯਾਤਰੀ ਜਾਂ ਚਾਲਕ ਦਲ ਜ਼ਖਮੀ ਨਹੀਂ ਹੋਇਆ ਹੈ।

ਇਸ ਘਟਨਾ ਬਾਰੇ ਸਪਾਈਸਜੈੱਟ ਦੇ ਬੁਲਾਰੇ ਨੇ ਕੀ ਕਿਹਾ?

ਸਪਾਈਸਜੈੱਟ ਦੇ ਬੁਲਾਰੇ ਨੇ ਦੱਸਿਆ ਕਿ ਇੱਕ ਸਪਾਈਸਜੈੱਟ B737-700 ਜਹਾਜ਼ ਟੈਕਸੀ ਕਰਦੇ ਸਮੇਂ ਕਿਸੇ ਹੋਰ ਏਅਰਲਾਈਨ ਦੇ ਜਹਾਜ਼ ਨਾਲ ਟਕਰਾ ਗਿਆ। ਟੱਕਰ ਨਾਲ ਸਪਾਈਸਜੈੱਟ ਜਹਾਜ਼ ਦੇ ਸੱਜੇ ਖੰਭ ਦੇ ਵਿੰਗਲੇਟ ਨੂੰ ਨੁਕਸਾਨ ਪਹੁੰਚਿਆ। ਦੂਜੀ ਏਅਰਲਾਈਨ ਦੇ ਜਹਾਜ਼ ਦੇ ਪਿੱਛਲੇ ਹਿੱਸੇ (ਹੌਰੀਜੈਂਟਲ ਸਟੈਬੀਲਾਈਜ਼ਰ) ਨੂੰ ਨੁਕਸਾਨ ਪਹੁੰਚਿਆ ਹੈ। ਸਪਾਈਸਜੈੱਟ ਦੇ ਜਹਾਜ਼ ਨੂੰ ਦਿੱਲੀ ਵਿੱਚ ਗ੍ਰਾਊਂਡ ਕਰ ਦਿੱਤਾ ਗਿਆ ਹੈ।

ਯਾਤਰੀਆਂ ਨੂੰ ਦੂਜੇ ਜਹਾਜ਼ ਰਾਹੀਂ ਹੈਦਰਾਬਾਦ ਭੇਜਿਆ ਜਾਵੇਗਾ – ਅਕਾਸਾ

ਅਕਾਸਾ ਏਅਰ ਦੇ ਬੁਲਾਰੇ ਨੇ ਦੱਸਿਆ ਕਿ ਦਿੱਲੀ ਹਵਾਈ ਅੱਡੇ ‘ਤੇ ਦਿੱਲੀ ਤੋਂ ਹੈਦਰਾਬਾਦ ਜਾ ਰਹੀ ਅਕਾਸਾ ਏਅਰ ਦੀ ਉਡਾਣ (QP 1406) ਨਾਲ ਹਾਦਸਾ ਵਾਪਰਿਆ। ਜਦੋਂ ਜਹਾਜ਼ ਖੜ੍ਹਾ ਸੀ, ਇਹ ਦੂਜੀ ਏਅਰਲਾਈਨ ਦੇ ਜਹਾਜ਼ ਨਾਲ ਟਕਰਾ ਗਿਆ। ਨਤੀਜੇ ਵਜੋਂ, ਉਡਾਣ ਰੱਦ ਕਰ ਦਿੱਤੀ ਗਈ ਅਤੇ ਜਹਾਜ਼ ਨੂੰ ਪਾਰਕਿੰਗ ਬੇ ਵਿੱਚ ਵਾਪਸ ਭੇਜਣਾ ਪਿਆ। ਰਾਹਤ ਦੀ ਗੱਲ ਹੈ ਕਿ ਸਾਰੇ ਯਾਤਰੀ ਅਤੇ ਚਾਲਕ ਦਲ ਸੁਰੱਖਿਅਤ ਹਨ। ਅਕਾਸਾ ਏਅਰ ਹੁਣ ਯਾਤਰੀਆਂ ਨੂੰ ਹੈਦਰਾਬਾਦ ਭੇਜਣ ਲਈ ਇੱਕ ਦੂਜੇ ਜਹਾਜ਼ ਦਾ ਪ੍ਰਬੰਧ ਕਰ ਰਹੀ ਹੈ।