ਕੇਰਲਮ ਤੇ ਅਸਾਮ ‘ਚ ਵੋਟਿੰਗ ਦੇ ਟੁੱਟੇ ਰਿਕਾਰਡ! ਪੁਡੂਚੇਰੀ ਰਿਹਾ ਸਭ ਤੋਂ ਅੱਗੇ, ਇਸ ਸੀਟ ‘ਤੇ 94% ਤੋਂ ਵੱਧ ਪਈਆਂ ਵੋਟਾਂ

Image Credit source: PTI

ਭਾਰਤ ਦੇ ਦੋ ਅਹਿਮ ਰਾਜਾਂ ਕੇਰਲਮ ਤੇ ਅਸਾਮ ਅਤੇ ਕੇਂਦਰ ਸ਼ਾਸਿਤ ਪ੍ਰਦੇਸ਼ ਪੁਡੂਚੇਰੀ ਵਿੱਚ ਵਿਧਾਨ ਸਭਾ ਚੋਣਾਂ ਲਈ ਵੋਟਾਂ ਪੈਣ ਦਾ ਕੰਮ ਅੱਜ ਸਫ਼ਲਤਾਪੂਰਵਕ ਨੇਪਰੇ ਚੜ੍ਹ ਗਿਆ ਹੈ। ਲੋਕਤੰਤਰ ਦੇ ਇਸ ਤਿਉਹਾਰ ਵਿੱਚ ਵੋਟਰਾਂ ਨੇ ਭਾਰੀ ਉਤਸ਼ਾਹ ਨਾਲ ਹਿੱਸਾ ਲਿਆ। ਅੰਕੜਿਆਂ ਅਨੁਸਾਰ ਕੇਰਲਮ ਦੀਆਂ 140, ਅਸਾਮ ਦੀਆਂ 126 ਅਤੇ ਪੁਡੂਚੇਰੀ ਦੀਆਂ 30 ਵਿਧਾਨ ਸਭਾ ਸੀਟਾਂ ‘ਤੇ ਵੋਟਾਂ ਪਾਈਆਂ ਗਈਆਂ।

ਵੋਟਿੰਗ ਫੀਸਦੀ ਵਿੱਚ ਭਾਰੀ ਵਾਧਾ

ਮੁੱਢਲੇ ਰੁਝਾਨਾਂ ਅਤੇ ਅੰਕੜਿਆਂ ਮੁਤਾਬਕ, ਅਸਾਮ ਵਿੱਚ 85.10%, ਕੇਰਲਮ ਵਿੱਚ 77.50% ਅਤੇ ਪੁਡੂਚੇਰੀ ਵਿੱਚ ਰਿਕਾਰਡਤੋੜ 89.20% ਮਤਦਾਨ ਦਰਜ ਕੀਤਾ ਗਿਆ ਹੈ। ਹਾਲਾਂਕਿ ਚੋਣ ਕਮਿਸ਼ਨ ਵੱਲੋਂ ਅੰਤਿਮ ਅੰਕੜੇ ਜਾਰੀ ਕੀਤੇ ਜਾਣੇ ਅਜੇ ਬਾਕੀ ਹਨ। ਸਾਲ 2021 ਦੀਆਂ ਵਿਧਾਨ ਸਭਾ ਚੋਣਾਂ ਦੇ ਮੁਕਾਬਲੇ ਇਸ ਵਾਰ ਅਸਾਮ ਵਿੱਚ ਵੋਟਿੰਗ ਦਾ ਪੱਧਰ ਕਾਫ਼ੀ ਉੱਚਾ ਰਿਹਾ ਹੈ। ਪਿਛਲੀ ਵਾਰ ਅਸਾਮ ਵਿੱਚ 82.04 ਫੀਸਦੀ ਮਤਦਾਨ ਹੋਇਆ ਸੀ। ਇਸ ਵਾਰ ਸੂਬੇ ਦੇ ਦਲਗਾਓਂ ਖੇਤਰ ਵਿੱਚ ਸਭ ਤੋਂ ਵੱਧ 94.57 ਫੀਸਦੀ ਵੋਟਿੰਗ ਹੋਈ, ਜਦਕਿ ਅਮਰੀ ਵਿੱਚ ਸਭ ਤੋਂ ਘੱਟ 70.40 ਫੀਸਦੀ ਵੋਟਾਂ ਪਈਆਂ। ਅਸਾਮ ਵਿੱਚ ਕੁੱਲ 722 ਉਮੀਦਵਾਰ ਚੋਣ ਮੈਦਾਨ ਵਿੱਚ ਹਨ, ਜਿਨ੍ਹਾਂ ਦੀ ਕਿਸਮਤ ਦਾ ਫੈਸਲਾ 4 ਮਈ ਨੂੰ ਹੋਵੇਗਾ।

ਪੁਡੂਚੇਰੀ ਵਿੱਚ ਵੋਟਰਾਂ ਦਾ ਅਨੋਖਾ ਸਵਾਗਤ

ਕੇਂਦਰ ਸ਼ਾਸਿਤ ਪ੍ਰਦੇਸ਼ ਪੁਡੂਚੇਰੀ ਵਿੱਚ ਵੋਟਿੰਗ ਫੀਸਦੀ ਅਸਾਮ ਅਤੇ ਕੇਰਲਮ ਨਾਲੋਂ ਵੀ ਵੱਧ ਰਹੀ। ਇੱਥੇ ਸਵੇਰੇ ਸੱਤ ਵਜੇ ਤੋਂ ਹੀ ਵੋਟਰਾਂ ਦੀਆਂ ਲੰਬੀਆਂ ਕਤਾਰਾਂ ਦੇਖਣ ਨੂੰ ਮਿਲੀਆਂ। ਪੁਡੂਚੇਰੀ ਵਿੱਚ ਚੋਣ ਕਮਿਸ਼ਨ ਦੀ ਇੱਕ ਬਹੁਤ ਹੀ ਅਨੋਖੀ ਪਹਿਲ ਦੇਖਣ ਨੂੰ ਮਿਲੀ, ਜਿੱਥੇ ਇੱਕ ਪੋਲਿੰਗ ਸਟੇਸ਼ਨ ‘ਤੇ ਰੋਬੋਟ ਨੂੰ ਤਾਇਨਾਤ ਕੀਤਾ ਗਿਆ ਸੀ। ਇਸ ਰੋਬੋਟ ਨੇ ਫੁੱਲਾਂ ਨਾਲ ਵੋਟਰਾਂ ਦਾ ਸਵਾਗਤ ਕੀਤਾ, ਜੋ ਖਿੱਚ ਦਾ ਕੇਂਦਰ ਬਣਿਆ ਰਿਹਾ। ਪੇਂਡੂ ਇਲਾਕਿਆਂ ਵਿੱਚ ਬਜ਼ੁਰਗਾਂ ਅਤੇ ਮਹਿਲਾਵਾਂ ਨੇ ਬੜੇ ਚਾਅ ਨਾਲ ਆਪਣੀ ਵੋਟ ਪਾਈ। ਇੱਥੇ ਐਨਡੀਏ (NDA) ਆਪਣੀ ਸੱਤਾ ਬਚਾਉਣ ਲਈ ਪੂਰਾ ਜ਼ੋਰ ਲਗਾ ਰਹੀ ਹੈ, ਜਦਕਿ ਵਿਰੋਧੀ ਧਿਰ ਸਥਾਨਕ ਮੁੱਦਿਆਂ ‘ਤੇ ਚੋਣ ਲੜ ਰਹੀ ਹੈ। ਪੁਡੂਚੇਰੀ ਵਿੱਚ ਕੁੱਲ 1,099 ਪੋਲਿੰਗ ਸਟੇਸ਼ਨ ਬਣਾਏ ਗਏ ਸਨ।

ਉਮੀਦਵਾਰਾਂ ਦੀ ਕਿਸਮਤ ਈਵੀਐਮ ਵਿੱਚ ਕੈਦ

ਦੋਵਾਂ ਰਾਜਾਂ ਅਤੇ ਇੱਕ ਕੇਂਦਰ ਸ਼ਾਸਿਤ ਪ੍ਰਦੇਸ਼ ਨੂੰ ਮਿਲਾ ਕੇ ਕੁੱਲ 1,899 ਉਮੀਦਵਾਰ ਚੋਣ ਮੈਦਾਨ ਵਿੱਚ ਸਨ। ਅਸਾਮ ਵਿੱਚ 722, ਕੇਰਲਮ ਵਿੱਚ 863 ਅਤੇ ਪੁਡੂਚੇਰੀ ਵਿੱਚ 294 ਉਮੀਦਵਾਰਾਂ ਦੀ ਕਿਸਮਤ ਹੁਣ ਈਵੀਐਮ (EVM) ਮਸ਼ੀਨਾਂ ਵਿੱਚ ਕੈਦ ਹੋ ਗਈ ਹੈ।

ਅਸਾਮ ਦਾ ਸਿਆਸੀ ਸਮੀਕਰਨ: ਅਸਾਮ ਵਿੱਚ ਬਹੁਮਤ ਲਈ 64 ਸੀਟਾਂ ਦੀ ਲੋੜ ਹੈ। ਪਿਛਲੇ 10 ਸਾਲਾਂ ਤੋਂ ਇੱਥੇ ਭਾਜਪਾ ਦੀ ਸਰਕਾਰ ਹੈ ਅਤੇ ਹਿਮੰਤ ਬਿਸਵਾ ਸਰਮਾ ਪਾਰਟੀ ਦਾ ਸਭ ਤੋਂ ਵੱਡਾ ਚਿਹਰਾ ਹਨ। ਦੂਜੇ ਪਾਸੇ, ਕਾਂਗਰਸ ਦੇ ਗੌਰਵ ਗੋਗੋਈ ਆਪਣੇ ਪਿਤਾ ਦੀ ਵਿਰਾਸਤ ਨੂੰ ਬਚਾਉਣ ਅਤੇ ਸੱਤਾ ਵਿੱਚ ਵਾਪਸੀ ਲਈ ਸਖ਼ਤ ਚੁਣੌਤੀ ਦੇ ਰਹੇ ਹਨ। ਜਲੁਕਬਾਰੀ, ਜੋਰਹਾਟ, ਅਤੇ ਗੁਵਾਹਾਟੀ ਸੈਂਟਰਲ ਵਰਗੀਆਂ ਸੀਟਾਂ ‘ਤੇ ਕੜਾ ਮੁਕਾਬਲਾ ਹੈ।

ਕੇਰਲਮ ਦੀ ਸਥਿਤੀ: ਕੇਰਲਮ ਵਿੱਚ ਬਹੁਮਤ ਦਾ ਅੰਕੜਾ 71 ਹੈ। ਇੱਥੇ 2016 ਤੋਂ ਪਿਨਰਾਈ ਵਿਜਯਨ ਮੁੱਖ ਮੰਤਰੀ ਵਜੋਂ ਸੇਵਾਵਾਂ ਨਿਭਾ ਰਹੇ ਹਨ। ਇੱਥੇ ਮੁੱਖ ਮੁਕਾਬਲਾ ਐਲਡੀਐਫ (LDF) ਅਤੇ ਯੂਡੀਐਫ (UDF) ਵਿਚਕਾਰ ਰਹਿੰਦਾ ਹੈ, ਪਰ ਭਾਜਪਾ ਵੀ ਤੇਜ਼ੀ ਨਾਲ ਆਪਣੇ ਪੈਰ ਪਸਾਰ ਰਹੀ ਹੈ। ਪਲੱਕੜ ਅਤੇ ਤ੍ਰਿਸ਼ੂਰ ਵਰਗੀਆਂ ਹੌਟ ਸੀਟਾਂ ‘ਤੇ ਸਭ ਦੀ ਨਜ਼ਰ ਹੈ।

ਪੁਡੂਚੇਰੀ ਦੇ ਅੰਕੜੇ: ਪੁਡੂਚੇਰੀ ਵਿੱਚ ਬਹੁਮਤ ਲਈ 16 ਸੀਟਾਂ ਚਾਹੀਦੀਆਂ ਹਨ। ਪਿਛਲੀਆਂ ਚੋਣਾਂ ਵਿੱਚ ਐਨਡੀਏ ਨੂੰ 16 ਸੀਟਾਂ ਮਿਲੀਆਂ ਸਨ ਅਤੇ ਐਨ. ਰੰਗਾਸਵਾਮੀ ਮੁੱਖ ਮੰਤਰੀ ਬਣੇ ਸਨ। ਇਸ ਵਾਰ ਵੀ ਮੁਕਾਬਲਾ ਕਾਫ਼ੀ ਦਿਲਚਸਪ ਬਣਿਆ ਹੋਇਆ ਹੈ।