ਦਲੇਰ ਮਹਿੰਦੀ ਵਿਵਾਦ: ਮੀਕਾ ਸਿੰਘ ਨੇ CM ਧਾਮੀ ਅੱਗੇ ਰੱਖੀ ਵੱਡੀ ਮੰਗ, ਮੰਤਰੀ ਸੁਬੋਧ ਉਨਿਆਲ ਵੀਡੀਓ ਜਾਰੀ ਕਰਕੇ ਮੰਗਣ ਮੁਆਫ਼ੀ
ਉੱਤਰਾਖੰਡ ਵਿਖੇ ਪ੍ਰਸਿੱਧ ਪੰਜਾਬੀ ਗਾਇਕ ਦਲੇਰ ਮਹਿੰਦੀ ਅਤੇ ਸੂਬੇ ਦੇ ਕੈਬਨਿਟ ਮੰਤਰੀ ਸੁਬੋਧ ਉਨਿਆਲ ਦਰਮਿਆਨ ਸਟੇਜ 'ਤੇ ਹੋਏ ਤਿੱਖੇ ਵਿਵਾਦ ਨੇ ਹੁਣ ਹੋਰ ਵੱਡਾ ਰੂਪ ਧਾਰਨ ਕਰ ਲਿਆ ਹੈ। ਇਸ ਮਾਮਲੇ ਵਿੱਚ ਹੁਣ ਦਲੇਰ ਮਹਿੰਦੀ ਦੇ ਭਰਾ ਅਤੇ ਪ੍ਰਸਿੱਧ ਬਾਲੀਵੁੱਡ ਗਾਇਕ ਮੀਕਾ ਸਿੰਘ ਨੇ ਉੱਤਰਾਖੰਡ ਦੇ ਮੁੱਖ ਮੰਤਰੀ ਪੁਸ਼ਕਰ ਸਿੰਘ ਧਾਮੀ ਨੂੰ ਸਿੱਧੀ ਅਪੀਲ ਕੀਤੀ ਹੈ।
ਉੱਤਰਾਖੰਡ ਵਿਖੇ ਪ੍ਰਸਿੱਧ ਪੰਜਾਬੀ ਗਾਇਕ ਦਲੇਰ ਮਹਿੰਦੀ ਅਤੇ ਸੂਬੇ ਦੇ ਕੈਬਨਿਟ ਮੰਤਰੀ ਸੁਬੋਧ ਉਨਿਆਲ ਦਰਮਿਆਨ ਸਟੇਜ ‘ਤੇ ਹੋਏ ਤਿੱਖੇ ਵਿਵਾਦ ਨੇ ਹੁਣ ਹੋਰ ਵੱਡਾ ਰੂਪ ਧਾਰਨ ਕਰ ਲਿਆ ਹੈ। ਇਸ ਮਾਮਲੇ ਵਿੱਚ ਹੁਣ ਦਲੇਰ ਮਹਿੰਦੀ ਦੇ ਭਰਾ ਅਤੇ ਪ੍ਰਸਿੱਧ ਬਾਲੀਵੁੱਡ ਗਾਇਕ ਮੀਕਾ ਸਿੰਘ ਨੇ ਉੱਤਰਾਖੰਡ ਦੇ ਮੁੱਖ ਮੰਤਰੀ ਪੁਸ਼ਕਰ ਸਿੰਘ ਧਾਮੀ ਨੂੰ ਸਿੱਧੀ ਅਪੀਲ ਕੀਤੀ ਹੈ। ਮੀਕਾ ਸਿੰਘ ਨੇ ਸ਼ੁੱਕਰਵਾਰ ਨੂੰ ਸੋਸ਼ਲ ਮੀਡੀਆ ਮੰਚ ‘ਐਕਸ’ (ਪਹਿਲਾਂ ਟਵਿੱਟਰ) ‘ਤੇ ਪੋਸਟ ਸਾਂਝੀ ਕਰਦਿਆਂ ਮੁੱਖ ਮੰਤਰੀ ਧਾਮੀ ਨੂੰ ਬੇਨਤੀ ਕੀਤੀ ਕਿ ਉਹ ਮੰਤਰੀ ਸੁਬੋਧ ਉਨਿਆਲ ਨੂੰ ਇੱਕ ਸਪੱਸ਼ਟੀਕਰਨ ਵਾਲੀ ਵੀਡੀਓ ਜਾਰੀ ਕਰਕੇ ਦਲੇਰ ਮਹਿੰਦੀ ਤੋਂ ਜਨਤਕ ਮੁਆਫ਼ੀ ਮੰਗਣ ਦੇ ਨਿਰਦੇਸ਼ ਦੇਣ।
ਮੀਕਾ ਸਿੰਘ ਨੇ ਆਪਣੀ ਪੋਸਟ ਰਾਹੀਂ ਇਸ ਵਿਵਾਦ ‘ਤੇ ਨਿੱਜੀ ਦਖ਼ਲ ਦੇਣ ਅਤੇ ਫ਼ੋਨ ‘ਤੇ ਗੱਲਬਾਤ ਕਰਨ ਲਈ ਮੁੱਖ ਮੰਤਰੀ ਪੁਸ਼ਕਰ ਸਿੰਘ ਧਾਮੀ ਦਾ ਤਹਿ ਦਿਲੋਂ ਧੰਨਵਾਦ ਪ੍ਰਗਟਾਇਆ। ਉਨ੍ਹਾਂ ਕਿਹਾ ਕਿ ਮੁੱਖ ਮੰਤਰੀ ਧਾਮੀ ਇੱਕ ਬੇਹੱਦ ਨਿਮਰ, ਸੰਜੀਦਾ ਅਤੇ ਜ਼ਮੀਨ ਨਾਲ ਜੁੜੇ ਹੋਏ ਆਗੂ ਹਨ ਅਤੇ ਉਨ੍ਹਾਂ ਨੂੰ ਮੁੱਖ ਮੰਤਰੀ ਦੀ ਸੂਝਵਾਨ ਅਗਵਾਈ ‘ਤੇ ਪੂਰਾ ਭਰੋਸਾ ਹੈ।
ਮੰਤਰੀ ਦੀ ਭਾਸ਼ਾ ‘ਤੇ ਚੁੱਕੇ ਗੰਭੀਰ ਸਵਾਲ
ਇਸ ਦੇ ਨਾਲ ਹੀ ਮੀਕਾ ਸਿੰਘ ਨੇ ਇੱਕ ਹੋਰ ਪੋਸਟ ਰਾਹੀਂ ਮੰਤਰੀ ਸੁਬੋਧ ਉਨਿਆਲ ਵੱਲੋਂ ਸਟੇਜ ‘ਤੇ ਵਰਤੀ ਗਈ ਸ਼ਬਦਾਵਲੀ ਅਤੇ ਬੋਲਣ ਦੇ ਢੰਗ ਨੂੰ ਬੇਹੱਦ ਇਤਰਾਜ਼ਯੋਗ, ਅਸੱਭਿਅਕ ਅਤੇ ਘਟੀਆ ਕਰਾਰ ਦਿੱਤਾ। ਉਨ੍ਹਾਂ ਮੰਤਰੀ ਵੱਲੋਂ ਸਟੇਜ ਤੋਂ ਦਲੇਰ ਮਹਿੰਦੀ ਨੂੰ ਕਹੀ ਗਈ ਉਸ ਵਿਵਾਦਤ ਟਿੱਪਣੀ ਦਾ ਵੀ ਵਿਸ਼ੇਸ਼ ਤੌਰ ‘ਤੇ ਜ਼ਿਕਰ ਕੀਤਾ, ਜਿਸ ਵਿੱਚ ਸੁਬੋਧ ਉਨਿਆਲ ਨੇ ਕਿਹਾ ਸੀ ਕਿ “ਤੁਹਾਨੂੰ ਪਤਾ ਹੈ ਨਾ ਕਿ ਮਨਿੰਦਰ ਬੁੱਟਰ ਇੱਥੋਂ ਕੁੱਟ ਖਾ ਕੇ ਗਿਆ ਸੀ? ਇੰਨਾ ਕੁੱਟਿਆ ਸੀ ਕਿ ਉਸ ਦਾ ਬਾਪ ਵੀ ਹੁਣ ਇੱਥੇ ਪੈਰ ਨਹੀਂ ਪਾ ਸਕਦਾ।” ਮੀਕਾ ਨੇ ਸਖ਼ਤ ਇਤਰਾਜ਼ ਜਤਾਉਂਦਿਆਂ ਸਵਾਲ ਕੀਤਾ ਕਿ ਕੀ ਕਿਸੇ ਜ਼ਿੰਮੇਵਾਰ ਕੈਬਨਿਟ ਮੰਤਰੀ ਨੂੰ ਦੇਸ਼ ਦਾ ਨਾਂ ਰੌਸ਼ਨ ਕਰਨ ਵਾਲੇ ਕਲਾਕਾਰਾਂ ਲਈ ਅਜਿਹੀ ਹੇਠਲੇ ਪੱਧਰ ਦੀ ਧਮਕੀ ਭਰੀ ਭਾਸ਼ਾ ਦੀ ਵਰਤੋਂ ਕਰਨੀ ਸ਼ੋਭਾ ਦਿੰਦੀ ਹੈ?
The way Minister @SubodhUniyal1 ji spoke on stage was extremely rude and disrespectful. An artist deserves dignity, regardless of the circumstances.
He reportedly said on stage, Yahan aapse pehle @manindarbuttar pit ke gaya tha. Itna pita tha ki ab uska baap bhi nahi aa sakta yahan se. Is this really the language a minister should use for artists? What kind of behaviour is this? Artists come to perform, entertain people, and honour their commitments. They deserve respect, not humiliation from a public platform. Subodh Uniyal ji, do you want artists to stop coming to Uttarakhand? Such an attitude can discourage artists from performing in a state that we all love. Please remember that the people have given you the position you hold today. Public office comes with responsibility, humility, and accountability. I have immense love and respect for Uttarakhand, but artists deserve respect too. I sincerely hope you will reflect on your words and address this matter with dignity. Respect is a two-way street. 🙏 — King Mika Singh (@MikaSingh) October 23, 2026
ਮੀਕਾ ਸਿੰਘ ਨੇ ਆਪਣੀ ਸੋਸ਼ਲ ਮੀਡੀਆ ਪੋਸਟ ‘ਚ ਕੀ ਲਿਖਿਆ…
“ਉੱਤਰਾਖੰਡ ਦੇ ਮਾਣਯੋਗ ਮੁੱਖ ਮੰਤਰੀ ਪੁਸ਼ਕਰ ਸਿੰਘ ਧਾਮੀ ਜੀ ਪ੍ਰਤੀ ਮੇਰੇ ਮਨ ਵਿੱਚ ਬਹੁਤ ਸਤਿਕਾਰ ਹੈ। ਉਨ੍ਹਾਂ ਨੇ ਦਲੇਰ ਭਾਈ ਨਾਲ ਵਾਪਰੀ ਘਟਨਾ ਨੂੰ ਲੈ ਕੇ ਮੈਨੂੰ ਨਿੱਜੀ ਤੌਰ ‘ਤੇ ਫ਼ੋਨ ਕੀਤਾ। ਮੈਂ ਉਨ੍ਹਾਂ ਦੀ ਇਸ ਨਿੱਘੀ ਪਹਿਲਕਦਮੀ ਦੀ ਦਿਲੋਂ ਸ਼ਲਾਘਾ ਕਰਦਾ ਹਾਂ।
ਇਹ ਵੀ ਪੜ੍ਹੋ
ਮੈਂ ਧਾਮੀ ਸਾਹਿਬ ਨੂੰ ਬਹੁਤ ਚੰਗੀ ਤਰ੍ਹਾਂ ਜਾਣਦਾ ਹਾਂ। ਉਹ ਬੇਹੱਦ ਨਿਮਰ ਅਤੇ ਜ਼ਮੀਨ ਨਾਲ ਜੁੜੇ ਹੋਏ ਵਿਅਕਤੀ ਹਨ ਅਤੇ ਮੇਰੇ ਦਿਲ ਵਿੱਚ ਉਨ੍ਹਾਂ ਲਈ ਅਥਾਹ ਆਦਰ ਹੈ।
ਉਨ੍ਹਾਂ ਅੱਗੇ ਮੇਰੀ ਸਿਰਫ਼ ਇੰਨੀ ਕੁ ਨਿਮਰਤਾ ਸਹਿਤ ਅਪੀਲ ਹੈ ਕਿ ਉਹ ਸੁਬੋਧ ਉਨਿਆਲ ਜੀ ਨੂੰ ਇੱਕ ਸਾਧਾਰਨ ਜਿਹੀ ਵੀਡੀਓ ਜਾਰੀ ਕਰਨ ਲਈ ਕਹਿਣ, ਜਿਸ ਵਿੱਚ ਉਹ ਆਪਣੇ ਦਿੱਤੇ ਬਿਆਨ ਦੀ ਸੱਚਾਈ ਸਪੱਸ਼ਟ ਕਰਨ ਅਤੇ ਲਾਈਵ ਪਰਫ਼ਾਰਮੈਂਸ ਦੌਰਾਨ ਦਲੇਰ ਭਾਈ ਵੱਲੋਂ ਸ਼ਰਾਬ ਪੀਣ ਦੇ ਲਗਾਏ ਝੂਠੇ ਦੋਸ਼ਾਂ ‘ਤੇ ਉਨ੍ਹਾਂ ਤੋਂ ਮੁਆਫ਼ੀ ਮੰਗਣ।
ਮੇਰਾ ਮੰਨਣਾ ਹੈ ਕਿ ਗ਼ਲਤਫ਼ਹਿਮੀਆਂ ਕਿਸੇ ਵੀ ਕਾਰਨ ਹੋ ਸਕਦੀਆਂ ਹਨ, ਪ੍ਰੰਤੂ ਉਨ੍ਹਾਂ ਨੂੰ ਸ਼ਾਲੀਨਤਾ ਅਤੇ ਸਲੀਕੇ ਨਾਲ ਸੁਲਝਾਇਆ ਜਾ ਸਕਦਾ ਹੈ। ਮੈਨੂੰ ਪੂਰੀ ਉਮੀਦ ਹੈ ਕਿ ਇਸ ਛੋਟੇ ਜਿਹੇ ਕਦਮ ਨਾਲ ਇਹ ਵਿਵਾਦ ਸਦਾ ਲਈ ਖ਼ਤਮ ਹੋ ਜਾਵੇਗਾ ਅਤੇ ਦਲੇਰ ਭਾਈ ਦੇ ਵੱਕਾਰ, ਸ਼ਾਨ ਅਤੇ ਮਾਣ-ਸਨਮਾਨ ਨੂੰ ਕਾਇਮ ਰੱਖਿਆ ਜਾ ਸਕੇਗਾ।”
ਵਿਵਾਦ ਵਧਣ ਮਗਰੋਂ ਮੰਤਰੀ ਨੇ ਦਿੱਤੀ ਸੀ ਸਫ਼ਾਈ
ਦੱਸਣਯੋਗ ਹੈ ਕਿ ਦਲੇਰ ਮਹਿੰਦੀ ਅਤੇ ਕੈਬਨਿਟ ਮੰਤਰੀ ਸੁਬੋਧ ਉਨਿਆਲ ਦਰਮਿਆਨ ਸਟੇਜ ‘ਤੇ ਹੋਈ ਤਕਰਾਰ ਦੀ ਵੀਡੀਓ ਸੋਸ਼ਲ ਮੀਡੀਆ ‘ਤੇ ਤੇਜ਼ੀ ਨਾਲ ਵਾਇਰਲ ਹੋਣ ਮਗਰੋਂ ਸਮੁੱਚੀ ਬਾਲੀਵੁੱਡ ਅਤੇ ਸੰਗੀਤ ਜਗਤ ਦਲੇਰ ਮਹਿੰਦੀ ਦੇ ਹੱਕ ਵਿੱਚ ਡਟ ਗਿਆ ਸੀ। ਮੀਕਾ ਸਿੰਘ ਨੇ ਇਹ ਦਾਅਵਾ ਵੀ ਕੀਤਾ ਸੀ ਕਿ ਦਲੇਰ ਮਹਿੰਦੀ ਨੇ ਆਪਣੀ ਪੂਰੀ ਜ਼ਿੰਦਗੀ ਵਿੱਚ ਕਦੇ ਸ਼ਰਾਬ ਨੂੰ ਹੱਥ ਤੱਕ ਨਹੀਂ ਲਗਾਇਆ। ਚੁਫ਼ੇਰਿਓਂ ਘਿਰਨ ਅਤੇ ਮਾਮਲਾ ਭਖਣ ਉਪਰੰਤ ਮੰਤਰੀ ਉਨਿਆਲ ਨੇ ਸਫ਼ਾਈ ਦਿੰਦਿਆਂ ਕਿਹਾ ਸੀ ਕਿ ਉਨ੍ਹਾਂ ਨੂੰ ਇਸ ਗੱਲ ਦੀ ਜਾਣਕਾਰੀ ਨਹੀਂ ਸੀ ਕਿ ਗਾਇਕ ਦੀ ਸਿਹਤ ਨਾਸਾਜ਼ ਸੀ।
ਮੁੱਖ ਮੰਤਰੀ ਧਾਮੀ ਵੱਲੋਂ ਮਾਮਲਾ ਸ਼ਾਂਤ ਕਰਨ ਦੇ ਯਤਨ
ਇਸ ਸਮੁੱਚੇ ਘਟਨਾਕ੍ਰਮ ਦੌਰਾਨ ਬੀਤੇ ਦਿਨ (22 ਅਕਤੂਬਰ) ਮੁੱਖ ਮੰਤਰੀ ਪੁਸ਼ਕਰ ਸਿੰਘ ਧਾਮੀ ਨੇ ਵੀ ਮਾਮਲੇ ਵਿੱਚ ਵਿਚੋਲਗੀ ਕੀਤੀ ਸੀ। ਮੁੱਖ ਮੰਤਰੀ ਨੇ ਕਿਹਾ ਸੀ ਕਿ ਉਸ ਵੇਲੇ ਮੰਤਰੀ ‘ਤੇ ਇਕੱਠੀ ਹੋਈ ਜਨਤਾ ਦਾ ਦਬਾਅ ਰਿਹਾ ਹੋਵੇਗਾ। ਉਨ੍ਹਾਂ ਸਪੱਸ਼ਟ ਕੀਤਾ ਸੀ ਕਿ ਉੱਤਰਾਖੰਡ ਕਲਾਕਾਰਾਂ ਦਾ ਸਤਿਕਾਰ ਕਰਨ ਵਾਲੀ ਪਵਿੱਤਰ ਧਰਤੀ ਹੈ ਅਤੇ ਇੱਥੇ ਹਰੇਕ ਕਲਾਕਾਰ ਦਾ ਪੂਰਾ ਮਾਣ-ਸਨਮਾਨ ਬਹਾਲ ਰੱਖਿਆ ਜਾਂਦਾ ਹੈ।
ਸੀਐੱਮ ਧਾਮੀ ਨੇ ਮੀਕਾ ਸਿੰਘ ਅਤੇ ਦਲੇਰ ਮਹਿੰਦੀ ਨਾਲ ਗੱਲਬਾਤ ਕਰਨ ਦੀ ਗੱਲ ਕਹਿੰਦਿਆਂ ਸਾਰੀਆਂ ਧਿਰਾਂ ਨੂੰ ਇਸ ਵਿਵਾਦ ਨੂੰ ਇੱਥੇ ਹੀ ਖ਼ਤਮ ਕਰਨ ਦੀ ਅਪੀਲ ਕੀਤੀ ਸੀ। ਇਸ ਉਪਰੰਤ ਮੁੱਖ ਮੰਤਰੀ ਨੇ ਖ਼ੁਦ ਮੀਕਾ ਸਿੰਘ ਨਾਲ ਫ਼ੋਨ ‘ਤੇ ਰਾਬਤਾ ਕਾਇਮ ਕਰਕੇ ਕਿਹਾ ਸੀ ਕਿ ਗ਼ਲਤਫ਼ਹਿਮੀਆਂ ਨੂੰ ਆਪਸੀ ਸੰਵਾਦ ਅਤੇ ਭਾਈਚਾਰਕ ਸਾਂਝ ਨਾਲ ਸੁਲਝਾ ਲੈਣਾ ਚਾਹੀਦਾ ਹੈ। ਹਾਲਾਂਕਿ, ਮੁੱਖ ਮੰਤਰੀ ਨਾਲ ਗੱਲਬਾਤ ਹੋਣ ਦੇ ਇੱਕ ਦਿਨ ਬਾਅਦ ਹੁਣ ਮੀਕਾ ਸਿੰਘ ਨੇ ਮੰਤਰੀ ਵੱਲੋਂ ਰਸਮੀ ਵੀਡੀਓ ਜਾਰੀ ਕਰਵਾ ਕੇ ਮੁਆਫ਼ੀ ਮੰਗਵਾਉਣ ਦੀ ਮੰਗ ਰੱਖ ਦਿੱਤੀ ਹੈ, ਜਿਸ ਨਾਲ ਇਹ ਮਾਮਲਾ ਪ੍ਰਸ਼ਾਸਨਿਕ ਅਤੇ ਸਿਆਸੀ ਹਲਕਿਆਂ ਵਿੱਚ ਇੱਕ ਵਾਰ ਫਿਰ ਚਰਚਾ ਦਾ ਵਿਸ਼ਾ ਬਣ ਗਿਆ ਹੈ।
