Dhurandhar 2 Controversy: ਮੈਂ ਆਪਣਾ ਜ਼ਮੀਰ ਨਹੀਂ ਵੇਚਿਆ, ਧੁਰੰਦਰ ਫ਼ਿਲਮ ‘ਤੇ ਲੱਗੇ ਪ੍ਰੋਪੇਗੰਡਾ ਦੇ ਇਲਜ਼ਾਮਾਂ ‘ਤੇ ਐਕਟਰ ਦਾ ਕਰਾਰਾ ਜਵਾਬ

ਰਣਵੀਰ ਸਿੰਘ ਦੀ ਸਪਾਈ ਐਕਸ਼ਨ ਥ੍ਰਿਲਰ ਫ਼ਿਲਮ ਧੁਰੰਦਰ: ਦਾ ਰਿਵੇਂਜ (Dhurandhar: The Revenge) ਬਾਕਸ ਆਫਿਸ ‘ਤੇ ਨਵੇਂ ਕੀਰਤੀਮਾਨ ਸਥਾਪਿਤ ਕਰ ਰਹੀ ਹੈ। 19 ਮਾਰਚ ਨੂੰ ਰਿਲੀਜ਼ ਹੋਈ ਇਸ ਫ਼ਿਲਮ ਨੇ ਮਹਿਜ਼ 7 ਦਿਨਾਂ ਦੇ ਅੰਦਰ ਦੁਨੀਆ ਭਰ ਵਿੱਚ 1000 ਕਰੋੜ ਰੁਪਏ ਦੀ ਕਮਾਈ ਕਰਕੇ ਸਭ ਨੂੰ ਹੈਰਾਨ ਕਰ ਦਿੱਤਾ ਹੈ।

ਜਿੱਥੇ ਇੱਕ ਪਾਸੇ ਫ਼ਿਲਮ ਨੂੰ ਦਰਸ਼ਕਾਂ ਦਾ ਭਰਪੂਰ ਪਿਆਰ ਮਿਲ ਰਿਹਾ ਹੈ, ਉੱਥੇ ਹੀ ਦੂਜੇ ਪਾਸੇ ਸੋਸ਼ਲ ਮੀਡੀਆ ‘ਤੇ ਕੁਝ ਲੋਕ ਇਸ ਨੂੰ ‘ਪ੍ਰੋਪੇਗੰਡਾ ਫ਼ਿਲਮ’ ਦੱਸ ਕੇ ਇਸ ਦੀ ਆਲੋਚਨਾ ਕਰ ਰਹੇ ਹਨ। ਹੁਣ ਫ਼ਿਲਮ ਵਿੱਚ ਭਾਰਤੀ ਜਾਸੂਸ ‘ਰਿਜ਼ਵਾਨ’ ਦਾ ਕਿਰਦਾਰ ਨਿਭਾਉਣ ਵਾਲੇ ਅਦਾਕਾਰ ਮੁਸਤਫਾ ਅਹਿਮਦ ਨੇ ਇਨ੍ਹਾਂ ਇਲਜ਼ਾਮਾਂ ‘ਤੇ ਆਪਣੀ ਪ੍ਰਤੀਕਿਰਿਆ ਦਿੱਤੀ ਹੈ।

“ਇਰਾਦਾ ਹੀ ਸਭ ਕੁਝ ਹੈ”

ਮੁਸਤਫਾ ਅਹਿਮਦ ਨੇ ਹਾਲ ਹੀ ਵਿੱਚ ‘ਬਾਲੀਵੁੱਡ ਕੱਟ ਅਨਕੱਟ’ ਨੂੰ ਦਿੱਤੇ ਇੱਕ ਇੰਟਰਵਿਊ ਵਿੱਚ ਫ਼ਿਲਮ ‘ਤੇ ਲੱਗ ਰਹੇ ਪ੍ਰੋਪੇਗੰਡਾ ਦੇ ਇਲਜ਼ਾਮਾਂ ਨੂੰ ਸਿਰੇ ਤੋਂ ਖਾਰਜ ਕਰ ਦਿੱਤਾ। ਉਨ੍ਹਾਂ ਕਿਹਾ, “ਇੱਕ ਇਨਸਾਨ ਦਾ ਪ੍ਰੋਪੇਗੰਡਾ, ਦੂਜੇ ਇਨਸਾਨ ਦਾ ਏਜੰਡਾ ਹੋ ਸਕਦਾ ਹੈ। ਮੈਨੂੰ ਲੱਗਦਾ ਹੈ ਕਿ ਹਰ ਕਿਸੇ ਨੂੰ ਆਪਣੀ ਰਾਏ ਰੱਖਣ ਦਾ ਹੱਕ ਹੈ। ਇਹੀ ਸਾਡੇ ਦੇਸ਼ ਦੀ ਖੂਬਸੂਰਤੀ ਹੈ ਕਿ ਸੰਵਿਧਾਨ ਸਾਨੂੰ ਬੋਲਣ ਦੀ ਆਜ਼ਾਦੀ ਦਿੰਦਾ ਹੈ। ਪਰ ਅੰਤ ਵਿੱਚ ਸਭ ਕੁਝ ਤੁਹਾਡੀ ਨੀਅਤ ਅਤੇ ਇਰਾਦੇ ‘ਤੇ ਨਿਰਭਰ ਕਰਦਾ ਹੈ। ਸਾਰੇ ਸਵਾਲ ਇਰਾਦੇ ਦੇ ਹੀ ਹੁੰਦੇ ਹਨ।”

ਆਪਣੇ ਕਿਰਦਾਰ ਨਾਲ ਨਹੀਂ ਕੀਤਾ ਸਮਝੌਤਾ

ਮੁਸਤਫਾ ਨੇ ਅੱਗੇ ਕਿਹਾ ਕਿ ਉਨ੍ਹਾਂ ਨੇ ਫ਼ਿਲਮ ਵਿੱਚ ਜੋ ਕਿਰਦਾਰ ਨਿਭਾਇਆ ਹੈ, ਉਸ ਵਿੱਚ ਕਿਤੇ ਵੀ ਕੋਈ ਸਮਝੌਤਾ ਨਹੀਂ ਕੀਤਾ ਗਿਆ। ਉਨ੍ਹਾਂ ਕਿਹਾ, “ਮੈਂ ਇਹ ਦਾਅਵੇ ਨਾਲ ਕਹਿ ਸਕਦਾ ਹਾਂ ਕਿ ਮੈਂ ਆਪਣੀ ਮਾਂ ਦੀਆਂ ਸਿੱਖਿਆਵਾਂ ਅਤੇ ਆਪਣੇ ਅਸੂਲਾਂ ਨਾਲ ਕਿਤੇ ਵੀ ਕੋਈ ਸਮਝੌਤਾ ਨਹੀਂ ਕੀਤਾ। ਅਸੀਂ ਜਿਸ ਮਾਹੌਲ ਵਿੱਚ ਕੰਮ ਕੀਤਾ, ਉੱਥੇ ਹਰ ਕਿਸੇ ਦੇ ਨਜ਼ਰੀਏ ਦਾ ਸਤਿਕਾਰ ਕੀਤਾ ਜਾਂਦਾ ਸੀ।”

“ਮੇਰਾ ਨਾਮ ਮੁਸਤਫਾ ਅਹਿਮਦ ਹੈ”

ਆਲੋਚਕਾਂ ਨੂੰ ਜਵਾਬ ਦਿੰਦਿਆਂ ਮੁਸਤਫਾ ਨੇ ਕਿਹਾ, “ਤੁਸੀਂ ਖੁਦ ਸੋਚੋ, ਮੇਰਾ ਨਾਮ ਮੁਸਤਫਾ ਅਹਿਮਦ ਹੈ। ਜੇਕਰ ਨਿਰਦੇਸ਼ਕ ਆਦਿਤਿਆ ਜੀ ਦਾ ਕੋਈ ਖਾਸ ਪ੍ਰੋਪੇਗੰਡਾ ਹੁੰਦਾ, ਤਾਂ ਉਨ੍ਹਾਂ ਨੂੰ ਮੇਰੇ ਨਾਲ ਕੰਮ ਕਰਨ ਦੀ ਕੀ ਲੋੜ ਸੀ? ਉਹ ਫਿਰ ਕਿਸੇ ਮਹੇਸ਼ ਜਾਂ ਮੁਕੇਸ਼ ਨਾਮ ਦੇ ਵਿਅਕਤੀ ਨੂੰ ਲੈ ਸਕਦੇ ਸਨ। ਕੋਈ ਕਿਸੇ ਲਈ ਇੰਨਾ ਕਿਉਂ ਕਰੇਗਾ? ਜੇਕਰ ਕਿਸੇ ਦਾ ਅਜਿਹਾ ਏਜੰਡਾ ਹੈ, ਤਾਂ ਮੈਂ ਸਭ ਦੇ ਵਿਚਾਰਾਂ ਦਾ ਸਨਮਾਨ ਕਰਦਾ ਹਾਂ, ਪਰ ਮੇਰੇ ਲਈ ਇਹ ਸੱਚ ਨਹੀਂ ਹੈ।”

ਇਹ ਵੀ ਪੜ੍ਹੋ

ਮੂਸੇਵਾਲਾ ਦਾ ਨਵਾਂ ਗੀਤ ਜਲਦੀ ਹੋਵੇਗਾ ਰਿਲੀਜ਼, ਸੋਸ਼ਲ ਮੀਡੀਆ 'ਤੇ ਦਿੱਤੀ ਜਾਣਕਾਰੀ

ਰਣਵੀਰ ਦੀ ਪੱਗ ਬੰਨ੍ਹ ਕੇ ਸਿਗਰੇਟ ਪੀਂਦੇ ਦੀ ਤਸਵੀਰ ਵਾਇਰਲ, ਕੀ ਹੈ ਸੱਚਾਈ?

ਰੈਪਰ ਬਾਦਸ਼ਾਹ ਨੇ ਗੁਪਚੁੱਪ ਰਚਾਇਆ ਦੂਜਾ ਵਿਆਹ? ਸੱਸ ਨੇ ਸ਼ੇਅਰ ਕੀਤੀਆਂ ਤਸਵੀਰਾਂ

“ਮੈਂ ਆਪਣੀ ਜ਼ਮੀਰ ਨਹੀਂ ਵੇਚੀ”

ਇੰਟਰਵਿਊ ਦੌਰਾਨ ਮੁਸਤਫਾ ਨੇ ਸਪੱਸ਼ਟ ਕੀਤਾ ਕਿ ਉਹ ਕੋਈ ‘ਸੇਫ ਸਾਈਡ’ ਨਹੀਂ ਲੈ ਰਹੇ। ਉਨ੍ਹਾਂ ਕਿਹਾ ਕਿ ਫ਼ਿਲਮ ਵਿੱਚ ਬਹੁਤ ਹੀ ਨੇਕ ਇਰਾਦੇ ਨਾਲ ਕੰਮ ਕੀਤਾ ਗਿਆ ਹੈ। ਉਨ੍ਹਾਂ ਲੋਕਾਂ ‘ਤੇ ਨਿਸ਼ਾਨਾ ਸਾਧਿਆ ਜੋ ਕਹਿੰਦੇ ਹਨ ਕਿ ਕਲਾਕਾਰਾਂ ਨੇ ਪ੍ਰਸਿੱਧੀ ਲਈ ਆਪਣੀ ਜ਼ਮੀਰ ਵੇਚ ਦਿੱਤੀ ਹੈ।

ਮੁਸਤਫਾ ਨੇ ਕਿਹਾ, “ਮੈਂ ਅਜਿਹਾ ਕੁਝ ਨਹੀਂ ਕੀਤਾ। ਮੈਂ ਸਿਰਫ਼ ਆਪਣੇ ਲਈ ਅਤੇ ਆਪਣੇ ਕਿਰਦਾਰ ਲਈ ਬੋਲ ਸਕਦਾ ਹਾਂ। ਮੇਰੇ ਕਿਰਦਾਰ ਨੇ ਅਜਿਹਾ ਕੁਝ ਨਹੀਂ ਕੀਤਾ ਅਤੇ ਨਾ ਹੀ ਮੈਂ ਸੈੱਟ ‘ਤੇ ਅਜਿਹਾ ਕੁਝ ਦੇਖਿਆ ਜਿਸ ਨਾਲ ਮੇਰੇ ਮਨ ਨੂੰ ਠੇਸ ਪਹੁੰਚੀ ਹੋਵੇ ਜਾਂ ਮੈਨੂੰ ਲੱਗਿਆ ਹੋਵੇ ਕਿ ਇਹ ਗਲਤ ਹੈ।