ਕੋਰੋਨਾ ਦੌਰਾਨ ਕਰੋੜਾਂ ਤੋਂ ਘੱਟ ਕੇ ਲੱਖਾਂ ‘ਚ ਆ ਗਈ ਸੀ ਕਰਮਜੀਤ ਅਨਮੋਲ ਦੀ ਜਾਇਦਾਦ, ਹੁਣ ਹੋਲੀ-ਹੋਲੀ ਵੱਧ ਰਹੀ ਆਮਦਨ, ਫਰੀਦਕੋਟ ਤੋਂ ਭਰੀ ਨਾਮਜ਼ਦਗੀ

ਨਾਮਜ਼ਦਗੀ ਦਾਖਿਲ ਕਰਨ ਸਮੇਂ ਦੀ ਤਸਵੀਰ

ਪੰਜਾਬ ਤੋਂ ਆਮ ਆਦਮੀ ਪਾਰਟੀ (ਆਪ) ਫਰੀਦਕੋਟ ਤੋਂ ਉਮੀਦਵਾਰ ਕਰਮਜੀਤ ਅਨਮੋਲ ਦੀ ਆਮਦਨ ਕੋਰੋਨਾ ਤੋਂ ਬਾਅਦ ਕਰੋੜਾਂ ਤੋਂ ਘੱਟ ਕੇ ਲੱਖਾਂ ਤੱਕ ਪਹੁੰਚ ਗਈ ਹੈ। 2018-19 ਵਿੱਚ ਉਨ੍ਹਾਂ ਦੀ ਆਮਦਨ ਜੋ 1.20 ਕਰੋੜ ਰੁਪਏ ਸੀ, ਹੁਣ ਲਗਭਗ 39 ਲੱਖ ਰੁਪਏ ਹੈ। ਪਰ ਇੰਨਾ ਵੱਡਾ ਸਟਾਰ ਹੋਣ ਦੇ ਬਾਵਜੂਦ ਅਨਮੋਲ ਸਾਦਾ ਜੀਵਨ ਬਤੀਤ ਕਰਦੇ ਹਨ। ਉਨ੍ਹਾਂ ਨੂੰ ਮਹਿੰਗੀਆਂ ਚੀਜ਼ਾਂ ਦਾ ਬਿਲਕੁੱਲ ਵੀ ਸ਼ੌਂਕ ਨਹੀਂ ਹੈ।

ਕਰਮਜੀਤ ਅਨਮੋਲ ਨੇ ਮੰਗਲਵਾਰ ਨੂੰ ਫਰੀਦਕੋਟ ਸੀਟ ਤੋਂ ਨਾਮਜ਼ਦਗੀ ਦਾਖਲ ਕੀਤੀ। ਆਪਣੀ ਤਰਫੋਂ ਦਾਇਰ ਹਲਫਨਾਮੇ ਵਿੱਚ ਉਨ੍ਹਾਂ ਨੇ 2018-19 ਵਿੱਚ ਆਪਣੀ ਆਮਦਨ 1.20 ਕਰੋੜ ਰੁਪਏ ਦੱਸੀ ਹੈ। ਇਸ ਦੇ ਨਾਲ ਹੀ, 2019-20 ਵਿੱਚ ਉਹ ਘੱਟ ਕੇ 29.83 ਲੱਖ ਰਹਿ ਗਏ। ਕੋਰੋਨਾ ਦੌਰਾਨ, ਉਨ੍ਹਾਂ ਦੀ ਆਮਦਨ ਸਿਰਫ 14.78 ਲੱਖ ਰੁਪਏ ਤੱਕ ਸੀਮਤ ਹੋ ਗਈ। ਕੋਰੋਨਾ ਦੇ ਦੌਰ ਤੋਂ ਬਾਅਦ ਹੁਣ ਕਰਮਜੀਤ ਅਨਮੋਲ ਲਗਭਗ 39.37 ਲੱਖ ਰੁਪਏ ਸਾਲਾਨਾ ਕਮਾ ਰਿਹਾ ਹੈ।

ਕਰਮਜੀਤ ਕੋਲ ਦੋ ਕਾਰਾਂ ਅਤੇ ਸਾਢੇ ਤਿੰਨ ਤੋਲੇ ਸੋਨਾ

ਕਰਮਜੀਤ ਅਨਮੋਲ ਸਾਦਾ ਜੀਵਨ ਪਸੰਦ ਕਰਦੇ ਹਨ। ਉਨ੍ਹਾਂ ਕੋਲ ਇੱਕ ਫਾਰਚੂਨਰ ਅਤੇ ਇੱਕ ਥਾਰ ਹੈ। ਉਨ੍ਹਾਂ ਨੂੰ ਗਹਿਣਿਆਂ ਦਾ ਸ਼ੌਂਕ ਨਹੀਂ ਹੈ। ਉਨ੍ਹਾਂ ਕੋਲ ਕਰੀਬ 34 ਗ੍ਰਾਮ ਸੋਨਾ ਹੈ, ਜਿਸ ਦੀ ਬਾਜ਼ਾਰੀ ਕੀਮਤ ਕਰੀਬ 2.20 ਲੱਖ ਰੁਪਏ ਹੈ। ਉਨ੍ਹਾਂ ਦੀ ਪਤਨੀ ਕੋਲ ਕਰੀਬ 362.35 ਗ੍ਰਾਮ ਸੋਨੇ ਦੇ ਗਹਿਣੇ ਹਨ, ਜਿਨ੍ਹਾਂ ਦੀ ਕੀਮਤ ਲਗਭਗ 25.83 ਲੱਖ ਰੁਪਏ ਹੈ।

ਕੁੱਲ ਮਿਲਾ ਕੇ, ਅਨਮੋਲ ਕੋਲ 66.63 ਲੱਖ ਰੁਪਏ ਦੀ ਚੱਲ ਜਾਇਦਾਦ ਹੈ ਅਤੇ ਉਨ੍ਹਾਂ ਦੀ ਪਤਨੀ ਕੋਲ 67.18 ਲੱਖ ਰੁਪਏ ਦੀ ਚੱਲ ਜਾਇਦਾਦ ਹੈ।

ਕਰੋੜਾਂ ਦੀ ਜਾਇਦਾਦ ਬਣਾਈ ਹੈ ਅਨਮੋਲ ਨੇ

ਫਿਲਮ ਇੰਡਸਟਰੀ ‘ਚ ਮਸ਼ਹੂਰ ਨਾਂ ਬਣਨ ਤੋਂ ਬਾਅਦ ਅਨਮੋਲ ਨੇ ਲਗਭਗ 13 ਕਰੋੜ ਰੁਪਏ ਦੀ ਜਾਇਦਾਦ ਬਣਾਈ ਹੈ। ਜਿਸ ‘ਚ 7.83 ਕਰੋੜ ਰੁਪਏ ਦੀ ਜਾਇਦਾਦ ਉਨ੍ਹਾਂ ਦੇ ਨਾਂ ‘ਤੇ ਹੈ ਅਤੇ 5.72 ਕਰੋੜ ਰੁਪਏ ਦੀ ਜਾਇਦਾਦ ਉਨ੍ਹਾਂ ਦੀ ਪਤਨੀ ਦੇ ਨਾਂ ‘ਤੇ ਹੈ।

ਨਾਲ ਹੀ ਅਨਮੋਲ ਅਤੇ ਉਨ੍ਹਾਂ ਦੇ ਪਰਿਵਾਰ ‘ਤੇਕਰੀਬ 5 ਕਰੋੜ ਰੁਪਏ ਦਾ ਕਰਜ਼ਾ ਵੀ ਹੈ। ਜਿਸ ਵਿੱਚੋਂ ਅਨਮੋਲ ਨੇ 2.90 ਕਰੋੜ ਰੁਪਏ ਦਾ ਕਰਜ਼ਾ ਲਿਆ ਹੈ ਜਦਕਿ ਉਨ੍ਹਾਂ ਦੀ ਪਤਨੀ ਨੇ 2.12 ਕਰੋੜ ਰੁਪਏ ਦਾ ਕਰਜ਼ਾ ਲਿਆ ਹੋਇਆ ਹੈ।

ਸੰਗਰੂਰ ਤੋਂ ਗਾਇਕ ਜੋੜੇ ਨੇ ਭਰੀ ਨਾਮਜ਼ਦਗੀ

ਉੱਧਰ ਸੰਗਰੂਰ ਤੋਂ ਪੰਜਾਬੀ ਡਿਊਟ ਸਿੰਗਰਸ ਹਾਕਮ ਬਖ਼ਤਿਆਰੀਵਾਲਾ ਤੇ ਉਨ੍ਹਾਂ ਦੀ ਪਤਨੀ ਦਲਜੀਤ ਕੌਰ ਨੇ ਬਤੌਰ ਆਜ਼ਾਦ ਉਮੀਦਵਾਰ ਆਪਣਾ ਨਾਮਜ਼ਦਗੀ ਪੱਤਰ ਦਾਖਲ ਕੀਤਾ। ਬੀਤੇ ਕਈ ਦਹਾਕਿਆਂ ਤੋਂ ਇਹ ਜੋੜੀ ਪੰਜਾਬ ਦੇ ਮਸ਼ਹੂਰ ਗਾਇਕਾਂ ਦੀ ਲਿਸਟ ਵਿੱਚ ਸ਼ੁਮਾਰ ਹੈ।

ਨਾਮਜ਼ਦਗੀ ਦਾਖ਼ਲ ਕਰਦੇ ਵੇਲ੍ਹੇ ਖਾਸ ਗੱਲ ਇਹ ਰਹੀ ਕਿ ਇਹ ਦੋਵਾਂ ਰਵਾਇਤੀ ਪੁਸ਼ਾਕ ਪਾ ਕੇ ਡੀਸੀ ਦਫ਼ਤਰ ਪਹੁੰਚੇ ਸਨ। ਉਨ੍ਹਾਂ ਨੂੰ ਵੇਖਣ ਲਈ ਉੱਥੇ ਕਾਫੀ ਭੀੜ ਜੁੱਟ ਗਈ। ਪਰਚਾ ਭਰਨ ਵੇਲ੍ਹੇ ਦੋਵਾਂ ਦੇ ਨਾਲ ਵੱਡੀ ਗਿਣਤੀ ਵਿੱਚ ਉਨ੍ਹਾਂ ਦੇ ਸਮਰਥਕ ਵੀ ਮੌਜਦ ਰਹੇ।