ਜਲੰਧਰ ‘ਚ ਨਕਲੀ ‘ਥਾਣੇਦਾਰ’ ਗ੍ਰਿਫ਼ਤਾਰ, XUV ਕਾਰ, ਆਈਡੀ ਕਾਰਡ ਤੇ ਖਿਡੌਣਾ ਪਿਸਤੌਲ ਬਰਾਮਦ

Jalandhar Fake Thanedar: ਜਲੰਧਰ ਦਿਹਾਤੀ ਪੁਲਿਸ ਨੇ ਧੋਖਾਧੜੀ ਕਰਨ ਵਾਲੇ ਇੱਕ ਫਰਜੀ ਪੁਲਿਸ ਮੁਲਾਜ਼ਮ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। ਮਹਿਤਪੁਰ ਪੁਲਿਸ ਨੇ ਨਾਕਾਬੰਦੀ ਕਰ ਰੱਖੀ ਸੀ। ਇਸ ਦੌਰਾਨ ਪੁਲਿਸ ਨੇ ਮਹਿਤਪੁਰ ਦੇ ਟੀ-ਪੁਆਇੰਟ ਛੋਟੇ ਬਿੱਲਾ ਵਿਖੇ ਨਾਕਾਬੰਦੀ ਦੌਰਾਨ ਇੱਕ ਨਕਲੀ ਪੁਲਿਸ ਅਧਿਕਾਰੀ ਨੂੰ ਗ੍ਰਿਫ਼ਤਾਰ ਕਰ ਲਿਆ। ਪੁਲਿਸ ਅਧਿਕਾਰੀ ਨੇ ਕਿਹਾ ਕਿ ਮੁਲਜ਼ਮ ਇੱਕ ਕਾਲੇ ਰੰਗ ਦੀ ਸਫਾਰੀ XUV, ਜਿਸ ਦਾ ਵਾਹਨ ਨੰਬਰ PB-10-BS-6706 ਚਲਾ ਰਿਹਾ ਸੀ। ਇਸ ਦੀ ਪਿਛਲੀ ਵਿੰਡਸ਼ੀਲਡ ‘ਤੇ ਪੰਜਾਬੀ ਵਿੱਚ “ਥਾਣੇਦਾਰ” ਲਿਖਿਆ ਹੋਇਆ ਸੀ।

ਉਨ੍ਹਾਂ ਦੱਸਿਆ ਕਿ ਗ੍ਰਿਫ਼ਤਾਰ ਕੀਤੇ ਗਏ ਮੁਲਜ਼ਮ ਦੀ ਪਛਾਣ ਅੰਸ਼ ਗਿੱਲ ਪੁੱਤਰ ਕਰਮ ਚੰਦ ਵਾਸੀ ਉੱਗੀ ਪਿੰਡ ਨਕੋਦਰ ਵਜੋਂ ਹੋਈ ਹੈ। ਜਦੋਂ ਉਸ ਤੋਂ ਪੁੱਛਗਿੱਛ ਕੀਤੀ ਗਈ ਤਾਂ ਉਹ ਆਪਣੀ ਗੱਡੀ ‘ਤੇ ‘ਪੁਲਿਸਮੈਨ’ ਦੇ ਸਾਈਨ ਬੋਰਡ ਬਾਰੇ ਕੋਈ ਤਸੱਲੀਬਖਸ਼ ਜਵਾਬ ਨਹੀਂ ਦੇ ਸਕਿਆ। ਹੋਰ ਜਾਂਚ ਕਰਨ ‘ਤੇ, ਉਸ ਕੋਲੋਂ ਪੰਜਾਬ ਪੁਲਿਸ ਦਾ ਇੱਕ ਜਾਅਲੀ ਆਈਡੀ ਕਾਰਡ ਅਤੇ ਇੱਕ ਕਾਲੇ ਰੰਗ ਦਾ ਖਿਡੌਣਾ ਪਿਸਤੌਲ ਬਰਾਮਦ ਹੋਇਆ।

ਦਿੱਤੀ ਸੀ ਪੁਲਿਸ ਭਰਤੀ ਦੀ ਪ੍ਰੀਖਿਆ, ਨਹੀਂ ਹੋਇਆ ਸੀ ਪਾਸ

ਸ਼ੁਰੂਆਤੀ ਜਾਂਚ ਤੋਂ ਪਤਾ ਲੱਗਾ ਹੈ ਕਿ ਉਸ ਨੇ ਪੁਲਿਸ ਭਰਤੀ ਪ੍ਰੀਖਿਆ ਦਿੱਤੀ ਸੀ, ਪਰ ਇਸ ਨੂੰ ਪਾਸ ਨਹੀਂ ਕਰ ਸਕਿਆ। ਪੁਲਿਸ ਨੇ ਕਿਹਾ ਕਿ ਮੁਲਜ਼ਮ ਲੋਕਾਂ ਨੂੰ ਦੱਸ ਰਿਹਾ ਸੀ ਕਿ ਉਸ ਨੇ ਪੁਲਿਸ ਦਾ ਪੇਪਰ ਪਾਸ ਕਰ ਲਿਆ ਹੈ ਅਤੇ ਆਪਣੇ ਝੂਠ ਦਾ ਸਮਰਥਨ ਕਰਨ ਲਈ ਇੱਕ ਜਾਅਲੀ ਆਈਡੀ ਕਾਰਡ ਬਣਾਇਆ ਸੀ।

ਆਪਣੀ ਕਾਰ ‘ਤੇ ਲਗਾਇਆ ਗਿਆ ਸੀ ਨਕਲੀ ਸਟੀਕਰ

ਉਸ ਨੇ ਆਪਣੀ ਕਾਰ ‘ਤੇ ਨਕਲੀ ਪੁਲਿਸ ਸਟੇਸ਼ਨ ਅਫਸਰ ਦਾ ਸਟਿੱਕਰ ਲਗਾਇਆ ਹੋਇਆ ਸੀ ਅਤੇ ਟੋਲ ਟੈਕਸ ਤੋਂ ਬਚ ਰਿਹਾ ਸੀ। ਮੁਲਜ਼ਮ ਖਿਲਾਫ਼ ਥਾਣਾ ਮਹਿਤਪੁਰ ਵਿੱਚ ਐਫਆਈਆਰ ਮਾਮਲਾ ਦਰਜ ਕੀਤਾ ਗਿਆ ਸੀ। ਪੁਲਿਸ ਨੇ ਜਾਣਕਾਰੀ ਦਿੱਤੀ ਹੈ ਕਿ ਕਿ ਮੁਲਜ਼ਮ ਨੂੰ ਹਿਰਾਸਤ ਵਿੱਚ ਲੈ ਲਿਆ ਗਿਆ ਹੈ ਅਤੇ ਉਸ ਨਾਲ ਜੁੜੀਆਂ ਹੋਰ ਧੋਖਾਧੜੀ ਵਾਲੀਆਂ ਗਤੀਵਿਧੀਆਂ ਦਾ ਪਤਾ ਲਗਾਉਣ ਲਈ ਹੋਰ ਜਾਂਚ ਕੀਤੀ ਜਾ ਰਹੀ ਹੈ।