NCC ਤੋਂ ਕਮਾਂਡਿੰਗ ਅਫ਼ਸਰ ਤੱਕ ਦਾ ਸਫ਼ਰ… ਕੌਣ ਹੈ ਮਹਿਲਾ ਅਧਿਕਾਰੀ, ਜਿਨ੍ਹਾਂ ਨੂੰ ਮਿਲੀ ਅਗਨੀਵੀਰ ਟ੍ਰੇਨਿੰਗ ਸੈਂਟਰ ਦੀ ਕਮਾਨ
Colonel Noreen Shanet John: ਭਾਰਤੀ ਹਥਿਆਰਬੰਦ ਸੈਨਾਵਾਂ ਵਿੱਚ ਔਰਤਾਂ ਦੀ ਭਾਗੀਦਾਰੀ ਲਗਾਤਾਰ ਵਧ ਰਹੀ ਹੈ ਅਤੇ ਹੁਣ ਉਹ ਸਿਰਫ਼ ਸ਼ਾਮਲ ਹੀ ਨਹੀਂ ਹੋ ਰਹੀਆਂ, ਸਗੋਂ ਮੋਹਰੀ ਹੋ ਕੇ ਅਗਵਾਈ ਵੀ ਕਰ ਰਹੀਆਂ ਹਨ। ਇਸੇ ਲੜੀ ਤਹਿਤ ਕਰਨਲ ਨੋਰੀਨ ਸ਼ਾਨੇਟ ਜੌਨ ਨੇ ਬੈਂਗਲੁਰੂ ਸਥਿਤ ਵੱਕਾਰੀ ਮਦਰਾਸ ਇੰਜੀਨੀਅਰਿੰਗ ਗਰੁੱਪ ਐਂਡ ਸੈਂਟਰ ਵਿੱਚ ਸਿਖਲਾਈ ਬਟਾਲੀਅਨ ਦੀ ਕਮਾਨ ਸੰਭਾਲ ਕੇ ਇੱਕ ਨਵਾਂ ਇਤਿਹਾਸ ਸਿਰਜ ਦਿੱਤਾ ਹੈ।
Image Credit source: X/@IaSouthern
ਭਾਰਤੀ ਹਥਿਆਰਬੰਦ ਸੈਨਾਵਾਂ ਵਿੱਚ ਔਰਤਾਂ ਦੀ ਭਾਗੀਦਾਰੀ ਲਗਾਤਾਰ ਵਧ ਰਹੀ ਹੈ ਅਤੇ ਹੁਣ ਉਹ ਸਿਰਫ਼ ਸ਼ਾਮਲ ਹੀ ਨਹੀਂ ਹੋ ਰਹੀਆਂ, ਸਗੋਂ ਮੋਹਰੀ ਹੋ ਕੇ ਅਗਵਾਈ ਵੀ ਕਰ ਰਹੀਆਂ ਹਨ। ਇਸੇ ਲੜੀ ਤਹਿਤ ਕਰਨਲ ਨੋਰੀਨ ਸ਼ਾਨੇਟ ਜੌਨ ਨੇ ਬੈਂਗਲੁਰੂ ਸਥਿਤ ਵੱਕਾਰੀ ਮਦਰਾਸ ਇੰਜੀਨੀਅਰਿੰਗ ਗਰੁੱਪ ਐਂਡ ਸੈਂਟਰ ਵਿੱਚ ਸਿਖਲਾਈ ਬਟਾਲੀਅਨ ਦੀ ਕਮਾਨ ਸੰਭਾਲ ਕੇ ਇੱਕ ਨਵਾਂ ਇਤਿਹਾਸ ਸਿਰਜ ਦਿੱਤਾ ਹੈ।
ਉਹ ਇਸ ਮਹੱਤਵਪੂਰਨ ਅਹੁਦੇ ਨੂੰ ਸੰਭਾਲਣ ਵਾਲੀ ਪਹਿਲੀ ਮਹਿਲਾ ਅਧਿਕਾਰੀ ਬਣ ਗਈ ਹੈ। MEG ਭਾਰਤੀ ਸੈਨਾ ਦੀਆਂ ਸਭ ਤੋਂ ਪੁਰਾਣੀਆਂ ਅਤੇ ਨਾਮਵਰ ਇੰਜੀਨੀਅਰਿੰਗ ਇਕਾਈਆਂ ਵਿੱਚੋਂ ਇੱਕ ਹੈ, ਜੋ ‘ਅਗਨੀਪਥ ਯੋਜਨਾ’ ਤਹਿਤ ਭਰਤੀ ਹੋਣ ਵਾਲੇ ਅਗਨੀਵੀਰਾਂ ਦੀ ਸਿਖਲਾਈ ਵਿੱਚ ਅਹਿਮ ਭੂਮਿਕਾ ਨਿਭਾਉਂਦੀ ਹੈ।
NCC ਤੋਂ ਕਮਾਂਡਿੰਗ ਅਫ਼ਸਰ ਤੱਕ ਦਾ ਸਫ਼ਰ
ਕਰਨਲ ਨੋਰੀਨ ਦੇ ਫੌਜੀ ਸਫ਼ਰ ‘ਤੇ ਨੈਸ਼ਨਲ ਕੈਡੇਟ ਕੋਰ (NCC) ਕੈਡੇਟ ਵਜੋਂ ਬਿਤਾਏ ਸ਼ੁਰੂਆਤੀ ਦਿਨਾਂ ਦਾ ਬਹੁਤ ਡੂੰਘਾ ਪ੍ਰਭਾਵ ਰਿਹਾ ਹੈ। ਕੇਰਲ ਦੇ ਕਾਲੀਕਟ ਸਥਿਤ ਪ੍ਰੋਵੀਡੈਂਸ ਵੂਮੈਨ ਕਾਲਜ ਦੀ ਵਿਦਿਆਰਥਣ ਰਹਿ ਚੁੱਕੀ ਕਰਨਲ ਨੋਰੀਨ ਨੇ ਐਨ.ਸੀ.ਸੀ. ਦੀਆਂ ਗਤੀਵਿਧੀਆਂ ਵਿੱਚ ਆਪਣੇ ਸ਼ਾਨਦਾਰ ਪ੍ਰਦਰਸ਼ਨ ਨਾਲ ਸ਼ੁਰੂਆਤ ਵਿੱਚ ਹੀ ਪਛਾਣ ਬਣਾ ਲਈ ਸੀ।
ਉਨ੍ਹਾਂ ਨੇ ਸਾਲ 1989 ਵਿੱਚ ਦਿੱਲੀ ਵਿੱਚ ਆਯੋਜਿਤ NCC ਗਣਤੰਤਰ ਦਿਵਸ ਕੈਂਪ ਦੌਰਾਨ ‘ਆਲ ਇੰਡੀਆ ਬੈਸਟ ਕੈਡੇਟ’ ਮੁਕਾਬਲੇ ਵਿੱਚ ਦੂਜਾ ਸਥਾਨ ਹਾਸਲ ਕੀਤਾ ਸੀ। ਇਸ ਤੋਂ ਇਲਾਵਾ, 1993 ਵਿੱਚ ਉਨ੍ਹਾਂ ਨੂੰ ਰਿਪਬਲਿਕ ਡੇ ਕੈਂਪ ਵਿੱਚ ‘ਬੈਸਟ ਪਰੇਡ ਕਮਾਂਡਰ’ ਵਜੋਂ ਸਨਮਾਨਿਤ ਕੀਤਾ ਗਿਆ ਸੀ ਅਤੇ ਉਸੇ ਕੈਂਪ ਵਿੱਚ ਤਤਕਾਲੀ ਪ੍ਰਧਾਨ ਮੰਤਰੀ ਪੀ.ਵੀ. ਨਰਸਿਮਹਾ ਰਾਓ ਦੀ ਰੈਲੀ ਦੌਰਾਨ ਸਾਂਝੇ ਗਾਰਡ ਆਫ਼ ਆਨਰ ਦੀ ਕਮਾਨ ਸੰਭਾਲਣ ਦਾ ਮਾਣ ਵੀ ਪ੍ਰਾਪਤ ਹੋਇਆ ਸੀ।
ਇਨ੍ਹਾਂ ਅਨੁਭਵਾਂ ਨੇ ਕਰਨਲ ਨੋਰੀਨ ਵਿੱਚ ਅਨੁਸ਼ਾਸਨ, ਅਗਵਾਈ ਅਤੇ ਰਾਸ਼ਟਰੀ ਭਾਵਨਾ ਦਾ ਵਿਕਾਸ ਕੀਤਾ, ਜੋ ਉਨ੍ਹਾਂ ਦੇ ਫੌਜੀ ਕਰੀਅਰ ਦੀ ਨੀਂਹ ਬਣੇ। ਕਰਨਲ ਨੋਰੀਨ ਨੂੰ 7 ਮਾਰਚ 1998 ਨੂੰ ਕੋਰ ਆਫ਼ ਇੰਜੀਨੀਅਰਜ਼ ਵਿੱਚ ਕਮੀਸ਼ਨ ਮਿਲਿਆ ਸੀ। 26 ਸਾਲਾਂ ਤੋਂ ਵੱਧ ਦੀ ਸਮਰਪਿਤ ਸੇਵਾ ਦੌਰਾਨ ਉਨ੍ਹਾਂ ਨੇ ਆਪ੍ਰੇਸ਼ਨਲ, ਇੰਸਟ੍ਰਕਸ਼ਨਲ ਅਤੇ ਅਗਵਾਈ ਦੇ ਅਹੁਦਿਆਂ ‘ਤੇ ਕੰਮ ਕਰਦਿਆਂ ਆਪਣੀ ਰਣਨੀਤਕ ਮੁਹਾਰਤ ਦਾ ਪ੍ਰਦਰਸ਼ਨ ਕੀਤਾ ਹੈ।
ਇਹ ਵੀ ਪੜ੍ਹੋ
ਕਰਨਲ ਨੋਰੀਨ ਦੇ ਕਰੀਅਰ ਦੀਆਂ ਪ੍ਰਮੁੱਖ ਪ੍ਰਾਪਤੀਆਂ
ਉਮੀਦਵਾਰਾਂ ਦੀ ਚੋਣ: ਪ੍ਰਯਾਗਰਾਜ ਸਥਿਤ 14ਵੇਂ ਸਰਵਿਸ ਸਿਲੈਕਸ਼ਨ ਬੋਰਡ (SSB) ਵਿੱਚ ਸੀਨੀਅਰ ਗਰੁੱਪ ਟੈਸਟਿੰਗ ਅਫਸਰ ਵਜੋਂ ਕੰਮ ਕਰਦਿਆਂ ਉਨ੍ਹਾਂ ਨੇ ਅਫਸਰ ਬਣਨ ਦੇ ਚਾਹਵਾਨ ਉਮੀਦਵਾਰਾਂ ਦਾ ਮੁਲਾਂਕਣ ਅਤੇ ਚੋਣ ਕਰਨ ਵਿੱਚ ਅਹਿਮ ਭੂਮਿਕਾ ਨਿਭਾਈ।
ਸਥਾਈ ਕਮੀਸ਼ਨ: ਜਨਵਰੀ 2020 ਵਿੱਚ ਉਨ੍ਹਾਂ ਨੂੰ ਸਥਾਈ ਕਮੀਸ਼ਨ ਦਿੱਤਾ ਗਿਆ, ਜੋ ਫੌਜ ਪ੍ਰਤੀ ਉਨ੍ਹਾਂ ਦੀ ਲੰਬੇ ਸਮੇਂ ਦੀ ਵਚਨਬੱਧਤਾ ਨੂੰ ਦਰਸਾਉਂਦਾ ਹੈ।
ਪਦੋਨਤੀ: ਜਨਵਰੀ 2023 ਵਿੱਚ ਉਨ੍ਹਾਂ ਨੂੰ ਕਰਨਲ (ਸਿਲੈਕਟ ਗ੍ਰੇਡ) ਦੇ ਅਹੁਦੇ ‘ਤੇ ਤਰੱਕੀ ਮਿਲੀ।
ਪਤੀ ਵੀ ਰਹਿ ਚੁੱਕੇ ਨੇ ਕਰਨਲ
ਕਰਨਲ ਨੋਰੀਨ ਦੇ ਨਿੱਜੀ ਜੀਵਨ ਦੀ ਗੱਲ ਕਰੀਏ ਤਾਂ ਉਨ੍ਹਾਂ ਦਾ ਵਿਆਹ ਕਰਨਲ ਮੋਨੀਸ਼ ਦਾਸ ਨਾਲ ਹੋਇਆ ਹੈ, ਜੋ ਹੁਣ ਸੇਵਾਮੁਕਤ ਹੋ ਚੁੱਕੇ ਹਨ। ਉਹ ਵੀ ਕੋਰ ਆਫ਼ ਇੰਜੀਨੀਅਰਜ਼ ਦੇ ਇੱਕ ਸਾਥੀ ਅਧਿਕਾਰੀ ਅਤੇ ਮਦਰਾਸ ਸੈਪਰ ਰਹੇ ਹਨ। ਇੱਕ ਐਨ.ਸੀ.ਸੀ. ਕੈਡੇਟ ਤੋਂ ਲੈ ਕੇ ਕਮਾਂਡਿੰਗ ਅਫ਼ਸਰ ਬਣਨ ਤੱਕ ਦੇ ਸਫ਼ਰ ਦੀ ਇਹ ਕਹਾਣੀ ਵਰਦੀ ਪਾ ਕੇ ਦੇਸ਼ ਦੀ ਸੇਵਾ ਕਰਨ ਦੀ ਇੱਛਾ ਰੱਖਣ ਵਾਲੀਆਂ ਮੁਟਿਆਰਾਂ ਲਈ ਪ੍ਰੇਰਣਾ ਦਾ ਸਰੋਤ ਹੈ।
MEG ਅਤੇ ਸੈਂਟਰ ਵਿੱਚ ਭਵਿੱਖ ਦੇ ਅਗਨੀਵੀਰਾਂ ਦੀ ਸਿਖਲਾਈ ਦੀ ਅਗਵਾਈ ਕਰਦਿਆਂ ਕਰਨਲ ਨੋਰੀਨ ਫੌਜ ਦੇ ਮੂਲ ਮੁੱਲਾਂ—ਫਰਜ਼, ਸਨਮਾਨ ਅਤੇ ਨਿਰਸਵਾਰਥ ਸੇਵਾ ਦੀ ਲਗਾਤਾਰ ਪ੍ਰਤੀਨਿਧਤਾ ਕਰ ਰਹੀ ਹੈ। ਉਨ੍ਹਾਂ ਦੀ ਅਗਵਾਈ ਫੌਜ ਦੀ ਇੰਜੀਨੀਅਰਿੰਗ ਰੀੜ੍ਹ ਦੀ ਹੱਡੀ ਨੂੰ ਵੀ ਮਜ਼ਬੂਤ ਕਰਦੀ ਹੈ। ਉਨ੍ਹਾਂ ਦੀ ਸੇਵਾ ਆਉਣ ਵਾਲੀ ਪੀੜ੍ਹੀ ਲਈ ਇੱਕ ਮਿਸਾਲ ਹੈ, ਜੋ ਇਹ ਸਾਬਤ ਕਰਦੀ ਹੈ ਕਿ ਸਮਰਪਣ ਅਤੇ ਯੋਗਤਾ ਕਦੇ ਵੀ ਲਿੰਗ ਵਿੱਚ ਫਰਕ ਨਹੀਂ ਕਰਦੀ।