Holi 2026: ਹੋਲੀ ‘ਤੇ ਭਾਰਤੀ ਬਾਜ਼ਾਰਾਂ ‘ਚ ਰੌਣਕਾਂ, 80 ਹਜ਼ਾਰ ਕਰੋੜ ਦੇ ਕਾਰੋਬਾਰ ਦੀ ਉਮੀਦ
Holi 2026: ਇਸ ਵਾਰ ਰੰਗਾਂ ਦਾ ਤਿਉਹਾਰ ਹੋਲੀ ਦੇਸ਼ ਭਰ ਦੇ ਵਪਾਰੀਆਂ ਲਈ ਇੱਕ ਵੱਡੀ ਖੁਸ਼ਖਬਰੀ ਲੈ ਕੇ ਆ ਰਿਹਾ ਹੈ। 'ਕਨਫੈਡਰੇਸ਼ਨ ਆਫ ਆਲ ਇੰਡੀਆ ਟ੍ਰੇਡਰਜ਼' ਦੇ ਅਨੁਸਾਰ, ਇਸ ਸਾਲ ਹੋਲੀ ਦੇ ਮੌਕੇ 'ਤੇ ਬਾਜ਼ਾਰਾਂ ਵਿੱਚ 80,000 ਕਰੋੜ ਰੁਪਏ ਤੋਂ ਵੱਧ ਦੇ ਸ਼ਾਨਦਾਰ ਕਾਰੋਬਾਰ ਹੋਣ ਦੀ ਉਮੀਦ ਹੈ।
ਇਸ ਵਾਰ ਰੰਗਾਂ ਦਾ ਤਿਉਹਾਰ ਹੋਲੀ ਦੇਸ਼ ਭਰ ਦੇ ਵਪਾਰੀਆਂ ਲਈ ਇੱਕ ਵੱਡੀ ਖੁਸ਼ਖਬਰੀ ਲੈ ਕੇ ਆ ਰਿਹਾ ਹੈ। ‘ਕਨਫੈਡਰੇਸ਼ਨ ਆਫ ਆਲ ਇੰਡੀਆ ਟ੍ਰੇਡਰਜ਼’ ਦੇ ਅਨੁਸਾਰ, ਇਸ ਸਾਲ ਹੋਲੀ ਦੇ ਮੌਕੇ ‘ਤੇ ਬਾਜ਼ਾਰਾਂ ਵਿੱਚ 80,000 ਕਰੋੜ ਰੁਪਏ ਤੋਂ ਵੱਧ ਦੇ ਸ਼ਾਨਦਾਰ ਕਾਰੋਬਾਰ ਹੋਣ ਦੀ ਉਮੀਦ ਹੈ। ਇਹ ਅੰਕੜਾ ਪਿਛਲੇ ਸਾਲ ਦੇ 60,000 ਕਰੋੜ ਰੁਪਏ ਦੇ ਮੁਕਾਬਲੇ ਲਗਭਗ 25 ਪ੍ਰਤੀਸ਼ਤ ਜ਼ਿਆਦਾ ਹੈ, ਜੋ ਭਾਰਤੀ ਆਰਥਿਕਤਾ ਲਈ ਇੱਕ ਉਤਸ਼ਾਹਜਨਕ ਸੰਕੇਤ ਹੈ।
ਚੀਨੀ ਉਤਪਾਦਾਂ ਦਾ ਬਾਜ਼ਾਰ ‘ਚੋਂ ਮੁਕੰਮਲ ਸਫਾਇਆ
ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੇ ‘ਵੋਕਲ ਫਾਰ ਲੋਕਲ’ ਅਭਿਆਨ ਦਾ ਅਸਰ ਹੁਣ ਜ਼ਮੀਨੀ ਪੱਧਰ ‘ਤੇ ਸਾਫ਼ ਨਜ਼ਰ ਆਉਣ ਲੱਗਾ ਹੈ। ਇੱਕ ਸਮਾਂ ਸੀ ਜਦੋਂ ਹੋਲੀ ਦੇ ਬਾਜ਼ਾਰਾਂ ਵਿੱਚ ਪੂਰੀ ਤਰ੍ਹਾਂ ਚੀਨੀ ਪਿਚਕਾਰੀਆਂ ਅਤੇ ਹੋਰ ਸਾਮਾਨ ਦਾ ਕਬਜ਼ਾ ਹੁੰਦਾ ਸੀ। ਪਰ ਸਾਲ 2021 ਤੋਂ ਬਾਅਦ ਹਾਲਾਤ ਤੇਜ਼ੀ ਨਾਲ ਬਦਲੇ ਹਨ ਅਤੇ ਹੁਣ ਭਾਰਤੀ ਬਾਜ਼ਾਰਾਂ ਵਿੱਚ ਪੂਰੀ ਤਰ੍ਹਾਂ ਸਵਦੇਸ਼ੀ ਉਤਪਾਦਾਂ ਦਾ ਦਬਦਬਾ ਹੈ।
ਗਾਹਕ ਹੁਣ ਭਾਰਤ ਵਿੱਚ ਬਣੇ ਕੁਦਰਤੀ ਰੰਗ, ਹਰਬਲ ਗੁਲਾਲ, ਚੰਦਨ ਅਤੇ ਪੂਜਾ ਸਮੱਗਰੀ ਨੂੰ ਪਹਿਲ ਦੇ ਰਹੇ ਹਨ। ਦੇਸੀ ਕਾਰੀਗਰਾਂ ਵੱਲੋਂ ਤਿਆਰ ਕੀਤੀਆਂ ਪਿਚਕਾਰੀਆਂ, ਗੁਬਾਰੇ ਅਤੇ ਹੋਰ ਸਾਮਾਨ ਹੱਥੋਂ-ਹੱਥ ਵਿਕ ਰਹੇ ਹਨ। ਇਸ ਨਾਲ ਕੁਟੀਰ ਉਦਯੋਗਾਂ ਅਤੇ ਛੋਟੇ ਵਪਾਰੀਆਂ ਨੂੰ ਸਿੱਧਾ ਆਰਥਿਕ ਲਾਭ ਮਿਲ ਰਿਹਾ ਹੈ ਅਤੇ ਵਿਦੇਸ਼ੀ ਨਿਰਭਰਤਾ ਖਤਮ ਹੋਣ ਨਾਲ ਸਥਾਨਕ ਕਾਰੋਬਾਰੀਆਂ ਦੇ ਚਿਹਰਿਆਂ ‘ਤੇ ਖੁਸ਼ੀ ਦੇਖਣ ਨੂੰ ਮਿਲ ਰਹੀ ਹੈ।
ਹਰਬਲ ਰੰਗਾਂ ਅਤੇ ਰਵਾਇਤੀ ਪਹਿਰਾਵੇ ਦੀ ਭਾਰੀ ਮੰਗ
ਲੋਕ ਹੁਣ ਆਪਣੀ ਸਿਹਤ ਅਤੇ ਚਮੜੀ ਨੂੰ ਲੈ ਕੇ ਕਾਫ਼ੀ ਜਾਗਰੂਕ ਹੋ ਗਏ ਹਨ। ਇਸ ਕਾਰਨ ਕੈਮੀਕਲ ਵਾਲੇ ਪੱਕੇ ਰੰਗਾਂ ਦੀ ਜਗ੍ਹਾ ਹਰਬਲ ਅਤੇ ਕੁਦਰਤੀ ਰੰਗਾਂ ਦੀ ਮੰਗ ਵਿੱਚ ਜ਼ਬਰਦਸਤ ਵਾਧਾ ਹੋਇਆ ਹੈ। ਦੂਜੇ ਪਾਸੇ, ਬੱਚਿਆਂ ਵਿੱਚ ਸਪਾਈਡਰ-ਮੈਨ ਅਤੇ ਛੋਟਾ ਭੀਮ ਵਰਗੇ ਮਸ਼ਹੂਰ ਕਿਰਦਾਰਾਂ ਵਾਲੀਆਂ ਪਿਚਕਾਰੀਆਂ ਖਿੱਚ ਦਾ ਕੇਂਦਰ ਬਣੀਆਂ ਹੋਈਆਂ ਹਨ।
ਰੰਗਾਂ ਤੋਂ ਇਲਾਵਾ ਕੱਪੜਾ ਬਾਜ਼ਾਰ ਵਿੱਚ ਵੀ ਭਾਰੀ ਤੇਜ਼ੀ ਦਰਜ ਕੀਤੀ ਗਈ ਹੈ। ਹੋਲੀ ਖੇਡਣ ਲਈ ਖਾਸ ਤੌਰ ‘ਤੇ ਚਿੱਟੀਆਂ ਟੀ-ਸ਼ਰਟਾਂ, ਰਵਾਇਤੀ ਕੁੜਤਾ-ਪਜਾਮਾ ਅਤੇ ਸਲਵਾਰ-ਸੂਟ ਦੀ ਜੰਮ ਕੇ ਖਰੀਦਦਾਰੀ ਹੋ ਰਹੀ ਹੈ। ਹੈਪੀ ਹੋਲੀ ਦੇ ਸੰਦੇਸ਼ ਵਾਲੀਆਂ ਪ੍ਰਿੰਟਿਡ ਟੀ-ਸ਼ਰਟਾਂ ਵੀ ਵੱਡੀ ਗਿਣਤੀ ਵਿੱਚ ਵਿਕ ਰਹੀਆਂ ਹਨ।
ਇਹ ਵੀ ਪੜ੍ਹੋ
ਦਿੱਲੀ ਦੇ ਬਾਜ਼ਾਰਾਂ ਵਿੱਚ ਜ਼ਬਰਦਸਤ ਹਲਚਲ
ਵਪਾਰਕ ਗਤੀਵਿਧੀਆਂ ਦੇ ਲਿਹਾਜ਼ ਨਾਲ ਰਾਜਧਾਨੀ ਦਿੱਲੀ ਵਿੱਚ ਸਭ ਤੋਂ ਵੱਧ ਹਲਚਲ ਦੇਖਣ ਨੂੰ ਮਿਲ ਰਹੀ ਹੈ। ਕੈਟ ਦੇ ਕੌਮੀ ਜਨਰਲ ਸਕੱਤਰ ਅਤੇ ਚਾਂਦਨੀ ਚੌਕ ਤੋਂ ਸੰਸਦ ਮੈਂਬਰ ਪ੍ਰਵੀਨ ਖੰਡੇਲਵਾਲ ਦੇ ਮੁਤਾਬਕ, ਇਕੱਲੀ ਦਿੱਲੀ ਵਿੱਚ 15,000 ਕਰੋੜ ਰੁਪਏ ਦਾ ਵਪਾਰ ਹੋਣ ਦਾ ਅਨੁਮਾਨ ਹੈ। ਦਿੱਲੀ ਦੇ ਥੋਕ ਅਤੇ ਪ੍ਰਚੂਨ ਬਾਜ਼ਾਰ ਗਾਹਕਾਂ ਦੀ ਭਾਰੀ ਭੀੜ ਨਾਲ ਖਚਾਖਚ ਭਰੇ ਹੋਏ ਹਨ। ਮਿਠਾਈ ਦੀਆਂ ਦੁਕਾਨਾਂ ‘ਤੇ ਗੁਝੀਆ ਅਤੇ ਡਰਾਈ ਫਰੂਟਸ ਦੇ ਪੈਕਟਾਂ ਦੀ ਮੰਗ ਅਸਮਾਨ ਨੂੰ ਛੂਹ ਰਹੀ ਹੈ।
ਸਰਵਿਸ ਸੈਕਟਰ ਵਿੱਚ ਉਛਾਲ
ਹੋਲੀ ਕੇਵਲ ਰੰਗਾਂ ਦਾ ਹੀ ਨਹੀਂ, ਸਗੋਂ ਸਮਾਜਿਕ ਮੇਲ-ਜੋਲ ਦਾ ਵੀ ਤਿਉਹਾਰ ਹੈ। ਦੇਸ਼ ਭਰ ਵਿੱਚ ਹੋਲੀ ਮਿਲਨ ਸਮਾਗਮਾਂ ਦਾ ਵੱਡੇ ਪੱਧਰ ‘ਤੇ ਆਯੋਜਨ ਕੀਤਾ ਜਾ ਰਿਹਾ ਹੈ। ਇਕੱਲੀ ਦਿੱਲੀ ਵਿੱਚ ਵੱਖ-ਵੱਖ ਜਥੇਬੰਦੀਆਂ ਵੱਲੋਂ 3,000 ਤੋਂ ਵੱਧ ਅਜਿਹੇ ਪ੍ਰੋਗਰਾਮ ਉਲੀਕੇ ਗਏ ਹਨ। ਇਨ੍ਹਾਂ ਆਯੋਜਨਾਂ ਕਾਰਨ ਸਰਵਿਸ ਅਤੇ ਹਾਸਪਿਟੈਲਿਟੀ ਸੈਕਟਰ, ਜਿਵੇਂ ਕਿ ਬੈਂਕੁਏਟ ਹਾਲ, ਫਾਰਮ ਹਾਊਸ ਅਤੇ ਰੈਸਟੋਰੈਂਟਾਂ ਨੂੰ ਭਾਰੀ ਮੁਨਾਫਾ ਹੋ ਰਿਹਾ ਹੈ।
