Car Insurance Claim: ਇਨ੍ਹਾਂ ਛੋਟੀਆਂ ਗਲਤੀਆਂ ਕਾਰਨ ਰੱਦ ਹੋ ਜਾਂਦਾ ਹੈ ਦਾਅਵਾ, ਨਹੀਂ ਮਿਲਦਾ ਕਲੇਮ ਦਾ ਇੱਕ ਵੀ ਪੈਸਾ
Car Insurance Claim: ਕਾਰ ਦਾ ਬੀਮਾ ਹੋਣ ਦੇ ਬਾਵਜੂਦ ਵੀ ਕਲੇਮ ਰੱਦ ਹੋਣਾ ਆਮ ਗੱਲ ਹੈ। ਲੋਕ ਇਸ ਲਈ ਕੰਪਨੀਆਂ ਨੂੰ ਦੋਸ਼ ਦਿੰਦੇ ਹਨ, ਪਰ ਹਕੀਕਤ ਵਿੱਚ ਐਕਸਪਾਇਰਡ ਲਾਇਸੈਂਸ, ਦੇਰ ਨਾਲ ਜਾਣਕਾਰੀ ਦੇਣਾ ਜਾਂ ਨਸ਼ੇ ਵਿੱਚ ਡਰਾਈਵਿੰਗ ਵਰਗੀਆਂ ਸਾਡੀਆਂ ਗਲਤੀਆਂ ਹੀ ਇਸ ਦੀ ਅਸਲ ਵਜ੍ਹਾ ਬਣਦੀਆਂ ਹਨ।
ਜਾਣੋ ਕਲੇਮ ਰੱਦ ਹੋਣ ਦੇ ਕਾਰਨ
Insurance Claim: ਗੱਡੀ ਦਾ ਐਕਸੀਡੈਂਟ ਹੋਣਾ ਕਿਸੇ ਵੀ ਕਾਰ ਮਾਲਕ ਲਈ ਵੱਡਾ ਝਟਕਾ ਹੁੰਦਾ ਹੈ। ਗੱਡੀ ਦੇ ਨੁਕਸਾਨ ਦਾ ਦੁੱਖ ਤਾਂ ਹੁੰਦਾ ਹੀ ਹੈ, ਪਰ ਅਸਲ ਪਰੇਸ਼ਾਨੀ ਉਦੋਂ ਸ਼ੁਰੂ ਹੁੰਦੀ ਹੈ ਜਦੋਂ ਬੀਮਾ ਕੰਪਨੀ ਤੁਹਾਡਾ ਕਲੇਮ ਰੱਦ ਕਰ ਦਿੰਦੀ ਹੈ। ਜ਼ਿਆਦਾਤਰ ਲੋਕ ਇਹ ਮੰਨ ਲੈਂਦੇ ਹਨ ਕਿ ਕੰਪਨੀਆਂ ਪੈਸੇ ਬਚਾਉਣ ਲਈ ਜਾਣਬੁੱਝ ਕੇ ਅਜਿਹਾ ਕਰਦੀਆਂ ਹਨ। ਹਕੀਕਤ ਵਿੱਚ ਅਜਿਹਾ ਨਹੀਂ ਹੈ। ਕਈ ਵਾਰ ਪਾਲਿਸੀਧਾਰਕ ਦੀ ਆਪਣੀ ਲਾਪਰਵਾਹੀ ਹੀ ਕਲੇਮ ਰੱਦ ਹੋਣ ਦਾ ਕਾਰਨ ਬਣਦੀ ਹੈ। ਅੱਜ ਅਸੀਂ ਉਨ੍ਹਾਂ ਹੀ ਗਲਤੀਆਂ ਬਾਰੇ ਗੱਲ ਕਰਾਂਗੇ, ਜਿਨ੍ਹਾਂ ਕਾਰਨ ਤੁਹਾਨੂੰ ਵੱਡਾ ਆਰਥਿਕ ਨੁਕਸਾਨ ਹੋ ਸਕਦਾ ਹੈ।
ਨਸ਼ੇ ਵਿੱਚ ਡਰਾਈਵਿੰਗ ਹੈ ਸਭ ਤੋਂ ਵੱਡਾ ਕਾਰਨ
ਭਾਰਤ ਵਿੱਚ ਸ਼ਰਾਬ ਪੀ ਕੇ ਗੱਡੀ ਚਲਾਉਣਾ ਕਾਨੂੰਨੀ ਤੌਰ ‘ਤੇ ਅਪਰਾਧ ਹੈ। ਜੇਕਰ ਐਕਸੀਡੈਂਟ ਦੇ ਸਮੇਂ ਡਰਾਈਵਰ ਨਸ਼ੇ ਵਿੱਚ ਪਾਇਆ ਜਾਂਦਾ ਹੈ, ਤਾਂ ਮੋਟਰ ਬੀਮਾ ਕੰਪਨੀਆਂ ਵੱਲੋਂ ਕੋਈ ਰਾਹਤ ਨਹੀਂ ਦਿੱਤੀ ਜਾਂਦੀ। ਅਜਿਹੇ ਮਾਮਲਿਆਂ ਵਿੱਚ ਕੰਪਨੀ ਬਿਨਾਂ ਕਿਸੇ ਹੋਰ ਕਾਰਨ ਦੇ ਸਿੱਧਾ ਤੁਹਾਡਾ ਕਲੇਮ ਰੱਦ ਕਰ ਸਕਦੀ ਹੈ। ਭਾਵੇਂ ਗੱਡੀ ਨੂੰ ਕਿੰਨਾ ਵੀ ਵੱਡਾ ਨੁਕਸਾਨ ਕਿਉਂ ਨਾ ਹੋਇਆ ਹੋਵੇ, ਤੁਹਾਨੂੰ ਪੂਰਾ ਖਰਚਾ ਆਪਣੀ ਜੇਬ ਵਿੱਚੋਂ ਹੀ ਚੁੱਕਣਾ ਪੈ ਸਕਦਾ ਹੈ।
ਲਾਇਸੈਂਸ ਨਾਲ ਜੁੜੀ ਛੋਟੀ ਲਾਪਰਵਾਹੀ
ਭਾਰਤ ਵਿੱਚ ਕਲੇਮ ਰੱਦ ਹੋਣ ਦੀ ਇੱਕ ਬਹੁਤ ਆਮ ਵਜ੍ਹਾ ਵੈਧ ਡਰਾਈਵਿੰਗ ਲਾਇਸੈਂਸ ਦਾ ਨਾ ਹੋਣਾ ਹੈ। ਕਈ ਵਾਰ ਲੋਕ ਟੂ-ਵ੍ਹੀਲਰ ਦੇ ਲਾਇਸੈਂਸ ‘ਤੇ ਕਾਰ ਚਲਾਉਂਦੇ ਹੋਏ ਹਾਦਸੇ ਦਾ ਸ਼ਿਕਾਰ ਹੋ ਜਾਂਦੇ ਹਨ। ਅਜਿਹੇ ਮਾਮਲਿਆਂ ਵਿੱਚ ਕਲੇਮ ਪਾਸ ਨਹੀਂ ਹੁੰਦਾ। ਇਸੇ ਤਰ੍ਹਾਂ ਜੇਕਰ ਤੁਹਾਡਾ ਲਾਇਸੈਂਸ ਐਕਸਪਾਇਰ ਹੋ ਚੁੱਕਾ ਹੈ, ਤਾਂ ਵੀ ਬੀਮਾ ਕੰਪਨੀ ਕਲੇਮ ਰੱਦ ਕਰ ਸਕਦੀ ਹੈ। ਗੱਡੀ ਚਲਾਉਂਦੇ ਸਮੇਂ ਹਮੇਸ਼ਾ ਵੈਧ ਡਰਾਈਵਿੰਗ ਲਾਇਸੈਂਸ ਰੱਖਣਾ ਜ਼ਰੂਰੀ ਹੈ।
ਸਮੇਂ ਸਿਰ ਜਾਣਕਾਰੀ ਦੇਣਾ ਬੇਹੱਦ ਜ਼ਰੂਰੀ
ਹਰ ਬੀਮਾ ਪਾਲਿਸੀ ਵਿੱਚ ਕੰਪਨੀ ਨੂੰ ਨੁਕਸਾਨ ਦੀ ਜਾਣਕਾਰੀ ਦੇਣ ਲਈ ਇੱਕ ਸਮਾਂ ਸੀਮਾ ਤੈਅ ਹੁੰਦੀ ਹੈ। ਜੇਕਰ ਤੁਸੀਂ ਉਸ ਤੈਅ ਸਮੇਂ ਤੋਂ ਬਾਅਦ ਕਲੇਮ ਬਾਰੇ ਜਾਣਕਾਰੀ ਦਿੰਦੇ ਹੋ, ਤਾਂ ਕੰਪਨੀ ਇਸ ਨੂੰ Late Intimation ਮੰਨ ਕੇ ਕਲੇਮ ਰੱਦ ਕਰ ਸਕਦੀ ਹੈ। ਮਾਹਰ ਹਮੇਸ਼ਾ ਇਹ ਸਲਾਹ ਦਿੰਦੇ ਹਨ ਕਿ ਹਾਦਸੇ ਤੋਂ ਤੁਰੰਤ ਬਾਅਦ ਬੀਮਾ ਕੰਪਨੀ ਨੂੰ ਇਸ ਦੀ ਜਾਣਕਾਰੀ ਦੇਣੀ ਚਾਹੀਦੀ ਹੈ। ਦੇਰੀ ਕਰਨ ਨਾਲ ਤੁਹਾਡੀ ਹੀ ਪਰੇਸ਼ਾਨੀ ਵੱਧ ਸਕਦੀ ਹੈ।
ਨਿੱਜੀ ਕਾਰ ਦਾ ਕਮਰਸ਼ੀਅਲ ਇਸਤੇਮਾਲ
ਲੋਕ ਅਕਸਰ ਨਿੱਜੀ ਵਰਤੋਂ ਲਈ ਬੀਮਾ ਕਰਵਾਉਂਦੇ ਹਨ, ਪਰ ਬਾਅਦ ਵਿੱਚ ਗੱਡੀ ਦੀ ਵਰਤੋਂ ਕੈਬ ਜਾਂ ਡਿਲੀਵਰੀ ਵਰਗੇ ਕਮਰਸ਼ੀਅਲ ਕੰਮਾਂ ਲਈ ਕਰਨ ਲੱਗਦੇ ਹਨ। ਕਮਰਸ਼ੀਅਲ ਕੰਮ ਲਈ ਵੱਖਰੀ ਕਿਸਮ ਦੀ ਪਾਲਿਸੀ ਹੁੰਦੀ ਹੈ। ਅਜਿਹੇ ਵਿੱਚ ਜੇਕਰ ਤੁਹਾਡੀ ਨਿੱਜੀ ਗੱਡੀ ਦਾ ਐਕਸੀਡੈਂਟ ਕਮਰਸ਼ੀਅਲ ਕੰਮ ਦੌਰਾਨ ਹੁੰਦਾ ਹੈ, ਤਾਂ ਕਲੇਮ ਰੱਦ ਹੋ ਸਕਦਾ ਹੈ। ਇਸ ਤੋਂ ਇਲਾਵਾ ਜੇਕਰ ਪਾਲਿਸੀ ਖਤਮ ਹੋ ਚੁੱਕੀ ਹੈ ਜਾਂ ਤੁਸੀਂ ਕੰਪਨੀ ਨੂੰ ਦੱਸੇ ਬਿਨਾਂ ਗੱਡੀ ਦੇ ਇੰਜਣ ਜਾਂ ਬਾਡੀ ਵਿੱਚ ਕੋਈ ਵੱਡਾ ਬਦਲਾਅ ਕੀਤਾ ਹੈ, ਤਾਂ ਵੀ ਕਲੇਮ ਨਹੀਂ ਮਿਲ ਸਕਦਾ। ਅਜਿਹਾ ਕਰਨ ਨਾਲ ਗੱਡੀ ਦਾ ਅਸਲ ਸਰੂਪ ਬਦਲ ਜਾਂਦਾ ਹੈ।
ਇਹ ਵੀ ਪੜ੍ਹੋ
ਕਲੇਮ ਰੱਦ ਹੋਣ ‘ਤੇ ਕੀ ਹੈ ਵਿਕਲਪ?
ਜੇਕਰ ਤੁਹਾਨੂੰ ਲੱਗਦਾ ਹੈ ਕਿ ਕੰਪਨੀ ਨੇ ਗਲਤ ਤਰੀਕੇ ਨਾਲ ਤੁਹਾਡਾ ਕਲੇਮ ਰੱਦ ਕੀਤਾ ਹੈ, ਤਾਂ ਤੁਹਾਡੇ ਕੋਲ ਸ਼ਿਕਾਇਤ ਕਰਨ ਦੇ ਰਸਤੇ ਮੌਜੂਦ ਹਨ। ਤੁਸੀਂ ਸਭ ਤੋਂ ਪਹਿਲਾਂ ਬੀਮਾ ਕੰਪਨੀ ਦੇ Internal Grievance Cell ਵਿੱਚ ਆਪਣੀ ਅਪੀਲ ਕਰ ਸਕਦੇ ਹੋ। ਜੇਕਰ ਉੱਥੋਂ ਵੀ ਕੋਈ ਸੰਤੋਸ਼ਜਨਕ ਜਵਾਬ ਨਹੀਂ ਮਿਲਦਾ, ਤਾਂ ਤੁਸੀਂ ਸਿੱਧੇ IRDAI (Insurance Regulatory and Development Authority of India) ਕੋਲ ਆਪਣੀ ਸ਼ਿਕਾਇਤ ਦਰਜ ਕਰਵਾ ਸਕਦੇ ਹੋ।