“ਜੋ ਦੇਸ਼ ਸਾਥ ਨਹੀਂ, ਉੱਥੇ ਫੌਜੀ ਅੱਡਿਆਂ ਦਾ ਕੀ ਫਾਇਦਾ?” ਟਰੰਪ ਦੇ ‘ਯੁੱਧ ਗੁਰੂ’ ਦੀ ਦੁਨੀਆ ਨੂੰ ਖੁੱਲ੍ਹੀ ਚੇਤਾਵਨੀ
ਈਰਾਨ ਨਾਲ ਚੱਲ ਰਹੀ ਭਿਆਨਕ ਜੰਗ ਦੇ ਵਿਚਕਾਰ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੇ ਕਰੀਬੀ ਅਤੇ 'ਯੁੱਧ ਗੁਰੂ' ਮੰਨੇ ਜਾਣ ਵਾਲੇ ਸੀਨੇਟਰ ਲਿੰਡਸੇ ਗ੍ਰਾਹਮ ਨੇ ਇੱਕ ਵੱਡੀ ਅਤੇ ਨਵੀਂ ਸਲਾਹ ਦਿੱਤੀ ਹੈ। ਗ੍ਰਾਹਮ ਨੇ ਸਪੱਸ਼ਟ ਸ਼ਬਦਾਂ ਵਿੱਚ ਕਿਹਾ ਹੈ ਕਿ ਅਮਰੀਕਾ ਹੁਣ ਉਨ੍ਹਾਂ ਦੇਸ਼ਾਂ ਵਿੱਚ ਆਪਣੇ ਫੌਜੀ ਅੱਡੇ ਨਹੀਂ ਰੱਖੇਗਾ, ਜਿਨ੍ਹਾਂ ਨੇ ਜੰਗ ਦੌਰਾਨ ਅਮਰੀਕੀ ਬੇਸ ਦੀ ਵਰਤੋਂ ਕਰਨ ਦੀ ਇਜਾਜ਼ਤ ਨਹੀਂ ਦਿੱਤੀ ਹੈ।
ਈਰਾਨ ਨਾਲ ਚੱਲ ਰਹੀ ਭਿਆਨਕ ਜੰਗ ਦੇ ਵਿਚਕਾਰ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੇ ਕਰੀਬੀ ਅਤੇ ‘ਯੁੱਧ ਗੁਰੂ’ ਮੰਨੇ ਜਾਣ ਵਾਲੇ ਸੀਨੇਟਰ ਲਿੰਡਸੇ ਗ੍ਰਾਹਮ ਨੇ ਇੱਕ ਵੱਡੀ ਅਤੇ ਨਵੀਂ ਸਲਾਹ ਦਿੱਤੀ ਹੈ। ਗ੍ਰਾਹਮ ਨੇ ਸਪੱਸ਼ਟ ਸ਼ਬਦਾਂ ਵਿੱਚ ਕਿਹਾ ਹੈ ਕਿ ਅਮਰੀਕਾ ਹੁਣ ਉਨ੍ਹਾਂ ਦੇਸ਼ਾਂ ਵਿੱਚ ਆਪਣੇ ਫੌਜੀ ਅੱਡੇ ਨਹੀਂ ਰੱਖੇਗਾ, ਜਿਨ੍ਹਾਂ ਨੇ ਜੰਗ ਦੌਰਾਨ ਅਮਰੀਕੀ ਬੇਸ ਦੀ ਵਰਤੋਂ ਕਰਨ ਦੀ ਇਜਾਜ਼ਤ ਨਹੀਂ ਦਿੱਤੀ ਹੈ। ਉਨ੍ਹਾਂ ਸਵਾਲ ਉਠਾਇਆ ਕਿ ਜੇਕਰ ਲੋੜ ਪੈਣ ‘ਤੇ ਅਮਰੀਕਾ ਇਨ੍ਹਾਂ ਅੱਡਿਆਂ ਦੀ ਵਰਤੋਂ ਹੀ ਨਹੀਂ ਕਰ ਸਕਦਾ, ਤਾਂ ਅਜਿਹੇ ਦੇਸ਼ਾਂ ਵਿੱਚ ਅਰਬਾਂ ਡਾਲਰ ਖ਼ਰਚ ਕੇ ਫੌਜੀ ਟਿਕਾਣੇ ਰੱਖਣ ਦਾ ਕੀ ਫਾਇਦਾ?
ਯੂਰਪੀ ਦੇਸ਼ਾਂ ਦੀ ਨਾਂਹ ਨੇ ਵਧਾਇਆ ਤਣਾਅ
ਜ਼ਿਕਰਯੋਗ ਹੈ ਕਿ ਸਪੇਨ ਅਤੇ ਜਰਮਨੀ ਵਰਗੇ ਕਈ ਪ੍ਰਮੁੱਖ ਦੇਸ਼ਾਂ ਨੇ ਆਪਣੇ ਦੇਸ਼ ਵਿੱਚ ਮੌਜੂਦ ਅਮਰੀਕੀ ਫੌਜੀ ਅੱਡਿਆਂ ਨੂੰ ਈਰਾਨ ਵਿਰੁੱਧ ਜੰਗ ਵਿੱਚ ਸ਼ਾਮਲ ਹੋਣ ਦੀ ਇਜਾਜ਼ਤ ਦੇਣ ਤੋਂ ਇਨਕਾਰ ਕਰ ਦਿੱਤਾ ਹੈ। ਅਮਰੀਕਾ ਦੇ ਇਸ ਸਮੇਂ ਵਿਸ਼ਵ ਭਰ ਦੇ 80 ਤੋਂ ਵੱਧ ਦੇਸ਼ਾਂ ਵਿੱਚ ਕੁੱਲ 750 ਤੋਂ ਵੱਧ ਫੌਜੀ ਟਿਕਾਣੇ ਹਨ, ਜਿਨ੍ਹਾਂ ਵਿੱਚੋਂ 55 ਦੇਸ਼ਾਂ ਵਿੱਚ 128 ਮੁੱਖ ਬੇਸ ਸ਼ਾਮਲ ਹਨ। ਇਕੱਲੇ ਯੂਰਪ ਵਿੱਚ ਹੀ ਅਮਰੀਕਾ ਦੇ ਕਰੀਬ ਤਿੰਨ ਦਰਜਨ ਫੌਜੀ ਅੱਡੇ ਹਨ, ਜਿੱਥੇ ਲਗਭਗ 80 ਹਜ਼ਾਰ ਅਮਰੀਕੀ ਸੈਨਿਕ ਤਾਇਨਾਤ ਹਨ।
ਕਿੱਥੇ-ਕਿੱਥੇ ਹਨ ਅਮਰੀਕੀ ਫੌਜੀ ਅੱਡੇ?
ਅਮਰੀਕਾ ਦਾ ਸਭ ਤੋਂ ਵੱਡਾ ਫੌਜੀ ਨੈੱਟਵਰਕ ਜਰਮਨੀ ਵਿੱਚ ਹੈ। ਇਸ ਤੋਂ ਇਲਾਵਾ ਇਟਲੀ, ਬ੍ਰਿਟੇਨ, ਸਪੇਨ ਅਤੇ ਪੋਲੈਂਡ ਵਿੱਚ ਵੀ ਵੱਡੇ ਅੱਡੇ ਮੌਜੂਦ ਹਨ। ਮੱਧ ਪੂਰਬ ਦੀ ਗੱਲ ਕਰੀਏ ਤਾਂ ਇੱਥੇ ਦਸ ਦੇਸ਼ਾਂ ਵਿੱਚ ਅਮਰੀਕੀ ਬੇਸ ਹਨ, ਜਿਨ੍ਹਾਂ ਵਿੱਚੋਂ ਕਤਰ ਵਿੱਚ ਸਭ ਤੋਂ ਵੱਡਾ ਅੱਡਾ ਹੈ ਅਤੇ ਬਹਿਰੀਨ ਵਿੱਚ ਅਮਰੀਕੀ ਜਲ ਸੈਨਾ ਦੀ ‘5th ਫਲੀਟ’ ਦਾ ਮੁੱਖ ਦਫ਼ਤਰ ਹੈ। ਯੂਰਪੀ ਦੇਸ਼ ਡਰ ਰਹੇ ਹਨ ਕਿ ਜੇਕਰ ਉਹ ਆਪਣੀ ਜ਼ਮੀਨ ਜਾਂ ਹਵਾਈ ਖੇਤਰ ਦੀ ਵਰਤੋਂ ਕਰਨ ਦਿੰਦੇ ਹਨ, ਤਾਂ ਈਰਾਨ ਨੂੰ ਉਨ੍ਹਾਂ ‘ਤੇ ਹਮਲਾ ਕਰਨ ਦਾ ਬਹਾਨਾ ਮਿਲ ਜਾਵੇਗਾ।
ਰਾਸ਼ਟਰਪਤੀ ਟਰੰਪ ਦੀ ਨਾਟੋ ਦੇਸ਼ਾਂ ਨੂੰ ਫਿਟਕਾਰ
ਇਸ ਤੋਂ ਪਹਿਲਾਂ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਨਾਟੋ ਦੇਸ਼ਾਂ ਦੀ ਸਖ਼ਤ ਨਿਖੇਧੀ ਕਰਦਿਆਂ ਉਨ੍ਹਾਂ ਨੂੰ ‘ਕਾਗਜ਼ੀ ਸ਼ੇਰ’ ਕਰਾਰ ਦਿੱਤਾ ਹੈ। ਟਰੰਪ ਨੇ ਕਿਹਾ ਕਿ ਅਮਰੀਕਾ ਤੋਂ ਬਿਨਾਂ ਨਾਟੋ ਦੀ ਕੋਈ ਹੋਂਦ ਨਹੀਂ ਹੈ। ਉਨ੍ਹਾਂ ਦੋਸ਼ ਲਾਇਆ ਕਿ ਜਦੋਂ ਪਰਮਾਣੂ ਸ਼ਕਤੀ ਵਾਲੇ ਈਰਾਨ ਨੂੰ ਰੋਕਣ ਦੀ ਲੜਾਈ ਚੱਲ ਰਹੀ ਸੀ, ਤਾਂ ਇਹ ਦੇਸ਼ ਪਿੱਛੇ ਹਟ ਗਏ। ਹੁਣ ਜਦੋਂ ਅਮਰੀਕਾ ਨੇ ਫੌਜੀ ਤੌਰ ‘ਤੇ ਜਿੱਤ ਹਾਸਲ ਕਰ ਲਈ ਹੈ, ਤਾਂ ਇਹ ਦੇਸ਼ ਤੇਲ ਦੀਆਂ ਵਧਦੀਆਂ ਕੀਮਤਾਂ ਦਾ ਰੋਣਾ ਰੋ ਰਹੇ ਹਨ।
“ਬੁਜ਼ਦਿਲੋ, ਅਸੀਂ ਇਹ ਗੱਲ ਯਾਦ ਰੱਖਾਂਗੇ”
ਟਰੰਪ ਨੇ ਅੱਗੇ ਬੇਹੱਦ ਤਲਖ਼ ਲਹਿਜੇ ਵਿੱਚ ਕਿਹਾ ਕਿ ਨਾਟੋ ਦੇਸ਼ ‘ਹੋਰਮੁਜ਼ ਸਟ੍ਰੇਟ’ ਨੂੰ ਖੋਲ੍ਹਣ ਵਿੱਚ ਮਦਦ ਨਹੀਂ ਕਰਨਾ ਚਾਹੁੰਦੇ, ਜੋ ਕਿ ਤੇਲ ਦੀਆਂ ਕੀਮਤਾਂ ਘਟਾਉਣ ਦਾ ਇੱਕੋ-ਇੱਕ ਰਸਤਾ ਹੈ। ਉਨ੍ਹਾਂ ਕਿਹਾ ਕਿ ਇਹ ਇੱਕ ਸੌਖੀ ਫੌਜੀ ਕਾਰਵਾਈ ਹੈ ਜਿਸ ਵਿੱਚ ਜੋਖਮ ਵੀ ਘੱਟ ਹੈ, ਫਿਰ ਵੀ ਇਹ ਦੇਸ਼ ਮਦਦ ਨਹੀਂ ਕਰ ਰਹੇ। ਟਰੰਪ ਨੇ ਇਨ੍ਹਾਂ ਦੇਸ਼ਾਂ ਨੂੰ ‘ਬੁਜ਼ਦਿਲ’ ਕਹਿੰਦੇ ਹੋਏ ਚੇਤਾਵਨੀ ਦਿੱਤੀ ਕਿ ਅਮਰੀਕਾ ਉਨ੍ਹਾਂ ਦੇ ਇਸ ਵਤੀਰੇ ਨੂੰ ਹਮੇਸ਼ਾ ਯਾਦ ਰੱਖੇਗਾ ਅਤੇ ਆਉਣ ਵਾਲੇ ਸਮੇਂ ਵਿੱਚ ਇਸ ਦਾ ਸਖ਼ਤ ਜਵਾਬ ਦਿੱਤਾ ਜਾਵੇਗਾ।
ਇਹ ਵੀ ਪੜ੍ਹੋ
