ਸਾਡੇ ਧਰਮ ਵੱਖ-ਵੱਖ…ਮਗਰ ਅਸੀਂ ਇੱਕ, ਨਿਊਯਾਰਕ ‘ਚ ਬੋਲੇ ਮੋਹਨ ਭਾਗਵਤ- ਆਤਮਾ ਹਰ ਕਿਸੇ ‘ਚ ਮੌਜੂਦ

ਸਾਡੇ ਧਰਮ ਵੱਖ-ਵੱਖ...ਮਗਰ ਅਸੀਂ ਇੱਕ, ਨਿਊਯਾਰਕ 'ਚ ਬੋਲੇ ਮੋਹਨ ਭਾਗਵਤ

ਰਾਸ਼ਟਰੀ ਸਵੈਮਸੇਵਕ ਸੰਘ (RSS) ਮੁਖੀ ਮੋਹਨ ਭਾਗਵਤ ਨਿਊਯਾਰਕ ਦੇ ਮਸ਼ਹੂਰ ਮੈਡਿਸਨ ਸਕੁਏਅਰ ‘ਚ ਆਯੋਜਿਤ ‘ਯੂਨੀਵਰਸਲ ਵਨਨੈੱਸ ਸੈਲੀਬ੍ਰੇਸ਼ਨ’ ਪ੍ਰੋਗਰਾਮ’ਚ ਸ਼ਾਮਲ ਹੋਏ। ਇਸ ਪ੍ਰੋਗਰਾਮ ‘ਚ ਵੱਖ-ਵੱਖ ਧਰਮਾਂ ਦੇ ਕਈ ਪ੍ਰਮੁੱਖ ਆਗੂਆਂ ਨੇ ਵੀ ਸ਼ਿਰਕਤ ਕੀਤੀ। ਇਸ ਦੌਰਾਨ ਮੋਹਨ ਭਾਗਵਤ ਨੇ ਲੋਕਾਂ ਨੂੰ ਸੰਬੋਧਨ ਕਰਦਿਆਂ ਕਿਹਾ ਕਿ ਸਾਡੇ ਸਰੀਰ, ਪਹਿਰਾਵੇ ਤੇ ਪੂਜਾ-ਪੱਧਤੀ ਭਾਵੇਂ ਵੱਖ-ਵੱਖ ਹੋਣ, ਪਰ ਅਸੀਂ ਇੱਕ ਹਾਂ। ਇਸ ਪ੍ਰੋਗਰਾਮ ਦਾ ਆਯੋਜਨ ‘ਦ ਅਮਰੀਕਨ ਹਿੰਦੂਜ਼ ਫਾਰ ਐਂਗੇਜਮੈਂਟ ਐਂਡ ਡਾਇਲਾਗ’ ਦੇ ਸਹਿਯੋਗ ਨਾਲ ਕੀਤਾ ਗਿਆ ਹੈ।

ਮੋਹਨ ਭਾਗਵਤ ਨੇ ਕਿਹਾ ਕਿ ਤੁਸੀਂ ਵੱਖਰੇ ਦਿਖਾਈ ਦਿੰਦੇ ਹੋ, ਪਰ ਅਸਲ ‘ਚ ਵੱਖਰੇ ਨਹੀਂ ਹੋ। ਉਨ੍ਹਾਂ ਕਿਹਾ ਕਿ ਸਾਡੇ ਸਰੀਰ, ਪਹਿਰਾਵੇ ਤੇ ਪੂਜਾ-ਪੱਧਤੀ ਭਾਵੇਂ ਵੱਖ-ਵੱਖ ਹੋਣ, ਪਰ ਜਿਵੇਂ ਇੱਕੋ ਧਾਗੇ ‘ਚ ਪਰੋਏ ਹੋਏ ਮਾਲਾ ਦੇ ਮੋਤੀ ਹੁੰਦੇ ਹਨ, ਉਸੇ ਤਰ੍ਹਾਂ ਇਹ ਆਤਮਾ ਹਰ ਕਿਸੇ ‘ਚ ਮੌਜੂਦ ਹੈ ਤੇ ਸਾਨੂੰ ਸਾਰਿਆਂ ਨੂੰ ਆਪਸ ‘ਚ ਜੋੜਦੀ ਹੈ। ਇਹ ਸਥਾਈ ਤੇ ਕਦੇ ਨਾ ਖ਼ਤਮ ਹੋਣ ਵਾਲੀ ਖੁਸ਼ੀ ਦਾ ਸਰੋਤ ਹੈ। ਇਸ ਦੇ ਨਾਲ ਹੀ, ਇਹ ਸਾਨੂੰ ਇੱਕ ਹੋਰ ਗੱਲ ਦੱਸਦੀ ਹੈ ਕਿ ਤੁਸੀਂ ਵੱਖਰੇ ਦਿਖਾਈ ਦਿੰਦੇ ਹੋ, ਪਰ ਅਸਲ ‘ਚ ਵੱਖਰੇ ਨਹੀਂ ਹੋ।

ਵਿਅਕਤੀ, ਸਮਾਜ ਤੇ ਵਾਤਾਵਰਣ ਨੂੰ ਇੱਕੋ ਸਮੇਂ ਅੱਗੇ ਵਧਣਾ ਚਾਹੀਦਾ

RSS ਮੁਖੀ ਨੇ ਕਿਹਾ ਕਿ ਵਿਅਕਤੀ, ਸਮਾਜ ਤੇ ਵਾਤਾਵਰਣ ਨੂੰ ਇੱਕੋ ਸਮੇਂ ਅੱਗੇ ਵਧਣਾ ਚਾਹੀਦਾ ਹੈ। ਉਨ੍ਹਾਂ ਕਿਹਾ ਕਿ ਇਨਸਾਨ ਜ਼ਿੰਦਗੀ ਦੇ ਦੋਹਰੇ ਪੱਖਾਂ ਨੂੰ ਸੰਭਾਲ ਸਕਦਾ ਹੈ। ਇਹ ਸੰਤੁਲਨ ਹੀ ਹੈ ਜੋ ਇੱਕੋ ਸਮੇਂ ਸਭ ਕੁਝ ਕਾਇਮ ਰੱਖਦਾ ਹੈ ਤੇ ਹਰ ਕੋਈ ਤਰੱਕੀ ਕਰ ਸਕਦਾ ਹੈ। ਉਨ੍ਹਾਂ ਕਿਹਾ ਕਿ ਅਜਿਹਾ ਨਹੀਂ ਹੈ ਕਿ ਸਮਾਜਿਕ ਤਰੱਕੀ ਤਾਂ ਹੀ ਹੋਵੇਗੀ ਜਦੋਂ ਵਿਅਕਤੀਆਂ ਨੂੰ ਦਬਾਇਆ ਜਾਵੇ, ਬਿਲਕੁਲ ਨਹੀਂ। ਵਿਅਕਤੀ, ਸਮਾਜ ਤੇ ਵਾਤਾਵਰਣ ਨੂੰ ਇੱਕੋ ਸਮੇਂ ਅੱਗੇ ਵਧਣਾ ਤੇ ਤਰੱਕੀ ਕਰਨੀ ਹੋਵੇਗੀ।

ਭਾਰਤ ਦੇ ਡੀਐਨਏ ‘ਚ ਏਕਤਾ ਤੇ ਵਿਭਿੰਨਤਾ

ਉਨ੍ਹਾਂ ਕਿਹਾ ਕਿ ਤੁਹਾਡੇ ਸਰੀਰ, ਤੁਹਾਡੇ ਮਨ ਅਤੇ ਤੁਹਾਡੀ ਬੁੱਧੀ – ਇਨ੍ਹਾਂ ਸਾਰਿਆਂ ਨੂੰ ਇੱਕੋ ਸਮੇਂ ਅੱਗੇ ਵਧਣਾ ਹੋਵੇਗਾ। ਮੋਹਨ ਭਾਗਵਤ ਨੇ ਕਿਹਾ ਕਿ ਇਹ ਉਹ ਸਿਧਾਂਤ ਹੈ ਜੋ ਸਾਰਿਆਂ ਨੂੰ ਜੋੜਦਾ ਹੈ, ਸਾਰਿਆਂ ਨੂੰ ਕਾਇਮ ਰੱਖਦਾ ਹੈ ਤੇ ਕੋਈ ਦਰਾਰ ਪੈਦਾ ਨਹੀਂ ਹੋਣ ਦਿੰਦਾ। ਭਾਰਤ ਦੇ ਲੋਕਾਂ ਲਈ ਇਹ ਏਕਤਾ ਤੇ ਵਿਭਿੰਨਤਾ ਦੋਵੇਂ ਹੀ ਉਨ੍ਹਾਂ ਦੇ ਡੀਐਨਏ ‘ਚ ਵੱਸੀਆਂ ਹੋਈਆਂ ਹਨ।

ਹਰ ਦੇਸ਼ ਦੀ ਆਪਣੀ ਇੱਕ ਖਾਸ ਕਿਸਮਤ

ਮੋਹਨ ਭਾਗਵਤ ਨੇ ਕਿਹਾ, ਜਿਵੇਂ ਸਵਾਮੀ ਵਿਵੇਕਾਨੰਦ ਨੇ ਕਿਹਾ ਸੀ, ਹਰ ਇੱਕ ਦੇਸ਼ ਦੀ ਆਪਣੀ ਇੱਕ ਖਾਸ ਕਿਸਮਤ ਹੁੰਦੀ ਹੈ, ਜਿਸ ਨੂੰ ਉਸ ਨੇ ਪੂਰਾ ਕਰਨਾ ਹੁੰਦਾ ਹੈ। ਉਨ੍ਹਾਂ ਅੱਗੇ ਕਿਹਾ ਕਿ ਜੇਕਰ ਤੁਸੀਂ ਸਹੀ ਤਰੀਕੇ ਨਾਲ ਸੋਚਦੇ ਹੋ, ਤਾਂ ਤੁਸੀਂ ਰੱਬ ਦੇ ਨੇੜੇ ਜਾਂਦੇ ਹੋ। ਜੇਕਰ ਤੁਸੀਂ ਗਲਤ ਤਰੀਕੇ ਨਾਲ ਸੋਚਦੇ ਹੋ, ਤਾਂ ਤੁਸੀਂ ਜਾਨਵਰਾਂ ਦੇ ਨੇੜੇ ਜਾਂਦੇ ਹੋ।

Source: TV9Hindi.com