ਇੰਡੋਨੇਸ਼ੀਆ ‘ਚ 243 ਯਾਤਰੀਆਂ ਵਾਲਾ ਜਹਾਜ਼ ਲਾਪਤਾ, 6 ਦੀ ਮੌਤ; 97 ਰੈਸਕਿਊ

ਇੰਡੋਨੇਸ਼ੀਆ 'ਚ 243 ਯਾਤਰੀਆਂ ਵਾਲਾ ਜਹਾਜ਼ ਲਾਪਤਾ

ਇੰਡੋਨੇਸ਼ੀਆ ਦੇ ਜਾਵਾ ਸਾਗਰ ‘ਚ ਇੱਕ ਯਾਤਰੀ ਫੈਰੀ ਖਰਾਬ ਮੌਸਮ ਦੌਰਾਨ ਲਾਪਤਾ ਹੋ ਗਈ। ਹਾਦਸੇ ‘ਚ ਹੁਣ ਤੱਕ 6 ਲੋਕਾਂ ਦੀ ਮੌਤ ਹੋ ਚੁੱਕੀ ਹੈ, ਜਦਕਿ 97 ਲੋਕਾਂ ਨੂੰ ਬਚਾ ਲਿਆ ਗਿਆ ਹੈ। ਬਾਕੀ ਯਾਤਰੀਆਂ ਦੀ ਭਾਲ ਅਜੇ ਵੀ ਜਾਰੀ ਹੈ। ਇਹ ਫੈਰੀ Virgo Transport 8 ਸੀ ਤੇ ਇਸ ‘ਚ ਕੁੱਲ 243 ਲੋਕ ਸਵਾਰ ਸਨ। ਜਹਾਜ਼ ਸ਼ਨੀਵਾਰ ਸਵੇਰੇ 10:33 ਵਜੇ ਸੁਰਾਬਾਇਆ ਤੋਂ ਦੱਖਣੀ ਕਾਲੀਮੰਤਨ ਦੇ ਬੰਜਾਰਮਾਸਿਨ ਲਈ ਰਵਾਨਾ ਹੋਇਆ ਸੀ। ਇਸ ਨੂੰ ਐਤਵਾਰ ਦੁਪਹਿਰ 2 ਵਜੇ ਬੰਜਾਰਮਾਸਿਨ ਪਹੁੰਚਣਾ ਸੀ।

ਐਤਵਾਰ ਰਾਤ ਕਰੀਬ 2 ਵਜੇ ਜਹਾਜ਼ ਨਾਲ ਸੰਪਰਕ ਟੁੱਟ ਗਿਆ। ਉਸ ਸਮੇਂ ਫੈਰੀ ਬੰਜਾਰਮਾਸਿਨ ਤੋਂ ਕਰੀਬ 150 ਕਿਲੋਮੀਟਰ ਦੱਖਣ ‘ਚ ਸੀ। ਅਧਿਕਾਰੀਆਂ ਨੂੰ ਜਹਾਜ਼ ਦੀ ਆਪਰੇਟਰ ਕੰਪਨੀ PT Virgo ਵੱਲੋਂ ਸਵੇਰੇ 4:10 ਵਜੇ ਪਹਿਲੀ ਵਾਰ ਮਦਦ ਦੀ ਸੂਚਨਾ ਮਿਲੀ। ਦੱਸਿਆ ਗਿਆ ਕਿ ਖ਼ਰਾਬ ਮੌਸਮ ਕਾਰਨ ਜਹਾਜ਼ ਮੁਸ਼ਕਲ ‘ਚ ਫਸ ਗਿਆ ਸੀ।

ਜਹਾਜ਼ ਤੇ ਹੈਲੀਕਾਪਟਰ ਰਾਹੀਂ ਰੈਸਕਿਊ ਜਾਰੀ

ਹਾਦਸੇ ਤੋਂ ਬਾਅਦ ਇੰਡੋਨੇਸ਼ੀਆ ਦੀ ਸਰਚ ਐਂਡ ਰੈਸਕਿਊ ਏਜੰਸੀ, ਨੇਵੀ, ਸਮੁੰਦਰੀ ਪੁਲਿਸ ਤੇ ਹੋਰ ਏਜੰਸੀਆਂ ਨੇ ਮਿਲ ਕੇ ਬਚਾਅ ਮੁਹਿੰਮ ਸ਼ੁਰੂ ਕੀਤੀ। ਮੌਕੇ ‘ਤੇ ਕਈ ਜਹਾਜ਼ ਤੇ ਇੱਕ ਹੈਲੀਕਾਪਟਰ ਭੇਜੇ ਗਏ ਹਨ। ਜਾਵਾ ਸਾਗਰ ‘ਚ ਨੇੜੇ ਮੌਜੂਦ ਹੋਰ ਜਹਾਜ਼ਾਂ ਨੂੰ ਵੀ ਯਾਤਰੀਆਂ ਦੀ ਭਾਲ ‘ਚ ਮਦਦ ਕਰਨ ਤੇ ਕਿਸੇ ਯਾਤਰੀ ਦੇ ਦਿਖਾਈ ਦੇਣ ‘ਤੇ ਤੁਰੰਤ ਸੂਚਨਾ ਦੇਣ ਲਈ ਕਿਹਾ ਗਿਆ ਹੈ। ਹਾਦਸੇ ਦੀ ਜਾਣਕਾਰੀ ਤੇ ਬਚਾਅ ਮੁਹਿੰਮ ਲਈ ਐਤਵਾਰ ਸਵੇਰੇ ਤ੍ਰਿਸ਼ਕਤੀ ਪੋਰਟ ਇਲਾਕੇ ਵਿੱਚ ਇੱਕ ਆਪਰੇਸ਼ਨ ਸੈਂਟਰ ਬਣਾਇਆ ਗਿਆ।

ਬੰਜਾਰਮਾਸਿਨ ਦੀ ਰਹਿਣ ਵਾਲੀ ਰੁਸਮਿਲਾਵਤੀ ਆਪਣੇ 8 ਰਿਸ਼ਤੇਦਾਰਾਂ ਦੀ ਜਾਣਕਾਰੀ ਲੈਣ ਲਈ ਬੰਦਰਗਾਹ ਪਹੁੰਚੀ। ਉਸ ਦੇ ਰਿਸ਼ਤੇਦਾਰ ਜਾਵਾ ਵਿੱਚ ਕਈ ਇਸਲਾਮੀ ਵਿਦਵਾਨਾਂ ਦੀਆਂ ਕਬਰਾਂ ‘ਤੇ ਜਾਣ ਤੋਂ ਬਾਅਦ ਜਹਾਜ਼ ਰਾਹੀਂ ਬੰਜਾਰਮਾਸਿਨ ਵਾਪਸ ਆ ਰਹੇ ਸਨ। ਪਰਿਵਾਰ ਨੂੰ ਆਖਰੀ ਵਾਰ ਇੱਕ ਰਿਸ਼ਤੇਦਾਰ ਦਾ ਵ੍ਹਾਟਸਐਪ ਸਟੇਟਸ ਮਿਲਿਆ ਸੀ। ਇਸ ‘ਚ ਉਸ ਨੇ ਸਮੁੰਦਰ ਦੀਆਂ ਤੇਜ਼ ਲਹਿਰਾਂ ਨੂੰ ਲੈ ਕੇ ਡਰ ਜ਼ਾਹਰ ਕੀਤਾ ਸੀ। ਐਤਵਾਰ ਦੁਪਹਿਰ ਤੱਕ ਪਰਿਵਾਰ ਨੂੰ ਉਨ੍ਹਾਂ ਦੇ ਸੁਰੱਖਿਅਤ ਹੋਣ ਦੀ ਕੋਈ ਜਾਣਕਾਰੀ ਨਹੀਂ ਮਿਲੀ ਸੀ।

ਇੰਡੋਨੇਸ਼ੀਆ ਵਿੱਚ 17 ਹਜ਼ਾਰ ਤੋਂ ਵੱਧ ਟਾਪੂ

ਇਸ ਤੋਂ ਪਹਿਲਾਂ ਪਿਛਲੇ ਮਹੀਨੇ ਮਦੂਰਾ ਟਾਪੂ ਦੇ ਨੇੜੇ ਇੱਕ ਹੋਰ ਫੈਰੀ ‘ਚ ਅੱਗ ਲੱਗਣ ਕਾਰਨ 5 ਲੋਕਾਂ ਦੀ ਮੌਤ ਹੋ ਗਈ ਸੀ। ਇੰਡੋਨੇਸ਼ੀਆ ‘ਚ 17 ਹਜ਼ਾਰ ਤੋਂ ਵੱਧ ਟਾਪੂ ਹਨ ਤੇ ਇੱਥੇ ਫੈਰੀ ਆਮ ਆਵਾਜਾਈ ਦਾ ਇੱਕ ਪ੍ਰਮੁੱਖ ਸਾਧਨ ਹਨ। Source: TV9Hindi.com