ਭਾਰਤੀ ਸੰਸਦਾਂ ਦੀ ਫਲਾਈਟ ਲੈਂਡ ਹੋਣ ਤੋਂ ਪਹਿਲਾਂ ਮਾਸਕੋ ਏਅਰਪੋਰਟ ‘ਤੇ ਡਰੋਨ ਹਮਲਾ, ਹਵਾ ‘ਚ ਹੀ ਘੁੰਮਦਾ ਰਿਹਾ ਜਹਾਜ਼
ਜਿਵੇਂ ਹੀ ਜਹਾਜ਼ ਮਾਸਕੋ ਵਿੱਚ ਦਾਖਲ ਹੋਇਆ, ਯੂਕਰੇਨ ਨੇ ਰੂਸ 'ਤੇ ਡਰੋਨ ਹਮਲਾ ਕਰ ਦਿੱਤਾ। ਡਰੋਨ ਹਮਲੇ ਕਾਰਨ, ਲੈਂਡਿੰਗ ਤੁਰੰਤ ਰੋਕ ਦਿੱਤੀ ਗਈ। ਇਸ ਕਾਰਨ ਭਾਰਤੀ ਸੰਸਦ ਮੈਂਬਰਾਂ ਦੀ ਫਲਾਇਟ ਨੂੰ ਕਈ ਮਿੰਟਾਂ ਲਈ ਹਵਾ ਵਿੱਚ ਚੱਕਰ ਲਗਾਉਣਾ ਪਿਆ। ਇਹ ਸੰਸਦ ਮੈਂਬਰ ਪਾਕਿਸਤਾਨ ਦਾ ਪਰਦਾਫਾਸ਼ ਕਰਨ ਲਈ ਰੂਸ ਪਹੁੰਚੇ ਹਨ।
ਫਲਾਈਟ ਦੇ ਲੈਂਡ ਹੋਣ ਤੋਂ ਪਹਿਲਾਂ ਡਰੋਨ ਹਮਲਾ
ਪਾਕਿਸਤਾਨੀ ਅੱਤਵਾਦੀਆਂ ਦਾ ਪਰਦਾਫਾਸ਼ ਕਰਨ ਲਈ ਰੂਸ ਪਹੁੰਚੇ ਭਾਰਤੀ ਵਫ਼ਦ ਦੇ ਜਹਾਜ਼ ਨੂੰ ਰਾਜਧਾਨੀ ਮਾਸਕੋ ਦੇ ਉੱਪਰੋਂ ਚੱਕਰ ਲਗਾਉਣਾ ਪਿਆ। ਦਰਅਸਲ, ਜਿਵੇਂ ਹੀ ਡੀਐਮਕੇ ਸੰਸਦ ਮੈਂਬਰ ਕਨੀਮੋਈ ਦੀ ਅਗਵਾਈ ਵਾਲਾ ਵਫ਼ਦ ਮਾਸਕੋ ਵਿੱਚ ਦਾਖਲ ਹੋਇਆ, ਯੂਕਰੇਨ ਨੇ ਡਰੋਨ ਹਮਲਾ ਕਰ ਦਿੱਤਾ। ਯੂਕਰੇਨ ਵੱਲੋਂ ਕੀਤੇ ਗਏ ਡਰੋਨ ਹਮਲੇ ਕਾਰਨ ਮਾਸਕੋ ਦੇ ਸਾਰੇ ਹਵਾਈ ਅੱਡਿਆਂ ‘ਤੇ ਜਹਾਜ਼ਾਂ ਦੀ ਆਵਾਜਾਈ ਬੰਦ ਕਰ ਦਿੱਤੀ ਗਈ।
ਰੂਸ ਦੇ ਇਸ ਫੈਸਲੇ ਕਾਰਨ ਭਾਰਤੀ ਵਫ਼ਦ ਦਾ ਜਹਾਜ਼ ਕਈ ਮਿੰਟਾਂ ਲਈ ਹਵਾ ਵਿੱਚ ਘੁੰਮਣ ਲੱਗਾ। ਅੰਤ ਵਿੱਚ ਜਦੋਂ ਹਰੀ ਝੰਡੀ ਮਿਲੀ, ਜਹਾਜ਼ ਨੂੰ ਮਾਸਕੋ ਵਿੱਚ ਉਤਾਰਿਆ ਗਿਆ।
ਮਾਸਕੋ ਵਿੱਚ ਭਾਰਤੀ ਰਾਜਦੂਤ ਦਾ ਸਵਾਗਤ
ਉਡਾਣ ਦੇ ਉਤਰਨ ਤੋਂ ਬਾਅਦ ਸਾਰੇ ਸੰਸਦ ਮੈਂਬਰਾਂ ਦਾ ਮਾਸਕੋ ਵਿੱਚ ਭਾਰਤੀ ਰਾਜਦੂਤ ਵਿਨੇ ਕੁਮਾਰ ਨੇ ਸਵਾਗਤ ਕੀਤਾ। ਸਾਰੇ ਸੰਸਦ ਮੈਂਬਰਾਂ ਦਾ ਕੰਮ ਰੂਸੀ ਸਰਕਾਰ, ਸੀਨੀਅਰ ਸੰਸਦ ਮੈਂਬਰਾਂ, ਅਧਿਕਾਰੀਆਂ ਤੇ ਮਾਹਿਰਾਂ ਨੂੰ ਪਾਕਿਸਤਾਨ ਵਿੱਚ ਪਾਲਣ-ਪੋਸ਼ਣ ਕੀਤੇ ਜਾ ਰਹੇ ਅੱਤਵਾਦੀਆਂ ਬਾਰੇ ਜਾਣਕਾਰੀ ਦੇਣਾ ਹੈ।
ਕਨੀਮੋਈ ਦਾ ਕਹਿਣਾ ਹੈ ਕਿ ਭਾਰਤ ਦੇ ਰੂਸ ਨਾਲ ਪਹਿਲਾਂ ਹੀ ਸ਼ਾਨਦਾਰ ਸਬੰਧ ਹਨ। ਅਸੀਂ ਰੂਸ ਨੂੰ ਦੱਸਾਂਗੇ ਕਿ ਕਿਵੇਂ ਪਾਕਿਸਤਾਨ ਦੇ ਅੱਤਵਾਦੀ ਦੁਨੀਆ ਲਈ ਖ਼ਤਰਾ ਬਣ ਰਹੇ ਹਨ।
ਪੁਤਿਨ ਨੂੰ ਪਹਿਲਾਂ ਤੋਂ ਹੀ ਹੈ ਇਸ ਗੱਲ੍ਹ ਦਾ ਡਰ
ਰੂਸੀ ਰਾਸ਼ਟਰਪਤੀ ਵਲਾਦੀਮੀਰ ਪੁਤਿਨ ਨੇ ਹਾਲ ਹੀ ਵਿੱਚ ਡੋਨਾਲਡ ਟਰੰਪ ਨਾਲ ਗੱਲਬਾਤ ਵਿੱਚ ਕਿਹਾ ਸੀ ਕਿ ਜਦੋਂ ਵੀ ਕਿਸੇ ਹੋਰ ਦੇਸ਼ ਦਾ ਕੋਈ ਸਰਕਾਰੀ ਵਫ਼ਦ ਰੂਸ ਦਾ ਦੌਰਾ ਕਰਨਾ ਚਾਹੁੰਦਾ ਹੈ ਤਾਂ ਯੂਕਰੇਨ ਮਾਸਕੋ ‘ਤੇ ਡਰੋਨ ਹਮਲਾ ਕਰਦਾ ਹੈ।
ਇਹ ਵੀ ਪੜ੍ਹੋ
ਪੁਤਿਨ ਦੇ ਮੁਤਾਬਕ ਯੂਕਰੇਨ ਅਜਿਹਾ ਜਾਣਬੁੱਝ ਕੇ ਕਰਦਾ ਹੈ ਤਾਂ ਜੋ ਰੂਸ ਬਾਕੀ ਦੁਨੀਆ ਤੋਂ ਕੱਟਿਆ ਜਾਵੇ। ਇਸ ਡਰ ਕਾਰਨ ਲੋਕਾਂ ਨੂੰ ਰੂਸ ਆਉਣਾ ਬੰਦ ਕਰ ਦੇਣਾ ਚਾਹੀਦਾ ਹੈ।
ਯੂਕਰੇਨ ਨੇ ਨਹੀਂ ਦਿੱਤਾ ਹੈ ਕੋਈ ਜਵਾਬ
ਮਾਸਕੋ ਵਿੱਚ ਭਾਰਤੀ ਸੰਸਦ ਮੈਂਬਰਾਂ ਦੇ ਵਫ਼ਦ ਦੇ ਦਾਖਲੇ ਦੌਰਾਨ ਡਰੋਨ ਹਮਲੇ ਸਬੰਧੀ ਯੂਕਰੇਨ ਨੇ ਕੋਈ ਪ੍ਰਤੀਕਿਰਿਆ ਨਹੀਂ ਦਿੱਤੀ ਹੈ। ਦ ਕੀਵ ਇੰਡੀਪੈਂਡੈਂਟ ਦੇ ਅਨੁਸਾਰ, ਰੂਸ ਨੇ ਯੂਕਰੇਨ ਤੋਂ ਡਰੋਨ ਹਮਲਿਆਂ ਦੇ ਡਰੋਂ 3 ਹਵਾਈ ਅੱਡੇ ਬੰਦ ਕਰ ਦਿੱਤੇ ਹਨ।
ਰਿਪੋਰਟ ਵਿੱਚ ਕਿਹਾ ਗਿਆ ਹੈ ਕਿ ਯੂਕਰੇਨ ਨੇ ਰੂਸ ‘ਤੇ ਵੱਡੀ ਗਿਣਤੀ ਵਿੱਚ ਡਰੋਨ ਹਮਲੇ ਕੀਤੇ ਹਨ। ਸਿਰਫ਼ 22 ਮਈ ਨੂੰ ਹੀ ਰੂਸ ਨੇ 250 ਤੋਂ ਵੱਧ ਯੂਕਰੇਨੀ ਡਰੋਨ ਡੇਗ ਦਿੱਤੇ।