Viral Video: ਕੁਦਰਤ ਦਾ ਅਜੂਬਾ! ਕਾਜ਼ੀਰੰਗਾ ‘ਚ ਦਿਖਿਆ ਦੁੱਧ ਵਰਗਾ ਚਿੱਟਾ ਹਿਰਨ; ਵੀਡੀਓ ਦੇਖ ਰਹਿ ਜਾਓਗੇ ਹੈਰਾਨ

ਅਸਾਮ ਦੇ ਜੰਗਲਾਂ ਤੋਂ ਇੱਕ ਅਜਿਹਾ ਵੀਡੀਓ ਸਾਹਮਣੇ ਆਇਆ ਹੈ, ਜਿਸ ਨੂੰ ਦੇਖ ਕੇ ਲੋਕਾਂ ਨੂੰ ਆਪਣੀਆਂ ਅੱਖਾਂ ‘ਤੇ ਵਿਸ਼ਵਾਸ ਕਰਨਾ ਔਖਾ ਹੋ ਰਿਹਾ ਹੈ। ਆਮ ਤੌਰ ‘ਤੇ ਭੂਰੇ ਰੰਗ ਵਿੱਚ ਨਜ਼ਰ ਆਉਣ ਵਾਲਾ ‘ਹੌਗ ਡੀਅਰ’ ਅਸਾਮ ਦੇ ਵਿਸ਼ਵ ਪ੍ਰਸਿੱਧ ਕਾਜ਼ੀਰੰਗਾ ਨੈਸ਼ਨਲ ਪਾਰਕ ਵਿੱਚ ਬਿਲਕੁਲ ਦੁੱਧ ਵਰਗੇ ਚਿੱਟੇ ਰੰਗ ਵਿੱਚ ਘੁੰਮਦਾ ਦੇਖਿਆ ਗਿਆ। ਇਸ ਬੇਹੱਦ ਦੁਰਲੱਭ ਨਜ਼ਾਰੇ ਦੀ ਵੀਡੀਓ ਖੁਦ ਅਸਾਮ ਦੇ ਮੁੱਖ ਮੰਤਰੀ ਹਿਮੰਤਾ ਬਿਸਵਾ ਸਰਮਾ ਨੇ ਆਪਣੇ ਸੋਸ਼ਲ ਮੀਡੀਆ ਹੈਂਡਲ (X) ‘ਤੇ ਸਾਂਝੀ ਕੀਤੀ ਹੈ।

ਮੁੱਖ ਮੰਤਰੀ ਨੇ ਜੰਗਲੀ ਜੀਵਾਂ ਦੀ ਅਮੀਰੀ ਦਾ ਦੱਸਿਆ ਪ੍ਰਤੀਕ

ਇਸ ਦਿਲਚਸਪ ਵੀਡੀਓ ਨੂੰ ਸਾਂਝਾ ਕਰਦੇ ਹੋਏ ਮੁੱਖ ਮੰਤਰੀ ਹਿਮੰਤਾ ਬਿਸਵਾ ਸਰਮਾ ਨੇ ਆਪਣੀ ਖੁਸ਼ੀ ਦਾ ਇਜ਼ਹਾਰ ਕੀਤਾ। ਉਨ੍ਹਾਂ ਨੇ ਲਿਖਿਆ, “ਰੋਜ਼ਾਨਾ ਅਜਿਹਾ ਦੁਰਲੱਭ ਹਿਰਨ ਦੇਖਣ ਨੂੰ ਨਹੀਂ ਮਿਲਦਾ। ਕਾਜ਼ੀਰੰਗਾ ਵਿੱਚ ਇਸ ‘ਐਲਬੀਨੋ ਹੌਗ ਡੀਅਰ’ ਦਾ ਦਿਖਾਈ ਦੇਣਾ ਸਾਡੇ ਜੰਗਲੀ ਜੀਵਾਂ ਦੀ ਅਮੀਰੀ ਦਾ ਪ੍ਰਤੀਕ ਹੈ। ਇਹ ਇਸ ਗੱਲ ਦਾ ਸਬੂਤ ਹੈ ਕਿ ਅਸਾਮ ਦੇ ਜੰਗਲ ਦੁਰਲੱਭ ਤੋਂ ਦੁਰਲੱਭ ਪ੍ਰਜਾਤੀਆਂ ਲਈ ਪੂਰੀ ਤਰ੍ਹਾਂ ਸੁਰੱਖਿਅਤ ਹਨ ਅਤੇ ਜੰਗਲੀ ਜੀਵਾਂ ਦੀ ਸੁਰੱਖਿਆ ਪ੍ਰਤੀ ਸਾਡਾ ਸੰਕਲਪ ਬਹੁਤ ਮਜ਼ਬੂਤ ਹੈ।”

ਕਿਉਂ ਚਿੱਟਾ ਹੈ ਇਹ ਹਿਰਨ?

ਵਾਇਰਲ ਹੋਈ ਵੀਡੀਓ ਵਿੱਚ ਦੇਖਿਆ ਜਾ ਸਕਦਾ ਹੈ ਕਿ ਕਾਜ਼ੀਰੰਗਾ ਦੇ ਹਰੇ-ਭਰੇ ਘਾਹ ਦੇ ਮੈਦਾਨਾਂ ਦੇ ਵਿਚਕਾਰ ਇਹ ਸਫੇਦ ਰੰਗ ਦਾ ਹਿਰਨ ਦੂਰੋਂ ਹੀ ਚਮਕ ਰਿਹਾ ਹੈ। ਵਿਗਿਆਨਕ ਨਜ਼ਰੀਏ ਤੋਂ ਦੇਖਿਆ ਜਾਵੇ ਤਾਂ ਇਹ ਕੋਈ ਨਵੀਂ ਪ੍ਰਜਾਤੀ ਨਹੀਂ ਹੈ, ਸਗੋਂ ਇਹ ਇੱਕ ਸਾਧਾਰਨ ਹੌਗ ਹਿਰਨ ਹੀ ਹੈ। ਪਰ ਇਸ ਦਾ ਰੰਗ ਸਫੇਦ ਹੋਣ ਪਿੱਛੇ ਇੱਕ ਖਾਸ ਕਾਰਨ ਹੈ।

ਦਰਅਸਲ, ਇਹ ਇੱਕ ਬਹੁਤ ਹੀ ਦੁਰਲੱਭ ਜੈਨੇਟਿਕ ਸਥਿਤੀ ਹੈ, ਜਿਸ ਨੂੰ ‘ਐਲਬਿਨਿਜ਼ਮ’ ਕਿਹਾ ਜਾਂਦਾ ਹੈ। ਇਸ ਸਥਿਤੀ ਵਿੱਚ ਸਰੀਰ ਵਿੱਚ ਰੰਗ ਤੈਅ ਕਰਨ ਵਾਲਾ ਪਿਗਮੈਂਟ ਯਾਨੀ ‘ਮੇਲੇਨਿਨ’ ਨਹੀਂ ਬਣਦਾ, ਜਿਸ ਕਾਰਨ ਜੀਵ ਦੀ ਚਮੜੀ ਅਤੇ ਵਾਲ ਪੂਰੀ ਤਰ੍ਹਾਂ ਸਫੇਦ ਜਾਂ ਬਹੁਤ ਹਲਕੇ ਰੰਗ ਦੇ ਹੋ ਜਾਂਦੇ ਹਨ।

ਹਰੇ ਮੈਦਾਨਾਂ ਦੇ ਵਿਚਕਾਰ ਇਸ ਸਫੇਦ ਹਿਰਨ ਦਾ ਘੁੰਮਣਾ ਕਿਸੇ ਜਾਦੂਈ ਦ੍ਰਿਸ਼ ਤੋਂ ਘੱਟ ਨਹੀਂ ਲੱਗ ਰਿਹਾ। ਕੁਦਰਤ ਪ੍ਰੇਮੀਆਂ ਅਤੇ ਸੋਸ਼ਲ ਮੀਡੀਆ ਵਰਤੋਂਕਾਰਾਂ ਲਈ ਇਹ ਵੀਡੀਓ ਕਿਸੇ ਵੱਡੇ ਤੋਹਫ਼ੇ ਵਰਗੀ ਹੈ। ਲੋਕ ਇਸ ਵੀਡੀਓ ਨੂੰ ਜੰਮ ਕੇ ਸ਼ੇਅਰ ਕਰ ਰਹੇ ਹਨ ਅਤੇ ਕਾਜ਼ੀਰੰਗਾ ਦੀ ਜੈਵਿਕ ਵਿਭਿੰਨਤਾ (Biodiversity) ਦੀ ਰੱਜ ਕੇ ਸ਼ਲਾਘਾ ਕਰ ਰਹੇ ਹਨ। ਅਸਾਮ ਦੇ ਜੰਗਲਾਂ ਦੀ ਇਹ ਖੂਬਸੂਰਤੀ ਇੱਕ ਵਾਰ ਫਿਰ ਦੁਨੀਆ ਭਰ ਵਿੱਚ ਚਰਚਾ ਦਾ ਵਿਸ਼ਾ ਬਣੀ ਹੋਈ ਹੈ।

ਦੇਖੋ ਵੀਡੀਓ