ਦਿਲ ਦਹਿਲਾ ਦੇਣ ਵਾਲਾ VIDEO: ਪਲਾਂ ‘ਚ ਢਹਿ ਗਈ ਸੁਪਰਮਾਰਕੀਟ ਦੀ ਛੱਤ, ਮਚੀ ਹਫੜਾ-ਦਫੜੀ

ਭਾਰੀ ਮੀਂਹ ਨਾਲ ਸੁਪਰਮਾਰਕੀਟ 'ਚ ਵੱਡਾ ਹਾਦਸਾ

ਜ਼ਰਾ ਸੋਚੋ, ਤੁਸੀਂ ਕਿਸੇ ਸੁਪਰਮਾਰਕੀਟ ਵਿੱਚ ਆਰਾਮ ਨਾਲ ਕਿਰਾਣੇ ਦਾ ਸਮਾਨ ਖਰੀਦ ਰਹੇ ਹੋਵੋ ਅਤੇ ਅਚਾਨਕ ਤੁਹਾਡੇ ਸਿਰ ਉੱਪਰ ਪੂਰੀ ਛੱਤ ਹੀ ਢਹਿ ਪਏ? ਅਮਰੀਕਾ ਦੇ ਨਿਊ ਜਰਸੀ ਵਿੱਚ ਅਜਿਹਾ ਹੀ ਇੱਕ ਦਿਲ ਦਹਿਲਾ ਦੇਣ ਵਾਲਾ ਹਾਦਸਾ ਵਾਪਰਿਆ ਹੈ। ਖਰਾਬ ਮੌਸਮ ਅਤੇ ਭਾਰੀ ਮੀਂਹ ਦੇ ਦਰਮਿਆਨ ਬੀਤੇ ਸੋਮਵਾਰ ਇੱਥੇ ਇੱਕ ਮਸ਼ਹੂਰ ਸੁਪਰਮਾਰਕੀਟ ਦੀ ਛੱਤ ਦਾ ਵੱਡਾ ਹਿੱਸਾ ਤਾਸ਼ ਦੇ ਪੱਤਿਆਂ ਵਾਂਗ ਢਹਿ ਗਿਆ। ਇਸ ਖੌਫਨਾਕ ਘਟਨਾ ਦੀ ਵੀਡੀਓ ਸੋਸ਼ਲ ਮੀਡੀਆ ‘ਤੇ ਤੇਜ਼ੀ ਨਾਲ ਵਾਇਰਲ ਹੋ ਰਿਹਾ ਹੈ, ਜਿਸ ਨੂੰ ਦੇਖ ਕੇ ਕਿਸੇ ਦੇ ਵੀ ਹੋਸ਼ ਉੱਡ ਸਕਦੇ ਹਨ।

ਖਰੀਦਦਾਰੀ ਦੌਰਾਨ ਅਚਾਨਕ ਢਹਿ ਗਈ ਛੱਤ

ਇਹ ਹੈਰਾਨ ਕਰ ਦੇਣ ਵਾਲੀ ਘਟਨਾ ਅਮਰੀਕਾ ਦੇ ਨਿਊ ਜਰਸੀ ਦੇ ਮਨਮਥ ਕਾਊਂਟੀ ਵਿੱਚ ਵਾਪਰੀ। ਇੱਥੇ ਓਸ਼ਨ ਟਾਊਨਸ਼ਿਪ ਸਥਿਤ BJs Wholesale Club ਵਿੱਚ ਹਰ ਰੋਜ਼ ਦੀ ਤਰ੍ਹਾਂ ਲੋਕ ਖਰੀਦਦਾਰੀ ਕਰਨ ਲਈ ਪਹੁੰਚੇ ਹੋਏ ਸਨ। ਸਵੇਰੇ ਕਰੀਬ 11:15 ਵਜੇ ਅਚਾਨਕ ਪਲਕ ਝਪਕਦੇ ਹੀ ਸਟੋਰ ਦੀ ਛੱਤ ਦਾ ਇੱਕ ਵੱਡਾ ਹਿੱਸਾ ਹੇਠਾਂ ਆ ਡਿੱਗਿਆ। ਵਾਇਰਲ ਵੀਡੀਓ ਵਿੱਚ ਸਾਫ਼ ਦਿਖਾਈ ਦਿੰਦਾ ਹੈ ਕਿ ਲੋਕ ਆਰਾਮ ਨਾਲ ਸਮਾਨ ਦੇਖ ਰਹੇ ਸਨ ਕਿ ਅਚਾਨਕ ਛੱਤ ਡਿੱਗ ਪਈ। ਇਸ ਦੇ ਨਾਲ ਹੀ ਸਟੋਰ ਦੇ ਅੰਦਰ ਮੀਂਹ ਦਾ ਪਾਣੀ ਤੇਜ਼ੀ ਨਾਲ ਵਹਿਣ ਲੱਗ ਪਿਆ, ਜਿਸ ਨਾਲ ਉੱਥੇ ਹਫੜਾ-ਦਫੜੀ ਮਚ ਗਈ।

ਮਲਬੇ ਹੇਠਾਂ ਫਸੇ ਲੋਕ, ਮਚ ਗਈ ਹਫੜਾ-ਦਫੜੀ

Fox News ਦੀ ਰਿਪੋਰਟ ਮੁਤਾਬਕ, ਜਦੋਂ ਇਹ ਹਾਦਸਾ ਵਾਪਰਿਆ, ਉਸ ਸਮੇਂ ਸੁਪਰਮਾਰਕੀਟ ਦੇ ਅੰਦਰ 27 ਲੋਕ ਮੌਜੂਦ ਸਨ। ਛੱਤ ਡਿੱਗਦੇ ਹੀ ਪੂਰੇ ਸਟੋਰ ਵਿੱਚ ਹਫੜਾ-ਦਫੜੀ ਮਚ ਗਈ ਅਤੇ ਹਰ ਪਾਸੇ ਮਲਬਾ ਫੈਲ ਗਿਆ। ਅਧਿਕਾਰੀਆਂ ਨੇ ਦੱਸਿਆ ਕਿ ਦੋ ਲੋਕ ਮਲਬੇ ਹੇਠਾਂ ਅੰਸ਼ਕ ਤੌਰ ‘ਤੇ ਫਸ ਗਏ ਸਨ, ਪਰ ਉਨ੍ਹਾਂ ਨੇ ਹਿੰਮਤ ਅਤੇ ਸੂਝਬੂਝ ਨਾਲ ਆਪਣੇ ਆਪ ਨੂੰ ਸੁਰੱਖਿਅਤ ਬਾਹਰ ਕੱਢ ਲਿਆ। ਰਾਹਤ ਦੀ ਗੱਲ ਇਹ ਰਹੀ ਕਿ ਇੰਨੇ ਵੱਡੇ ਹਾਦਸੇ ਦੇ ਬਾਵਜੂਦ ਨਾ ਕਿਸੇ ਦੀ ਜਾਨ ਗਈ ਅਤੇ ਨਾ ਹੀ ਕੋਈ ਗੰਭੀਰ ਰੂਪ ਵਿੱਚ ਜ਼ਖ਼ਮੀ ਹੋਇਆ। ਸਾਰੇ 27 ਲੋਕਾਂ ਨੂੰ ਸੁਰੱਖਿਅਤ ਬਾਹਰ ਕੱਢ ਲਿਆ ਗਿਆ।

ਡਰੋਨ ਅਤੇ ਕੇ-9 ਡੌਗ ਸਕੁਆਡ ਨੇ ਸੰਭਾਲਿਆ ਮੋਰਚਾ

ਹਾਦਸੇ ਦੀ ਸੂਚਨਾ ਮਿਲਦੇ ਹੀ ਸਥਾਨਕ ਪ੍ਰਸ਼ਾਸਨ ਤੁਰੰਤ ਅਲਰਟ ਹੋ ਗਿਆ। ਪੁਲਿਸ ਅਤੇ ਸ਼ੈਰਿਫ ਦਫ਼ਤਰ ਦੀਆਂ ਟੀਮਾਂ ਨੇ ਮਲਬੇ ਹੇਠਾਂ ਕਿਸੇ ਹੋਰ ਦੇ ਫਸੇ ਹੋਣ ਦੀ ਸੰਭਾਵਨਾ ਨੂੰ ਦੇਖਦੇ ਹੋਏ ਵਿਆਪਕ ਤਲਾਸ਼ੀ ਮੁਹਿੰਮ ਸ਼ੁਰੂ ਕੀਤੀ। ਰਾਹਤ ਅਤੇ ਬਚਾਅ ਕਾਰਜ ਦੌਰਾਨ ਹਾਈ-ਟੈਕ ਇਨਡੋਰ ਡਰੋਨ ਦੀ ਵਰਤੋਂ ਕੀਤੀ ਗਈ, ਜਿਸ ਨੇ ਖਤਰਨਾਕ ਬਣ ਚੁੱਕੀ ਇਮਾਰਤ ਦੇ ਅੰਦਰ ਜਾ ਕੇ ਤਸਵੀਰਾਂ ਅਤੇ ਹਾਲਾਤ ਦੀ ਜਾਣਕਾਰੀ ਇਕੱਠੀ ਕੀਤੀ। ਇਸ ਤੋਂ ਇਲਾਵਾ, ਨਿਊ ਜਰਸੀ ਅਰਬਨ ਸਰਚ ਐਂਡ ਰੈਸਕਿਊ ਦੀ ਕੇ-9 ਡੌਗ ਸਕੁਆਡ ਟੀਮ ਨੇ ਵੀ ਮਲਬੇ ਦੀ ਬਾਰੀਕੀ ਨਾਲ ਜਾਂਚ ਕੀਤੀ ਤਾਂ ਜੋ ਇਹ ਯਕੀਨੀ ਬਣਾਇਆ ਜਾ ਸਕੇ ਕਿ ਅੰਦਰ ਕੋਈ ਹੋਰ ਵਿਅਕਤੀ ਫਸਿਆ ਨਾ ਹੋਵੇ।

ਮਨਮਥ ਕਾਊਂਟੀ ਦੇ ਸ਼ੈਰਿਫ ਸ਼ੌਨ ਗੋਲਡਨ ਨੇ ਇਸ ਮੁਸ਼ਕਲ ਘੜੀ ਦੌਰਾਨ ਬਚਾਅ ਦਲ ਦੀ ਮੁਸਤੈਦੀ ਅਤੇ ਤੁਰੰਤ ਕਾਰਵਾਈ ਦੀ ਸ਼ਲਾਘਾ ਕੀਤੀ। ਇਸੇ ਦੌਰਾਨ, ਓਸ਼ਨ ਟਾਊਨਸ਼ਿਪ ਦੇ ਪੁਲਿਸ ਮੁਖੀ ਮਾਈਕਲ ਸੋਰੈਂਟੀਨੋ ਨੇ ਲੋਕਾਂ ਨੂੰ ਅਪੀਲ ਕੀਤੀ ਹੈ ਕਿ ਫਿਲਹਾਲ ਇਸ ਇਲਾਕੇ ਤੋਂ ਦੂਰ ਰਹਿਣ ਅਤੇ ਪ੍ਰਸ਼ਾਸਨ ਵੱਲੋਂ ਜਾਰੀ ਹਦਾਇਤਾਂ ਦੀ ਪਾਲਣਾ ਕਰਨ।

ਇੱਥੇ ਦੇਖੋ ਵਾਇਰਲ ਵੀਡੀਓ

Security camera footage shows the moment the roof collapsed at a BJ’s store in Oakhurst, New Jersey. No injuries were reported. pic.twitter.com/1Bqk26n8vi

— Shlomo Schorr (@OneJerseySchorr) July 6, 2026