ਵਿਨੋਦ ਕਾਂਬਲੀ ਦੀ ਮਦਦ ਲਈ ਅੱਗੇ ਆਏ ਸੁਨੀਲ ਗਾਵਸਕਰ, ਮੈਡੀਕਲ ਖਰਚੇ ਦੇ ਨਾਲ ਹਰ ਮਹੀਨੇ ਦੇਣਗੇ ਇੰਨੇ ਪੈਸੇ
Vinod Kambli: ਵਿਨੋਦ ਕਾਂਬਲੀ ਨੂੰ ਸੁਨੀਲ ਗਾਵਸਕਰ ਦੇ CHAMPS ਫਾਊਂਡੇਸ਼ਨ ਵੱਲੋਂ ਮਦਦ ਕੀਤੀ ਜਾਵੇਗੀ। 53 ਸਾਲਾ ਕਾਂਬਲੀ ਨੂੰ ਹੁਣ ਆਪਣੀ ਬਾਕੀ ਦੀ ਜ਼ਿੰਦਗੀ ਲਈ ਹਰ ਮਹੀਨੇ ਪੈਸੇ ਮਿਲਣਗੇ। ਇਸਦੀ ਸ਼ੁਰੂਆਤ 1 ਅਪ੍ਰੈਲ ਤੋਂ ਹੋ ਚੁੱਕੀ ਹੈ। ਵਿਨੋਦ ਕਾਂਬਲੀ ਸੁਨੀਲ ਗਾਵਸਕਰ ਦੇ ਚੈਂਪਸ ਫਾਊਂਡੇਸ਼ਨ ਤੋਂ ਮਦਦ ਪ੍ਰਾਪਤ ਕਰਨ ਵਾਲੇ ਦੂਜੇ ਕ੍ਰਿਕਟਰ ਹੋਣਗੇ।
ਸੁਨੀਲ ਗਾਵਸਕਰ ਨੇ ਵਿਨੋਦ ਕਾਂਬਲੀ ਵੱਲ ਮਦਦ ਦਾ ਹੱਥ ਵਧਾਇਆ ਹੈ। ਇਹ ਮਦਦ ਗਾਵਸਕਰ ਦੇ CHAMPS ਫਾਊਂਡੇਸ਼ਨ ਵੱਲੋਂ ਪ੍ਰਦਾਨ ਕੀਤੀ ਜਾਵੇਗੀ। ਇਸ ਸਹਾਇਤਾ ਦੇ ਤਹਿਤ, ਕਾਂਬਲੀ ਨੂੰ ਉਨ੍ਹਾਂ ਦੀ ਪੂਰੀ ਜ਼ਿੰਦਗੀ ਲਈ ਹਰ ਮਹੀਨੇ 30,000 ਰੁਪਏ ਦਿੱਤੇ ਜਾਣਗੇ। ਇਸ ਤੋਂ ਇਲਾਵਾ, ਉਨ੍ਹਾਂ ਨੂੰ ਪੂਰੇ ਸਾਲ ਲਈ ਡਾਕਟਰੀ ਖਰਚੇ ਵਜੋਂ 30,000 ਰੁਪਏ ਵੱਖਰੇ ਤੌਰ ‘ਤੇ ਵੀ ਮਿਲਣਗੇ। ਸੁਨੀਲ ਗਾਵਸਕਰ ਦੀ CHAMPS ਫਾਊਂਡੇਸ਼ਨ 1999 ਵਿੱਚ ਲੋੜਵੰਦ ਅੰਤਰਰਾਸ਼ਟਰੀ ਕ੍ਰਿਕਟਰਾਂ ਦੀ ਮਦਦ ਕਰਨ ਦੇ ਉਦੇਸ਼ ਨਾਲ ਸ਼ੁਰੂ ਕੀਤੀ ਗਈ ਸੀ।
ਕਾਂਬਲੀ ਨੂੰ ਹਰ ਮਹੀਨੇ ਇੰਨੇ ਪੈਸੇ ਦੇਣਗੇ ਗਾਵਸਕਰ
TOI ਦੀ ਰਿਪੋਰਟ ਦੇ ਅਨੁਸਾਰ, ਫਾਊਂਡੇਸ਼ਨ ਵੱਲੋਂ ਵਿਨੋਦ ਕਾਂਬਲੀ ਨੂੰ ਪ੍ਰਤੀ ਮਹੀਨਾ 30000 ਰੁਪਏ ਦੇਣ ਦੀ ਪ੍ਰਕਿਰਿਆ 1 ਅਪ੍ਰੈਲ ਤੋਂ ਲਾਗੂ ਕੀਤੀ ਗਈ ਹੈ। 53 ਸਾਲਾ ਕਾਂਬਲੀ ਨੂੰ ਇਹ ਪੈਸਾ ਉਦੋਂ ਤੱਕ ਮਿਲਦਾ ਰਹੇਗਾ ਜਦੋਂ ਤੱਕ ਉਹ ਜ਼ਿੰਦਾ ਰਹਿਣਗੇ। ਇਸ ਤੋਂ ਇਲਾਵਾ, ਉਨ੍ਹਾਂ ਨੂੰ ਮਿਲਣ ਵਾਲੇ 30,000 ਰੁਪਏ ਦੇ ਸਾਲਾਨਾ ਡਾਕਟਰੀ ਖਰਚੇ ਵੱਖਰੇ ਹੋਣਗੇ।
ਜਨਵਰੀ ਵਿੱਚ ਮੁਲਾਕਾਤ, ਅਪ੍ਰੈਲ ਵਿੱਚ ਮਦਦ ਦਾ ਹੱਥ
ਸੁਨੀਲ ਗਾਵਸਕਰ 11 ਜਨਵਰੀ ਨੂੰ ਵਾਨਖੇੜੇ ਸਟੇਡੀਅਮ ਦੀ 50ਵੀਂ ਵਰ੍ਹੇਗੰਢ ‘ਤੇ ਵਿਨੋਦ ਕਾਂਬਲੀ ਨੂੰ ਮਿਲੇ ਸਨ। ਉਸ ਦੌਰਾਨ, ਕਾਂਬਲੀ ਗਾਵਸਕਰ ਦੇ ਪੈਰ ਛੂਹਦੇ ਹੋਏ ਭਾਵੁਕ ਹੋ ਗਏ। ਉਸ ਮੀਟਿੰਗ ਤੋਂ ਬਾਅਦ, ਸੁਨੀਲ ਗਾਵਸਕਰ ਦੇ ਫਾਊਂਡੇਸ਼ਨ ਦਾ ਇਹ ਫੈਸਲਾ ਸਵਾਗਤਯੋਗ ਹੈ।
ਕਾਂਬਲੀ ਦੀ ਸਿਹਤ ਵਿਗੜਨ ਤੋਂ ਬਾਅਦ ਲਿਆ ਗਿਆ ਮਦਦ ਦਾ ਫੈਸਲਾ
ਪਿਛਲੇ ਸਾਲ ਦਸੰਬਰ ਵਿੱਚ ਵਿਨੋਦ ਕਾਂਬਲੀ ਦੀ ਸਿਹਤ ਕਾਫ਼ੀ ਵਿਗੜ ਗਈ ਸੀ। ਉਨ੍ਹਾਂ ਨੂੰ ਯੂਰਿਨ ਇੰਫੈਕਸ਼ਨ ਹੋ ਗਿਆ ਸੀ, ਜਿਸ ਤੋਂ ਬਾਅਦ ਉਨ੍ਹਾਂਨੂੰ ਹਸਪਤਾਲ ਵਿੱਚ ਦਾਖਲ ਕਰਵਾਇਆ ਗਿਆ। ਕਾਂਬਲੀ ਦੀ ਸਿਹਤ ਵਿਗੜਣ ਦੇ ਬਾਅਦ ਤੋਂ ਹੀ ਗਾਵਸਕਰ ਉਨ੍ਹਾਂ ਦੀ ਮਦਦ ਕਰਨ ਲਈ ਉਤਸੁਕ ਸਨ। ਵਾਨਖੇੜੇ ਸਟੇਡੀਅਮ ਦੀ 50ਵੀਂ ਵਰ੍ਹੇਗੰਢ ਦੌਰਾਨ, ਗਾਵਸਕਰ ਨਾ ਸਿਰਫ਼ ਵਿਨੋਦ ਕਾਂਬਲੀ ਨੂੰ ਮਿਲੇ, ਸਗੋਂ ਉਨ੍ਹਾਂ ਦੋ ਡਾਕਟਰਾਂ ਨਾਲ ਵੀ ਮੁਲਾਕਾਤ ਕੀਤੀ। ਜਿਸ ਤੋਂ ਬਾਅਦ ਖੱਬੇ ਹੱਥ ਦੇ ਸਾਬਕਾ ਬੱਲੇਬਾਜ਼ ਦੀ ਮਦਦ ਕਰਨ ਦਾ ਉਨ੍ਹਾਂ ਦਾ ਇਰਾਦਾ ਹੋਰ ਮਜ਼ਬੂਤ ਹੋ ਗਿਆ।
ਮਦਦ ਪਾਉਣ ਵਾਲੇ ਕਾਂਬਲੀ ਦੂਜੇ ਕ੍ਰਿਕਟਰ
ਭਾਰਤ ਲਈ 17 ਟੈਸਟ ਅਤੇ 104 ਵਨਡੇ ਖੇਡਣ ਵਾਲੇ ਵਿਨੋਦ ਕਾਂਬਲੀ ਸੁਨੀਲ ਗਾਵਸਕਰ ਦੇ ਚੈਂਪਸ ਫਾਊਂਡੇਸ਼ਨ ਤੋਂ ਮਦਦ ਪ੍ਰਾਪਤ ਕਰਨ ਵਾਲੇ ਦੂਜੇ ਕ੍ਰਿਕਟਰ ਹੋਣਗੇ। ਉਨ੍ਹਾਂ ਤੋਂ ਪਹਿਲਾਂ, ਇਹ ਫਾਊਂਡੇਸ਼ਨ ਸਾਬਕਾ ਕ੍ਰਿਕਟਰ ਸਲੀਮ ਦੁਰਾਨੀ ਦੀ ਵੀ ਮਦਦ ਕਰ ਚੁੱਕਾ ਹੈ।
ਇਹ ਵੀ ਪੜ੍ਹੋ
