ਚੇਨਈ ਫਿਰ ਹੋਈ ਬੁਰੀ ਤਰ੍ਹਾਂ ਫੇਲ, ਅਭਿਸ਼ੇਕ ਤੇ ਮਲਿੰਗਾ ਨੇ ਹੈਦਰਾਬਾਦ ਨੂੰ ਦਿਵਾਈ ਰੋਮਾਂਚਕ ਜਿੱਤ

ਇੰਡੀਅਨ ਪ੍ਰੀਮੀਅਰ ਲੀਗ (IPL) 2026 ਵਿੱਚ ਲਗਾਤਾਰ ਦੋ ਜਿੱਤਾਂ ਦਰਜ ਕਰਕੇ ਵਾਪਸੀ ਦੀ ਰਾਹ ‘ਤੇ ਦਿਖ ਰਹੀ ਚੇਨਈ ਸੁਪਰ ਕਿੰਗਜ਼ (CSK) ਨੂੰ ਇੱਕ ਵਾਰ ਫਿਰ ਹਾਰ ਦਾ ਸਵਾਦ ਚੱਖਣਾ ਪਿਆ ਹੈ। ਈਸ਼ਾਨ ਕਿਸ਼ਨ ਦੀ ਕਪਤਾਨੀ ਹੇਠ ਸਨਰਾਈਜ਼ਰਜ਼ ਹੈਦਰਾਬਾਦ (SRH) ਨੇ ਇੱਕ ਵਾਰ ਫਿਰ ਸ਼ਾਨਦਾਰ ਪ੍ਰਦਰਸ਼ਨ ਕਰਦਿਆਂ ਚੇਨਈ ਨੂੰ ਇੱਕ ਨਜ਼ਦੀਕੀ ਮੁਕਾਬਲੇ ਵਿੱਚ 10 ਦੌੜਾਂ ਨਾਲ ਹਰਾ ਦਿੱਤਾ।

ਹੈਦਰਾਬਾਦ ਦੇ ਘਰੇਲੂ ਮੈਦਾਨ ‘ਤੇ ਖੇਡੇ ਗਏ ਇਸ ਮੈਚ ਵਿੱਚ ਅਭਿਸ਼ੇਕ ਸ਼ਰਮਾ ਅਤੇ ਹੇਨਰਿਕ ਕਲਾਸਨ ਦੇ ਅਰਧ ਸੈਂਕੜਿਆਂ ਦੀ ਬਦੌਲਤ ਸਨਰਾਈਜ਼ਰਜ਼ ਨੇ 194 ਦੌੜਾਂ ਦਾ ਮਜ਼ਬੂਤ ਸਕੋਰ ਖੜ੍ਹਾ ਕੀਤਾ ਸੀ। ਇਸ ਦੇ ਜਵਾਬ ਵਿੱਚ ਈਸ਼ਾਨ ਮਲਿੰਗਾ ਅਤੇ ਨਿਤੀਸ਼ ਕੁਮਾਰ ਰੈੱਡੀ ਦੀ ਘਾਤਕ ਗੇਂਦਬਾਜ਼ੀ ਅੱਗੇ ਚੇਨਈ ਦੀ ਬੈਟਿੰਗ ਲੜਖੜਾ ਗਈ ਅਤੇ ਟੀਮ 184 ਦੌੜਾਂ ‘ਤੇ ਹੀ ਰੁਕ ਗਈ। ਇਸ ਜਿੱਤ ਨਾਲ ਸਨਰਾਈਜ਼ਰਜ਼ ਨੇ ਸੀਜ਼ਨ ਵਿੱਚ ਆਪਣੀ ਤੀਜੀ ਜਿੱਤ ਦਰਜ ਕਰ ਲਈ ਹੈ।

ਅਭਿਸ਼ੇਕ ਅਤੇ ਕਲਾਸਨ ਦੀ ਤੂਫ਼ਾਨੀ ਬੈਟਿੰਗ

ਸਨਰਾਈਜ਼ਰਜ਼ ਹੈਦਰਾਬਾਦ ਨੇ ਇਸ ਮੈਚ ਵਿੱਚ ਧਮਾਕੇਦਾਰ ਸ਼ੁਰੂਆਤ ਕੀਤੀ, ਪਰ ਆਖਰੀ ਓਵਰਾਂ ਵਿੱਚ ਟੀਮ ਉਸ ਰਫ਼ਤਾਰ ਨੂੰ ਬਰਕਰਾਰ ਨਹੀਂ ਰੱਖ ਸਕੀ। ਇੱਕ ਸਮੇਂ ਅਜਿਹਾ ਲੱਗ ਰਿਹਾ ਸੀ ਕਿ ਹੈਦਰਾਬਾਦ ਆਸਾਨੀ ਨਾਲ 210 ਦੌੜਾਂ ਦਾ ਅੰਕੜਾ ਪਾਰ ਕਰ ਲਵੇਗੀ, ਪਰ ਟੀਮ 194 ਤੱਕ ਹੀ ਸੀਮਤ ਰਹਿ ਗਈ। ਅਭਿਸ਼ੇਕ ਸ਼ਰਮਾ ਨੇ ਮਹਿਜ਼ 15 ਗੇਂਦਾਂ ਵਿੱਚ ਅਰਧ ਸੈਂਕੜਾ ਜੜ ਕੇ ਟੀਮ ਨੂੰ ਤੇਜ਼ ਸ਼ੁਰੂਆਤ ਦਿੱਤੀ। ਦੂਜੇ ਪਾਸੇ ਹੇਨਰਿਕ ਕਲਾਸਨ ਨੇ ਵੀ ਇੱਕ ਹੋਰ ਸੂਝ-ਬੂਝ ਵਾਲਾ ਅਰਧ ਸੈਂਕੜਾ ਲਗਾਇਆ।

ਹਾਲਾਂਕਿ, ਅਭਿਸ਼ੇਕ (59 ਦੌੜਾਂ, 22 ਗੇਂਦਾਂ) ਅਤੇ ਕਲਾਸਨ (59 ਦੌੜਾਂ, 39 ਗੇਂਦਾਂ) ਨੂੰ ਛੱਡ ਕੇ ਹੈਦਰਾਬਾਦ ਦਾ ਕੋਈ ਵੀ ਹੋਰ ਬੱਲੇਬਾਜ਼ ਵੱਡਾ ਯੋਗਦਾਨ ਨਹੀਂ ਪਾ ਸਕਿਆ। ਕਪਤਾਨ ਈਸ਼ਾਨ ਕਿਸ਼ਨ ਆਪਣੀ ਪਹਿਲੀ ਹੀ ਗੇਂਦ ‘ਤੇ ਖਾਤਾ ਖੋਲ੍ਹੇ ਬਿਨਾਂ ਆਊਟ ਹੋ ਗਏ। ਇੰਪੈਕਟ ਪਲੇਅਰ ਵਜੋਂ ਆਏ ਲਿਆਮ ਲਿਵਿੰਗਸਟੋਨ ਵੀ 5 ਗੇਂਦਾਂ ਵਿੱਚ ਸਿਰਫ਼ 1 ਦੌੜ ਹੀ ਬਣਾ ਸਕੇ। ਚੇਨਈ ਵੱਲੋਂ ਅੰਸ਼ੁਲ ਕੰਬੋਜ ਅਤੇ ਜੇਮੀ ਓਵਰਟਨ ਨੇ 3-3 ਵਿਕਟਾਂ ਹਾਸਲ ਕੀਤੀਆਂ।

ਚੇਨਈ ਦੀ ਬੈਟਿੰਗ ਰਹੀ ਨਾਕਾਮ

ਟੀਚੇ ਦਾ ਪਿੱਛਾ ਕਰਨ ਉਤਰੀ ਚੇਨਈ ਦੀ ਟੀਮ ਨੂੰ ਦੂਜੇ ਹੀ ਓਵਰ ਵਿੱਚ ਸੰਜੂ ਸੈਮਸਨ (7) ਦੇ ਰੂਪ ਵਿੱਚ ਵੱਡਾ ਝਟਕਾ ਲੱਗਿਆ। ਆਯੂਸ਼ ਮਹਾਤਰੇ ਨੇ ਤੇਜ਼ ਗੇਂਦਬਾਜ਼ ਪ੍ਰਫੁੱਲ ਹਿੰਗੇ ਦੇ ਇੱਕ ਓਵਰ ਵਿੱਚ 5 ਚੌਕੇ ਜੜ ਕੇ ਉਮੀਦ ਜਗਾਈ, ਪਰ ਉਹ 30 ਦੌੜਾਂ ਬਣਾ ਕੇ ਚੱਲਦੇ ਬਣੇ। ਕਪਤਾਨ ਰੁਤੂਰਾਜ ਗਾਇਕਵਾੜ (19) ਇੱਕ ਵਾਰ ਫਿਰ ਨਾਕਾਮ ਰਹੇ ਅਤੇ ਇਹ ਉਨ੍ਹਾਂ ਦੀ ਲਗਾਤਾਰ ਛੇਵੀਂ ਫਲਾਪ ਪਾਰੀ ਸੀ। ਸਿਰਫ਼ 66 ਦੌੜਾਂ ‘ਤੇ 3 ਵਿਕਟਾਂ ਗੁਆਉਣ ਤੋਂ ਬਾਅਦ ਸਰਫ਼ਰਾਜ਼ ਖਾਨ ਨੇ ਮੈਥਿਊ ਸ਼ਾਰਟ ਨਾਲ ਮਿਲ ਕੇ 46 ਦੌੜਾਂ ਦੀ ਸਾਂਝੇਦਾਰੀ ਕੀਤੀ।

ਇਹ ਵੀ ਪੜ੍ਹੋ

ਗੁਜਰਾਤ ਨੇ ਹੈਦਰਾਬਾਦ ਨੂੰ ਹਰਾਇਆ, ਲਗਾਤਾਰ ਪੰਜਵਾਂ ਮੈਚ ਜਿੱਤਿਆ

ਅੰਤਰਰਾਸ਼ਟਰੀ ਬਾਡੀ ਬਿਲਡਰ ਰੌਨ ਸਿੰਘ ਦੀ ਮੌਤ, ਅਚਾਨਕ ਵਿਗੜੀ ਸੀ ਸਿਹਤ

ਦਿੱਲੀ ਕੈਪੀਟਲਜ਼ ਦੀ ਸ਼ਾਨਦਾਰ ਜਿੱਤ, ਪੰਜਾਬ ਕਿੰਗਜ਼ ਦੀ ਲਗਾਤਾਰ ਚੌਥੀ ਹਾਰ

ਪਰ 11ਵੇਂ ਅਤੇ 12ਵੇਂ ਓਵਰ ਵਿੱਚ ਖੇਡ ਪੂਰੀ ਤਰ੍ਹਾਂ ਪਲਟ ਗਈ ਜਦੋਂ 7 ਗੇਂਦਾਂ ਦੇ ਅੰਦਰ ਹੀ ਸਰਫ਼ਰਾਜ਼ (25) ਅਤੇ ਡੇਵਾਲਡ ਬ੍ਰੇਵਿਸ ਆਊਟ ਹੋ ਗਏ। ਬ੍ਰੇਵਿਸ ਆਪਣਾ ਖਾਤਾ ਵੀ ਨਹੀਂ ਖੋਲ੍ਹ ਸਕੇ। ਇਸ ਤੋਂ ਬਾਅਦ ਸ਼ਾਰਟ (34) ਅਤੇ ਸ਼ਿਵਮ ਦੂਬੇ (21) ਵੀ ਜ਼ਿਆਦਾ ਦੇਰ ਟਿਕ ਨਹੀਂ ਸਕੇ। ਆਖਰੀ ਓਵਰ ਵਿੱਚ ਚੇਨਈ ਨੂੰ ਜਿੱਤ ਲਈ 18 ਦੌੜਾਂ ਦੀ ਲੋੜ ਸੀ, ਪਰ ਪਿਛਲੇ 3 ਓਵਰਾਂ ਵਿੱਚ 53 ਦੌੜਾਂ ਲੁਟਾਉਣ ਵਾਲੇ ਪ੍ਰਫੁੱਲ ਨੇ ਸ਼ਾਨਦਾਰ ਵਾਪਸੀ ਕਰਦਿਆਂ ਸਿਰਫ਼ 7 ਦੌੜਾਂ ਦਿੱਤੀਆਂ ਅਤੇ ਆਪਣੀ ਟੀਮ ਨੂੰ ਜਿੱਤ ਦਿਵਾਈ। ਹੈਦਰਾਬਾਦ ਦੇ ਸ਼੍ਰੀਲੰਕਾਈ ਗੇਂਦਬਾਜ਼ ਈਸ਼ਾਨ ਮਲਿੰਗਾ (3/29) ਅਤੇ ਨਿਤੀਸ਼ ਕੁਮਾਰ ਰੈੱਡੀ (2 ਵਿਕਟਾਂ) ਨੇ ਚੇਨਈ ਦੀ ਹਾਰ ਵਿੱਚ ਅਹਿਮ ਭੂਮਿਕਾ ਨਿਭਾਈ।