IND vs SA: ਸਾਉਥ ਅਫਰੀਕਾ ਨੇ ਭਾਰਤ ਨੂੰ 76 ਦੌੜਾਂ ਨਾਲ ਹਰਾਇਆ, ਟੀਮ ਇੰਡੀਆ ਦੀ ਬੱਲੇਬਾਜ਼ੀ ਰਹੀ ਪੂਰੀ ਤਰ੍ਹਾਂ ਫਲਾਪ
IND vs SA: ਟੀ-20 ਵਰਲਡ ਕੱਪ 2024 ਦੇ ਫਾਈਨਲ ਦੇ ਰੀ-ਮੈਚ ਵਜੋਂ ਦੇਖੇ ਜਾ ਰਹੇ ਇਸ ਮੁਕਾਬਲੇ ਵਿੱਚ ਟੀਮ ਇੰਡੀਆ ਤੋਂ ਦਬਦਬਾ ਬਣਾਉਣ ਦੀ ਉਮੀਦ ਸੀ। ਟਾਸ ਹਾਰਨ ਤੋਂ ਬਾਅਦ ਜਦੋਂ ਭਾਰਤ ਨੇ ਪਹਿਲਾਂ ਗੇਂਦਬਾਜ਼ੀ ਸ਼ੁਰੂ ਕੀਤੀ ਤਾਂ ਇੱਕ ਸਮੇਂ ਅਜਿਹਾ ਹੁੰਦਾ ਵੀ ਦਿਖਾਈ ਦਿੱਤਾ।
ਟੀ-20 ਵਰਲਡ ਕੱਪ 2026 ਵਿੱਚ ਮੌਜੂਦਾ ਚੈਂਪੀਅਨ ਭਾਰਤੀ ਟੀਮ ਨੂੰ ਇੱਕ ਵੱਡਾ ਝਟਕਾ ਲੱਗਾ ਹੈ। ਟੂਰਨਾਮੈਂਟ ਦੇ ਸੁਪਰ-8 ਗੇੜ ਦੇ ਆਪਣੇ ਪਹਿਲੇ ਹੀ ਮੈਚ ਵਿੱਚ ਟੀਮ ਇੰਡੀਆ ਨੂੰ ਦੱਖਣੀ ਅਫ਼ਰੀਕਾ ਹੱਥੋਂ 76 ਦੌੜਾਂ ਦੀ ਸਨਸਨੀਖੇਜ਼ ਹਾਰ ਦਾ ਸਾਹਮਣਾ ਕਰਨਾ ਪਿਆ। ਅਹਿਮਦਾਬਾਦ ਦੇ ਨਰਿੰਦਰ ਮੋਦੀ ਸਟੇਡੀਅਮ ਵਿੱਚ ਐਤਵਾਰ, 22 ਫਰਵਰੀ ਨੂੰ ਖੇਡੇ ਗਏ ਇਸ ਅਹਿਮ ਮੁਕਾਬਲੇ ਵਿੱਚ ਦੱਖਣੀ ਅਫ਼ਰੀਕਾ ਨੇ ਡੇਵਿਡ ਮਿਲਰ ਦੀ ਸ਼ਾਨਦਾਰ ਅੱਧੀ ਸੈਂਕੜੇ ਵਾਲੀ ਪਾਰੀ ਦੀ ਬਦੌਲਤ 187 ਦੌੜਾਂ ਦਾ ਵੱਡਾ ਸਕੋਰ ਖੜ੍ਹਾ ਕੀਤਾ ਸੀ। ਇਸ ਦੇ ਜਵਾਬ ਵਿੱਚ ਮਾਰਕੋ ਯਾਨਸਨ ਦੀ ਅਗਵਾਈ ਵਾਲੇ ਅਫ਼ਰੀਕੀ ਗੇਂਦਬਾਜ਼ੀ ਹਮਲੇ ਸਾਹਮਣੇ ਭਾਰਤੀ ਬੱਲੇਬਾਜ਼ੀ ਬੁਰੀ ਤਰ੍ਹਾਂ ਫੇਲ੍ਹ ਸਾਬਤ ਹੋਈ ਅਤੇ ਪੂਰੀ ਟੀਮ ਮਹਿਜ਼ 111 ਦੌੜਾਂ ‘ਤੇ ਹੀ ਢੇਰ ਹੋ ਗਈ।
ਮਿਲਰ, ਬ੍ਰੇਵਿਸ ਅਤੇ ਸਟੱਬਸ ਨੇ ਸੰਭਾਲੀ ਪਾਰੀ
ਟੀ-20 ਵਰਲਡ ਕੱਪ 2024 ਦੇ ਫਾਈਨਲ ਦੇ ਰੀ-ਮੈਚ ਵਜੋਂ ਦੇਖੇ ਜਾ ਰਹੇ ਇਸ ਮੁਕਾਬਲੇ ਵਿੱਚ ਟੀਮ ਇੰਡੀਆ ਤੋਂ ਦਬਦਬਾ ਬਣਾਉਣ ਦੀ ਉਮੀਦ ਸੀ। ਟਾਸ ਹਾਰਨ ਤੋਂ ਬਾਅਦ ਜਦੋਂ ਭਾਰਤ ਨੇ ਪਹਿਲਾਂ ਗੇਂਦਬਾਜ਼ੀ ਸ਼ੁਰੂ ਕੀਤੀ ਤਾਂ ਇੱਕ ਸਮੇਂ ਅਜਿਹਾ ਹੁੰਦਾ ਵੀ ਦਿਖਾਈ ਦਿੱਤਾ। ਚੌਥੇ ਓਵਰ ਵਿੱਚ ਮਹਿਜ਼ 20 ਦੌੜਾਂ ਤੱਕ ਦੱਖਣੀ ਅਫ਼ਰੀਕਾ ਦੇ ਚੋਟੀ ਦੇ 3 ਬੱਲੇਬਾਜ਼ ਪਵੇਲੀਅਨ ਪਰਤ ਗਏ ਸਨ, ਜਿਸ ਵਿੱਚ 2 ਵਿਕਟਾਂ ਜਸਪ੍ਰੀਤ ਬੁਮਰਾਹ ਨੇ ਲਈਆਂ। ਪਰ ਇਸ ਤੋਂ ਬਾਅਦ ਡੇਵਿਡ ਮਿਲਰ ਅਤੇ ਡੇਵਾਲਡ ਬ੍ਰੇਵਿਸ ਨੇ ਅਜਿਹੀ ਸਾਂਝੇਦਾਰੀ ਕੀਤੀ, ਜਿਸ ਨੇ ਟੀਮ ਇੰਡੀਆ ਨੂੰ ਬੈਕਫੁੱਟ ‘ਤੇ ਧੱਕ ਦਿੱਤਾ। ਇਨ੍ਹਾਂ ਦੋਵਾਂ ਨੇ ਚੌਥੀ ਵਿਕਟ ਲਈ 97 ਦੌੜਾਂ ਦੀ ਮਹੱਤਵਪੂਰਨ ਸਾਂਝੇਦਾਰੀ ਕੀਤੀ।
ਯਾਨਸਨ ਅਤੇ ਬੌਸ਼ ਨੇ ਭਾਰਤੀ ਬੱਲੇਬਾਜ਼ੀ ਨੂੰ ਕੀਤਾ ਪਰੇਸ਼ਾਨ
ਟੀਚੇ ਦਾ ਪਿੱਛਾ ਕਰਨ ਉਤਰੀ ਭਾਰਤੀ ਟੀਮ ਦੀਆਂ ਨਜ਼ਰਾਂ ਅਭਿਸ਼ੇਕ ਸ਼ਰਮਾ ‘ਤੇ ਸਨ, ਜੋ ਪਿਛਲੇ ਤਿੰਨਾਂ ਮੈਚਾਂ ਵਿੱਚ ਖਾਤਾ ਖੋਲ੍ਹਣ ਵਿੱਚ ਨਾਕਾਮ ਰਹੇ ਸਨ। ਅਭਿਸ਼ੇਕ ਨੇ ਇਸ ਵਾਰ ਖਾਤਾ ਜ਼ਰੂਰ ਖੋਲ੍ਹਿਆ ਪਰ ਉਸ ਤੋਂ ਪਹਿਲਾਂ ਹੀ ਭਾਰਤ ਮੁਸੀਬਤ ਵਿੱਚ ਫਸ ਗਿਆ ਸੀ। ਪਹਿਲੇ ਓਵਰ ਵਿੱਚ ਹੀ ਈਸ਼ਾਨ ਕਿਸ਼ਨ ਜ਼ੀਰੋ ‘ਤੇ ਆਊਟ ਹੋ ਗਏ, ਜਦਕਿ ਦੂਜੇ ਓਵਰ ਦੀ ਪਹਿਲੀ ਗੇਂਦ ‘ਤੇ ਤਿਲਕ ਵਰਮਾ ਪਵੇਲੀਅਨ ਪਰਤ ਗਏ। ਅਭਿਸ਼ੇਕ ਨੇ ਚੌਕੇ ਨਾਲ ਖਾਤਾ ਖੋਲ੍ਹਿਆ ਅਤੇ ਕੁਝ ਬਾਊਂਡਰੀਆਂ ਵੀ ਲਗਾਈਆਂ, ਪਰ ਵੱਡੇ ਸ਼ਾਟ ਖੇਡਣ ਦੀ ਕਾਹਲੀ ਵਿੱਚ ਉਹ ਪੰਜਵੇਂ ਓਵਰ ਵਿੱਚ ਆਊਟ ਹੋ ਗਏ। ਤਿਲਕ (1) ਅਤੇ ਅਭਿਸ਼ੇਕ (15) ਦੋਵਾਂ ਨੂੰ ਮਾਰਕੋ ਯਾਨਸਨ ਨੇ ਆਪਣਾ ਸ਼ਿਕਾਰ ਬਣਾਇਆ। ਭਾਰਤ ਨੇ 26 ਦੌੜਾਂ ‘ਤੇ 3 ਵਿਕਟਾਂ ਗੁਆ ਦਿੱਤੀਆਂ ਸਨ, ਪਰ ਮਿਲਰ ਅਤੇ ਬ੍ਰੇਵਿਸ ਵਰਗੀ ਕੋਈ ਸਾਂਝੇਦਾਰੀ ਨਹੀਂ ਹੋ ਸਕੀ।
ਲਗਾਤਾਰ ਡਿੱਗਦੀਆਂ ਰਹੀਆਂ ਵਿਕਟਾਂ
ਕਪਤਾਨ ਸੂਰਿਆਕੁਮਾਰ ਯਾਦਵ (18) ਅਤੇ ਵਾਸ਼ਿੰਗਟਨ ਸੁੰਦਰ (11) ਨਾ ਤਾਂ ਤੇਜ਼ੀ ਨਾਲ ਦੌੜਾਂ ਬਣਾ ਸਕੇ ਅਤੇ ਨਾ ਹੀ ਵੱਡੀ ਸਾਂਝੇਦਾਰੀ ਕਰ ਸਕੇ। 10ਵੇਂ ਓਵਰ ਵਿੱਚ 51 ਦੌੜਾਂ ਤੱਕ ਭਾਰਤ ਦੀਆਂ 5 ਵਿਕਟਾਂ ਡਿੱਗ ਚੁੱਕੀਆਂ ਸਨ। ਦੋਵਾਂ ਨੂੰ ਕਾਰਬਿਨ ਬੌਸ਼ (2/12) ਨੇ ਲਗਾਤਾਰ ਓਵਰਾਂ ਵਿੱਚ ਆਊਟ ਕੀਤਾ। ਇਸ ਤੋਂ ਬਾਅਦ ਸਾਰੀ ਜ਼ਿੰਮੇਵਾਰੀ ਹਾਰਦਿਕ ਪੰਡਯਾ ਅਤੇ ਸ਼ਿਵਮ ਦੂਬੇ ‘ਤੇ ਸੀ। ਪਰ 15ਵੇਂ ਓਵਰ ਵਿੱਚ ਸਪਿਨਰ ਕੇਸ਼ਵ ਮਹਾਰਾਜ (3/24) ਨੇ ਹਾਰਦਿਕ (18), ਰਿੰਕੂ ਸਿੰਘ (0) ਅਤੇ ਅਰਸ਼ਦੀਪ ਸਿੰਘ (1) ਦੀਆਂ ਵਿਕਟਾਂ ਲੈ ਕੇ ਮੈਚ ਪੂਰੀ ਤਰ੍ਹਾਂ ਦੱਖਣੀ ਅਫ਼ਰੀਕਾ ਦੇ ਪੱਖ ਵਿੱਚ ਕਰ ਦਿੱਤਾ। ਸ਼ਿਵਮ ਦੂਬੇ (42) ਨੇ ਕੁਝ ਚੰਗੇ ਸ਼ਾਟ ਲਗਾ ਕੇ ਟੀਮ ਨੂੰ 100 ਦੌੜਾਂ ਤੋਂ ਪਾਰ ਪਹੁੰਚਾਇਆ, ਪਰ ਉਦੋਂ ਤੱਕ ਬਹੁਤ ਦੇਰ ਹੋ ਚੁੱਕੀ ਸੀ। 19ਵੇਂ ਓਵਰ ਵਿੱਚ ਯਾਨਸਨ (4/22) ਨੇ ਦੂਬੇ ਸਮੇਤ ਆਖਰੀ ਦੋ ਵਿਕਟਾਂ ਲੈ ਕੇ ਭਾਰਤੀ ਪਾਰੀ ਨੂੰ 111 ਦੌੜਾਂ ‘ਤੇ ਸਮੇਟ ਦਿੱਤਾ।
