T20 World Cup 2026 Final: ਭਾਰਤ ਨੇ ਨਿਊਜ਼ੀਲੈਂਡ ਅੱਗੇ ਰੱਖਿਆ 256 ਦੌੜਾਂ ਦਾ ਟੀਚਾ, ਸੰਜੂ ਤੇ ਅਭਿਸ਼ੇਕ ਦੀ ਧਮਾਕੇਦਾਰ ਪਾਰੀ
T20 World Cup 2026 Final: ਅੱਜ ਅਹਿਮਦਾਬਾਦ ਦੇ ਨਰਿੰਦਰ ਮੋਦੀ ਸਟੇਡੀਅਮ ਵਿੱਚ ਆਈਸੀਸੀ ਮੇਨਜ਼ ਟੀ-20 ਵਿਸ਼ਵ ਕੱਪ ਦਾ ਖ਼ਿਤਾਬੀ ਮੁਕਾਬਲਾ ਭਾਰਤ ਅਤੇ ਨਿਊਜ਼ੀਲੈਂਡ ਵਿਚਾਲੇ ਖੇਡਿਆ ਜਾ ਰਿਹਾ ਹੈ। ਇਸ ਮਹਾਂ-ਮੁਕਾਬਲੇ ਵਿੱਚ ਨਿਊਜ਼ੀਲੈਂਡ ਨੇ ਟਾਸ ਜਿੱਤ ਕੇ ਪਹਿਲਾਂ ਗੇਂਦਬਾਜ਼ੀ ਕਰਨ ਦਾ ਫੈਸਲਾ ਕੀਤਾ ਸੀ।
ਅੱਜ ਅਹਿਮਦਾਬਾਦ ਦੇ ਨਰਿੰਦਰ ਮੋਦੀ ਸਟੇਡੀਅਮ ਵਿੱਚ ਆਈਸੀਸੀ ਮੇਨਜ਼ ਟੀ-20 ਵਿਸ਼ਵ ਕੱਪ ਦਾ ਖ਼ਿਤਾਬੀ ਮੁਕਾਬਲਾ ਭਾਰਤ ਅਤੇ ਨਿਊਜ਼ੀਲੈਂਡ ਵਿਚਾਲੇ ਖੇਡਿਆ ਜਾ ਰਿਹਾ ਹੈ। ਇਸ ਮਹਾਂ-ਮੁਕਾਬਲੇ ਵਿੱਚ ਨਿਊਜ਼ੀਲੈਂਡ ਨੇ ਟਾਸ ਜਿੱਤ ਕੇ ਪਹਿਲਾਂ ਗੇਂਦਬਾਜ਼ੀ ਕਰਨ ਦਾ ਫੈਸਲਾ ਕੀਤਾ ਸੀ। ਪਰ ਭਾਰਤੀ ਬੱਲੇਬਾਜ਼ਾਂ, ਖ਼ਾਸ ਕਰਕੇ ਸੰਜੂ ਸੈਮਸਨ, ਅਭਿਸ਼ੇਕ ਸ਼ਰਮਾ ਅਤੇ ਈਸ਼ਾਨ ਕਿਸ਼ਨ ਦੇ ਸ਼ਾਨਦਾਰ ਅਰਧ ਸੈਂਕੜਿਆਂ ਅਤੇ ਸ਼ਿਵਮ ਦੂਬੇ ਦੀ ਤੂਫ਼ਾਨੀ ਪਾਰੀ ਦੀ ਬਦੌਲਤ ਭਾਰਤ ਨੇ ਨਿਊਜ਼ੀਲੈਂਡ ਦੇ ਸਾਹਮਣੇ 256 ਦੌੜਾਂ ਦਾ ਪਹਾੜ ਜੈਸਾ ਟੀਚਾ ਰੱਖਿਆ ਹੈ।
ਅਭਿਸ਼ੇਕ ਅਤੇ ਸੰਜੂ ਦੀ ਧਮਾਕੇਦਾਰ ਸ਼ੁਰੂਆਤ
ਪਹਿਲਾਂ ਬੱਲੇਬਾਜ਼ੀ ਕਰਨ ਉਤਰੀ ਟੀਮ ਇੰਡੀਆ ਵੱਲੋਂ ਅਭਿਸ਼ੇਕ ਸ਼ਰਮਾ ਅਤੇ ਸੰਜੂ ਸੈਮਸਨ ਨੇ ਪਾਰੀ ਦਾ ਆਗਾਜ਼ ਕੀਤਾ। ਦੋਵਾਂ ਨੇ ਸੰਭਲ ਕੇ ਖੇਡਦਿਆਂ ਵਿਚ-ਵਿਚਾਲੇ ਸ਼ਾਨਦਾਰ ਸ਼ਾਟ ਲਗਾਏ। ਅਭਿਸ਼ੇਕ ਸ਼ਰਮਾ ਅੱਜ ਬਿਲਕੁਲ ਵੱਖਰੇ ਅੰਦਾਜ਼ ਵਿੱਚ ਨਜ਼ਰ ਆਏ। ਪਾਰੀ ਦੇ ਚੌਥੇ ਓਵਰ ਵਿੱਚ ਜਦੋਂ ਲੌਕੀ ਫਰਗੂਸਨ ਗੇਂਦਬਾਜ਼ੀ ਲਈ ਆਏ, ਤਾਂ ਦੋਵਾਂ ਬੱਲੇਬਾਜ਼ਾਂ ਨੇ ਮਿਲ ਕੇ ਉਸ ਓਵਰ ਵਿੱਚ 24 ਦੌੜਾਂ ਬਟੋਰ ਲਈਆਂ ਅਤੇ ਭਾਰਤ ਦਾ ਸਕੋਰ 50 ਦੇ ਪਾਰ ਪਹੁੰਚਾ ਦਿੱਤਾ। ਇਸ ਤੋਂ ਬਾਅਦ ਅਭਿਸ਼ੇਕ ਨੇ ਹੋਰ ਹਮਲਾਵਰ ਰੁਖ਼ ਅਪਣਾਇਆ ਅਤੇ ਮਹਿਜ਼ 18 ਗੇਂਦਾਂ ਵਿੱਚ ਆਪਣਾ ਅਰਧ ਸੈਂਕੜਾ ਪੂਰਾ ਕਰ ਲਿਆ। 6 ਓਵਰਾਂ ਦੀ ਸਮਾਪਤੀ ਤੋਂ ਬਾਅਦ ਭਾਰਤ ਦਾ ਸਕੋਰ 92 ਦੌੜਾਂ ਸੀ। ਹਾਲਾਂਕਿ, 8ਵੇਂ ਓਵਰ ਵਿੱਚ ਭਾਰਤ ਨੂੰ ਪਹਿਲਾ ਝਟਕਾ ਲੱਗਾ ਜਦੋਂ ਅਭਿਸ਼ੇਕ ਸ਼ਰਮਾ (21 ਗੇਂਦਾਂ ‘ਚ 52 ਦੌੜਾਂ) ਰਚਿਨ ਰਵਿੰਦਰਾ ਦੀ ਗੇਂਦ ‘ਤੇ ਆਊਟ ਹੋ ਗਏ।
ਸੰਜੂ ਅਤੇ ਈਸ਼ਾਨ ਦੀ ਹਮਲਾਵਰ ਬੱਲੇਬਾਜ਼ੀ
ਅਭਿਸ਼ੇਕ ਦੇ ਆਊਟ ਹੋਣ ਦੇ ਬਾਵਜੂਦ ਰਨ ਰੇਟ ਵਿੱਚ ਕੋਈ ਕਮੀ ਨਹੀਂ ਆਈ। 8ਵੇਂ ਓਵਰ ਵਿੱਚ ਹੀ ਭਾਰਤ ਨੇ 100 ਦੌੜਾਂ ਦਾ ਅੰਕੜਾ ਪਾਰ ਕਰ ਲਿਆ। 11ਵੇਂ ਓਵਰ ਵਿੱਚ ਸੰਜੂ ਸੈਮਸਨ ਨੇ ਵੀ ਆਪਣੀ ਫਿਫਟੀ ਪੂਰੀ ਕੀਤੀ। ਸੰਜੂ ਨੇ ਸਿਰਫ਼ 33 ਗੇਂਦਾਂ ਵਿੱਚ ਪਚਾਸਾ ਜੜਿਆ, ਜੋ ਕਿ ਇਸ ਵਿਸ਼ਵ ਕੱਪ ਵਿੱਚ ਉਨ੍ਹਾਂ ਦੀ ਲਗਾਤਾਰ ਤੀਜੀ ਫਿਫਟੀ ਸੀ। 15ਵੇਂ ਓਵਰ ਵਿੱਚ ਟੀਮ ਇੰਡੀਆ ਨੇ 200 ਦੌੜਾਂ ਦਾ ਅੰਕੜਾ ਛੂਹ ਲਿਆ। ਇਸੇ ਦੌਰਾਨ ਈਸ਼ਾਨ ਕਿਸ਼ਨ ਨੇ ਵੀ ਸ਼ਾਨਦਾਰ ਬੱਲੇਬਾਜ਼ੀ ਕਰਦਿਆਂ 23 ਗੇਂਦਾਂ ਵਿੱਚ ਆਪਣਾ ਅਰਧ ਸੈਂਕੜਾ ਪੂਰਾ ਕੀਤਾ।
ਨੀਸ਼ਮ ਦਾ ਇੱਕ ਓਵਰ ਅਤੇ 3 ਵਿਕਟਾਂ
ਭਾਰਤੀ ਪਾਰੀ ਦੇ 16ਵੇਂ ਓਵਰ ਵਿੱਚ ਨਿਊਜ਼ੀਲੈਂਡ ਦੇ ਜੇਮਸ ਨੀਸ਼ਮ ਨੇ ਮੈਚ ਦਾ ਪਾਸਾ ਪਲਟਣ ਦੀ ਕੋਸ਼ਿਸ਼ ਕੀਤੀ। ਇਸ ਓਵਰ ਵਿੱਚ ਸੰਜੂ ਸੈਮਸਨ (46 ਗੇਂਦਾਂ ‘ਚ 89 ਦੌੜਾਂ) ਬਣਾ ਕੇ ਆਊਟ ਹੋਏ। ਅਗਲੀਆਂ ਗੇਂਦਾਂ ‘ਤੇ ਈਸ਼ਾਨ ਕਿਸ਼ਨ (54 ਦੌੜਾਂ) ਅਤੇ ਕਪਤਾਨ ਸੂਰਿਆਕੁਮਾਰ ਯਾਦਵ (ਜ਼ੀਰੋ) ‘ਤੇ ਆਪਣੀ ਵਿਕਟ ਗੁਆ ਬੈਠੇ। ਨੀਸ਼ਮ ਨੇ ਇੱਕੋ ਓਵਰ ਵਿੱਚ 3 ਵਿਕਟਾਂ ਝਟਕਾਈਆਂ ਅਤੇ 16 ਓਵਰਾਂ ਬਾਅਦ ਭਾਰਤ ਦਾ ਸਕੋਰ 204/4 ਸੀ।
ਸ਼ਿਵਮ ਦੂਬੇ ਦਾ ਆਖਰੀ ਓਵਰ ‘ਚ ਧਮਾਕਾ
ਅੰਤਲੇ ਓਵਰਾਂ ਵਿੱਚ ਹਾਰਦਿਕ ਪਾਂਡਿਆ ਅਤੇ ਤਿਲਕ ਵਰਮਾ ਨੇ ਮੋਰਚਾ ਸੰਭਾਲਿਆ। 19ਵੇਂ ਓਵਰ ਵਿੱਚ ਹਾਰਦਿਕ ਪਾਂਡਿਆ ਆਊਟ ਹੋ ਗਏ, ਉਸ ਸਮੇਂ ਸਕੋਰ 226/5 ਸੀ। ਪਰ ਅਸਲ ਖੇਡ ਅਜੇ ਬਾਕੀ ਸੀ। ਆਖਰੀ ਓਵਰ ਵਿੱਚ ਸ਼ਿਵਮ ਦੂਬੇ ਨੇ ਜੇਮਸ ਨੀਸ਼ਮ ਨੂੰ ਨਿਸ਼ਾਨੇ ‘ਤੇ ਲਿਆ ਅਤੇ ਓਵਰ ਵਿੱਚ 24 ਦੌੜਾਂ ਬਣਾ ਦਿੱਤੀਆਂ। ਦੂਬੇ ਨੇ ਮਹਿਜ਼ 8 ਗੇਂਦਾਂ ਵਿੱਚ 26 ਦੌੜਾਂ ਦੀ ਤੂਫ਼ਾਨੀ ਪਾਰੀ ਖੇਡੀ, ਜਿਸ ਦੀ ਮਦਦ ਨਾਲ ਭਾਰਤ ਨੇ ਨਿਰਧਾਰਿਤ 20 ਓਵਰਾਂ ਵਿੱਚ ਨਿਊਜ਼ੀਲੈਂਡ ਦੇ ਸਾਹਮਣੇ 256 ਦੌੜਾਂ ਦਾ ਵੱਡਾ ਟੀਚਾ ਰੱਖਿਆ।
ਇਹ ਵੀ ਪੜ੍ਹੋ
