22 ਸਾਲਾਂ ‘ਚ ਪਹਿਲੀ ਵਾਰ… ਕੇਐਲ ਰਾਹੁਲ ਨੇ ਇੰਗਲੈਂਡ ‘ਚ ਰਚਿਆ ਇਤਿਹਾਸ, ਦੁਨੀਆ ਦੇ ਸਾਰੇ ਓਪਨਰਾਂ ਨੂੰ ਕੀਤਾ ਫੇਲ੍ਹ

ਟੀਮ ਇੰਡੀਆ ਦੇ ਸਟਾਰ ਓਪਨਰ ਕੇਐਲ ਰਾਹੁਲ ਨੇ ਇੰਗਲੈਂਡ ਦੌਰੇ ‘ਤੇ ਇਤਿਹਾਸ ਰਚਿਆ। ਰਾਹੁਲ ਓਵਲ ਟੈਸਟ ‘ਚ ਕੁੱਝ ਖਾਸ ਨਹੀਂ ਕਰ ਸਕੇ, ਪਰ ਇਹ ਦੌਰਾ ਉਨ੍ਹਾਂ ਲਈ ਯਾਦਗਾਰ ਸਾਬਤ ਹੋਇਆ। ਇਸ ਸੀਰੀਜ਼ ‘ਚ ਭਾਰਤੀ ਟੀਮ ਦੇ ਸਭ ਤੋਂ ਸੀਨੀਅਰ ਅਤੇ ਤਜਰਬੇਕਾਰ ਬੱਲੇਬਾਜ਼ ਵਜੋਂ ਆਏ ਰਾਹੁਲ ਨੇ ਆਪਣੇ ਕਰੀਅਰ ਦਾ ਸਭ ਤੋਂ ਵਧੀਆ ਪ੍ਰਦਰਸ਼ਨ ਕੀਤਾ ਤੇ ਟੀਮ ਇੰਡੀਆ ਦੀਆਂ ਉਮੀਦਾਂ ‘ਤੇ ਖਰੇ ਉਤਰੇ। ਇਸ ਦੇ ਨਾਲ, ਉਹ ਪਿਛਲੇ 22 ਸਾਲਾਂ ‘ਚ ਇੰਗਲੈਂਡ ਦੀ ਧਰਤੀ ‘ਤੇ ਕਿਸੇ ਸੀਰੀਜ਼ ‘ਚ ਸਭ ਤੋਂ ਵੱਧ ਦੌੜਾਂ ਬਣਾਉਣ ਵਾਲਾ ਓਪਨਰ ਵੀ ਬਣ ਗਏ।

ਰਾਹੁਲ ਲਈ ਸ਼ਾਨਦਾਰ ਸੀਰੀਜ਼

ਲੰਡਨ ਦੇ ਓਵਲ ਵਿਖੇ ਭਾਰਤ ਤੇ ਇੰਗਲੈਂਡ ਵਿਚਕਾਰ ਟੈਸਟ ਸੀਰੀਜ਼ ਦੇ ਆਖਰੀ ਮੈਚ ‘ਚ, ਰਾਹੁਲ ਦੋਵੇਂ ਪਾਰੀਆਂ ‘ਚ ਅਸਫਲ ਰਹੇ। ਐਂਡਰਸਨ-ਤੇਂਦੁਲਕਰ ਟਰਾਫੀ ਦੇ ਇਸ ਫੈਸਲਾਕੁੰਨ ਮੈਚ ਦੀ ਪਹਿਲੀ ਪਾਰੀ ‘ਚ ਰਾਹੁਲ ਸਿਰਫ਼ 14 ਦੌੜਾਂ ਬਣਾ ਕੇ ਆਊਟ ਹੋ ਗਏ। ਇਸ ਦੇ ਨਾਲ ਹੀ, ਉਹ ਦੂਜੀ ਪਾਰੀ ‘ਚ ਵੀ ਕੁਝ ਨਹੀਂ ਕਰ ਸਕੇ ਤੇ ਇਸ ਦੇ ਸਿਰਫ਼ ਅੱਧੀਆਂ ਦੌੜਾਂ ਹੀ ਬਣਾ ਸਕੇ। ਇਸ ਵਾਰ ਉਹ ਸਿਰਫ਼ 7 ਦੌੜਾਂ ਬਣਾ ਕੇ ਪੈਵੇਲੀਅਨ ਵਾਪਸ ਪਰਤੇ। ਇਸ ਤਰ੍ਹਾਂ, ਉਹ ਮੈਚ ਦੇ ਪਹਿਲੇ ਦੋ ਦਿਨਾਂ ‘ਚ ਦੋਵੇਂ ਪਾਰੀਆਂ ‘ਚ ਆਊਟ ਹੋ ਕੇ ਵਾਪਸ ਪਰਤੇ।

ਕੇਐਲ ਰਾਹੁਲ ਇਸ ਟੈਸਟ ‘ਚ ਸਿਰਫ਼ 21 ਦੌੜਾਂ ਹੀ ਬਣਾ ਸਕੇ, ਪਰ ਉਨ੍ਹਾਂ ਨੇ ਪਿਛਲੇ ਚਾਰ ਮੈਚਾਂ ‘ਚ ਬਹੁਤ ਦੌੜਾਂ ਬਣਾਈਆਂ। ਲੀਡਜ਼ ‘ਚ ਪਹਿਲੇ ਟੈਸਟ ਤੋਂ ਲੈ ਕੇ ਮੈਨਚੈਸਟਰ ‘ਚ ਚੌਥੇ ਟੈਸਟ ਤੱਕ, ਉਨ੍ਹਾਂ ਨੇ ਹਰ ਮੈਚ ਵਿੱਚ ਘੱਟੋ-ਘੱਟ ਇੱਕ ਵਾਰ 50 ਤੋਂ ਵੱਧ ਦੌੜਾਂ ਬਣਾਈਆਂ। ਇਸ ਤਰ੍ਹਾਂ, ਰਾਹੁਲ ਨੇ 5 ਟੈਸਟਾਂ ਦੀਆਂ 10 ਪਾਰੀਆਂ ਵਿੱਚ 532 ਦੌੜਾਂ ਦੇ ਮਜ਼ਬੂਤ ਅੰਕੜਿਆਂ ਨਾਲ ਸੀਰੀਜ਼ ਦਾ ਅੰਤ ਕੀਤਾ। ਉਨ੍ਹਾਂ ਦਾ ਔਸਤ 53.20 ਸੀ, ਜਿਸ ‘ਚ 2 ਸੈਂਕੜੇ ਅਤੇ 2 ਅਰਧ ਸੈਂਕੜੇ ਸ਼ਾਮਲ ਸਨ। ਉਨ੍ਹਾਂ ਦਾ ਸਭ ਤੋਂ ਵਧੀਆ ਸਕੋਰ 137 ਦੌੜਾਂ ਸੀ।

22 ਸਾਲਾਂ ‘ਚ ਇੰਗਲੈਂਡ ‘ਚ ਸਭ ਤੋਂ ਵਧੀਆ ਓਪਨਰ

ਇਹ ਰਾਹੁਲ ਦੇ ਟੈਸਟ ਕਰੀਅਰ ਦੀ ਸਭ ਤੋਂ ਵਧੀਆ ਸੀਰੀਜ਼ ਸਾਬਤ ਹੋਈ, ਜਿੱਥੇ ਉਨ੍ਹਾਂ ਨੇ ਪਹਿਲੀ ਵਾਰ ਇੱਕ ਸੀਰੀਜ਼ ‘ਚ ਨਾ ਸਿਰਫ਼ 400 ਤੋਂ ਵੱਧ ਦੌੜਾਂ ਬਣਾਈਆਂ। ਇਸ ਦੇ ਨਾਲ, ਉਹ ਇੰਗਲੈਂਡ ਦੀ ਧਰਤੀ ‘ਤੇ ਪਿਛਲੇ 22 ਸਾਲਾਂ ‘ਚ ਸਭ ਤੋਂ ਸਫਲ ਓਪਨਰ ਵੀ ਬਣ ਗਏ। ਇਸ ਤੋਂ ਪਹਿਲਾਂ 2003 ਵਿੱਚ, ਦੱਖਣੀ ਅਫਰੀਕਾ ਦੇ ਸਾਬਕਾ ਕਪਤਾਨ ਗ੍ਰੀਮ ਸਮਿਥ ਨੇ ਇੰਗਲੈਂਡ ਵ’ਚ ਇੱਕ ਓਪਨਰ ਵਜੋਂ 714 ਦੌੜਾਂ ਬਣਾਈਆਂ ਸਨ। ਉਨ੍ਹਾਂ ਤੋਂ ਬਾਅਦ ਇਹ ਪਹਿਲੀ ਵਾਰ ਹੈ ਜਦੋਂ ਕਿਸੇ ਸਲਾਮੀ ਬੱਲੇਬਾਜ਼ ਨੇ ਇੰਗਲੈਂਡ ‘ਚ 500 ਤੋਂ ਵੱਧ ਦੌੜਾਂ ਬਣਾਈਆਂ ਹਨ। ਮੈਥਿਊ ਹੇਡਨ, ਵਰਿੰਦਰ ਸਹਿਵਾਗ ਤੇ ਰੋਹਿਤ ਸ਼ਰਮਾ ਵਰਗੇ ਵਿਦੇਸ਼ੀ ਸਲਾਮੀ ਬੱਲੇਬਾਜ਼ ਤੇ ਐਲਸਟੇਅਰ ਕੁੱਕ ਅਤੇ ਐਂਡਰਿਊ ਸਟ੍ਰਾਸ ਵਰਗੇ ਅੰਗਰੇਜ਼ੀ ਸਲਾਮੀ ਬੱਲੇਬਾਜ਼ ਵੀ ਇਹ ਕਾਰਨਾਮਾ ਆਪਣੀ ਹੋਮ ਗਰਾਊਂਡ ‘ਚ ਨਹੀਂ ਕਰ ਸਕੇ।