ਸਿਰਫ਼ 18 ਦੌੜਾਂ ਤੇ ਸ਼ੁਭਮਨ ਗਿੱਲ ਬਣ ਜਾਣਗੇ ਨੰਬਰ-1, ਲਾਰਡਜ਼ ਟੈਸਟ ‘ਚ ਇਤਿਹਾਸ ਰੱਚ ਅਤੇ ਟੀਮ ਇੰਡੀਆ ਨੂੰ ਦਿਵਾਉਣਗੇ ਲੀਡ!
Shubman Gill Record: ਹਾਲਾਂਕਿ ਇਤਿਹਾਸਕ ਤੌਰ 'ਤੇ ਲਾਰਡਜ਼ ਕ੍ਰਿਕਟ ਸਟੇਡੀਅਮ 'ਚ ਭਾਰਤ ਤੇ ਇੰਗਲੈਂਡ ਵਿਚਕਾਰ ਹੋਏ ਮੁਕਾਬਲੇ 'ਚ ਮੇਜ਼ਬਾਨ ਟੀਮ ਦਾ ਹੱਥ ਉੱਪਰ ਰਿਹਾ ਹੈ। ਪਰ ਜੇਕਰ ਅਸੀਂ ਪਿਛਲੇ 11 ਸਾਲਾਂ ਦੇ ਰਿਕਾਰਡ 'ਤੇ ਨਜ਼ਰ ਮਾਰੀਏ, ਤਾਂ ਟੀਮ ਇੰਡੀਆ ਨੇ ਇੱਥੇ ਦਬਦਬਾ ਬਣਾਇਆ ਹੈ ਅਤੇ ਇਸ ਸਮੇਂ ਦੌਰਾਨ ਖੇਡੇ ਗਏ 3 ਵਿੱਚੋਂ 2 ਮੈਚ ਜਿੱਤੇ ਹਨ। ਕੀ ਟੀਮ ਇੰਡੀਆ ਗਿੱਲ ਦੀ ਕਪਤਾਨੀ 'ਚ ਤੀਜੀ ਜਿੱਤ ਦਰਜ ਕਰੇਗੀ?
ਸ਼ੁਭਮਨ ਗਿੱਲ ਨੇ ਆਪਣੇ ਟੈਸਟ ਕਰੀਅਰ ਦੇ ਪਿਛਲੇ ਸਾਢੇ 4 ਸਾਲਾਂ ‘ਚ ਸਿਰਫ਼ ਇੱਕ ਵਾਰ ਹੀ ਇੰਨੀਆਂ ਦੌੜਾਂ ਬਣਾਈਆਂ ਹਨ, ਜਿੰਨੀਆਂ ਉਨ੍ਹਾਂ ਨੇ ਇਸ ਸਮੇਂ ਭਾਰਤ-ਇੰਗਲੈਂਡ ਟੈਸਟ ਸੀਰੀਜ਼ ‘ਚ ਬਣਾਈਆਂ ਹਨ। ਇਸ ਸਟਾਰ ਬੱਲੇਬਾਜ਼ ਨੇ ਪਿਛਲੇ ਸਾਲ ਟੈਸਟ ਕ੍ਰਿਕਟ ਵਿੱਚ 800 ਤੋਂ ਵੱਧ ਦੌੜਾਂ ਬਣਾਈਆਂ ਸਨ। ਪਰ ਟੀਮ ਇੰਡੀਆ ਦਾ ਨਵਾਂ ਟੈਸਟ ਕਪਤਾਨ ਬਣਨ ਤੋਂ ਬਾਅਦ, ਉਨ੍ਹਾਂ ਦੀ ਕਿਸਮਤ ਇੰਨੀ ਬਦਲ ਗਈ ਹੈ ਕਿ ਉਨ੍ਹਾਂ ਨੇ ਮੌਜੂਦਾ ਸੀਰੀਜ਼ ਦੇ ਸਿਰਫ਼ 2 ਮੈਚਾਂ ਵਿੱਚ ਲਗਭਗ 600 ਦੌੜਾਂ ਬਣਾਈਆਂ ਹਨ। ਹੁਣ ਉਨ੍ਹਾਂ ਨੂੰ ਇੰਗਲੈਂਡ ਵਿੱਚ ਟੈਸਟ ਸੀਰੀਜ਼ ‘ਚ ਸਭ ਤੋਂ ਵੱਧ ਦੌੜਾਂ ਬਣਾਉਣ ਵਾਲੇ ਭਾਰਤੀ ਬੱਲੇਬਾਜ਼ ਬਣਨ ਲਈ ਸਿਰਫ 18 ਦੌੜਾਂ ਦੀ ਲੋੜ ਹੈ ਤੇ ਇਸ ਲਈ ਲਾਰਡਜ਼ ਤੋਂ ਵਧੀਆ ਸਥਾਨ ਕੀ ਹੋ ਸਕਦਾ ਹੈ।
ਲਾਰਡਜ਼ ‘ਚ ਅਗਵਾਈ ਕੌਣ ਕਰੇਗਾ?
ਭਾਰਤ ਤੇ ਇੰਗਲੈਂਡ ਵਿਚਕਾਰ ਟੈਸਟ ਸੀਰੀਜ਼ ਦਾ ਤੀਜਾ ਮੈਚ 10 ਜੁਲਾਈ ਤੋਂ ਲਾਰਡਜ਼ ‘ਚ ਸ਼ੁਰੂ ਹੋ ਰਿਹਾ ਹੈ। ਸੀਰੀਜ਼ ਲੀਡਜ਼ ਵਿੱਚ ਸ਼ੁਰੂ ਹੋਈ ਸੀ, ਜਿਸ ਨੂੰ ਇੰਗਲੈਂਡ ਨੇ ਜਿੱਤਿਆ ਸੀ। ਫਿਰ ਬਰਮਿੰਘਮ ‘ਚ ਖੇਡੇ ਗਏ ਦੂਜੇ ਮੈਚ ‘ਚ ਟੀਮ ਇੰਡੀਆ ਨੇ ਵਾਪਸੀ ਕੀਤੀ ਅਤੇ ਮੇਜ਼ਬਾਨ ਟੀਮ ਨੂੰ ਹਰਾਇਆ। ਹੁਣ ਸੀਰੀਜ਼ ਦੇ ਤੀਜੇ ਮੈਚ ‘ਚ ਦੋਵੇਂ ਟੀਮਾਂ 1-1 ਦੇ ਸਕੋਰ ਨਾਲ ਆ ਰਹੀਆਂ ਹਨ। ਅਜਿਹੀ ਸਥਿਤੀ ‘ਚ, ਇੱਥੇ ਜੋ ਵੀ ਟੀਮ ਜਿੱਤੇਗੀ, ਉਸ ਨੂੰ ਲੀਡ ਮਿਲੇਗੀ।
ਹਾਲਾਂਕਿ ਇੰਗਲੈਂਡ ਨੇ ਲਾਰਡਜ਼ ਟੈਸਟ ‘ਚ ਟੀਮ ਇੰਡੀਆ ‘ਤੇ ਜ਼ਿਆਦਾ ਜਿੱਤਾਂ ਦਰਜ ਕੀਤੀਆਂ ਹਨ, ਪਰ ਜੇਕਰ ਅਸੀਂ ਪਿਛਲੇ 3 ਟੈਸਟ ਮੈਚਾਂ ‘ਤੇ ਨਜ਼ਰ ਮਾਰੀਏ ਤਾਂ ਟੀਮ ਇੰਡੀਆ ਦਾ ਹੱਥ ਉੱਪਰ ਜਾਪਦਾ ਹੈ। ਟੀਮ ਇੰਡੀਆ ਨੇ 2014 ਅਤੇ 2021 ‘ਚ ਇੱਥੇ ਖੇਡੇ ਗਏ ਟੈਸਟ ਮੈਚ ਜਿੱਤੇ ਸਨ। ਹਾਲਾਂਕਿ, 2018 ਵਿੱਚ, ਭਾਰਤੀ ਟੀਮ ਨੂੰ ਪਾਰੀ ਦੇ ਫਰਕ ਨਾਲ ਵੱਡੀ ਹਾਰ ਦਾ ਸਾਹਮਣਾ ਕਰਨਾ ਪਿਆ ਸੀ। ਪਰ ਪਿਛਲੇ ਦੌਰੇ ‘ਤੇ, ਮੁਹੰਮਦ ਸਿਰਾਜ, ਜਸਪ੍ਰੀਤ ਬੁਮਰਾਹ ਅਤੇ ਕੇਐਲ ਰਾਹੁਲ ਵਰਗੇ ਸਿਤਾਰਿਆਂ ਨੇ ਇਤਿਹਾਸਕ ਜਿੱਤ ‘ਚ ਵੱਡੀ ਭੂਮਿਕਾ ਨਿਭਾਈ। ਇਹ ਤਿੰਨੋਂ ਖਿਡਾਰੀ ਇਸ ਵਾਰ ਵੀ ਪਲੇਇੰਗ ਇਲੈਵਨ ਦਾ ਹਿੱਸਾ ਹੋਣਗੇ। ਅਜਿਹੀ ਸਥਿਤੀ ‘ਚ ਸਾਰਿਆਂ ਦੀਆਂ ਨਜ਼ਰਾਂ ਇਨ੍ਹਾਂ ਤਿੰਨਾਂ ‘ਤੇ ਹੋਣਗੀਆਂ।
ਗਿੱਲ ਕੋਲ ਨੰਬਰ-1 ਬਣਨ ਦਾ ਮੌਕਾ
ਇਸ ਮੈਚ ‘ਚ, ਜਿਸ ਖਿਡਾਰੀ ‘ਤੇ ਸਭ ਤੋਂ ਵੱਧ ਧਿਆਨ ਹੋਵੇਗਾ ਉਹ ਕਪਤਾਨ ਸ਼ੁਭਮਨ ਗਿੱਲ ਹੈ। ਜਿਵੇਂ ਕਿ ਸ਼ੁਰੂ ਵਿੱਚ ਦੱਸਿਆ ਗਿਆ ਹੈ, ਗਿੱਲ ਨੇ ਇਸ ਸੀਰੀਜ਼ ਵਿੱਚ ਓਨੀਆਂ ਦੌੜਾਂ ਬਣਾ ਲਈਆਂ ਹਨ, ਜਿੰਨੀਆਂ ਉਹ ਪਿਛਲੇ ਸਾਲਾਂ ਵਿੱਚ ਨਹੀਂ ਬਣਾ ਸਕੇ ਸਨ। ਭਾਰਤੀ ਕਪਤਾਨ ਨੇ ਹੁਣ ਤੱਕ ਇਸ ਸੀਰੀਜ਼ ‘ਚ ਸਿਰਫ਼ ਸੈਂਕੜਿਆਂ ਬਾਰੇ ਹੀ ਗੱਲ ਕੀਤੀ ਹੈ। ਗਿੱਲ ਨੇ ਲੀਡਜ਼ ਵਿੱਚ ਪਹਿਲੀ ਪਾਰੀ ‘ਚ 147 ਦੌੜਾਂ ਬਣਾਈਆਂ। ਫਿਰ ਉਨ੍ਹਾਂ ਨੇ ਐਜਬੈਸਟਨ ‘ਚ ਸਾਰੇ ਰਿਕਾਰਡ ਤੋੜ ਦਿੱਤੇ। ਟੀਮ ਇੰਡੀਆ ਦੇ ਇਸ ਨਵੇਂ ਕਪਤਾਨ ਨੇ ਪਹਿਲੀ ਪਾਰੀ ‘ਚ 269 ਦੌੜਾਂ ਬਣਾਈਆਂ ਅਤੇ ਇੰਗਲੈਂਡ ‘ਚ ਦੋਹਰਾ ਸੈਂਕੜਾ ਲਗਾਉਣ ਵਾਲਾ ਪਹਿਲਾ ਏਸ਼ੀਆਈ ਕਪਤਾਨ ਬਣ ਗਏ। ਫਿਰ ਉਨ੍ਹਾਂ ਨੇ ਅਗਲੀ ਪਾਰੀ ਵਿੱਚ ਵੀ 161 ਦੌੜਾਂ ਬਣਾਈਆਂ। ਇਸ ਤਰ੍ਹਾਂ, ਉਨ੍ਹਾਂ ਨੇ ਹੁਣ ਤੱਕ 4 ਪਾਰੀਆਂ ‘ਚ 585 ਦੌੜਾਂ ਬਣਾਈਆਂ ਹਨ।
ਹੁਣ ਗਿੱਲ ਕੋਲ ਇੰਗਲੈਂਡ ਵਿੱਚ ਟੈਸਟ ਸੀਰੀਜ਼ ਵ’ਚ ਸਭ ਤੋਂ ਵੱਧ ਦੌੜਾਂ ਬਣਾਉਣ ਵਾਲਾ ਭਾਰਤੀ ਬੱਲੇਬਾਜ਼ ਬਣਨ ਦਾ ਮੌਕਾ ਹੈ। ਜੇਕਰ ਗਿੱਲ ਸਿਰਫ਼ 18 ਹੋਰ ਦੌੜਾਂ ਬਣਾਉਂਦਾ ਹਨ, ਤਾਂ ਉਹ ਸਾਬਕਾ ਕਪਤਾਨ ਤੇ ਕੋਚ ਰਾਹੁਲ ਦ੍ਰਾਵਿੜ ਨੂੰ ਪਿੱਛੇ ਛੱਡ ਦੇਣਗੇ। ਦ੍ਰਾਵਿੜ ਨੇ 2002 ਦੀ ਸੀਰੀਜ਼ ਵਿੱਚ 4 ਟੈਸਟ ਮੈਚਾਂ ‘ਚ 602 ਦੌੜਾਂ ਬਣਾ ਕੇ ਇਹ ਰਿਕਾਰਡ ਬਣਾਇਆ ਸੀ। ਜੇਕਰ ਗਿੱਲ 18 ਦੌੜਾਂ ਬਣਾਉਂਦੇ ਹਨ, ਤਾਂ ਉਹ ਦ੍ਰਾਵਿੜ ਨੂੰ ਪਛਾੜ ਕੇ ਨੰਬਰ-1 ਬਣ ਜਾਣਗੇ। ਵਰਤਮਾਨ ‘ਚ, ਉਹ ਦ੍ਰਾਵਿੜ ਅਤੇ ਵਿਰਾਟ ਕੋਹਲੀ ਤੋਂ ਬਾਅਦ ਤੀਜੇ ਨੰਬਰ ‘ਤੇ ਹਨ। ਜੇਕਰ ਉਹ ਇਨ੍ਹਾਂ 18 ਵਿੱਚੋਂ 9 ਦੌੜਾਂ ਬਣਾਉਂਦੇ ਹਨ, ਤਾਂ ਉਹ ਕੋਹਲੀ (593 ਦੌੜਾਂ, 2018) ਨੂੰ ਪਿੱਛੇ ਛੱਡ ਦੇਣਗੇ ਅਤੇ ਇੰਗਲੈਂਡ ‘ਚ ਇੱਕ ਸੀਰੀਜ਼ ‘ਚ ਸਭ ਤੋਂ ਵੱਧ ਦੌੜਾਂ ਬਣਾਉਣ ਵਾਲੇ ਭਾਰਤੀ ਕਪਤਾਨ ਵੀ ਬਣ ਜਾਣਗੇ। ਹਾਲਾਂਕਿ ਇਸ ਲੜੀ ‘ਚ ਅਜੇ 6 ਪਾਰੀਆਂ ਬਾਕੀ ਹਨ, ਪਰ ਲਾਰਡਸ ‘ਚ ਇਤਿਹਾਸ ਬਣਾਉਣਾ ਆਪਣੇ ਆਪ ‘ਚ ਖਾਸ ਹੋਵੇਗਾ।
ਇਹ ਵੀ ਪੜ੍ਹੋ
