ਮੋਹਸਿਨ ਨਕਵੀ ਤੋਂ Womens Asia Cup ਦੀ ਟ੍ਰਾਫੀ ਨਾ ਲੈਣ ‘ਤੇ BCCI ਨੇ ਕੀ ਕਿਹਾ? ਟੀਮ ਇੰਡੀਆ ਦੇ ਕੋਚ ਨੇ ਵੀ ਤੋੜੀ ਚੁੱਪੀ
Women's Asia Cup 2026: ਮੋਹਸਿਨ ਨਕਵੀ ਤੋਂ ਟੀਮ ਇੰਡੀਆ ਨੇ ਫਿਰ ਨਹੀਂ ਲਈ ਏਸ਼ੀਆ ਕੱਪ ਦੀ ਟ੍ਰਾਫੀ। ਫਰਕ ਸਿਰਫ਼ ਇੰਨਾ ਰਿਹਾ ਕਿ ਜੋ ਕੰਮ ਪਹਿਲਾਂ ਪੁਰਸ਼ ਟੀਮ ਨੇ ਕੀਤਾ ਸੀ, ਉਹ ਇਸ ਵਾਰ ਮਹਿਲਾ ਟੀਮ ਨੇ ਕੀਤਾ ਹੈ। ਇਸ ਤੇ BCCI ਸਕੱਤਰ ਦੇਵਜੀਤ ਸੈਕੀਆ ਨੇ ਕੀ ਕਿਹਾ?
ਮੋਹਸਿਨ ਨਕਵੀ ਤੋਂ Women’s Asia Cup ਦੀ ਟ੍ਰਾਫੀ ਨਾ ਲੈਣ ’ਤੇ BCCI ਨੇ ਕੀ ਕਿਹਾ?
ਪਿਛਲੇ ਸਾਲ ਭਾਰਤੀ ਪੁਰਸ਼ ਟੀਮ ਨੇ ਜੋ ਕੀਤਾ ਸੀ, ਇਸ ਸਾਲ ਉਹੀ ਭਾਰਤ ਦੀ ਮਹਿਲਾ ਟੀਮ ਨੇ ਵੀ ਕਰ ਦਿੱਤਾ। ਭਾਰਤ ਦੀ ਸੀਨੀਅਰ ਪੁਰਸ਼ ਅਤੇ ਮਹਿਲਾ ਕ੍ਰਿਕਟ ਟੀਮ ਦੇ ਇਸ ਕਾਰਨਾਮੇ ਵਿੱਚ ਜੋ ਗੱਲ ਸਾਂਝੀ ਰਹੀ, ਉਹ ਮੋਹਸਿਨ ਨਕਵੀ ਦੀ ਹੋਈ ਫਜ਼ੀਹਤ ਸੀ। ਪੁਰਸ਼ ਟੀਮ ਦੀ ਤਰ੍ਹਾਂ ਭਾਰਤੀ ਮਹਿਲਾ ਟੀਮ ਨੇ ਵੀ ਮੋਹਸਿਨ ਨਕਵੀ ਤੋਂ ਏਸ਼ੀਆ ਕੱਪ ਦੀ ਟ੍ਰਾਫੀ ਲੈਣ ਤੋਂ ਇਨਕਾਰ ਕਰ ਦਿੱਤਾ। ਭਾਰਤੀ ਮਹਿਲਾ ਟੀਮ ਵੱਲੋਂ ਚੁੱਕੇ ਗਏ ਇਸ ਕਦਮ ਤੇ ਹੁਣ BCCI ਵੱਲੋਂ ਬਿਆਨ ਸਾਹਮਣੇ ਆਇਆ ਹੈ।
ਮੋਹਸਿਨ ਨਕਵੀ ਤੋਂ ਟ੍ਰਾਫੀ ਨਾ ਲੈਣ ਤੇ BCCI ਦਾ ਬਿਆਨ
ਦੁਬਈ ਵਿੱਚ BCCI ਸਕੱਤਰ ਦੇਵਜੀਤ ਸੈਕੀਆ ਨੇ ਹਰਮਨਪ੍ਰੀਤ ਕੌਰ ਅਤੇ ਟੀਮ ਦੇ ਫੈਸਲੇ ਤੇ ਕਿਹਾ ਕਿ ਅਜਿਹਾ ਕਰਕੇ ਉਨ੍ਹਾਂ ਨੇ ਪੁਰਸ਼ ਟੀਮ ਦੇ ਰੁਖ ਨਾਲ ਆਪਣੀ ਇਕਜੁੱਟਤਾ ਦਾ ਪ੍ਰਗਟਾਵਾ ਕੀਤਾ ਹੈ। ਉਨ੍ਹਾਂ ਕਿਹਾ ਕਿ 2025 ਵਿੱਚ ਹੋਏ ਪਹਿਲਗਾਮ ਅੱਤਵਾਦੀ ਹਮਲੇ ਤੋਂ ਬਾਅਦ ਸਾਡੇ ਦੇਸ਼ਵਾਸੀਆਂ ਵੱਲੋਂ ਸਾਡੇ ਤੇ ਦਬਾਅ ਸੀ ਕਿ ਅਸੀਂ ਆਪਣੇ ਗੁਆਂਢੀ ਮੁਲਕ ਨਾਲ ਕੋਈ ਸਬੰਧ ਨਾ ਰੱਖੀਏ। ਉਨ੍ਹਾਂ ਨਾਲ ਕ੍ਰਿਕਟ ਵੀ ਨਾ ਖੇਡੀਏ। ਹਾਲਾਂਕਿ, ਸਾਡੇ ਦੇਸ਼ ਦੀ ਸਰਕਾਰ ਨੇ ਫਿਰ ਵੀ ਮਲਟੀਨੇਸ਼ਨ ਟੂਰਨਾਮੈਂਟ ਵਿੱਚ ਉਨ੍ਹਾਂ ਨਾਲ ਖੇਡਣ ਦੀ ਮਨਜ਼ੂਰੀ ਦਿੱਤੀ। ਪਰ ਇਸ ਦਾ ਇਹ ਮਤਲਬ ਨਹੀਂ ਕਿ ਅਸੀਂ ਹਰ ਸ਼ਰਤ ਨੂੰ ਮੰਨਾਂਗੇ।
ਦੇਵਜੀਤ ਸੈਕੀਆ ਨੇ ਕਿਹਾ ਕਿ ਮੋਹਸਿਨ ਨਕਵੀ ACC ਦੇ ਪ੍ਰਧਾਨ ਹੋਣ ਦੇ ਨਾਲ-ਨਾਲ PCB ਦੇ ਚੇਅਰਮੈਨ ਵੀ ਹਨ। ਇਸ ਤੋਂ ਇਲਾਵਾ ਉਹ ਪਾਕਿਸਤਾਨ ਸਰਕਾਰ ਵਿੱਚ ਮੰਤਰੀ ਵੀ ਹਨ। ਅਜਿਹੇ ਵਿੱਚ ਅਸੀਂ ਉਨ੍ਹਾਂ ਤੋਂ ਟ੍ਰਾਫੀ ਨਹੀਂ ਲੈ ਸਕਦੇ। ਮਹਿਲਾ ਟੀਮ ਨੇ ਆਪਣੇ ਫੈਸਲੇ ਰਾਹੀਂ ਸਾਬਤ ਕੀਤਾ ਹੈ ਕਿ ਉਹ ਭਾਰਤੀ ਪੁਰਸ਼ ਟੀਮ ਦੇ ਰੁਖ ਦੇ ਨਾਲ ਹੈ। ਸਾਨੂੰ ਇਸ ਦਾ ਕੋਈ ਮਲਾਲ ਨਹੀਂ ਹੈ। ਸਾਡਾ ਮੁੱਖ ਮਕਸਦ ਟ੍ਰਾਫੀ ਲੈਣਾ ਨਹੀਂ, ਸਗੋਂ ਭਾਰਤੀ ਟੀਮ ਦੀ ਜਿੱਤ ਹੈ ਅਤੇ ਅਸੀਂ ਉਹ ਹਾਸਲ ਕਰ ਰਹੇ ਹਾਂ।
ਅਮੋਲ ਮਜ਼ੂਮਦਾਰ ਨੇ ਵੀ ਪੂਰੇ ਵਿਵਾਦ ਤੇ ਤੋੜੀ ਚੁੱਪੀ
ਦੇਵਜੀਤ ਸੈਕੀਆ ਤੋਂ ਪਹਿਲਾਂ ਭਾਰਤੀ ਮਹਿਲਾ ਟੀਮ ਦੇ ਕੋਚ ਅਮੋਲ ਮਜ਼ੂਮਦਾਰ ਨੇ ਵੀ ਪ੍ਰੈੱਸ ਕਾਨਫਰੰਸ ਵਿੱਚ ਟ੍ਰਾਫੀ ਨਾ ਲੈਣ ਦੇ ਵਿਵਾਦ ਤੇ ਚੁੱਪੀ ਤੋੜੀ। ਉਨ੍ਹਾਂ ਕਿਹਾ ਕਿ ਇਹ ਫੈਸਲਾ BCCI ਨੇ ਲਿਆ ਹੈ ਅਤੇ ਅਸੀਂ ਬੋਰਡ ਦੇ ਨਾਲ ਹਾਂ। ਮਜ਼ੂਮਦਾਰ ਨੇ ਅੱਗੇ ਕਿਹਾ ਕਿ ਸਾਡੇ ਲਈ ਟੂਰਨਾਮੈਂਟ ਖਤਮ ਹੋ ਚੁੱਕਾ ਹੈ ਅਤੇ ਅਸੀਂ ਚੈਂਪੀਅਨ ਬਣ ਗਏ ਹਾਂ, ਇੰਨਾ ਹੀ ਕਾਫੀ ਹੈ। ਇਹ ਰਿਕਾਰਡ ਵਿੱਚ ਦਰਜ ਹੋ ਚੁੱਕਾ ਹੈ ਕਿ ਭਾਰਤੀ ਮਹਿਲਾ ਟੀਮ ਏਸ਼ੀਆ ਕੱਪ 2026 ਦੀ ਚੈਂਪੀਅਨ ਹੈ। ਅਸੀਂ ਇੰਨੇ ਨਾਲ ਹੀ ਖੁਸ਼ ਹਾਂ ਅਤੇ ਹੁਣ ਸਾਡਾ ਸਾਰਾ ਧਿਆਨ ਏਸ਼ੀਅਨ ਗੇਮਜ਼ ਤੇ ਹੈ।
ਭਾਰਤ ਨੇ 72 ਦੌੜਾਂ ਨਾਲ ਜਿੱਤਿਆ ਏਸ਼ੀਆ ਕੱਪ ਦਾ ਫਾਈਨਲ
ਭਾਰਤੀ ਟੀਮ ਨੇ ਮਹਿਲਾ ਏਸ਼ੀਆ ਕੱਪ 2026 ਦੇ ਫਾਈਨਲ ਵਿੱਚ ਸ਼੍ਰੀਲੰਕਾ ਨੂੰ 72 ਦੌੜਾਂ ਨਾਲ ਹਰਾਇਆ, ਜਿਸ ਤੋਂ ਬਾਅਦ ਉਸ ਨੇ ਮੋਹਸਿਨ ਨਕਵੀ ਤੋਂ ਟ੍ਰਾਫੀ ਲੈਣ ਤੋਂ ਇਨਕਾਰ ਕਰ ਦਿੱਤਾ ਸੀ।