ਚੰਡੀਗੜ੍ਹ ‘ਚ ਸੰਧੀ ਪੂਜਾ ਦਾ ਸ਼ਰਧਾ ਨਾਲ ਆਯੋਜਨ, 108 ਕਮਲ ਦੇ ਫੁੱਲਾਂ ਅਤੇ 108 ਦੀਵਿਆਂ ਨਾਲ ਮਾਂ ਦੁਰਗਾ ਦੀ ਕੀਤੀ ਵਿਸ਼ੇਸ਼ ਆਰਤੀ
Sandhi Puja: ਬੰਗਾਲੀ ਪਰੰਪਰਾ ਵਿੱਚ ਸੰਧੀ ਪੂਜਾ ਦਾ ਵਿਸ਼ੇਸ਼ ਧਾਰਮਿਕ ਮਹੱਤਵ ਹੈ। ਇਹ ਅਸ਼ਟਮੀ ਤਿਥੀ ਦੇ ਆਖਰੀ 24 ਮਿੰਟਾਂ ਅਤੇ ਨੌਮੀ ਤਿਥੀ ਦੇ ਸ਼ੁਰੂਆਤੀ 24 ਮਿੰਟਾਂ ਦੇ ਸੰਧੀਕਾਲ ਦੌਰਾਨ ਕੀਤੀ ਜਾਂਦੀ ਹੈ। ਮਾਨਤਾ ਹੈ ਕਿ ਇਸੇ ਸਮੇਂ ਮਾਂ ਦੁਰਗਾ ਨੇ ਰਾਖਸ਼ਾਂ ਦਾ ਵਧ ਕੀਤਾ ਸੀ।
ਚੰਡੀਗੜ੍ਹ ਦੇ ਬੰਗ ਭਵਨ ਤੇ ਕਾਲੀਬਾੜੀ 'ਚ ਸ਼ਰਧਾ ਨਾਲ ਮਨਾਈ ਗਈ ਸੰਧੀ ਪੂਜਾ Photo Credit : Meta AI
ਚੰਡੀਗੜ੍ਹ ਦੇ ਸੈਕਟਰ-35 ਸਥਿਤ ਬੰਗ ਭਵਨ ਅਤੇ ਸੈਕਟਰ-47 ਦੇ ਕਾਲੀਬਾੜੀ ਦੁਰਗਾ ਪੂਜਾ ਪੰਡਾਲ ਵਿੱਚ ਸੋਮਵਾਰ ਨੂੰ ਸੰਧੀ ਪੂਜਾ ਦਾ ਆਯੋਜਨ ਸ਼ਰਧਾ ਅਤੇ ਭਗਤੀ ਨਾਲ ਕੀਤਾ ਗਿਆ। ਇਸ ਦੌਰਾਨ ਮਾਂ ਦੁਰਗਾ ਦੀ ਵਿਸ਼ੇਸ਼ ਆਰਤੀ 108 ਕਮਲ ਦੇ ਫੁੱਲਾਂ ਅਤੇ 108 ਦੀਵਿਆਂ ਨਾਲ ਕੀਤੀ ਗਈ।
ਮਾਂ ਦੁਰਗਾ ਦੀ ਪੂਜਾ ਲਈ ਕੋਲਕਾਤਾ ਤੋਂ ਆਏ ਕਮਲ ਦੇ ਫੁੱਲ
ਬੰਗ ਭਵਨ ਦੇ ਪੁਜਾਰੀ ਸੁਨੀਲ ਕੁਮਾਰ ਚੈਟਰਜੀ ਨੇ ਦੱਸਿਆ ਕਿ ਪੂਜਾ ਲਈ ਵਿਸ਼ੇਸ਼ ਤੌਰ ‘ਤੇ ਕਮਲ ਦੇ ਫੁੱਲ ਕੋਲਕਾਤਾ ਤੋਂ ਮੰਗਵਾਏ ਗਏ ਸਨ। ਸੰਧੀ ਪੂਜਾ ਦੌਰਾਨ ਸ਼ਰਧਾਲੂਆਂ ਨੇ ਮਾਂ ਦੁਰਗਾ ਅੱਗੇ ਸੀਸ ਝੁਕਾ ਕੇ ਪਰਿਵਾਰ ਦੀ ਸੁਖ-ਸਮ੍ਰਿੱਧੀ ਅਤੇ ਖ਼ੁਸ਼ਹਾਲੀ ਦੀ ਕਾਮਨਾ ਕੀਤੀ।
ਸੰਧੀ ਪੂਜਾ ਦੌਰਾਨ ਭਗਤੀ ਵਿੱਚ ਲੀਨ ਹੋਏ ਸ਼ਰਧਾਲੂ
ਦੁਰਗਾ ਪੂਜਾ ਦੌਰਾਨ ਸੰਧੀ ਪੂਜਾ ਨੂੰ ਬਹੁਤ ਹੀ ਪਵਿੱਤਰ ਸਮਾਂ ਮੰਨਿਆ ਜਾਂਦਾ ਹੈ। ਬੰਗਾਲੀ ਭਾਈਚਾਰੇ ਵਿੱਚ ਇਸ ਪੂਜਾ ਨੂੰ ਲੈ ਕੇ ਵਿਸ਼ੇਸ਼ ਉਤਸ਼ਾਹ ਦੇਖਣ ਨੂੰ ਮਿਲਦਾ ਹੈ। ਧਾਰਮਿਕ ਮਾਨਤਾਵਾਂ ਅਨੁਸਾਰ, ਅਸ਼ਟਮੀ ਅਤੇ ਨੌਮੀ ਦੇ ਸੰਧੀਕਾਲ ਦੌਰਾਨ ਮਾਂ ਦੁਰਗਾ ਦੇ ਚਾਮੁੰਡਾ ਸਰੂਪ ਦੀ ਪੂਜਾ ਕੀਤੀ ਜਾਂਦੀ ਹੈ। ਮਾਨਤਾ ਹੈ ਕਿ ਇਸੇ ਸਮੇਂ ਮਾਂ ਦੁਰਗਾ ਨੇ ਚੰਡ ਅਤੇ ਮੁੰਡ ਨਾਮ ਦੇ ਰਾਖਸ਼ਾਂ ਦਾ ਵਧ ਕੀਤਾ ਸੀ। ਇਸ ਲਈ ਇਸ ਪੂਜਾ ਨੂੰ ਬੁਰਾਈ ‘ਤੇ ਚੰਗਿਆਈ ਦੀ ਜਿੱਤ ਦੇ ਪ੍ਰਤੀਕ ਵਜੋਂ ਵੀ ਦੇਖਿਆ ਜਾਂਦਾ ਹੈ।
108 ਦੀਵੇ ਜਗਾ ਕੇ ਮਾਂ ਦੁਰਗਾ ਦੀ ਵਿਸ਼ੇਸ਼ ਪੂਜਾ
ਉਨ੍ਹਾਂ ਦੱਸਿਆ ਕਿ ਬੰਗਾਲੀ ਪਰੰਪਰਾ ਵਿੱਚ ਸੰਧੀ ਪੂਜਾ ਦਾ ਵਿਸ਼ੇਸ਼ ਧਾਰਮਿਕ ਮਹੱਤਵ ਹੈ। ਇਹ ਅਸ਼ਟਮੀ ਤਿਥੀ ਦੇ ਆਖਰੀ 24 ਮਿੰਟਾਂ ਅਤੇ ਨੌਮੀ ਤਿਥੀ ਦੇ ਸ਼ੁਰੂਆਤੀ 24 ਮਿੰਟਾਂ ਦੇ ਸੰਧੀਕਾਲ ਦੌਰਾਨ ਕੀਤੀ ਜਾਂਦੀ ਹੈ। ਮਾਨਤਾ ਹੈ ਕਿ ਇਸੇ ਸਮੇਂ ਮਾਂ ਦੁਰਗਾ ਨੇ ਰਾਖਸ਼ਾਂ ਦਾ ਵਧ ਕੀਤਾ ਸੀ। ਇਸੇ ਮੌਕੇ ਦੀ ਯਾਦ ਵਿੱਚ ਮਾਂ ਦੀ ਵਿਸ਼ੇਸ਼ ਪੂਜਾ-ਅਰਚਨਾ ਕੀਤੀ ਜਾਂਦੀ ਹੈ। ਪੂਜਾ ਦੌਰਾਨ ਮਾਂ ਨੂੰ 108 ਕਮਲ ਦੇ ਫੁੱਲ ਅਰਪਿਤ ਕਰਨ ਅਤੇ 108 ਦੀਵੇ ਜਗਾਉਣ ਦੀ ਪਰੰਪਰਾ ਨਿਭਾਈ ਜਾਂਦੀ ਹੈ।