ਸਾਨੂੰ Compromised ਲੀਡਰ ਦੀ ਲੋੜ ਨਹੀਂ… ਚੰਨੀ ਧੜੇ ਦੇ ਸ਼ਬਦ ਹਾਈਕਮਾਨ ਲਈ ਬਣੇ ਚਿੰਤਾ!

(Pic: Social Media)

“ਸਾਨੂੰ ਠੋਕ ਕੇ ਬੋਲਣ ਵਾਲਾ ਲੀਡਰ ਚਾਹੀਦਾ ਹੈ, ਸਾਨੂੰ Compromised ਲੀਡਰ ਦੀ ਲੋੜ ਨਹੀਂ…”, ਸਾਬਕਾ ਉੱਪ ਮੱਖ ਮੰਤਰੀ ਤੇ ਗੁਰਦਾਸਪੁਰ ਦੇ ਮੌਜੂਦਾ ਸਾਂਸਦ ਸੁਖਜਿੰਦਰ ਸਿੰਘ ਰੰਧਾਵਾ ਦੇ ਇਨ੍ਹਾਂ ਸ਼ਬਦਾਂ ਨੇ ਪੰਜਾਬ ਕਾਂਗਰਸ ਇੰਚਾਰਜ ਭੂਪੇਸ਼ ਬਘੇਲ ਨਾਲ ਮੀਟਿੰਗ ਦਾ ਮੁੱਖ ਮੁੱਦਾ ਸਾਹਮਣੇ ਰੱਖ ਦਿੱਤਾ। ਰੰਧਾਵਾ ਨਾਲ ਸਾਬਕਾ ਮੁੱਖ ਮੰਤਰੀ ਤੇ ਜਲੰਧਰ ਤੋਂ ਮੌਜੂਦਾ ਸਾਂਸਦ ਚਰਨਜੀਤ ਸਿੰਘ ਚੰਨੀ ਵੀ ਮੌਜੂਦ ਸਨ। ਚੰਨੀ ਨੇ ਹੀ ਪੰਜਾਬ ਕਾਂਗਰਸ ਪ੍ਰਧਾਨ ਅਮਰਿੰਦਰ ਸਿੰਘ ਰਾਜਾ ਵੜਿੰਗ ਖਿਲਾਫ਼ ਮੋਰਚਾ ਖੋਲ੍ਹਿਆ ਸੀ। ਹੁਣ ਚੰਨੀ ਧੜੇ ਨੇ ਬਘੇਲ ਅੱਗੇ ਸਾਫ਼ ਤੌਰ ‘ਤੇ ਗੱਲ ਰੱਖ ਦਿੱਤੀ ਹੈ ਕਿ ਕਿ ਕਈ ਵਾਰ ਪਾਰਟੀ ਨੂੰ ਫੈਸਲੇ ਵਾਪਸ ਵੀ ਲੈਣੇ ਪੈਂਦੇ ਹਨ।

ਹਾਲਾਂਕਿ, ਹੋਣ ਹਾਈਕਮਾਨ ਕੀ ਫੈਸਲਾ ਲਵੇਗੀ? ਇਹ ਆਉਣ ਵਾਲੇ ਦਿਨਾਂ ‘ਚ ਦੇਖਣਾ ਹੋਵੇਗਾ। ਪਰ, ਰੰਧਾਵਾ ਦੇ ਸ਼ਬਦਾਂ ਨੇ ਸਪੱਸ਼ਟ ਕਰ ਦਿੱਤਾ ਹੈ ਕਿ ਚੰਨੀ ਧੜਾ ਅਮਰਿੰਦਰ ਸਿੰਘ ਰਾਜਾ ਵੜਿੰਗ ਦੀ ਪ੍ਰਧਾਨਗੀ ਤੋਂ ਬਿਲਕੁਲ ਵੀ ਖੁਸ਼ ਨਹੀਂ ਹੈ।

ਕਈ ਵਾਰ ਪਾਰਟੀ ਨੂੰ ਫੈਸਲੇ ਵਾਪਸ ਲੈਣ ਪੈਂਦੇ: ਰੰਧਾਵਾ

ਸੁਖਜਿੰਦਰ ਸਿੰਘ ਰੰਧਾਵਾ ਇਸ ਮੁਲਾਕਾਤ ਤੋਂ ਬਾਅਦ ਮੀਡੀਆ ਦੇ ਰੂ-ਬ-ਰੂ ਹੋਏ। ਸੁਖਜਿੰਦਰ ਸਿੰਘ ਰੰਧਾਵਾ ਕਿਹਾ ਕਿ ਪੰਜਾਬ ਕਾਂਗਰਸ ਦੀ ਪੂਰੀ ਸੀਨੀਅਰ ਲੀਡਰਸ਼ਿਪ ਨੇ ਮੀਟਿੰਗ ‘ਚ ਹਿੱਸਾ ਲਿਆ। ਸੁਖਜਿੰਦਰ ਸਿੰਘ ਰੰਧਾਵਾ ਨੇ ਦੱਸਿਆ ਕਿ ਮੀਟਿੰਗ ‘ਚ ਵਿਧਾਇਕਾਂ, ਸੰਸਦ ਮੈਂਬਰਾਂ ਤੇ ਹੋਰ ਸੀਨੀਅਰ ਕਾਂਗਰਸੀਆਂ ਸਮੇਤ ਲਗਭਗ 92 ਆਗੂ ਮੌਜੂਦ ਸਨ। ਸਾਰੇ ਆਗੂਆਂ ਨੇ ਭੂਪੇਸ਼ ਬਘੇਲ ਨੂੰ ਆਪਣੇ ਵਿਚਾਰ ਪੇਸ਼ ਕੀਤੇ ਤੇ ਪੰਜਾਬ ‘ਚ ਕਾਂਗਰਸ ਪਾਰਟੀ ਨੂੰ ਮਜ਼ਬੂਤ ​​ਕਰਨ ਲਈ ਇਕੱਠੇ ਕੰਮ ਕਰਨ ਦੀ ਜ਼ਰੂਰਤ ‘ਤੇ ਜ਼ੋਰ ਦਿੱਤਾ।

ਰੰਧਾਵਾ ਨੇ ਕਿਹਾ ਕਿ ਮੀਟਿੰਗ ਦੌਰਾਨ ਉਨ੍ਹਾਂ ਨੇ ਪਾਰਟੀ ਵਰਕਰਾਂ ਦੀਆਂ ਭਾਵਨਾਵਾਂ ਬਾਰੇ ਚਰਚਾ ਕੀਤੀ। ਉਨ੍ਹਾਂ ਕਿਹਾ ਕਿ ਕਈ ਵਾਰ ਪਾਰਟੀ ਨੂੰ ਫੈਸਲੇ ਵਾਪਸ ਲੈਣੇ ਪੈਂਦੇ ਹਨ। ਅਸੀਂ ਪੰਜਾਬ ‘ਚ ਕਾਂਗਰਸ ਦੀ ਸਰਕਾਰ ਬਣਾਉਣਾ ਚਾਹੁੰਦੇ ਹਾਂ। ਪਾਰਟੀ ਨੂੰ ਪੰਜਾਬ ਦੇ ਮੁੱਦਿਆਂ ‘ਤੇ ਠੋਕ ਕੇ ਗੱਲ ਕਰਨ ਵਾਲਾ ਆਗੂ ਚਾਹੀਦਾ ਹੈ ਨਾ ਕਿ ਅਜਿਹਾ ਆਗੂ ਚਾਹੀਦਾ ਹੈ, ਜੋ Compromised (ਸਮਝੌਤਾ ਕਰ ਚੁੱਕਿਆ) ਹੋਵੇ।

ਬਘੇਲ ਵੱਲੋਂ ਕਲੇਸ਼ ਨੂੰ ਢੱਕਣ ਦੀ ਕੋਸ਼ਿਸ਼

ਪੰਜਾਬ ਕਾਂਗਰਸ ਇੰਚਾਰਜ ਭੂਪੇਸ਼ ਬਘੇਲ ਹਰ ਵਾਰ ਵੀ ਤਰ੍ਹਾਂ ਕਲੇਸ਼ ਨੂੰ ਢੱਕਦੇ ਹੋਏ ਨਜ਼ਰ ਆਏ। ਮੀਟਿੰਗ ਤੋਂ ਬਾਅਦ ਉਨ੍ਹਾਂ ਨੇ ਕਿਹਾ ਕਿ ਸਾਰੇ ਪਾਰਟੀ ਆਗੂ ਕਾਂਗਰਸ ਹਾਈ ਕਮਾਂਡ ਵੱਲੋਂ ਲਏ ਗਏ ਫੈਸਲਿਆਂ ਨਾਲ ਸਹਿਮਤ ਹਨ। ਹਾਲਾਂਕਿ, ਮੀਟਿੰਗ ਦੌਰਾਨ ਕੁਝ ਮੁੱਦਿਆਂ ‘ਤੇ ਚਰਚਾ ਕੀਤੀ ਗਈ, ਜਿਸ ‘ਚ ਆਗੂਆਂ ਨੇ ਆਪਣੀ ਗੱਲ ਰੱਖੀ। ਬਘੇਲ ਨੇ ਆਗੂਆਂ ਨੂੰ ਭਰੋਸਾ ਦਿੱਤਾ ਕਿ ਉਨ੍ਹਾਂ ਦੇ ਵਿਚਾਰ ਕਾਂਗਰਸ ਹਾਈ ਕਮਾਂਡ ਤੱਕ ਪਹੁੰਚਾਏ ਜਾਣਗੇ।

ਪੰਜਾਬ ਕਾਂਗਰਸ ਪ੍ਰਧਾਨ ਅਮਰਿੰਦਰ ਸਿੰਘ ਰਾਜਾ ਵੜਿੰਗ ਨੂੰ ਉਨ੍ਹਾਂ ਦੇ ਅਹੁਦੇ ਤੋਂ ਹਟਾਉਣ ਬਾਰੇ ਚੱਲ ਰਹੀਆਂ ਅਟਕਲਾਂ ਬਾਰੇ, ਭੁਪੇਸ਼ ਬਘੇਲ ਨੇ ਕਿਹਾ ਕਿ ਮੀਟਿੰਗ ਦੌਰਾਨ ਇਸ ਮੁੱਦੇ ‘ਤੇ ਚਰਚਾ ਨਹੀਂ ਹੋਈ। ਉਨ੍ਹਾਂ ਨੇ ਕਿਹਾ ਕਿ ਪਾਰਟੀ ਅੰਦਰ ਕੋਈ ਵੀ ਨਾਰਾਜ਼ ਨਹੀਂ ਹੈ।

ਹਾਈਕਮਾਨ ਦੇ ਫੈਸਲੇ ਦੀ ਉਡੀਕ

ਹਾਲਾਂਕਿ, ਚੰਨੀ ਧੜੇ ਦੇ ਸ਼ਬਦਾਂ ਦੀ ਚੋਣ ਨੇ ਕਾਂਗਰਸ ਹਾਈਕਮਾਨ ਨੂੰ ਕਿਤੇ ਨਾ ਕਿਤੇ ਜ਼ਰੂਰ ਚਿੰਤਾ ‘ਚ ਪਾ ਦਿੱਤਾ ਹੋਵੇਗਾ। ਚੰਨੀ ਬਨਾਮ ਵੜਿੰਗ ਕਲੇਸ਼ ਤੋਂ ਪਾਰਟੀ ਕਿਵੇਂ ਉਭਰੇਗੀ, ਇਹ ਗੇਂਦ ਹੁਣ ਹਾਈਕਮਾਨ ਦੇ ਪਾਲੇ ‘ਚ ਸੁੱਟ ਦਿੱਤੀ ਗਈ ਹੈ, ਜੋ ਪਹਿਲਾਂ ਵੀ ਕਈ ਮੀਟਿੰਗਾਂ ਤੋਂ ਬਾਅਦ ਮੁੱਦਾ ਸੁਲਝਾਉਣ ‘ਚ ਅਸਮਰੱਥ ਰਹਿ ਚੁੱਕੀ ਹੈ।

ਮੀਟਿੰਗ ‘ਚ ਸ਼ਾਮਲ ਹੋਣ ਵਾਲੇ ਕੁਝ ਆਗੂਆਂ ਦੇ ਨਾਮ

• ਭੂਪੇਸ਼ ਬਘੇਲ – ਇੰਚਾਰਜ, ਪੰਜਾਬ ਕਾਂਗਰਸ
• ਚਰਨਜੀਤ ਸਿੰਘ ਚੰਨੀ – ਸਾਬਕਾ ਮੁੱਖ ਮੰਤਰੀ ਤੇ ਮੌਜੂਦਾ ਸਾਂਸਦ
• ਸੁਖਜਿੰਦਰ ਸਿੰਘ ਰੰਧਾਵਾ – ਸਾਬਕਾ ਉਪ ਮੁੱਖ ਮੰਤਰੀ ਤੇ ਮੌਜੂਦਾ ਸਾਂਸਦ
• ਪ੍ਰਤਾਪ ਸਿੰਘ ਬਾਜਵਾ ਵਿਰੋਧੀ ਧਿਰ ਦੇ ਨੇਤਾ, ਪੰਜਾਬ
• ਪਰਗਟ ਸਿੰਘ ਐਮ.ਐਲ.ਏ
• ਸ਼ੇਰ ਸਿੰਘ ਘੁਬਾਇਆ – ਐਮ.ਪੀ
• ਭਾਰਤ ਭੂਸ਼ਣ ਆਸ਼ੂ ਸਾਬਕਾ ਮੰਤਰੀ
• ਅਜੀਤਇੰਦਰ ਸਿੰਘ ਮੋਫਰ – ਸਾਬਕਾ ਵਿਧਾਇਕ
• ਪਿਰਮਲ ਸਿੰਘ ਸਾਬਕਾ ਵਿਧਾਇਕ
• ਜਗਦੇਵ ਸਿੰਘ ਕਮਾਲੂ – ਸਾਬਕਾ ਵਿਧਾਇਕ
• ਮਦਨ ਲਾਲ ਜਲਾਲਪੁਰ – ਸਾਬਕਾ ਵਿਧਾਇਕ
• ਮੁਹੰਮਦ ਸਾਦਿਕ – ਸਾਬਕਾ ਐਮ.ਪੀ
• ਗੁਰਪ੍ਰੀਤ ਸਿੰਘ ਕਾਂਗੜ – ਸਾਬਕਾ ਮੰਤਰੀ
• ਦਵਿੰਦਰ ਸਿੰਘ ਘੁਬਾਇਆ ਸਾਬਕਾ ਵਿਧਾਇਕ
• ਹਰਪ੍ਰਤਾਪ ਸਿੰਘ ਅਜਨਾਲਾ ਸਾਬਕਾ ਵਿਧਾਇਕ
• ਸੰਗਤ ਸਿੰਘ ਗਿਲਜੀਆਂ- ਸਾਬਕਾ ਮੰਤਰੀ
• ਇੰਦਰਬੀਰ ਸਿੰਘ ਬੁਲਾਰੀਆ ਸਾਬਕਾ ਵਿਧਾਇਕ
• ਸ਼੍ਰੀਮਤੀ ਕਰਨ ਕੌਰ ਬਰਾੜ – ਸਾਬਕਾ ਐਮ.ਐਲ.ਏ
• ਹਰਦੇਵ ਸਿੰਘ ਲਾਡੀ ਸ਼ੇਰੋਵਾਲੀਆ ਵਿਧਾਇਕ
• ਤ੍ਰਿਪਤ ਰਜਿੰਦਰ ਸਿੰਘ ਬਾਜਵਾ ਸਾਬਕਾ ਮੰਤਰੀ
• ਮਾਲਵਿਕਾ ਸੂਦ ਮੋਗਾ
• ਕੁਲਦੀਪ ਸਿੰਘ ਕਾਲਾ ਢਿੱਲੋਂ – ਵਿਧਾਇਕ
• ਲਖਬੀਰ ਸਿੰਘ ਲੱਖਾ ਸਾਬਕਾ ਵਿਧਾਇਕ
• ਦਰਸ਼ਨ ਸਿੰਘ ਬਰਾੜ – ਸਾਬਕਾ ਵਿਧਾਇਕ
• ਗੁਰਕੀਰਤ ਸਿੰਘ ਕੋਟਲੀ – ਸਾਬਕਾ ਮੰਤਰੀ
• ਜੀਤ ਮਹਿੰਦਰ ਸਿੰਘ ਸਿੱਧੂ – ਸਾਬਕਾ ਵਿਧਾਇਕ
• ਓ.ਪੀ. ਸੋਨੀ – ਸਾਬਕਾ ਮੰਤਰੀ
• ਕਾਕਾ ਸੁਖਜੀਤ ਸਿੰਘ ਲੋਹਗੜ੍ਹ – ਸਾਬਕਾ ਵਿਧਾਇਕ
• ਬਲਵਿੰਦਰ ਸਿੰਘ ਧਾਲੀਵਾਲ ਵਿਧਾਇਕ
• ਬਰਿੰਦਰਮੀਤ ਸਿੰਘ ਪਾਹੜਾ ਸਾਬਕਾ ਵਿਧਾਇਕ
• ਅਰੁਣਾ ਚੌਧਰੀ – ਸਾਬਕਾ ਵਿਧਾਇਕ
• ਕੁਸ਼ਲਦੀਪ ਸਿੰਘ ਕਿੱਕੀ ਢਿੱਲੋਂ ਸਾਬਕਾ ਵਿਧਾਇਕ
• ਰਜ਼ੀਆ ਸੁਲਤਾਨਾ ਸਾਬਕਾ ਵਿਧਾਇਕ
• ਰਮਿੰਦਰ ਆਵਲਾ ਸਾਬਕਾ ਵਿਧਾਇਕ
• ਅੰਗਦ ਸੈਣੀ – ਸਾਬਕਾ ਵਿਧਾਇਕ
• ਸ਼ੁਭਮ ਸ਼ਰਮਾ – ਪ੍ਰਧਾਨ, ਪੰਜਾਬ ਯੂਥ ਕਾਂਗਰਸ (PYC)
• ਬਰਿੰਦਰ ਸਿੰਘ ਢਿੱਲੋਂ ਸਾਬਕਾ ਪ੍ਰਧਾਨ, ਪੰਜਾਬ ਯੂਥ ਕਾਂਗਰਸ
• ਈਸ਼ਰਪ੍ਰੀਤ ਸਿੰਘ – ਪ੍ਰਧਾਨ, NSUI ਪੰਜਾਬ
• ਰਾਹੁਲਇੰਦਰ ਸਿੰਘ ਸਿੱਧੂ (ਭੱਠਲ)
• ਬਲਕੌਰ ਸਿੰਘ ਸਿੱਧੂ ਸਿੱਧੂ ਮੂਸੇਵਾਲਾ ਦੇ ਪਿਤਾ