ਰਾਮਪਾਲ ਨੂੰ ਮਿਲਣ ਪਹੁੰਚੇ ਨਵਜੋਤ ਕੌਰ ਸਿੱਧੂ, ਪੈਰ ਛੁਹੇ ਤੇ ਲਿਆ ਆਸ਼ੀਰਵਾਦ

ਰਾਮਪਾਲ ਨੂੰ ਮਿਲਣ ਪਹੁੰਚੇ ਨਵਜੋਤ ਕੌਰ ਸਿੱਧੂ(Pic Source: spiritualleadersaintrampalji)

ਪੰਜਾਬ ਕਾਂਗਰਸ ਦੇ ਸਾਬਕਾ ਪ੍ਰਧਾਨ ਤੇ ਸਾਬਕਾ ਕ੍ਰਿਕਟਰ ਨਵਜੋਤ ਸਿੰਘ ਸਿੱਧੂ ਦੀ ਪਤਨੀ ਡਾ. ਨਵਜੋਤ ਕੌਰ ਸਿੱਧੂ, ਸਤਲੋਕ ਆਸ਼ਰਮ ਦੇ ਮੁਖੀ ਰਾਮਪਾਲ ਨੂੰ ਮਿਲਣ ਲਈ ਪਹੁੰਚੇ। ਰਾਮਪਾਲ 11 ਸਾਲ ਕੈਦ ਕੱਟਣ ਤੋਂ ਬਾਅਦ ਜ਼ਮਾਨਤ ‘ਤੇ ਜੇਲ੍ਹ ਤੋਂ ਬਾਹਰ ਆਏ। ਮੁਲਾਕਾਤ ਦੌਰਾਨ, ਡਾ. ਨਵਜੋਤ ਨੇ ਰਾਮਪਾਲ ਦੇ ਪੈਰ ਛੁਹ ਕੇ ਆਸ਼ੀਰਵਾਦ ਲਿਆ।

ਮੁਲਾਕਾਤ ਸੋਸ਼ਲ ਮੀਡੀਆ ‘ਤੇ ਵਾਇਰਲ

ਇਹ ਮੁਲਾਕਾਤ ਰਾਮਪਾਲ ਦੇ ਅਧਿਕਾਰਤ ਸੋਸ਼ਲ ਮੀਡੀਆ ਚੈਨਲ, “spiritualleadersaintrampalji” ‘ਤੇ ਸਾਂਝੀ ਕੀਤੀ ਗਈ। ਵੀਡੀਓ ‘ਚ ਡਾ. ਨਵਜੋਤ ਤੇ ਰਾਮਪਾਲ ਵਿਚਕਾਰ ਇੱਕ ਗੱਲਬਾਤ ਦਿਖਾਈ ਗਈ ਹੈ। ਨਵਜੋਤ ਕੌਰ ਆਪਣੇ ਬਾਰੇ ਦੱਸਦੀ ਹੈ ਕਿ ਮੈਂ ਪਟਿਆਲਾ ਤੋਂ ਡਾ. ਨਵਜੋਤ ਕੌਰ ਸਿੱਧੂ ਹਾਂ। ਮੈਂ ਤੁਹਾਨੂੰ ਜੇਲ੍ਹ ‘ਚ ਮਿਲਣਾ ਚਾਹੁੰਦੀ ਸੀ, ਪਰ ਪਰਮਾਤਮਾ ਨੇ ਮੇਰੀਆਂ ਪ੍ਰਾਰਥਨਾਵਾਂ ਸੁਣੀਆਂ ਤੇ ਤੁਹਾਨੂੰ ਬਾਹਰ ਬੁਲਾਇਆ।

ਰਾਮਪਾਲ ਨੇ ਮੁਸਕਰਾਉਂਦੇ ਹੋਏ ਜਵਾਬ ਦਿੱਤਾ ਕਿ ਤੁਹਾਡੀਆਂ ਦੁਆਵਾਂ ਨੇ ਮੈਨੂੰ ਇੱਥੇ ਲਿਆਂਦਾ ਹੈ। ਤੁਸੀਂ ਸਾਨੂੰ ਮਿਲਣ ਆਉਂਦੇ ਹਨ, ਇਸ ਨਾਲ ਸਾਡਾ ਮਨੋਬਲ ਵੱਧਦਾ ਹੈ।

ਨਵਜੋਤ ਕੌਰ ਨੇ ਕਿਹਾ ਕਿ ਉਹ ਰਾਮਪਾਲ ਤੋਂ ਮਾਰਗਦਰਸ਼ਨ ਲੈਣ ਆਏ ਹਨ। ਉਨ੍ਹਾਂ ਨੇ ਕਿਹਾ ਮੈਂ ਤੁਹਾਡਾ ਆਸ਼ਿਰਵਾਦ ਲੈਣ ਆਈ ਹਾਂ। ਭਗਤੀ ਸਭ ਤੋਂ ਉੱਪਰ ਹੈ ਤੇ ਸੇਵਾ ਵੀ ਇਸ ਦੇ ਨਾਲ-ਨਾਲ ਹੈ। ਉਨ੍ਹਾਂ ਨੇ ਕਿਹਾ ਕਿ ਮੈਂ ਕਹਿ ਦਿੱਤਾ ਸੀ ਕਿ ਚਾਹੇ ਕੋਈ ਗੁੱਸਾ ਕਰੇ ਜਾਂ ਨਾ ਕਰੇ, ਮੈਂ ਤਾਂ ਚਾਹੁੰਦੀ ਹਾਂ ਕਿ ਸੰਤ ਜੀ ਦੇਸ਼ ਦੇ ਪ੍ਰਧਾਨ ਮੰਤਰੀ ਹੋਣ।