ਲੁਧਿਆਣਾ ਚ ਕੁੱਤੇ ਦੀ ਨਸਲ ਪੁੱਛੀ ਤਾਂ ਹੋ ਗਿਆ ਵਿਵਾਦ, ਪਿਓ-ਪੁੱਤ ਨੂੰ ਲੱਗੀਆਂ ਗੋਲੀਆਂ

ਲੁਧਿਆਣਾ ’ਚ ਕੁੱਤੇ ਦੀ ਨਸਲ ਪੁੱਛੀ ਤਾਂ ਹੋ ਗਿਆ ਵਿਵਾਦ, ਪਿਓ-ਪੁੱਤ ਨੂੰ ਲੱਗੀਆਂ ਗੋਲੀਆਂ

ਲੁਧਿਆਣਾ ‘ਚ ਕੁੱਤੇ ਨੂੰ ਲੈ ਕੇ ਖ਼ੂਨੀ ਵਿਵਾਦ ਦੇਖਣ ਨੂੰ ਮਿਲਿਆ। ਮਾਮਲਾ ਇੰਨਾ ਵੱਧ ਗਿਆ ਕਿ ਇੱਕ ਨੌਜਵਾਨ ਨੇ ਬੰਦੂਕ ਨਾਲ ਫਾਇਰਿੰਗ ਕਰ ਦਿੱਤੀ। ਇਸ ਘਟਨਾ ‘ਚ ਪਿਓ-ਪੁੱਤ ਦੋਵੇਂ ਜ਼ਖ਼ਮੀ ਹੋ ਗਏ ਹਨ। ਦੋਵਾਂ ਨੂੰ ਲੱਤ ‘ਚ ਗੋਲੀ ਲੱਗੀ ਹੈ ਤੇ ਦੋਵਾਂ ਇਲਾਜ ਲਈ ਹਸਪਤਾਲ ‘ਚ ਦਾਖ਼ਲ ਕਰਵਾਇਆ ਗਿਆ ਹੈ। ਫ਼ਿਲਹਾਲ ਪੁਲਿਸ ਵੱਲੋਂ ਮਾਮਲੇ ਦੀ ਜਾਂਚ ਕੀਤੀ ਜਾ ਰਹੀ ਹੈ।

ਕੁੱਤੇ ਬਾਰੇ ਪੁੱਛਣ ‘ਤੇ ਹੋਇਆ ਵਿਵਾਦ

ਪੀੜਤ ਪਰਿਵਾਰ ਮੁਤਾਬਕ, ਉਨ੍ਹਾਂ ਦੀ ਲੜਕੀ ਸਿਵਲ ਸਿਟੀ ਇਲਾਕੇ ‘ਚ ਕੇਕ ਲੈਣ ਗਈ ਸੀ। ਇਸ ਦੌਰਾਨ ਉੱਥੇ ਇੱਕ ਨੌਜਵਾਨ ਕੁੱਤਾ ਘੁਮਾ ਰਿਹਾ ਸੀ। ਲੜਕੀ ਨੇ ਉਸ ਨੌਜਵਾਨ ਤੋਂ ਆਮ ਜਿਹਾ ਸਵਾਲ ਪੁੱਛਿਆ ਕਿ ਕੁੱਤਾ ਕਿਸ ਨਸਲ ਦਾ ਹੈ। ਪਰਿਵਾਰ ਦਾ ਇਲਜ਼ਾਮ ਹੈ ਕਿ ਇਸ ਸਵਾਲ ਤੇ ਨੌਜਵਾਨ ਗੁੱਸੇ ‘ਚ ਆ ਗਿਆ ਤੇ ਲੜਕੀ ਨਾਲ ਬਦਸਲੂਕੀ ਕਰਨ ਲੱਗਾ। ਇੱਥੋਂ ਤੱਕ ਕਿ ਉਸ ਨੇ ਲੜਕੀ ਨੂੰ ਹੱਥ ‘ਚ ਫੜੀ ਸੋਟੀ ਨਾਲ ਵੀ ਮਾਰਿਆ।

ਨੌਜਵਾਨ ‘ਤੇ ਫਾਇਰਿੰਗ ਦਾ ਇਲਜ਼ਾਮ

ਹਾਦਸੇ ‘ਚ ਜ਼ਖ਼ਮੀ ਲੜਕੀ ਦੇ ਪਿਤਾ ਪ੍ਰਿੰਸ ਨੇ ਦੱਸਿਆ ਕਿ ਉਨ੍ਹਾਂ ਦਾ ਜਨਮਦਿਨ ਸੀ ਤੇ ਉਨ੍ਹਾਂ ਦੇ ਲੜਕੀ ਕੇਕ ਲੈ ਕੇ ਪਾਰਕ ਕੋਲ ਖੜ੍ਹੀ ਸੀ। ਇਸ ਦੌਰਾਨ ਉੱਥੇ ਇੱਕ ਵਿਅਕਤੀ ਕੁੱਤਾ ਘੁਮਾ ਰਿਹਾ ਸੀ। ਪਿਤਾ ਮੁਤਾਬਕ ਲੜਕੀ ਨੇ ਪੁੱਛਿਆ ਕਿ ਵੀਰੇ ਇਹ ਕਿਹੜੀ ਨਸਲ ਦਾ ਕੁੱਤਾ ਹੈ। ਇਸ ‘ਤੇ ਵਿਅਕਤੀ ਨੇ ਕੁੜੀ ਨੂੰ ਗੱਲ ਕੱਢ ਕੇ ਕਿਹਾ ਕਿ ਮੈਂ ਤੇਰਾ ਭਰਾ ਲੱਗਦਾ ਹੈ? ਤੇ ਉਸ ਨੇ ਲੜਕੀ ਦੇ ਸੋਟੀ ਮਾਰ ਦਿੱਤੀ।

ਪਿਤਾ ਮੁਤਾਬਕ ਲੜਕੀ ਨੇ ਉਨ੍ਹਾਂ ਨੂੰ ਰੋਂਦੇ ਹੋਏ ਫੋਨ ਕੀਤਾ ਕਿ ਇੱਕ ਲੜਕੇ ਨੇ ਉਸ ਨੂੰ ਸੋਟੀ ਮਾਰੀ ਹੈ। ਇਸ ਤੋਂ ਬਾਅਦ ਉਨ੍ਹਾਂ ਨੇ ਆਪਣੀ ਧੀ ਨੂੰ ਘਰ ਬੁਲਾ ਲਿਆ। ਲੜਕੀ ਦੇ ਘਰ ਪਹੁੰਚਣ ਦੇ ਬਾਅਦ, ਪਿਓ-ਪੁੱਤ ਤੇ ਧੀ ਤਿੰਨੋਂ ਮੌਕੇ ‘ਤੇ ਪਹੁੰਚੇ। ਮੌਕੇ ‘ਤੇ ਤਿੰਨ ਲੋਕ ਖੜ੍ਹੇ ਸਨ। ਪਿਤਾ ਨੇ ਜਦੋਂ ਤਿੰਨਾਂ ਨੂੰ ਸੋਟੀ ਮਾਰਨ ਦਾ ਕਾਰਨ ਪੁੱਛਿਆ ਤਾਂ ਇਸ ਦੌਰਾਨ ਦੋਵਾਂ ਧਿਰਾਂ ਵਿਚਕਾਰ ਹੱਥੋਪਾਈ ਹੋ ਗਈ। ਇੱਕ ਨੌਜਵਾਨ ਨੇ ਇਸ ਦੌਰਾਨ ਪਿਸਟਲ ਕੱਢ ਲਈ ਤੇ ਪਿਓ-ਪੁੱਤ ਦੇ ਲੱਤ ਤੇ ਗੋਲੀ ਮਾਰ ਦਿੱਤੀ।