ਕਪੂਰਥਲਾ ‘ਚ ਧਾਰਮਿਕ ਥਾਂ ਨੂੰ ਲੈ ਕੇ ਦੋ ਧਿਰਾਂ ਭਿੜੀਆਂ, ਪੁਲਿਸ ਨਾਲ ਵੀ ਹੋਈ ਧੱਕਾਮੁੱਕੀ; ਪੋਸਟਰ ਲਗਾਉਣ ਨਾਲ ਭੱਖਿਆ ਮਾਹੌਲ

ਕਪੂਰਥਲਾ ਦੇ ਅਧੀਨ ਆਉਂਦੇ ਪਿੰਡ ਖੋਜੇਵਾਲ ਵਿੱਚ ਇੱਕ ਧਾਰਮਿਕ ਸਥਾਨ ਦੀ ਪ੍ਰਬੰਧਕੀ ਕਮੇਟੀ ਨੂੰ ਲੈ ਕੇ ਚੱਲ ਰਿਹਾ ਪੁਰਾਣਾ ਵਿਵਾਦ ਉਸ ਵੇਲੇ ਬੇਹੰਦ ਤਣਾਅਪੂਰਨ ਹੋ ਗਿਆ, ਜਦੋਂ ਦੋ ਗੁੱਟਾਂ ਦੇ ਲੋਕ ਆਮੋ-ਸਾਹਮਣੇ ਆ ਗਏ ਅਤੇ ਉਨ੍ਹਾਂ ਵਿਚਕਾਰ ਤਿੱਖੀ ਬਹਿਸ ਸ਼ੁਰੂ ਹੋ ਗਈ। ਹਾਲਾਤ ਵਿਗੜਦੇ ਦੇਖ ਮੌਕੇ ‘ਤੇ ਮੌਜੂਦ ਪੁਲਿਸ ਨੇ ਦੋਵਾਂ ਪੱਖਾਂ ਦੇ ਲੋਕਾਂ ਨੂੰ ਇੱਕ-ਦੂਜੇ ਤੋਂ ਵੱਖ ਕੀਤਾ। ਇਸ ਹੰਗਾਮੇ ਦੌਰਾਨ ਕੁਝ ਸ਼ਰਾਰਤੀ ਅਨਸਰਾਂ ਵੱਲੋਂ ਡਿਊਟੀ ‘ਤੇ ਤੈਨਾਤ ਪੁਲਿਸ ਮੁਲਾਜ਼ਮਾਂ ਨਾਲ ਧੱਕਾਮੁੱਕੀ ਵੀ ਕੀਤੀ ਗਈ।

ਪਿੰਡ ਖੋਜੇਵਾਲ ਵਿੱਚ ਸਥਿਤੀ ਨਾਜ਼ੁਕ ਹੋਣ ਦੀ ਸੂਚਨਾ ਮਿਲਦਿਆਂ ਹੀ ਜ਼ਿਲ੍ਹਾ ਪ੍ਰਸ਼ਾਸਨ ਤੁਰੰਤ ਹਰਕਤ ਵਿੱਚ ਆਇਆ। ਮਾਹੌਲ ਨੂੰ ਸ਼ਾਂਤ ਕਰਨ ਲਈ ਕਪੂਰਥਲਾ ਦੀ ਐਸਡੀਐਮ ਡਾ. ਇਰਵਿਨ ਕੌਰ, ਡੀਐਸਪੀ ਸਬ-ਡਿਵੀਜ਼ਨ ਡਾ. ਸੀਤਲ ਸਿੰਘ, ਥਾਣਾ ਸਦਰ ਦੇ ਐਸਐਚਓ, ਸਾਇੰਸ ਸਿਟੀ ਚੌਕੀ ਇੰਚਾਰਜ ਸੰਦੀਪ ਸਿੰਘ ਅਤੇ ਭਾਰੀ ਗਿਣਤੀ ਵਿੱਚ ਦੰਗਾ ਰੋਕੂ ਪੁਲਿਸ ਬਲ ਮੌਕੇ ‘ਤੇ ਪਹੁੰਚੇ। ਪੁਲਿਸ ਅਤੇ ਪ੍ਰਸ਼ਾਸਨਿਕ ਅਧਿਕਾਰੀਆਂ ਨੇ ਕਾਫ਼ੀ ਮੁਸ਼ੱਕਤ ਤੋਂ ਬਾਅਦ ਹਾਲਾਤ ‘ਤੇ ਕਾਬੂ ਪਾਇਆ।

40 ਸਾਲ ਪੁਰਾਣੀ ਕਮੇਟੀ ਬਨਾਮ ਨਵੀਂ ਕਮੇਟੀ ਦਾ ਵਿਵਾਦ

ਮਿਲੀ ਜਾਣਕਾਰੀ ਅਨੁਸਾਰ, ਪਿੰਡ ਖੋਜੇਵਾਲ ਸਥਿਤ ‘ਬਾਬਾ ਸ਼੍ਰੀ ਸਾਹਬੂ ਜੀ’ ਦੇ ਧਾਰਮਿਕ ਅਸਥਾਨ ਦਾ ਪ੍ਰਬੰਧ ਪਿਛਲੇ ਕਰੀਬ 40 ਸਾਲਾਂ ਤੋਂ ਇੱਕ ਸਥਾਨਕ ਕਮੇਟੀ ਵੱਲੋਂ ਸੰਭਾਲਿਆ ਜਾ ਰਿਹਾ ਸੀ। ਪਰ ਹਾਲ ਹੀ ਵਿੱਚ ਪਿੰਡ ਦੇ ਕੁਝ ਹੋਰ ਲੋਕਾਂ ਨੇ ਇੱਕ ਦੂਜੀ ਕਮੇਟੀ ਦਾ ਗਠਨ ਕਰਕੇ ਇਸ ਧਾਰਮਿਕ ਸਥਾਨ ਦੀ ਅਗਵਾਈ ਅਤੇ ਪ੍ਰਬੰਧ ‘ਤੇ ਆਪਣਾ ਦਾਅਵਾ ਜਤਾਉਣਾ ਸ਼ੁਰੂ ਕਰ ਦਿੱਤਾ, ਜਿਸ ਕਾਰਨ ਪਿਛਲੇ ਕੁਝ ਸਮੇਂ ਤੋਂ ਪਿੰਡ ਵਿੱਚ ਅੰਦਰੂਨੀ ਤਣਾਅ ਚੱਲ ਰਿਹਾ ਸੀ।

ਧਾਰਮਿਕ ਸਥਾਨ ਦਾ ਇਤਿਹਾਸ ਅਤੇ ਤਣਾਅ ਦੇ ਕਾਰਨ

ਅਧਿਕਾਰੀਆਂ ਮੁਤਾਬਕ, ਬਾਬਾ ਸਾਹਬੂ ਜੀ ਨੂੰ ਇਲਾਕੇ ਵਿੱਚ ਲੰਮੇ ਸਮੇਂ ਤੋਂ ਸੂਫੀ ਸੰਤ ਵਜੋਂ ਪੂਜਿਆ ਜਾਂਦਾ ਰਿਹਾ ਹੈ। ਕਰੀਬ ਦੋ ਸਾਲ ਪਹਿਲਾਂ ਪਿੰਡ ਵਿੱਚ ਰਵਿਦਾਸੀਆ ਭਾਈਚਾਰੇ ਦੇ ਸ਼ਰਧਾਲੂਆਂ ਦੀ ਵੱਡੀ ਗਿਣਤੀ ਨੂੰ ਦੇਖਦਿਆਂ, ਕੁਝ ਪਿੰਡ ਵਾਸੀਆਂ ਨੇ ਇਸ ਧਾਰਮਿਕ ਸਥਾਨ ‘ਤੇ ਗੁਰੂ ਰਵਿਦਾਸ ਜੀ ਦੀ ਤਸਵੀਰ ਸਥਾਪਿਤ ਕਰ ਦਿੱਤੀ ਸੀ। ਵਿਵਾਦ ਉਸ ਵੇਲੇ ਹੋਰ ਗੰਭੀਰ ਰੂਪ ਧਾਰਨ ਕਰ ਗਿਆ, ਜਦੋਂ ਕੁਝ ਦਿਨ ਪਹਿਲਾਂ ਗੁਰੂ ਰਵਿਦਾਸ ਜੀ ਦੀ ਤਸਵੀਰ ਦੇ ਕੋਲ ਕਥਿਤ ਤੌਰ ‘ਤੇ ਕੋਈ ਇਤਰਾਜ਼ਯੋਗ ਵਸਤੂ ਰੱਖ ਦਿੱਤੀ ਗਈ ਸੀ।

ਇਸੇ ਦੌਰਾਨ, ਇੱਕ ਧਿਰ ਵੱਲੋਂ ਸੰਤ ਜੀ ਦੀ ਯਾਦ ਵਿੱਚ ਕਰਵਾਏ ਜਾਣ ਵਾਲੇ ਸਾਲਾਨਾ ਮੇਲੇ ਦੇ ਸਬੰਧ ਵਿੱਚ ਪਿੰਡ ਵਿੱਚ ਪੋਸਟਰ ਅਤੇ ਸੱਦਾ ਪੱਤਰ ਲਗਾ ਦਿੱਤੇ ਗਏ, ਜਿਸ ਨਾਲ ਮਾਹੌਲ ਹੋਰ ਗਰਮਾ ਗਿਆ। ਬੀਤੇ ਦਿਨ ਦੁਪਹਿਰ ਤੋਂ ਬਾਅਦ ਮਾਮਲਾ ਉਦੋਂ ਪੂਰੀ ਤਰ੍ਹਾਂ ਭੜਕ ਗਿਆ, ਜਦੋਂ ਇੱਕ ਪੱਖ ਨੇ ਪਿੰਡ ਦੇ ਬਾਹਰੋਂ ਕੁਝ ਅਣਪਛਾਤੇ ਲੋਕਾਂ ਨੂੰ ਬੁਲਾ ਲਿਆ। ਦੇਖਦੇ ਹੀ ਦੇਖਦੇ 40 ਤੋਂ 50 ਲੋਕਾਂ ਦੇ ਇਕੱਠ ਵਿੱਚ ਹੰਗਾਮਾ ਅਤੇ ਤਿੱਖੀ ਬਹਿਸ ਸ਼ੁਰੂ ਹੋ ਗਈ, ਜਿਸ ਨੂੰ ਪੁਲਿਸ ਨੇ ਮੌਕੇ ‘ਤੇ ਪਹੁੰਚ ਕੇ ਰੋਕਿਆ।

ਇਹ ਵੀ ਪੜ੍ਹੋ

ਪਟਿਆਲਾ 'ਚ ਪਹਿਲਾ ਹਾਈਬ੍ਰਿਡ ਸਫ਼ਾਈ ਮਾਡਲ ਸ਼ੁਰੂ, ਸੜਕ 'ਤੇ ਉਤਰੇ ਮੰਤਰੀ ਬੈਂਸ

ਕੇਜਰੀਵਾਲ ਦਾ ਭਾਜਪਾ-ਅਕਾਲੀ ਗਠਜੋੜ 'ਤੇ ਤਿੱਖਾ ਹਮਲਾ; ਦੋਵਾਂ ਨੂੰ ਕਰੜੇ ਹੱਥੀਂ ਲਿਆ

ਮਾਮਾ ਲੜ ਰਿਹਾ ਸੀ ਕੇਸ, ਭਾਣਜੀ ਕੈਨੇਡਾ 'ਚ ਮਿਲੀ ਜ਼ਿੰਦਾ; ਕੋਰਟ ਨੇ ਰੱਦ ਕੀਤਾ ਕੇਸ

ਪ੍ਰਸ਼ਾਸਨ ਵੱਲੋਂ 12 ਮੈਂਬਰੀ ਨਵੀਂ ਕਮੇਟੀ ਬਣਾਉਣ ਦੇ ਨਿਰਦੇਸ਼

ਡੀਐਸਪੀ ਡਾ. ਸੀਤਲ ਸਿੰਘ ਨੇ ਦੱਸਿਆ ਕਿ ਇਹ ਪਿੰਡ ਦਾ ਪੁਰਾਣਾ ਵਿਵਾਦ ਹੈ ਅਤੇ ਪੁਲਿਸ ਨੇ ਮੰਗਲਵਾਰ ਨੂੰ ਵੀ ਪਿੰਡ ਦਾ ਦੌਰਾ ਕੀਤਾ ਸੀ। ਮੌਜੂਦਾ ਵਿਵਾਦ ਸਾਲਾਨਾ ਮੇਲੇ ਦੇ ਆਯੋਜਨ ਨੂੰ ਲੈ ਕੇ ਹੋਇਆ ਹੈ। ਧੱਕਾਮੁੱਕੀ ਦੌਰਾਨ ਇੱਕ ਪੁਲਿਸ ਮੁਲਾਜ਼ਮ ਦੇ ਹੱਥ ‘ਤੇ ਕਿਸੇ ਵਿਅਕਤੀ ਦੇ ਕੜੇ ਨਾਲ ਹਲਕੀ ਖ਼ਰੋਚ ਵੀ ਆਈ ਹੈ, ਪਰ ਪੁਲਿਸ ਨੇ ਸਥਿਤੀ ਨੂੰ ਵਿਗੜਨ ਨਹੀਂ ਦਿੱਤਾ। ਹਾਲਾਤ ਨੂੰ ਪੂਰੀ ਤਰ੍ਹਾਂ ਆਮ ਵਰਗੇ ਬਣਾਉਣ ਲਈ ਐਸਡੀਐਮ ਡਾ. ਇਰਵਿਨ ਕੌਰ ਨੇ ਇੱਕ ਨਵੀਂ 12 ਮੈਂਬਰੀ ਸਾਂਝੀ ਕਮੇਟੀ ਗਠਿਤ ਕਰਨ ਦੇ ਨਿਰਦੇਸ਼ ਦਿੱਤੇ ਹਨ।

ਸਾਇੰਸ ਸਿਟੀ ਚੌਕੀ ਦੇ ਇੰਚਾਰਜ ਸੰਦੀਪ ਸਿੰਘ ਨੇ ਦੱਸਿਆ ਕਿ ਇਸ ਨਵੀਂ ਕਮੇਟੀ ਵਿੱਚ ਦੋਵਾਂ ਪੁਰਾਣੀਆਂ ਕਮੇਟੀਆਂ ਵਿੱਚੋਂ 3-3 ਮੈਂਬਰ ਸ਼ਾਮਲ ਕੀਤੇ ਜਾਣਗੇ, ਜਦਕਿ 3 ਮੈਂਬਰ ਸੁਤੰਤਰ ਰੱਖੇ ਜਾਣਗੇ, ਜੋ ਧਾਰਮਿਕ ਸਥਾਨ ਦਾ ਪ੍ਰਬੰਧ ਚਲਾਉਣਗੇ। ਇਸ ਕਮੇਟੀ ਦੇ ਗਠਨ ਲਈ ਪਿੰਡ ਵਾਸੀਆਂ ਨੂੰ ਇੱਕ ਦਿਨ ਦਾ ਸਮਾਂ ਦਿੱਤਾ ਗਿਆ ਹੈ। ਪੁਲਿਸ ਨੇ ਸਖ਼ਤ ਚੇਤਾਵਨੀ ਦਿੱਤੀ ਹੈ ਕਿ ਪਿੰਡ ਦਾ ਮਾਹੌਲ ਜਾਂ ਅਮਨ-ਕਾਨੂੰਨ ਵਿਗਾੜਨ ਦੀ ਕੋਸ਼ਿਸ਼ ਕਰਨ ਵਾਲੇ ਕਿਸੇ ਵੀ ਸ਼ਰਾਰਤੀ ਅਨਸਰ ਨੂੰ ਬਖਸ਼ਿਆ ਨਹੀਂ ਜਾਵੇਗਾ ਅਤੇ ਉਸ ਖ਼ਿਲਾਫ਼ ਸਖ਼ਤ ਕਾਨੂੰਨੀ ਕਾਰਵਾਈ ਕੀਤੀ ਜਾਵੇਗੀ।