ਕਰਤਾਰਪੁਰ ਫਲਾਈਓਵਰ ‘ਤੇ ਕਾਲ ਬਣ ਕੇ ਆਈ ਇਨੋਵਾ! ਜੋੜੇ ਸਮੇਤ ਸੱਸ ਦੀ ਮੌਤ, ਤਿੰਨ ਧੀਆਂ ਜ਼ਖ਼ਮੀ

ਕਰਤਾਰਪੁਰ ਫਲਾਈਓਵਰ 'ਤੇ ਕਾਲ ਬਣ ਕੇ ਆਈ ਇਨੋਵਾ!

ਜਲੰਧਰ-ਅੰਮ੍ਰਿਤਸਰ ਰਾਸ਼ਟਰੀ ਰਾਜਮਾਰਗ ‘ਤੇ ਵਿਧੀਪੁਰ (ਆਈਟੀਬੀਵੀ ਕੈਂਪ) ਫਲਾਈਓਵਰ ਦੇ ਨੇੜੇ ਇੱਕ ਦੁਖਦਾਈ ਸੜਕ ਹਾਦਸੇ ‘ਚ 3 ਲੋਕਾਂ ਦੀ ਮੌਤ ਹੋ ਗਈ। ਐਤਵਾਰ ਸਵੇਰੇ ਸਵੇਰੇ 10 ਵਜੇ ਦੇ ਕਰੀਬ ਇਹ ਹਾਦਸਾ ਵਾਪਰਿਆ। ਹਾਦਸੇ ‘ਚ 29 ਸਾਲਾ ਸੁਰੇਂਦਰ ਸ਼ੁਕਲਾ, ਉਸ ਦੀ ਪਤਨੀ ਪ੍ਰਿਯੰਕਾ ਤਿਵਾੜੀ (27) ਤੇ ਉਸ ਦੀ 65 ਸਾਲਾ ਮਾਂ,ਜਾਮਵੰਤੀ ਦੀ ਜਾਨ ਚਲੀ ਗਈ।

ਇਸ ਦੌਰਾਨ, ਪਰਿਵਾਰ ਦੀਆਂ ਤਿੰਨ ਛੋਟੀਆਂ ਧੀਆਂ ਅੰਸ਼ਿਕਾ (13), ਅਰਪਿਤਾ (8) ਤੇ ਇੱਕ ਸਾਲ ਦੀ ਮਾਨਵੀ ਨੂੰ ਗੰਭੀਰ ਸੱਟਾਂ ਲੱਗੀਆਂ ਹਨ। ਅੰਸ਼ਿਕਾ ਤੇ ਅਰਪਿਤਾ ਦੀਆਂ ਲੱਤਾਂ ਟੁੱਟ ਗਈਆਂ, ਜਦੋਂ ਕਿ ਮਾਨਵੀ ਗੰਭੀਰ ਰੂਪ ‘ਚ ਜ਼ਖਮੀ ਹੈ ਤੇ ਹਸਪਤਾਲ ‘ਚ ਇਲਾਜ ਅਧੀਨ ਹੈ।

ਪੀੜਤ ਪਰਿਵਾਰਕ ਮੈਂਬਰਾਂ ਦਾ ਇਲਜ਼ਾਮ ਹੈ ਕਿ ਹਾਦਸਾ ਗਲਤ ਦਿਸ਼ਾ ਤੋਂ ਆਉਣ ਵਾਲੀ ਇੱਕ ਇਨੋਵਾ ਕਾਰ ਕਾਰਨ ਹੋਇਆ, ਪਰ ਪੁਲਿਸ ਘਟਨਾ ਨੂੰ ਅਲੱਗ ਤਰੀਕੇ ਨਾਲ ਪੇਸ਼ ਕਰ ਰਹੀ ਹੈ। ਇਸ ਤੋਂ ਇਲਾਵਾ, ਹਾਦਸੇ ਤੋਂ ਬਾਅਦ ਘੰਟਿਆਂ ਤੱਕ ਨਾ ਤਾਂ ਐਫਆਈਆਰ ਦਰਜ ਕੀਤੀ ਗਈ ਤੇ ਨਾ ਹੀ ਨੁਕਸਾਨੇ ਗਏ ਵਾਹਨਾਂ ਨੂੰ ਹਾਈਵੇਅ ਤੋਂ ਹਟਾਇਆ ਗਿਆ।

ਹਾਦਸਾ ਕਿਵੇਂ ਹੋਇਆ?

ਜਾਣਕਾਰੀ ਮੁਤਾਬਕ, ਪਰਿਵਾਰ ਸਵੇਰੇ 10 ਵਜੇ ਦੇ ਕਰੀਬ ਡੇਰਾ ਬਿਆਸ ਵੱਲ ਜਾ ਰਿਹਾ ਸੀ। ਉਸੇ ਸਮੇਂ, ਗਲਤ ਪਾਸੇ ਤੋਂ ਆ ਰਹੀ ਇੱਕ ਇਨੋਵਾ ਕਾਰ ਉਨ੍ਹਾਂ ਦੀ ਸਵਿਫਟ ਨਾਲ ਟਕਰਾ ਗਈ। ਟੱਕਰ ਇੰਨੀ ਜ਼ਬਰਦਸਤ ਸੀ ਕਿ ਸਵਿਫਟ ਪੂਰੀ ਤਰ੍ਹਾਂ ਨੁਕਸਾਨੀ ਗਈ। SSF (ਰੋਡ ਸੇਫਟੀ ਫੋਰਸ) ਦੀ ਇੱਕ ਟੀਮ ਤੁਰੰਤ ਮੌਕੇ ‘ਤੇ ਪਹੁੰਚੀ ਤੇ ਜ਼ਖਮੀਆਂ ਨੂੰ ਕਰਤਾਰਪੁਰ ਦੇ ਨਿਊ ਆਰਥੋ ਕੇਅਰ ਹਸਪਤਾਲ ਪਹੁੰਚਾਇਆ। ਇਲਾਜ ਦੌਰਾਨ, ਪ੍ਰਿਯੰਕਾ ਤਿਵਾੜੀ ਸਭ ਤੋਂ ਪਹਿਲਾਂ ਦਮ ਤੋੜ ਗਈ, ਉਸ ਤੋਂ ਬਾਅਦ ਸੁਰੇਂਦਰ ਸ਼ੁਕਲਾ ਤੇ ਉਸੇ ਸ਼ਾਮ ਨੂੰ ਬਾਅਦ ‘ਚ, ਉਸ ਦੀ ਮਾਂ, ਜਮਵੰਤੀ ਦੀ ਵੀ ਮੌਤ ਹੋ ਗਈ।

ਦੋ ਧੀਆਂ ਦੀਆਂ ਦੋਵੇਂ ਲੱਤਾਂ ਟੁੱਟ ਗਈਆਂ

ਮ੍ਰਿਤਕ ਦੀ ਭੈਣ ਮਾਇਆ ਸ਼ੁਕਲਾ ਨੇ ਦੱਸਿਆ ਕਿ ਹਾਦਸੇ ਦੌਰਾਨ ਉਸ ਦੇ ਵੱਡੇ ਭਰਾ ਦੀਆਂ ਦੋਵੇਂ ਧੀਆਂ ਦੀਆਂ ਦੋਵੇਂ ਲੱਤਾਂ ‘ਚ ਫ੍ਰੈਕਚਰ ਹੋ ਗਿਆ, ਜਦੋਂ ਕਿ ਇੱਕ ਤੀਜੀ ਕੁੜੀ ਵੀ ਗੰਭੀਰ ਜ਼ਖਮੀ ਹੈ। ਉਸ ਨੇ ਜ਼ਿਕਰ ਕੀਤਾ ਕਿ ਸੁਰੇਂਦਰ ਪਰਿਵਾਰ ਦਾ ਇਕਲੌਤਾ ਕਮਾਉਣ ਵਾਲਾ ਸੀ ਤੇ ਪੂਰਾ ਪਰਿਵਾਰ ਹੁਣ ਬੇਸਹਾਰਾ ਹੋ ਗਿਆ ਹੈ। ਸੁਰੇਂਦਰ ਦੀ ਇੱਕ ਸਾਲ ਦੀ ਧੀ ਨੇ ਆਪਣੇ ਮਾਤਾ-ਪਿਤਾ ਦੋਵਾਂ ਨੂੰ ਹਮੇਸ਼ਾ ਲਈ ਗੁਆ ਦਿੱਤਾ ਹੈ।

ਪੁਲਿਸ ‘ਤੇ ਕਾਰਵਾਈ ਨਾ ਕਰਨ ਦਾ ਇਲਜ਼ਾਮ

ਪਰਿਵਾਰਕ ਮੈਂਬਰਾਂ ਦਾ ਇਲਜ਼ਾਮ ਹੈ ਕਿ ਹਾਦਸੇ ਤੋਂ ਬਾਅਦ ਪੁਲਿਸ ਨੇ ਕਈ ਘੰਟਿਆਂ ਤੱਕ ਉਨ੍ਹਾਂ ਦੀ ਸ਼ਿਕਾਇਤ ਦਰਜ ਨਹੀਂ ਕੀਤੀ। ਉਨ੍ਹਾਂ ਦਾ ਦਾਅਵਾ ਹੈ ਕਿ ਪੁਲਿਸ ਨੇ ਉਨ੍ਹਾਂ ‘ਤੇ ਸ਼ਿਕਾਇਤ ਬਦਲਣ ਤੇ ਦਸਤਖ਼ਤ ਕਰਨ ਲਈ ਵਾਰ-ਵਾਰ ਦਬਾਅ ਪਾਇਆ। ਪਰਿਵਾਰ ਦਾ ਇਲਜ਼ਾਮ ਹੈ ਕਿ ਸ਼ਿਕਾਇਤ ‘ਚ ਹਾਦਸਾ ਇਨੋਵਾ ਕਾਰ ਦੇ ਡਿਵਾਈਡਰ ਨੂੰ ਪਾਰ ਕਰਨ ਨੂੰ ਦੱਸਿਆ ਗਿਆ, ਜਦੋਂ ਕਿ ਚਸ਼ਮਦੀਦਾਂ ਤੇ ਐਸਐਸਐਫ ਅਧਿਕਾਰੀਆਂ ਨੇ ਕਿਹਾ ਕਿ ਵਾਹਨ ਗਲਤ ਦਿਸ਼ਾ ਤੋਂ ਆ ਰਿਹਾ ਸੀ। ਇਸ ਲਈ ਉਨ੍ਹਾਂ ਨੇ ਉਸ ਸ਼ਿਕਾਇਤ ‘ਤੇ ਦਸਤਖਤ ਕਰਨ ਤੋਂ ਇਨਕਾਰ ਕਰ ਦਿੱਤਾ। ਪਰਿਵਾਰ ਦਾ ਦਾਅਵਾ ਹੈ ਕਿ ਉਨ੍ਹਾਂ ਕੋਲ ਇੱਕ ਐਸਐਸਐਫ ਅਧਿਕਾਰੀ ਨਾਲ ਗੱਲਬਾਤ ਦੀ ਰਿਕਾਰਡਿੰਗ ਹੈ ਜਿਸ ‘ਚ ਪੁਸ਼ਟੀ ਕੀਤੀ ਗਈ ਹੈ ਕਿ ਗੱਡੀ ਗਲਤ ਦਿਸ਼ਾ ਤੋਂ ਆ ਰਹੀ ਸੀ।

ਨੁਕਸਾਨੇ ਵਾਹਨ ਦੇਰ ਰਾਤ ਤੱਕ ਹਾਈਵੇਅ ‘ਤੇ ਪਏ ਰਹੇ

ਹੈਰਾਨੀ ਦੀ ਗੱਲ ਹੈ ਕਿ ਹਾਦਸੇ ‘ਚ ਨੁਕਸਾਨੇ ਗਏ ਦੋਵੇਂ ਵਾਹਨ ਦੇਰ ਰਾਤ ਤੱਕ ਸੜਕ ਕਿਨਾਰੇ ਹੀ ਰਹੇ, ਹਾਲਾਂਕਿ ਹਾਦਸਾ ਸਵੇਰੇ ਵਾਪਰਿਆ। ਪਰਿਵਾਰਕ ਮੈਂਬਰਾਂ ਦਾ ਇਲਜ਼ਾਮ ਹੈ ਕਿ ਜਦੋਂ ਸੜਕ ਸੁਰੱਖਿਆ ਬਲ ਨੇ ਜ਼ਖਮੀਆਂ ਨੂੰ ਹਸਪਤਾਲ ਪਹੁੰਚਾਇਆ ਤਾਂ ਸਥਾਨਕ ਪੁਲਿਸ ਨੇ ਸੜਕ ਨੂੰ ਪੂਰੀ ਤਰ੍ਹਾਂ ਸਾਫ਼ ਕਰਨ ਲਈ ਕੋਈ ਕਾਰਵਾਈ ਨਹੀਂ ਕੀਤੀ। ਸੜਕ ਕਿਨਾਰੇ ਪਏ ਨੁਕਸਾਨੇ ਗਏ ਵਾਹਨ ਹੋਰ ਹਾਦਸਿਆਂ ਦਾ ਕਾਰਨ ਬਣ ਸਕਦੇ ਸਨ।

ਪੁਲਿਸ ਦਾ ਪੱਖ

ਕਰਤਾਰਪੁਰ ਪੁਲਿਸ ਸਟੇਸ਼ਨ ਦੇ ਜਾਂਚ ਅਧਿਕਾਰੀ ਪੱਪੂ ਗਿੱਲ ਨੇ ਦੱਸਿਆ ਕਿ ਜ਼ਖਮੀਆਂ ਨੂੰ ਹਸਪਤਾਲ ਪਹੁੰਚਾਉਣ ਤੋਂ ਬਾਅਦ ਪੁਲਿਸ ਨੇ ਵਾਹਨਾਂ ਨੂੰ ਸੜਕ ਤੋਂ ਪਾਸੇ ਕਰ ਦਿੱਤਾ ਸੀ। ਉਨ੍ਹਾਂ ਅੱਗੇ ਕਿਹਾ ਕਿ ਹਾਦਸੇ ਦਾ ਕਾਰਨ ਪਹਿਲੀ ਨਜ਼ਰੇ ਇਨੋਵਾ ਡਰਾਈਵਰ ਦੀ ਲਾਪਰਵਾਹੀ ਕਾਰਨ ਜਾਪਦਾ ਹੈ। ਜ਼ਖਮੀ ਇਨੋਵਾ ਡਰਾਈਵਰ ਦੀ ਪਛਾਣ ਮੁਕੇਸ਼ ਚੋਪੜਾ ਵਜੋਂ ਹੋਈ ਹੈ, ਜੋ ਕਿ ਸੈਂਟਰਲ ਟਾਊਨ, ਜਲੰਧਰ ਦਾ ਰਹਿਣ ਵਾਲਾ ਹੈ। ਕਾਰ ਇੰਦਰਪਾਲ ਚੋਪੜਾ ਦੀ ਪਤਨੀ ਜਾਨਕੀ ਦੇ ਨਾਮ ‘ਤੇ ਰਜਿਸਟਰਡ ਹੈ। ਹਾਲਾਂਕਿ, ਪੁਲਿਸ ਨੇ ਇਹ ਵੀ ਕਿਹਾ ਕਿ ਗਲਤ ਦਿਸ਼ਾ ਤੋਂ ਆ ਰਹੇ ਵਾਹਨ ਸੰਬੰਧੀ ਇਲਜ਼ਾਮਾਂ ਦੀ ਜਾਂਚ ਕੀਤੀ ਜਾ ਰਹੀ ਹੈ।