ਹੁਸ਼ਿਆਰਪੁਰ: ਖੁਰਾਲਗੜ੍ਹ ਦੇ ਜੰਗਲ ‘ਚੋਂ ਮਿਲੀ 14 ਸਾਲਾ ਲੜਕੀ ਦੀ ਜਲੀ ਹੋਈ ਲਾਸ਼

ਜ਼ਿਲ੍ਹਾ ਹੁਸ਼ਿਆਰਪੁਰ ਦੇ ਪਿੰਡ ਖੁਰਾਲਗੜ੍ਹ ਦੇ ਜੰਗਲ ‘ਚੋਂ ਬੀਤੀ ਰਾਤ ਇੱਕ ਨਾਬਾਲਗ ਲੜਕੀ ਦੀ ਜਲੀ ਹੋਈ ਲਾਸ਼ ਮਿਲੀ ਹੈ। ਮੁਲਜ਼ਮ ਦੀ ਨਿਸ਼ਾਨਦੇਹੀ ‘ਤੇ ਪੁਲਿਸ ਜੰਗਲ ਤੱਕ ਪਹੁੰਚੀ ਸੀ। ਪੁਲਿਸ ਨੇ ਐਸਬੀਐਸ ਨਗਰ ਦੇ ਪਿੰਡ ਜਾਡਲੀ ਦੇ 23 ਸਾਲਾ ਨੌਜਵਾਨ ਨੂੰ ਰਾਊਂਡਅਪ ਕੀਤਾ ਸੀ। ਉਸ ਦੀ ਹੀ ਨਿਸ਼ਾਨਦੇਹੀ ‘ਤੇ ਪੁਲਿਸ ਮੌਕੇ ਪਹੁੰਚੀ ਤਾਂ ਲੜਕੀ ਦੀ ਲਾਸ਼ ਬੁਰੀ ਤਰ੍ਹਾਂ ਸੜੀ ਹੋਈ ਸੀ ਤੇ ਲੜਕੀ ਦਾ ਸਿਰਫ਼ ਪਿੰਜਰ ਹੀ ਰਹਿ ਗਿਆ ਸੀ।

ਇਸ ਸਬੰਧੀ ਸਿਟੀ ਥਾਣਾ ਨਵਾਂਸ਼ਹਿਰ ਪੁਲਿਸ ਦੇ ਐਸਐਚਓ ਅਵਤਾਰ ਸਿੰਘ ਨੇ ਦੱਸਿਆ ਕਿ ਲੜਕੀ ਦੀ ਮਾਤਾ ਉਸ਼ਾ ਨੇ ਪੁਲਿਸ ਨੂੰ ਸ਼ਿਕਾਇਤ ਦਿੱਤੀ ਸੀ ਕਿ ਉਸ ਦੀ ਧੀ ਨੂੰ ਕੋਈ ਮੁੰਡਾ ਗੁਮਰਾਹ ਕਰਕੇ ਲੈ ਗਿਆ ਹੈ। ਇਸ ਤੋਂ ਬਾਅਦ ਪੁਲਿਸ ਨੇ ਜਾਂਚ ਕੀਤੀ ਤਾਂ ਇੱਕ ਨੌਜਵਾਨ ਨੂੰ ਰਾਊਂਡਅਪ ਕੀਤਾ। ਨੌਜਵਾਨ ਨੇ ਦੱਸਿਆ ਕਿ ਉਸ ਨੇ ਲੜਕੀ ਦਾ ਕਤਲ ਕਰਕੇ ਲਾਸ਼ ਅਟੈਚੀ ‘ਚ ਪਾ ਦਿੱਤੀ ਸੀ।

ਮੁਲਜ਼ਮ ਨੌਜਵਾਨ ਨੇ 29 ਮਈ ਨੂੰ ਅਟੈਚੀ ‘ਚ ਲਾਸ਼ ਨੂੰ ਲਿਜਾ ਕੇ ਖੁਲਾਰਗੜ੍ਹ ਦੇ ਜੰਗਲ ‘ਚ ਜਲਾ ਦਿੱਤਾ ਸੀ। ਇਸ ਤੋਂ ਬਾਅਦ ਮੁਲਜ਼ਮ ਦੀ ਨਿਸ਼ਾਨਦੇਹੀ ‘ਤੇ ਪੁਲਿਸ ਜੰਗਲ ਤੱਕ ਪਹੁੰਚੀ। ਪੁਲਿਸ ਨੂੰ ਲਾਸ਼ ਬੁਰੀ ਤਰ੍ਹਾਂ ਜਲੀ ਹੋਈ ਮਿਲੀ। ਲਾਸ਼ ਦਾ ਸਿਰਫ਼ ਹੱਡੀਆਂ ਦਾ ਪਿੰਜਰ ਹੀ ਬਚਿਆ ਹੋਇਆ ਸੀ।

ਪੁਲਿਸ ਵੱਲੋਂ ਮਾਮਲੇ ਦੀ ਜਾਂਚ ਜਾਰੀ ਹੈ ਤੇ ਜਲਦੀ ਹੀ ਇਸ ਮਾਮਲੇ ‘ਚ ਹੋਰ ਵੀ ਖੁਲਾਸੇ ਕੀਤੇ ਜਾ ਸਕਦੇ ਹਨ। ਪੁਲਿਸ ਦਾ ਕਹਿਣਾ ਹੈ ਕਿ ਮਾਮਲੇ ਦੀ ਜਾਂਚ ਤੋਂ ਬਾਅਦ ਉਹ ਜਲਦੀ ਹੀ ਇਸ ਸਬੰਧੀ ਜਾਣਕਾਰੀ ਸਾਂਝੀ ਕਰਨਗੇ।