ਹਿਮਾਚਲ ਦੀਆਂ ਵਾਦੀਆਂ ‘ਚ ਫਿਰ ਦੌੜੇਗਾ ਇਤਿਹਾਸਕ ਸਟੀਮ ਇੰਜਣ, ਕਰਾਏਗਾ ਪਠਾਨਕੋਟ ਤੋਂ ਜੋਗਿੰਦਰਨਗਰ ਦੀ ਸੈਰ

ਜਲਦ ਹੀ ਹਿਮਾਚਲ ਦੀਆਂ ਖ਼ੂਬਸੂਰਤ ਵਾਦੀਆਂ ਵਿੱਚ ਇੱਕ ਵਾਰ ਫਿਰ ਤੋਂ ਸਟੀਮ ਇੰਜਣ ਦੌੜਦਾ ਹੋਇਆ ਨਜ਼ਰ ਆਵੇਗਾ। 1990 ਦੇ ਦਹਾਕੇ ਤੋਂ ਬਾਅਦ ਇਹ ਸਟੀਮ ਇੰਜਣ ਪੂਰੀ ਤਰ੍ਹਾਂ ਬੰਦ ਹੋ ਗਏ ਸਨ। ਹੁਣ ਹਿਮਾਚਲ ਦੀਆਂ ਵਾਦੀਆਂ ਵਿੱਚ ਸੈਲਾਨੀਆਂ ਨੂੰ ਹੁਲਾਰਾ ਦੇਣ ਦੇ ਲਈ ਕਾਂਗੜਾ ਘਾਟੀ ਵਿੱਚ ਇਸ ਸਟੀਮ ਇੰਜਣ ਨੂੰ ਚਲਾਇਆ ਜਾਵੇਗਾ।

ਸਾਲ 1952 ਵਿੱਚ ਬਣਾਇਆ ਗਿਆ ਇਹ ਸਟੀਮ ਇੰਜਣ ਨੈਰੋਗੇਜ ਰੇਲਵੇ ਟ੍ਰੈਕ ‘ਤੇ ਦੌੜੇਗਾ ਅਤੇ ਇੱਕ ਵਾਰ ਫਿਰ ਤੋਂ ਰੇਲਵੇ ਦੀ ਸ਼ੋਭਾ ਵਧਾਏਗਾ। ਇਸ ਸਟੀਮ ਇੰਜਣ ਨੂੰ ਪੂਰੀ ਤਰ੍ਹਾਂ ਸ਼ੁਰੂ ਕਰਨ ਦੇ ਲਈ ਰੇਵਾੜੀ ਤੋਂ ਵਿਸ਼ੇਸ਼ ਇੰਜੀਨੀਅਰ ਪਠਾਨਕੋਟ ਆਉਣਗੇ। ਫਿਲਹਾਲ ਇਹ ਸਟੀਮ ਇੰਜਣ ਪਠਾਨਕੋਟ ਇੰਜਣ ਸ਼ੈੱਡ ਵਿੱਚ ਪਹੁੰਚ ਚੁੱਕਾ ਹੈ, ਜੋ ਪੰਜਾਬ ਤੋਂ ਲੈ ਕੇ ਹਿਮਾਚਲ ਦੇ ਜੋਗਿੰਦਰਨਗਰ ਤੱਕ ਦੀ ਸੈਰ ਕਰਵਾਏਗਾ।

1990 ਦੇ ਦਹਾਕੇ ‘ਚ ਬੰਦ ਕਰ ਦਿੱਤਾ ਗਿਆ ਸੀ

ਗੌਰਤਲਬ ਹੈ ਕਿ 1990 ਦੇ ਦਹਾਕੇ ਵਿੱਚ ਰੇਲਵੇ ਵੱਲੋਂ ਕੋਲੇ ਨਾਲ ਚੱਲਣ ਵਾਲੇ ਇਨ੍ਹਾਂ ਸਟੀਮ ਇੰਜਣਾਂ ਨੂੰ ਬੰਦ ਕਰ ਦਿੱਤਾ ਗਿਆ ਸੀ, ਜਿਸ ਤੋਂ ਬਾਅਦ ਇਹ ਇੰਜਣ ਸਿਰਫ਼ ਕਿਤਾਬਾਂ ਵਿੱਚ ਹੀ ਦੇਖਣ ਨੂੰ ਮਿਲਦੇ ਸਨ। ਪਰ ਹੁਣ ਰੇਲਵੇ ਵਿਭਾਗ ਵੱਲੋਂ ਪੰਜਾਬ ਤੋਂ ਹਿਮਾਚਲ ਨੂੰ ਜਾਣ ਵਾਲੀ ਟ੍ਰੇਨ ਦੇ ਅੱਗੇ ਸਟੀਮ ਇੰਜਣ ਲਗਾਉਣ ਦਾ ਵਿਸ਼ੇਸ਼ ਯਤਨ ਕੀਤਾ ਜਾ ਰਿਹਾ ਹੈ।

ਇਸੇ ਦੇ ਤਹਿਤ, 1952 ਵਿੱਚ ਬਣੇ ਇਸ ਸਟੀਮ ਇੰਜਣ ਦੀ ਵਿਆਪਕ ਮੁਰੰਮਤ ਕੀਤੀ ਗਈ ਹੈ ਅਤੇ ਰੇਲਵੇ ਵਿਭਾਗ ਵੱਲੋਂ ਅੱਜ ਇਸ ਦਾ ਸਫ਼ਲ ਟਰਾਇਲ ਵੀ ਲਿਆ ਗਿਆ ਹੈ। ਰੇਲਵੇ ਵਿਭਾਗ ਦੀ ਕੋਸ਼ਿਸ਼ ਹੈ ਕਿ ਜਿੱਥੇ ਇਸ ਇੰਜਣ ਦੇ ਚੱਲਣ ਨਾਲ ਇਲਾਕੇ ਵਿੱਚ ਸੈਲਾਨੀਆਂ ਦੀ ਗਿਣਤੀ ਵਧੇਗੀ, ਉੱਥੇ ਹੀ ਨਵੀਂ ਪੀੜ੍ਹੀ ਵੀ ਇਨ੍ਹਾਂ ਬੰਦ ਹੋ ਚੁੱਕੇ ਸਟੀਮ ਇੰਜਣਾਂ ਨੂੰ ਦੇਖ ਕੇ ਆਪਣਾ ਮਨੋਰੰਜਨ ਕਰ ਸਕੇਗੀ।

ਨਵੀਂ ਪੀੜ੍ਹੀ ਅਤੇ ਸੈਲਾਨੀਆਂ ਲਈ ਖ਼ਿੱਚ ਦਾ ਕੇਂਦਰ: ਰੇਲਵੇ ਮੁਲਾਜ਼ਮ

ਇਸ ਸਬੰਧੀ ਗੱਲਬਾਤ ਕਰਦਿਆਂ ਰੇਲਵੇ ਵਿਭਾਗ ਵਿੱਚ ਕੰਮ ਕਰ ਰਹੇ ਨੌਜਵਾਨ ਮੁਲਾਜ਼ਮਾਂ ਨੇ ਕਿਹਾ ਕਿ ਇਸ ਸਟੀਮ ਇੰਜਣ ਦੇ ਚੱਲਣ ਨਾਲ ਜਿੱਥੇ ਪੰਜਾਬ ਅਤੇ ਹਿਮਾਚਲ ਦਾ ਆਪਸੀ ਸੰਪਰਕ ਇਤਿਹਾਸਕ ਹੋਵੇਗਾ, ਉੱਥੇ ਹੀ ਨਵੀਂ ਪੀੜ੍ਹੀ ਨੂੰ ਵੀ ਇਸ ਸਟੀਮ ਇੰਜਣ ਦੇ ਬਾਰੇ ਬਹੁਤ ਕੁਝ ਜਾਣਨ ਅਤੇ ਦੇਖਣ ਨੂੰ ਮਿਲੇਗਾ।

ਨੌਜਵਾਨਾਂ ਨੇ ਦੱਸਿਆ ਕਿ ਇਹ ਸਟੀਮ ਇੰਜਣ ਉਨ੍ਹਾਂ ਦੇ ਜਨਮ ਤੋਂ ਵੀ ਪਹਿਲਾਂ ਦਾ ਹੈ, ਜਿਸ ਨੂੰ ਉਨ੍ਹਾਂ ਨੇ ਪਹਿਲਾਂ ਕਦੇ ਲਾਈਵ ਨਹੀਂ ਦੇਖਿਆ ਸੀ। ਹੁਣ ਜਦੋਂ ਇਹ ਇੰਜਣ ਸ਼ੈੱਡ ਵਿੱਚ ਆਇਆ ਹੈ ਤਾਂ ਇਸ ਨੂੰ ਦੇਖ ਕੇ ਉਹ ਬਹੁਤ ਉਤਸ਼ਾਹਿਤ ਹਨ ਅਤੇ ਆਉਣ ਵਾਲੇ ਦਿਨਾਂ ਵਿੱਚ ਸੈਲਾਨੀ ਵੀ ਇਸ ਸ਼ਾਹੀ ਅਤੇ ਇਤਿਹਾਸਕ ਸਫ਼ਰ ਦਾ ਭਰਪੂਰ ਆਨੰਦ ਲੈ ਸਕਣਗੇ।