ਪੰਜਾਬ ਯੂਨੀਵਰਸਿਟੀ ‘ਚ UG ਦਾਖ਼ਲਿਆਂ ਲਈ ਨਵੇਂ ਨਿਯਮ ਜਾਰੀ, ਵਿਦਿਆਰਥੀ ਚੁਣ ਸਕਣਗੇ ਇਹ 58 ਵਿਸ਼ੇ
ਪੰਜਾਬ ਯੂਨੀਵਰਸਿਟੀ ਨੇ ਨਵੀਂ ਸਿੱਖਿਆ ਨੀਤੀ ਤਹਿਤ ਅੰਡਰ ਗ੍ਰੈਜੂਏਸ਼ਨ ਦਾਖ਼ਲਿਆਂ ਲਈ ਮਲਟੀ ਡਿਸਿਪਲਿਨਰੀ ਕੋਰਸ (MDC) ਦੇ ਨਵੇਂ ਦਿਸ਼ਾ-ਨਿਰਦੇਸ਼ ਜਾਰੀ ਕੀਤੇ ਹਨ। ਇਸ ਤਹਿਤ ਵਿਦਿਆਰਥੀ ਨਿਰਧਾਰਤ 58 ਵਿਸ਼ਿਆਂ ਵਿੱਚੋਂ ਚੋਣ ਕਰ ਸਕਣਗੇ। ਖ਼ਾਸ ਗੱਲ ਇਹ ਹੈ ਕਿ ਹੁਣ ਆਰਟਸ ਦੇ ਵਿਦਿਆਰਥੀ ਸਾਇੰਸ-ਕਾਮਰਸ ਅਤੇ ਸਾਇੰਸ ਦੇ ਵਿਦਿਆਰਥੀ ਆਰਟਸ ਦੇ ਵਿਸ਼ੇ ਪੜ੍ਹ ਸਕਣਗੇ।
ਪੰਜਾਬ ਯੂਨੀਵਰਸਿਟੀ ਵੱਲੋਂ ਅੰਡਰ ਗ੍ਰੈਜੂਏਸ਼ਨ ਦਾਖ਼ਲਿਆਂ ਨੂੰ ਲੈ ਕੇ ਇੱਕ ਬੇਹੱਦ ਅਹਿਮ ਖ਼ਬਰ ਸਾਹਮਣੇ ਆਈ ਹੈ। ਯੂਨੀਵਰਸਿਟੀ ਪ੍ਰਸ਼ਾਸਨ ਨੇ ਮਲਟੀ ਡਿਸਿਪਲਿਨਰੀ ਕੋਰਸ ਦੇ ਸਬੰਧ ਵਿੱਚ ਨਵੇਂ ਦਿਸ਼ਾ-ਨਿਰਦੇਸ਼ ਜਾਰੀ ਕੀਤੇ ਹਨ। ਇਸ ਤਹਿਤ ਪੰਜਾਬ ਯੂਨੀਵਰਸਿਟੀ ਨੇ ਚੰਡੀਗੜ੍ਹ ਅਤੇ ਪੰਜਾਬ ਦੇ ਆਪਣੇ ਨਾਲ ਸਬੰਧਤ ਕਰੀਬ 200 ਕਾਲਜਾਂ ਨੂੰ ਮੰਗਲਵਾਰ ਨੂੰ ਇੱਕ ਸਰਕੂਲਰ ਭੇਜ ਕੇ ਸਪੱਸ਼ਟ ਕੀਤਾ ਹੈ ਕਿ ਹੁਣ ਵਿਦਿਆਰਥੀ ਸਿਰਫ਼ ਨਿਰਧਾਰਤ ਕੀਤੇ ਗਏ 58 ਵਿਸ਼ਿਆਂ ਵਿੱਚੋਂ ਹੀ ਐੱਮ.ਡੀ.ਸੀ. ਦੀ ਚੋਣ ਕਰ ਸਕਣਗੇ।
ਨਵੀਂ ਸਿੱਖਿਆ ਨੀਤੀ ਦੇ ਨਿਯਮਾਂ ਅਨੁਸਾਰ ਵਿਦਿਆਰਥੀਆਂ ਨੂੰ ਦਾਖ਼ਲੇ ਦੇ ਸਮੇਂ ਆਪਣੇ ਸਟ੍ਰੀਮ ਦੇ ਤਿੰਨ ਮੁੱਖ ਵਿਸ਼ੇ ਚੁਣਨੇ ਪੈਣਗੇ, ਜਦੋਂ ਕਿ ਚੌਥਾ ਵਿਸ਼ਾ ਐੱਮ.ਡੀ.ਸੀ. ਦੇ ਰੂਪ ਵਿੱਚ ਪੜ੍ਹਨਾ ਹੋਵੇਗਾ। ਇਹ ਚੌਥਾ ਵਿਸ਼ਾ ਵਿਦਿਆਰਥੀ ਆਪਣੀ ਦਿਲਚਸਪੀ ਮੁਤਾਬਕ ਚੁਣ ਸਕਦਾ ਹੈ, ਪਰ ਸ਼ਰਤ ਇਹ ਹੈ ਕਿ ਉਹ ਵਿਸ਼ਾ ਉਸ ਦੇ ਮੁੱਖ ਤਿੰਨ ਮੇਜਰ ਵਿਸ਼ਿਆਂ ਵਿੱਚ ਸ਼ਾਮਲ ਨਹੀਂ ਹੋਣਾ ਚਾਹੀਦਾ।
ਦੂਜੇ ਸਟ੍ਰੀਮ ਦੇ ਵਿਸ਼ੇ ਪੜ੍ਹਨ ਦਾ ਮਿਲੇਗਾ ਸੁਨਹਿਰੀ ਮੌਕਾ
ਪੰਜਾਬ ਯੂਨੀਵਰਸਿਟੀ ਨੇ ਪਹਿਲੀ ਵਾਰ ਵਿਦਿਆਰਥੀਆਂ ਨੂੰ ਇਹ ਵਿਸ਼ੇਸ਼ ਸਹੂਲਤ ਦਿੱਤੀ ਹੈ ਕਿ ਉਹ ਦੂਜੇ ਸਟ੍ਰੀਮ ਦੇ ਵਿਸ਼ਿਆਂ ਦੀ ਪੜ੍ਹਾਈ ਵੀ ਕਰ ਸਕਣਗੇ। ਮਿਸਾਲ ਦੇ ਤੌਰ ‘ਤੇ, ਆਰਟਸ ਦਾ ਕੋਈ ਵਿਦਿਆਰਥੀ ਹੁਣ ਸਾਇੰਸ ਜਾਂ ਕਾਮਰਸ ਦਾ ਕੋਈ ਵਿਸ਼ਾ ਐੱਮ.ਡੀ.ਸੀ. ਵਜੋਂ ਚੁਣ ਸਕਦਾ ਹੈ। ਇਸੇ ਤਰ੍ਹਾਂ ਸਾਇੰਸ ਦਾ ਵਿਦਿਆਰਥੀ ਆਰਟਸ ਜਾਂ ਕਾਮਰਸ ਦੇ ਵਿਸ਼ਿਆਂ ਦੀ ਚੋਣ ਕਰ ਸਕੇਗਾ। ਯੂਨੀਵਰਸਿਟੀ ਨੇ ਸਾਫ਼ ਤੌਰ ‘ਤੇ ਹਦਾਇਤ ਕੀਤੀ ਹੈ ਕਿ ਜਿਨ੍ਹਾਂ ਤਿੰਨ ਵਿਸ਼ਿਆਂ ਨੂੰ ਵਿਦਿਆਰਥੀ ਮੇਜਰ ਵਜੋਂ ਚੁਣ ਚੁੱਕੇ ਹਨ, ਉਨ੍ਹਾਂ ਵਿੱਚੋਂ ਕਿਸੇ ਵੀ ਵਿਸ਼ੇ ਨੂੰ ਐੱਮ.ਡੀ.ਸੀ. ਵਜੋਂ ਦੁਬਾਰਾ ਨਹੀਂ ਲਿਆ ਜਾ ਸਕੇਗਾ।
ਕਾਲਜ ਵਿੱਚ ਫੈਕਲਟੀ ਹੋਣ ‘ਤੇ ਹੀ ਮਿਲੇਗਾ ਮਨਪਸੰਦ ਵਿਸ਼ਾ
ਯੂਨੀਵਰਸਿਟੀ ਵੱਲੋਂ ਜਾਰੀ ਸਰਕੂਲਰ ਅਨੁਸਾਰ, ਕੋਈ ਵੀ ਐੱਮ.ਡੀ.ਸੀ. ਵਿਸ਼ਾ ਵਿਦਿਆਰਥੀ ਨੂੰ ਉਦੋਂ ਹੀ ਅਲਾਟ ਕੀਤਾ ਜਾਵੇਗਾ, ਜੇਕਰ ਸਬੰਧਤ ਕਾਲਜ ਵਿੱਚ ਉਸ ਵਿਸ਼ੇ ਨੂੰ ਪੜ੍ਹਾਉਣ ਲਈ ਫੈਕਲਟੀ (ਪ੍ਰੋਫੈਸਰ) ਅਤੇ ਲੋੜੀਂਦੇ ਪ੍ਰਬੰਧ ਮੌਜੂਦ ਹੋਣਗੇ। ਜੇਕਰ ਕਾਲਜ ਕੋਲ ਸਬੰਧਤ ਵਿਸ਼ੇ ਦੀ ਪੜ੍ਹਾਈ ਕਰਵਾਉਣ ਲਈ ਬੁਨਿਆਦੀ ਸਹੂਲਤ ਨਹੀਂ ਹੈ, ਤਾਂ ਵਿਦਿਆਰਥੀਆਂ ਨੂੰ ਉਹ ਵਿਸ਼ਾ ਚੁਣਨ ਦੀ ਇਜਾਜ਼ਤ ਨਹੀਂ ਦਿੱਤੀ ਜਾਵੇਗੀ।
ਸੂਚੀ ਵਿੱਚ ਇਹ 58 ਪ੍ਰਮੁੱਖ ਵਿਸ਼ੇ ਕੀਤੇ ਗਏ ਸ਼ਾਮਲ
ਪੰਜਾਬ ਯੂਨੀਵਰਸਿਟੀ ਵੱਲੋਂ ਜਾਰੀ ਕੀਤੀ ਗਈ ਅਧਿਕਾਰਤ ਸੂਚੀ ਵਿੱਚ ਕੁੱਲ 58 ਵਿਸ਼ਿਆਂ ਨੂੰ ਜਗ੍ਹਾ ਮਿਲੀ ਹੈ। ਇਨ੍ਹਾਂ ਵਿੱਚ ਪ੍ਰਮੁੱਖ ਤੌਰ ‘ਤੇ ਅਰਥ ਸ਼ਾਸਤਰ, ਡਿਫੈਂਸ ਸਟੱਡੀਜ਼, ਐਜੂਕੇਸ਼ਨ, ਫਾਈਨ ਆਰਟਸ, ਪੁਲਿਸ ਐਡਮਿਨਿਸਟ੍ਰੇਸ਼, ਗਣਿਤ, ਇਤਿਹਾਸ, ਪਬਲਿਕ ਐਡਮਿਨਿਸਟ੍ਰੇਸ਼ਨ, ਹੋਮ ਸਾਇੰਸ, ਫਿਲਾਸਫੀ, ਰਾਜਨੀਤੀ ਸ਼ਾਸਤਰ, ਸਟੈਟਿਸਟਿਕਸ, ਸਮਾਜ ਸ਼ਾਸਤਰ, ਭੂਗੋਲ, ਪੱਤਰਕਾਰੀ ਅਤੇ ਜਨਸੰਚਾਰ, ਮਨੋਵਿਗਿਆਨ, ਫੈਸ਼ਨ ਡਿਜ਼ਾਈਨਿੰਗ ਅਤੇ ਕਾਮਰਸ ਐਂਡ ਬਿਜ਼ਨਸ ਮੈਨੇਜਮੈਂਟ ਸ਼ਾਮਲ ਹਨ। ਇਸ ਤੋਂ ਇਲਾਵਾ ਭਾਸ਼ਾਵਾਂ ਵਿੱਚ ਹਿੰਦੀ, ਪੰਜਾਬੀ, ਸੰਸਕ੍ਰਿਤ, ਉਰਦੂ, ਫ੍ਰੈਂਚ, ਜਰਮਨ ਤੇ ਰੂਸੀ ਅਤੇ ਸਾਇੰਸ ਵਿਸ਼ਿਆਂ ਵਿੱਚ ਕੰਪਿਊਟਰ ਸਾਇੰਸ ਐਂਡ ਐਪਲੀਕੇਸ਼ਨਜ਼, ਜ਼ੂਲੋਜੀ, ਬਾਇਓਟੈਕਨਾਲੋਜੀ, ਬਾਇਓਕੈਮਿਸਟਰੀ, ਮਾਈਕ੍ਰੋਬਾਇਓਲੋਜੀ ਅਤੇ ਐਗਰੀਕਲਚਰ ਸਮੇਤ ਕਈ ਹੋਰ ਅਹਿਮ ਵਿਸ਼ੇ ਸ਼ਾਮਲ ਕੀਤੇ ਗਏ ਹਨ।