ਨੈਨਸੀ ਗਰੇਵਾਲ ਦਾ ਆਖਿਰੀ ਵੀਡੀਓ ਆਇਆ ਸਾਹਮਣੇ, ਭੈਣ ਅਲੀਸ਼ਾ ਨੇ ਸਾਂਝੇ ਕੀਤੇ ਆਖਿਰੀ ਪਲ

ਨੈਨਸੀ ਗਰੇਵਾਲ ਦਾ ਆਖਿਰੀ ਵੀਡੀਓ ਆਇਆ ਸਾਹਮਣੇ

ਕੈਨੇਡਾ ‘ਚ ਰਹਿਣ ਵਾਲੀ ਪੰਜਾਬੀ ਮੂਲ ਦੀ ਯੂਟਿਊਬਰ ਨੈਨਸੀ ਗਰੇਵਾਲ (45) ਦਾ ਆਖਰੀ ਵੀਡੀਓ ਸਾਹਮਣੇ ਆਇਆ ਹੈ, ਜੋ ਉਸ ਦੀ ਮੌਤ ਤੋਂ ਠੀਕ ਪਹਿਲਾਂ ਦਾ ਦੱਸਿਆ ਜਾ ਰਿਹਾ ਹੈ। ਇਹ ਵੀਡੀਓ ਨੈਨਸੀ ਦੀ ਭੈਣ ਅਲੀਸ਼ਾ ਗਰੇਵਾਲ ਨੇ ਆਪਣੇ ਇੰਸਟਾਗ੍ਰਾਮ ਅਕਾਊਂਟ ‘ਤੇ ਸਾਂਝਾ ਕੀਤਾ ਹੈ। ਵੀਡੀਓ ਸਾਂਝਾ ਕਰਦੇ ਹੋਏ, ਅਲੀਸ਼ਾ ਨੇ ਲਿਖਿਆ, “ਮੈਂ ਤੁਹਾਨੂੰ ਹਰ ਰੋਜ਼ ਯਾਦ ਕਰਦੀ ਹਾਂ, ਭੈਣ।”

ਇਸ ਤੋਂ ਇਲਾਵਾ, ਅਲੀਸ਼ਾ ਨੇ ਕਿਹਾ ਕਿ ਇਹ ਨੈਨਸੀ ਗਰੇਵਾਲ ਦੀ ਆਖਰੀ ਵੀਡੀਓ ਹੈ। ਇਸ ‘ਚ, ਉਹ ਕੰਮ ‘ਤੇ ਜਾਣ ਲਈ ਤਿਆਰ ਹੁੰਦੀ ਦਿਖਾਈ ਦੇ ਰਹੀ ਹੈ। ਇਸ ਤੋਂ ਪਹਿਲਾਂ, ਉਹ ਆਪਣੇ ਘਰ ਦੇ ਲੌਨ (ਗਾਰਡਨ) ‘ਚ ਘੁੰਮਦੀ ਤੇ ਆਪਣਾ ਸਮਾਨ ਆਪਣੀ ਕਾਰ ਦੇ ਅੰਦਰ ਰੱਖਦੀ ਦਿਖਾਈ ਦੇ ਰਹੀ ਹੈ।

ਵੀਡੀਓ ਸਾਂਝਾ ਕਰਦੇ ਹੋਏ, ਅਲੀਸ਼ਾ ਨੇ ਖੁਲਾਸਾ ਕੀਤਾ ਕਿ ਨੈਨਸੀ ਦਾ ਕਤਲ ਥੋੜ੍ਹੀ ਦੇਰ ਬਾਅਦ ਕੀਤਾ ਗਿਆ ਸੀ। ਨੈਨਸੀ ਪੂਰੇ ਉਤਸ਼ਾਹ ਊਰਜਾ ਨਾਲ ਕੰਮ ਲਈ ਜਾਂਦੀ ਦਿਖਾਈ ਦੇ ਰਹੀ ਹੈ। ਉਸ ਨੂੰ ਬਿਲਕੁਲ ਵੀ ਅੰਦਾਜ਼ਾ ਨਹੀਂ ਸੀ ਕਿ ਇਹ ਵੀਡੀਓ ਉਸ ਦੀ ਆਖਰੀ ਹੋਵੇਗੀ। ਅਲੀਸ਼ਾ ਨੇ ਟਿੱਪਣੀ ਕੀਤੀ ਕਿ ਇਸ ਪਲ ਤੋਂ ਬਾਅਦ ਨੈਨਸੀ ਕਦੇ ਵਾਪਸ ਨਹੀਂ ਆਈ ਤੇ ਉਸਦੀ ਆਵਾਜ਼ ਹਮੇਸ਼ਾ ਲਈ ਚੁੱਪ ਹੋ ਗਈ।

ਅਲੀਸ਼ਾ ਵੱਲੋਂ ਅਪਲੋਡ ਕੀਤੇ ਗਏ ਵੀਡੀਓ ‘ਚ, ਇਹ ਸਾਫ਼ ਦਿਖਾਈ ਦੇ ਰਿਹਾ ਹੈ ਕਿ ਨੈਨਸੀ ਦੁਪਹਿਰ 3:02 ਵਜੇ ਕੰਮ ਲਈ ਜਾ ਰਹੀ ਹੈ। 4 ਮਾਰਚ ਦੀ ਇਸ ਵੀਡੀਓ ‘ਚ, ਨੈਨਸੀ ਨੇ ਕਾਲਾ ਟੌਪ ਪਾਇਆ ਹੋਇਆ ਹੈ ਤੇ ਹੱਥ ‘ਚ ਇੱਕ ਬੈਗ ਲੈ ਕੇ ਆਪਣੇ ਘਰ ਤੋਂ ਬਾਹਰ ਨਿਕਲਦੀ ਦਿਖਾਈ ਦੇ ਰਹੀ ਹੈ। ਫਿਰ ਉਹ ਲੌਨ ‘ਤੇ ਖੜ੍ਹੀ ਆਪਣੀ ਲਾਲ ਕਾਰ ‘ਚ ਚੜ੍ਹ ਜਾਂਦੀ ਹੈ, ਤੇ ਗੱਡੀ ਚਲਾਉਂਦੀ ਹੈ। ਉਸ ਪਲ ਤੋਂ ਬਾਅਦ ਨੈਨਸੀ ਕਦੇ ਘਰ ਵਾਪਸ ਨਹੀਂ ਆਈ।

ਇਹ ਧਿਆਨ ਦੇਣ ਯੋਗ ਹੈ ਕਿ ਨੈਨਸੀ ਦਾ 4 ਮਾਰਚ, 2026 ਨੂੰ ਕੈਨੇਡਾ ‘ਚ ਚਾਕੂ ਮਾਰ ਕੇ ਕਤਲ ਕਰ ਦਿੱਤਾ ਗਿਆ ਸੀ। ਕੈਨੇਡੀਅਨ ਪੁਲਿਸ ਦੇ ਅਨੁਸਾਰ, ਹਮਲਾਵਰ ਮੰਗਲਵਾਰ ਰਾਤ 9:30 ਵਜੇ ਦੇ ਕਰੀਬ ਘਰ ‘ਚ ਦਾਖਲ ਹੋਏ ਸਨ। ਉਸ ਸਮੇਂ, ਨੈਨਸੀ ਇੱਕ ਬਜ਼ੁਰਗ ਮਰੀਜ਼ ਦੇ ਘਰ ਦੇਖਭਾਲ ਲਈ ਬਾਹਰ ਗਈ ਸੀ। ਜਦੋਂ ਹਮਲਾ ਹੋਇਆ, ਤਾਂ ਉਹ ਨੇੜਲੇ ਜੰਗਲੀ ਖੇਤਰ ਵੱਲ ਭੱਜ ਗਈ, ਜਿੱਥੇ ਦੋ ਹਮਲਾਵਰਾਂ ਨੇ ਉਸ ਦੇ ਪੇਟ ਵਿੱਚ ਕਈ ਵਾਰ ਚਾਕੂ ਮਾਰੇ। ਪੁਲਿਸ ਮੌਕੇ ‘ਤੇ ਪਹੁੰਚੀ ਤੇ ਨੈਨਸੀ ਨੂੰ ਹਸਪਤਾਲ ਲੈ ਗਈ, ਪਰ ਡਾਕਟਰਾਂ ਨੇ ਪਹੁੰਚਣ ‘ਤੇ ਉਸ ਨੂੰ ਮ੍ਰਿਤਕ ਐਲਾਨ ਦਿੱਤਾ। ਨੈਨਸੀ ਆਖਰੀ ਵਾਰ ਹੱਥ ‘ਚ ਲਾਲ ਬੈਗ ਲੈ ਕੇ ਜਾ ਰਹੀ ਸੀ

ਕੈਨੇਡਾ ਵਿੱਚ ਖਾਲਿਸਤਾਨੀਆਂ ਵਿਰੁੱਧ ਬੋਲਣ ਵਾਲੀ ਨੈਨਸੀ ਨੂੰ ਜਾਨੋਂ ਮਾਰਨ ਦੀਆਂ ਧਮਕੀਆਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਸੀ। ਸਿੱਟੇ ਵਜੋਂ, ਉਸ ਨੇ ਕਈ ਹਫ਼ਤਿਆਂ ਤੋਂ ਸੋਸ਼ਲ ਮੀਡੀਆ ‘ਤੇ ਵੀਡੀਓ ਪੋਸਟ ਕਰਨਾ ਬੰਦ ਕਰ ਦਿੱਤਾ ਸੀ। ਨੈਨਸੀ ਪੰਜਾਬ ਨਾਲ ਸਬੰਧਤ ਹਰ ਮੁੱਦੇ ਨੂੰ ਸੰਬੋਧਨ ਕਰਦੀ ਸੀ। ਆਪਣੇ ਕਤਲ ਤੋਂ ਪਹਿਲਾਂ, ਉਸਨੇ ਨਾਭਾ ਜੇਲ੍ਹ ਤੋਂ ਮਜੀਠੀਆ ਦੀ ਰਿਹਾਈ ਦੇ ਮੱਦੇਨਜ਼ਰ ਰਾਧਾ ਸੁਆਮੀ ਡੇਰੇ ਬਾਰੇ ਵੀ ਤਿੱਖੀਆਂ ਟਿੱਪਣੀਆਂ ਕੀਤੀਆਂ ਸਨ। ਇਸ ਤੋਂ ਇਲਾਵਾ, ਉਸਨੇ ਸ੍ਰੀ ਅਕਾਲ ਤਖ਼ਤ ਦੇ ਜਥੇਦਾਰ ਗਿਆਨੀ ਗੜਗੱਜ ਦੀ ਆਲੋਚਨਾ ਕਰਦੇ ਹੋਏ ਵੀਡੀਓ ਅਪਲੋਡ ਕੀਤੇ ਸਨ।