ਜਲੰਧਰ: ਧਰਮ ਕੰਡੇ 'ਤੇ ਤੇਜ਼ਧਾਰ ਹਥਿਆਰਾਂ ਦਿਖਾ ਕੇ ਲੁੱਟ, ਨਕਦੀ, ਫ਼ੋਨ ਤੇ ਸਿਲੰਡਰ ਲੈ ਕੇ ਬਦਮਾਸ਼ ਫ਼ਰਾਰ
ਜਲੰਧਰ ਦੇ ਸੋਢਲ ਰੋਡ ‘ਤੇ ਕਾਲੀ ਮਾਤਾ ਮੰਦਰ ਦੇ ਨੇੜੇ ਸਥਿਤ ਘਈ ਧਰਮ ਕੰਡੇ ਵਿਖੇ ਸਵੇਰੇ 3:45 ਵਜੇ ਦੋ ਲੁਟੇਰੇ ਇੱਕ ਨੌਜਵਾਨ ਤੋਂ ਨਕਦੀ, ਇੱਕ ਮੋਬਾਈਲ ਫੋਨ ਤੇ ਦੋ ਗੈਸ ਸਿਲੰਡਰ ਲੁੱਟ ਕੇ ਮੌਕੇ ਤੋਂ ਫ਼ਰਾਰ ਹੋ ਗਏ। ਲੁੱਟ ਦੀ ਇਹ ਘਟਨਾ, ਨੇੜਲੀ ਦੁਕਾਨ ‘ਤੇ ਲੱਗੇ ਸੀਸੀਟੀਵੀ ਕੈਮਰਿਆਂ ‘ਚ ਕੈਦ ਹੋ ਗਈ। ਧਰਮ ਕੰਡੇ ਦੇ ਮਾਲਕ ਨੇ ਸਵੇਰੇ ਤੜਕੇ ਥਾਣਾ ਨੰਬਰ 8 ‘ਚ ਇਸ ਘਟਨਾ ਸਬੰਧੀ ਸ਼ਿਕਾਇਤ ਦਰਜ ਕਰਵਾਈ। ਸੂਚਨਾ ਮਿਲਣ ‘ਤੇ ਪੁਲਿਸ ਮੌਕੇ ‘ਤੇ ਪਹੁੰਚੀ ਤੇ ਮਾਮਲੇ ਦੀ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।
ਧਰਮ ਕੰਡੇ ਦੇ ਮਾਲਕ ਅਭਿਮਨਿਊ ਨੇ ਦੱਸਿਆ ਕਿ ਸਵੇਰੇ 3:30 ਵਜੇ ਦੇ ਕਰੀਬ, ਇੱਕ ਨੌਜਵਾਨ ਕਰਮਚਾਰੀ ਧਰਮ ਕੰਡੇ ‘ਤੇ ਮੌਜੂਦ ਸੀ। ਉਸੇ ਸਮੇਂ, ਮੋਟਰਸਾਈਕਲ ‘ਤੇ ਹੈਲਮੇਟ ਪਹਿਨੇ ਦੋ ਬਦਮਾਸ਼ ਆਏ, ਜੋ ਕਿ ਤੇਜ਼ਧਾਰ ਹਥਿਆਰਾਂ ਨਾਲ ਲੈਸ ਸਨ। ਉਨ੍ਹਾਂ ਨੇ ਕਰਮਚਾਰੀ ਦਾ ਮੋਬਾਈਲ ਫੋਨ ਤੇ 15,000 ਰੁਪਏ ਦੀ ਨਕਦੀ ਲੁੱਟ ਲਈ। ਲੁੱਟ ਦੌਰਾਨ ਬਦਮਾਸ਼ ਨੇ ਨਾਲ ਲੱਗਦੇ ਕਮਰਿਆਂ ‘ਚ ਰੱਖੇ ਦੋ ਗੈਸ ਸਿਲੰਡਰ ਵੀ ਚੋਰੀ ਕਰ ਲਏ। ਉਨ੍ਹਾਂ ਨੇ ਸਵੇਰੇ 10:00 ਵਜੇ ਥਾਣਾ ਨੰਬਰ 8 ਵਿਖੇ ਪੁਲਿਸ ਕੋਲ ਡਕੈਤੀ ਸੰਬੰਧੀ ਸ਼ਿਕਾਇਤ ਦਰਜ ਕਰਵਾਈ।
ਇਸ ਦੌਰਾਨ, ਥਾਣਾ ਨੰਬਰ 8 ਦੇ ਜਾਂਚ ਅਧਿਕਾਰੀ ਨੇ ਪੁਸ਼ਟੀ ਕੀਤੀ ਕਿ ਉਨ੍ਹਾਂ ਨੂੰ ਕੰਟਰੋਲ ਰੂਮ ਰਾਹੀਂ ਘਟਨਾ ਬਾਰੇ ਜਾਣਕਾਰੀ ਮਿਲੀ ਸੀ। ਉਨ੍ਹਾਂ ਕਿਹਾ ਕਿ ਲੁਟੇਰੇ ਅਪਰਾਧ ਕਰਨ ਤੋਂ ਤੁਰੰਤ ਬਾਅਦ ਫ਼ਰਾਰ ਹੋ ਗਏ ਸਨ, ਜਿਸ ਤੋਂ ਬਾਅਦ ਉਹ ਆਪਣੀ ਟੀਮ ਦੇ ਨਾਲ ਮੌਕੇ ‘ਤੇ ਪਹੁੰਚੇ। ਪੁਲਿਸ ਇਸ ਸਮੇਂ ਆਲੇ ਦੁਆਲੇ ਦੇ ਇਲਾਕੇ ‘ਚ ਲੱਗੇ ਸੀਸੀਟੀਵੀ ਕੈਮਰਿਆਂ ਦੀ ਫੁਟੇਜ ਦੀ ਜਾਂਚ ਕਰ ਰਹੀ ਹੈ।
