ਵਿਦੇਸ਼ਾਂ ‘ਚ ਨੌਕਰੀ ਦੇ ਚੱਕਰ ਵਿੱਚ ਫ੍ਰਾਡ ਏਜੰਟ ਦਾ ਨਾ ਹੋਵੋ ਸ਼ਿਕਾਰ, ਸਰਕਾਰ ਕਰੇਗੀ ਸਹਿਯੋਗ, ਇੰਝ ਲੱਭੋ ਰਜ਼ਿਸਟਰਡ ਏਜੰਟ

ਵਿਦੇਸ਼ ਮੰਤਰਾਲੇ ਦੇ ਅੰਕੜਿਆਂ ਤੋਂ ਪਤਾ ਲੱਗਦਾ ਹੈ ਕਿ ਏਜੰਟ ਆਮ ਨਾਗਰਿਕਾਂ ਨੂੰ ਵਿਦੇਸ਼ਾਂ ਵਿੱਚ ਨੌਕਰੀਆਂ ਦੇਣ ਦਾ ਵਾਅਦਾ ਕਰਕੇ ਧੋਖਾਧੜੀ ਦਾ ਸ਼ਿਕਾਰ ਬਣਾਉਂਦੇ ਹਨ। ਫਰਜ਼ੀ ਵਿਦੇਸ਼ੀ ਨੌਕਰੀ ਦੇ ਨਾਂ ‘ਤੇ ਏਜੰਟਾਂ ਨੇ ਹਰੇਕ ਵਿਅਕਤੀ ਤੋਂ 5 ਲੱਖ ਰੁਪਏ ਤੱਕ ਲੈ ਲਏ ਹਨ। ਵਿਦੇਸ਼ ਮੰਤਰਾਲੇ ਨੇ ਇੱਕ ਪ੍ਰੈਸ ਬਿਆਨ ਵਿੱਚ ਕਿਹਾ ਕਿ ਇਹ ਦੇਖਿਆ ਗਿਆ ਹੈ ਕਿ ਗੈਰ-ਰਜਿਸਟਰਡ ਭਰਤੀ ਏਜੰਟਾਂ ਵੱਲੋਂ ਜਾਅਲੀ ਨੌਕਰੀਆਂ ਦੀ ਪੇਸ਼ਕਸ਼ ਕਰਕੇ 2-5 ਲੱਖ ਰੁਪਏ ਵਸੂਲੇ ਜਾਣ ਕਾਰਨ ਵਿਦੇਸ਼ੀ ਨੌਕਰੀ ਭਾਲਣ ਵਾਲਿਆਂ ਦੀ ਗਿਣਤੀ ਵਿੱਚ ਭਾਰੀ ਵਾਧਾ ਹੋਇਆ ਹੈ।

ਮੰਤਰਾਲੇ ਨੇ ਇਹ ਅਪੀਲ ਕੀਤੀ

ਧੋਖਾਧੜੀ ਦੀਆਂ ਇਨ੍ਹਾਂ ਘਟਨਾਵਾਂ ਨੂੰ ਘੱਟ ਕਰਨ ਲਈ, ਵਿਦੇਸ਼ ਮੰਤਰਾਲੇ ਨੇ ਸਹੀ ਏਜੰਟ ਦਾ ਪਤਾ ਲਗਾਉਣ ਬਾਰੇ ਇੱਕ ਰੀਲੀਜ਼ ਜਾਰੀ ਕੀਤੀ ਹੈ। ਇਹ ਰੀਲੀਜ਼ ਦੱਸਦੀ ਹੈ ਕਿ ਤੁਸੀਂ ਵਿਦੇਸ਼ ਮੰਤਰਾਲੇ ਨਾਲ ਰਜਿਸਟਰਡ ਹੋਣ ਵਾਲੇ ਅਸਲ ਵਿਦੇਸ਼ੀ ਨੌਕਰੀ ਪਲੇਸਮੈਂਟ ਏਜੰਟਾਂ ਨੂੰ ਕਿਵੇਂ ਲੱਭ ਸਕਦੇ ਹੋ ਅਤੇ ਉਹਨਾਂ ਨਾਲ ਜੁੜ ਸਕਦੇ ਹੋ। ਮੰਤਰਾਲੇ ਨੇ ਵਿਦੇਸ਼ਾਂ ਵਿੱਚ ਰੁਜ਼ਗਾਰ ਲਈ ਸਿਰਫ਼ ਰਜਿਸਟਰਡ ਭਰਤੀ ਏਜੰਟਾਂ (RAs) ਦੀਆਂ ਸੁਰੱਖਿਅਤ ਅਤੇ ਕਾਨੂੰਨੀ ਸੇਵਾਵਾਂ ਦੀ ਵਰਤੋਂ ਕਰਨ ਦੀ ਬੇਨਤੀ ਕੀਤੀ ਹੈ। ਸਾਰੇ ਰਜਿਸਟਰਡ RAs ਨੂੰ ਇੱਕ ਲਾਇਸੈਂਸ ਨੰਬਰ ਜਾਰੀ ਕੀਤਾ ਜਾਂਦਾ ਹੈ, ਜੋ ਉਹਨਾਂ ਦੇ ਦਫਤਰ ਦੇ ਅਹਾਤੇ ਅਤੇ ਅਖਬਾਰਾਂ ਅਤੇ ਸੋਸ਼ਲ ਮੀਡੀਆ ਸਮੇਤ ਉਹਨਾਂ ਦੇ ਇਸ਼ਤਿਹਾਰਾਂ ਵਿੱਚ ਪ੍ਰਮੁੱਖਤਾ ਨਾਲ ਪ੍ਰਦਰਸ਼ਿਤ ਹੁੰਦਾ ਹੈ।

ਸਰਕਾਰੀ ਰਜਿਸਟਰਡ ਏਜੰਟਾਂ ਨੂੰ ਕਿਵੇਂ ਲੱਭਣਾ ਹੈ?

ਵਿਦੇਸ਼ ਮੰਤਰਾਲੇ ਨੇ ਕਿਹਾ ਹੈ ਕਿ ਤੁਸੀਂ ਸਰਕਾਰੀ ਵੈੱਬਸਾਈਟ www.emigrate.gov.in ‘ਤੇ ਜਾ ਕੇ RA ਦੀ ਅਸਲੀਅਤ ਬਾਰੇ ਜਾਣ ਸਕਦੇ ਹੋ। ਆਓ ਇਸ ਨੂੰ ਕਦਮ-ਦਰ-ਕਦਮ ਸਮਝੀਏ।

• ਸਟੈਪ 1: www.emigrate.gov.in ‘ਤੇ ਜਾਓ।
• ਸਟੈਪ 2: ‘ਰਿਕਰੂਟਿੰਗ ਏਜੰਟ’ ਨਾਮਕ ਟੈਬ ਲੱਭੋ ਅਤੇ ਇਸ ‘ਤੇ ਕਲਿੱਕ ਕਰੋ।
• ਸਟੈਪ 3: ‘ਐਕਟਿਵ ਆਰਏ ਲਿਸਟ’ ‘ਤੇ ਕਲਿੱਕ ਕਰੋ।

ਇਸ ਤੋਂ ਬਾਅਦ ਤੁਹਾਨੂੰ ਸਾਰੇ ਏਜੰਟਾਂ ਬਾਰੇ ਜਾਣਕਾਰੀ ਮਿਲੇਗੀ। ਤੁਹਾਨੂੰ ਦੱਸ ਦੇਈਏ ਕਿ ਇਮੀਗ੍ਰੇਸ਼ਨ ਐਕਟ 1983 ਦੇ ਤਹਿਤ, ਏਜੰਟ ਇੱਕ ਵਿਅਕਤੀ ਤੋਂ ਚਾਰਜ ਦੇ ਤੌਰ ‘ਤੇ ਸਿਰਫ 30,000 ਰੁਪਏ ਤੋਂ ਇਲਾਵਾ ਜੀਐਸਟੀ ਵਸੂਲ ਸਕਦੇ ਹਨ। ਜੇਕਰ ਕੋਈ ਇਸ ਤੋਂ ਵੱਧ ਰਕਮ ਦੀ ਮੰਗ ਕਰਦਾ ਹੈ ਤਾਂ ਤੁਸੀਂ ਇਸ ਦੀ ਸ਼ਿਕਾਇਤ ਕਰ ਸਕਦੇ ਹੋ।