Ajit Pawar: ਕਿਉਂ ਅਜੀਤ ਪਵਾਰ ਦੇ ਜਹਾਜ਼ Learjet 45 ਨੂੰ ਕਿਹਾ ਜਾਂਦਾ ਹੈ ਸੁਪਰ ਲਾਈਟ? ਜਾਣੋ ਇਸ ਦੀਆਂ ਖ਼ਾਸ ਵਿਸ਼ੇਸ਼ਤਾਵਾਂ

Learjet 45 ਨੂੰ ਕਿਉਂ ਕਿਹਾ ਜਾਂਦਾ ਹੈ ਸੁਪਰ ਲਾਈਟ?

ਮਹਾਰਾਸ਼ਟਰ ਦੇ ਡਿਪਟੀ ਮੁੱਖ ਮੰਤਰੀ ਅਤੇ ਸੀਨੀਅਰ ਨੇਤਾ ਅਜੀਤ ਪਵਾਰ ਦਾ ਬੁੱਧਵਾਰ ਨੂੰ ਇੱਕ ਦਰਦਨਾਕ ਜਹਾਜ਼ ਹਾਦਸੇ ਵਿੱਚ ਨਿਧਨ ਹੋ ਗਿਆ। ਇਹ ਹਾਦਸਾ ਬਾਰਾਮਤੀ ਏਅਰਪੋਰਟ ਤੇ ਉਸ ਸਮੇਂ ਵਾਪਰਿਆ, ਜਦੋਂ ਉਹ ਮੁੰਬਈ ਤੋਂ ਇੱਕ ਚਾਰਟਰਡ ਜਹਾਜ਼ ਰਾਹੀਂ ਬਾਰਾਮਤੀ ਪਹੁੰਚ ਰਹੇ ਸਨ। ਲੈਂਡਿੰਗ ਦੌਰਾਨ ਜਹਾਜ਼ ਰਨਵੇ ਤੋਂ ਫਿਸਲ ਗਿਆ ਅਤੇ ਹਾਦਸਾਗ੍ਰਸਤ ਹੋ ਗਿਆ।

ਇਸ ਭਿਆਨਕ ਹਾਦਸੇ ਵਿੱਚ ਅਜੀਤ ਪਵਾਰ ਦੇ ਨਾਲ ਉਨ੍ਹਾਂ ਦੇ ਨਿੱਜੀ ਸਹਾਇਕ, ਸੁਰੱਖਿਆ ਕਰਮਚਾਰੀ ਅਤੇ ਜਹਾਜ਼ ਦੇ ਸਟਾਫ ਸਮੇਤ ਕੁੱਲ 5 ਲੋਕਾਂ ਦੀ ਮੌਤ ਹੋ ਗਈ। ਘਟਨਾ ਤੋਂ ਬਾਅਦ ਸੂਬੇ ਭਰ ਵਿੱਚ ਸੋਗ ਦੀ ਲਹਿਰ ਦੌੜ ਗਈ ਹੈ।

ਅਜੀਤ ਪਵਾਰ ਜਿਸ ਜਹਾਜ਼ ਰਾਹੀਂ ਬਾਰਾਮਤੀ ਗਏ ਸਨ, ਉਹ Bombardier Learjet 45 ਸੀ। ਇਹ ਜਹਾਜ਼ ਸੁਪਰ ਲਾਈਟ ਜੈੱਟ ਸ਼੍ਰੇਣੀ ਵਿੱਚ ਸ਼ਾਮਲ ਕੀਤਾ ਜਾਂਦਾ ਹੈ। ਇਹ ਦੋ ਇੰਜਣਾਂ ਵਾਲਾ ਇੱਕ ਲਾਈਟ ਬਿਜ਼ਨਸ ਜੈੱਟ ਹੈ, ਜਿਸਦਾ ਇਸਤੇਮਾਲ ਆਮ ਤੌਰ ਤੇ ਕਾਰਪੋਰੇਟ ਅਤੇ VIP ਯਾਤਰਾਂ ਲਈ ਕੀਤਾ ਜਾਂਦਾ ਹੈ। Learjet 45 ਨੂੰ ਇਸ ਤਰ੍ਹਾਂ ਡਿਜ਼ਾਈਨ ਕੀਤਾ ਗਿਆ ਹੈ ਕਿ ਇਹ ਛੋਟੇ ਰੂਟਾਂ ਅਤੇ ਬਾਰਾਮਤੀ ਵਰਗੇ ਰੀਜਨਲ ਏਅਰਪੋਰਟਾਂ ਤੇ ਆਸਾਨੀ ਨਾਲ ਲੈਂਡਿੰਗ ਕਰ ਸਕੇ। ਇਸੀ ਕਾਰਨ ਇਹ ਜਹਾਜ਼ ਪ੍ਰਾਈਵੇਟ ਅਤੇ ਚਾਰਟਰਡ ਉਡਾਣਾਂ ਲਈ ਕਾਫ਼ੀ ਲੋਕਪ੍ਰਿਯ ਹੈ।

ਕਿਉਂ ਬਣਾਈ ਗਈ ਸੁਪਰ ਲਾਈਟ ਸ਼੍ਰੇਣੀ?

ਏਵੀਏਸ਼ਨ ਉਦਯੋਗ ਵਿੱਚ Learjet 45 ਨੂੰ ਸੁਪਰ ਲਾਈਟ ਜੈੱਟ ਕੈਟਾਗਰੀ ਵਿੱਚ ਰੱਖਿਆ ਜਾਂਦਾ ਹੈ, ਜਿਸਦੀ ਸ਼ੁਰੂਆਤ 1990 ਦੇ ਦਹਾਕੇ ਵਿੱਚ ਹੋਈ ਸੀ। ਇਸ ਸ਼੍ਰੇਣੀ ਨੂੰ ਵਿਕਸਤ ਕਰਨ ਦਾ ਮੁੱਖ ਮਕਸਦ Cessna Citation Excel ਵਰਗੇ ਵੱਡੇ ਕੇਬਿਨ ਵਾਲੇ ਲੋਕਪ੍ਰਿਯ ਜਹਾਜ਼ਾਂ ਨਾਲ ਮੁਕਾਬਲਾ ਕਰਨਾ ਸੀ। ਸੁਪਰ ਲਾਈਟ ਜੈੱਟ ਸ਼੍ਰੇਣੀ ਦੇ ਜਹਾਜ਼ ਹਾਈ ਸਪੀਡ, ਲੰਮੀ ਰੇਂਜ ਅਤੇ ਬਿਹਤਰ ਕਮਫਰਟ ਦੇ ਲਈ ਜਾਣੇ ਜਾਂਦੇ ਹਨ। ਇਹ ਜਹਾਜ਼ ਛੋਟੀ ਅਤੇ ਦਰਮਿਆਨੀ ਦੂਰੀਆਂ ਦੀ ਯਾਤਰਾ ਲਈ ਖਾਸ ਤੌਰ ਤੇ ਬਣਾਏ ਜਾਂਦੇ ਹਨ।

Learjet 45 ਨੂੰ ਸੁਪਰ ਲਾਈਟ ਕਿਉਂ ਕਿਹਾ ਜਾਂਦਾ ਹੈ?

ਪਰਫਾਰਮੈਂਸ: ਇਹ ਜਹਾਜ਼ ਉੱਚ ਗਤੀ ਅਤੇ ਲੰਮੀ ਦੂਰੀ ਤੱਕ ਉਡਾਣ ਭਰਨ ਦੀ ਸਮਰੱਥਾ ਰੱਖਦਾ ਹੈ।

8 ਸੀਟਾਂ ਵਾਲਾ ਜਹਾਜ਼: Learjet 45 ਇੱਕ 8 ਸੀਟਾਂ ਵਾਲਾ ਜਹਾਜ਼ ਹੈ, ਜਿਸ ਵਿੱਚ ਡਬਲ ਕਲੱਬ ਅਰੈਂਜਮੈਂਟ ਹੁੰਦਾ ਹੈ। ਇਸ ਵਿੱਚ ਗੈਲਰੀ ਅਤੇ ਲੈਵਟਰੀ (ਵਾਸ਼ਰੂਮ) ਵੀ ਮੌਜੂਦ ਹੁੰਦੀ ਹੈ।

ਡਿਜ਼ਾਈਨ ਅਤੇ ਆਰਾਮ: ਭਾਵੇਂ ਇਸਨੂੰ ਸੁਪਰ ਲਾਈਟ ਕਿਹਾ ਜਾਂਦਾ ਹੈ, ਪਰ ਯਾਤਰੀਆਂ ਦੇ ਆਰਾਮ ਦੇ ਮਾਮਲੇ ਵਿੱਚ ਕਿਸੇ ਵੀ ਤਰ੍ਹਾਂ ਦਾ ਸਮਝੌਤਾ ਨਹੀਂ ਕੀਤਾ ਗਿਆ।

ਛੋਟੀ ਦੂਰੀ ਲਈ ਉਚਿਤ: ਇਹ ਜਹਾਜ਼ ਲਗਭਗ 3.5 ਘੰਟਿਆਂ ਦੀ ਯਾਤਰਾ ਲਈ ਸਭ ਤੋਂ ਵਧੀਆ ਮੰਨਿਆ ਜਾਂਦਾ ਹੈ। ਇਸੇ ਕਾਰਨ ਪ੍ਰਾਈਵੇਟ ਜੈੱਟ ਵਜੋਂ ਇਸਦੀ ਮੰਗ ਲਗਾਤਾਰ ਵੱਧ ਰਹੀ ਹੈ।

16 ਸਾਲ ਪੁਰਾਣਾ ਸੀ ਹਾਦਸਾਗ੍ਰਸਤ ਜਹਾਜ਼

ਹਾਦਸੇ ਦਾ ਸ਼ਿਕਾਰ ਹੋਇਆ Bombardier Learjet 45 ਦਾ ਟੇਲ ਨੰਬਰ VT-SSK ਅਤੇ ਸੀਰੀਅਲ ਨੰਬਰ 45-417 ਸੀ। ਇਹ ਜਹਾਜ਼ ਲਗਭਗ 16 ਸਾਲ ਪੁਰਾਣਾ ਸੀ। ਇਹ ਜਹਾਜ਼ ਦਿੱਲੀ ਦੀ ਕੰਪਨੀ VSR Ventures Private Limited ਦੇ ਮਾਲਕੀ ਹੱਕ ਵਿੱਚ ਸੀ। VSR Ventures ਦੇ ਬੇੜੇ ਵਿੱਚ ਇਸ ਸਮੇਂ ਕੁੱਲ 17 ਜਹਾਜ਼ ਸ਼ਾਮਲ ਹਨ, ਜਿਨ੍ਹਾਂ ਵਿੱਚ ਇਹ ਹਾਦਸਾਗ੍ਰਸਤ ਜਹਾਜ਼ ਵੀ ਸ਼ਾਮਲ ਸੀ।

ਮੀਡੀਆ ਰਿਪੋਰਟਾਂ ਅਨੁਸਾਰ, VSR Ventures ਦੇ ਅਧਿਕਾਰੀਆਂ ਨੇ ਕਿਹਾ ਹੈ ਕਿ ਜਹਾਜ਼ ਵਿੱਚ ਕਿਸੇ ਵੀ ਤਰ੍ਹਾਂ ਦੀ ਸੁਰੱਖਿਆ ਸੰਬੰਧੀ ਖਾਮੀ ਨਹੀਂ ਸੀ। ਕੰਪਨੀ ਦੇ ਸਿਖਰਲੇ ਅਧਿਕਾਰੀ ਵਿਜੇ ਕੁਮਾਰ ਸਿੰਘ ਨੇ ਦਾਅਵਾ ਕੀਤਾ ਕਿ ਜਹਾਜ਼ 100 ਫੀਸਦੀ ਸੁਰੱਖਿਅਤ ਸੀ ਅਤੇ ਉਡਾਣ ਦਲ ਕਾਫ਼ੀ ਤਜਰਬੇਕਾਰ ਸੀ। ਉਨ੍ਹਾਂ ਮੁਤਾਬਕ, ਹਾਦਸੇ ਦੀ ਸੰਭਾਵਿਤ ਵਜ੍ਹਾ ਘੱਟ ਦਿੱਖ (Low Visibility) ਹੋ ਸਕਦੀ ਹੈ। ਹਾਲਾਂਕਿ, ਹਾਦਸੇ ਦੀ ਅਸਲ ਵਜ੍ਹਾ DGCA (ਡਾਇਰੈਕਟੋਰੇਟ ਜਨਰਲ ਆਫ ਸਿਵਿਲ ਏਵੀਏਸ਼ਨ) ਦੀ ਜਾਂਚ ਤੋਂ ਬਾਅਦ ਹੀ ਸਾਹਮਣੇ ਆਵੇਗੀ।

ਤਿੰਨ ਸਾਲ ਪਹਿਲਾਂ ਵੀ ਹੋ ਚੁੱਕਾ ਹੈ ਹਾਦਸਾ

ਗੌਰਤਲਬ ਹੈ ਕਿ VSR Ventures ਦੀ ਇੱਕ ਹੋਰ Learjet-45 ਵੀ 14 ਸਤੰਬਰ 2023 ਨੂੰ ਮੁੰਬਈ ਹਵਾਈ ਅੱਡੇ ਤੇ ਗੰਭੀਰ ਹਾਦਸੇ ਦਾ ਸ਼ਿਕਾਰ ਹੋ ਚੁੱਕੀ ਹੈ। ਉਸ ਜਹਾਜ਼ ਦਾ ਪੰਜੀਕਰਨ ਨੰਬਰ VT-DBL ਸੀ, ਜੋ Learjet-45XR ਮਾਡਲ ਦਾ ਸੀ। ਇਹ ਜਹਾਜ਼ ਵਿਸਾਖਾਪਟਨਮ ਤੋਂ ਆ ਰਹੀ ਉਡਾਣ ਦੌਰਾਨ ਭਾਰੀ ਮੀਂਹ ਅਤੇ ਘੱਟ ਦਿੱਖ ਦੇ ਕਾਰਨ ਹਾਦਸਾਗ੍ਰਸਤ ਹੋ ਗਿਆ ਸੀ।

ਆਟੋਪਾਇਲਟ ਸਿਸਟਮ ਬੰਦ ਹੋਣ ਤੋਂ ਬਾਅਦ ਜਹਾਜ਼ ਰਨਵੇ 27 ਦੇ ਸੱਜੇ ਪਾਸੇ ਚਲਾ ਗਿਆ ਅਤੇ ਦੋ ਹਿੱਸਿਆਂ ਵਿੱਚ ਟੁੱਟ ਗਿਆ। ਜਹਾਜ਼ ਸਟੈਂਡ C80 ਦੇ ਨੇੜੇ ਜਾ ਕੇ ਰੁਕਿਆ। ਉਸ ਹਾਦਸੇ ਵਿੱਚ ਅੱਗ ਤੇ ਸਮੇਂ ਸਿਰ ਕਾਬੂ ਪਾ ਲਿਆ ਗਿਆ ਸੀ ਅਤੇ ਜਹਾਜ਼ ਵਿੱਚ ਸਵਾਰ ਸਾਰੇ 8 ਲੋਕਾਂ ਦੀ ਜਾਨ ਬਚ ਗਈ ਸੀ, ਹਾਲਾਂਕਿ ਕਈ ਯਾਤਰੀ ਜ਼ਖ਼ਮੀ ਹੋ ਗਏ ਸਨ। ਕੋ-ਪਾਇਲਟ ਨੂੰ ਗੰਭੀਰ ਚੋਟਾਂ ਵੀ ਆਈਆਂ ਸਨ।