ਮੂਸੇਵਾਲਾ ਦੀ ਮਾਂ ਨੇ ਆਪਣੇ ਪੁੱਤਰਾਂ ਦੇ ਨਾਮ ਬਣਵਾਏ ਟੈਟੂ, ਦੋਵੇਂ ਬਾਹਾਂ ਤੇ ਲਿਖਵਾਈ ਜਨਮ ਤਰੀਕ

Follow Us On

Sidhu Moosewala Mother Tattoos: ਪੰਜਾਬ ਗਾਇਕ ਸਿੱਧੂ ਮੂਸੇਵਾਲਾ ਦੀ ਮੌਤ ਨੂੰ ਇਸ ਸਾਲ ਮਈ ਮਹੀਨੇ ਵਿੱਚ 3 ਸਾਲ ਹੋ ਜਾਣਗੇ। ਜਦੋਂ ਕਿ, ਉਹਨਾਂ ਦਾ ਛੋਟਾ ਭਰਾ ਮਾਰਚ ਵਿੱਚ 1 ਸਾਲ ਦਾ ਹੋ ਜਾਵੇਗਾ। ਇਸ ਦੌਰਾਨ, ਮਾਂ ਚਰਨ ਕੌਰ ਨੇ ਆਪਣੇ ਦੋਵੇਂ ਪੁੱਤਰਾਂ ਦੀ ਜਨਮ ਮਿਤੀ (DOB), ਨਾਮ ਅਤੇ ਪੈਰਾਂ ਦਾ ਟੈਟੂ ਆਪਣੀ ਬਾਂਹ ‘ਤੇ ਬਣਵਾਇਆ ਹੈ। ਮੂਸੇਵਾਲਾ ਦੀ ਜਨਮ ਮਿਤੀ 11 ਜੂਨ 1993 ਹੈ ਅਤੇ ਉਹਨਾਂ ਦੇ ਛੋਟੇ ਭਰਾ ਦੀ ਜਨਮ ਮਿਤੀ 17 ਮਾਰਚ 2024 ਹੈ। ਚਰਨ ਕੌਰ ਦੀ ਬਾਂਹ ‘ਤੇ ਇਨ੍ਹਾਂ ਤਾਰੀਖਾਂ ਦਾ ਟੈਟੂ ਹੁਣ ਸੋਸ਼ਲ ਮੀਡੀਆ ‘ਤੇ ਬਹੁਤ ਜ਼ਿਆਦਾ ਵਾਇਰਲ ਹੋ ਰਿਹਾ ਹੈ।

ਇਸ ਦੇ ਨਾਲ ਹੀ, ਲੋਕ ਸਿੱਧੂ ਮੂਸੇਵਾਲਾ ਦੁਆਰਾ ‘ਗੋਲੀ’ ਸਿਰਲੇਖ ਨਾਲ ਰਿਲੀਜ਼ ਕੀਤੇ ਗਏ ਗੀਤ ਨੂੰ ਵੀ ਯਾਦ ਕਰ ਰਹੇ ਹਨ, ਜਿਸ ਵਿੱਚ ਇਹ ਗਾਇਆ ਗਿਆ ਸੀ – ‘ਗੋਲੀ ਵੱਜੀ ਤੇ ਸੋਚੀ ਨਾ ਮੈਂ ਮੁੱਕ ਜਾਊਂਗਾ ਨੀਂ, ਮੇਰੇ ਯਾਰਾਂ ਦੀ ਬਾਹ ਤੇ ਮੇਰੇ ਟੈਟੂ ਬਣਾਏ (ਜੇ ਮੈਨੂੰ ਗੋਲੀ ਲੱਗ ਗਈ, ਤਾਂ ਇਹ ਨਾ ਸੋਚੋ ਕਿ ਮੈਂ ਖਤਮ ਹੋ ਗਿਆ ਹਾਂ, ਮੇਰੇ ਟੈਟੂ ਮੇਰੇ ਦੋਸਤਾਂ ਦੀਆਂ ਬਾਹਾਂ ‘ਤੇ ਬਣ ਜਾਣਗੇ)।

ਮੂਸੇਵਾਲਾ ਨੂੰ ਵੀ ਸ਼ੌਕ

ਸਿੱਧੂ ਮੂਸੇਵਾਲਾ ਨੂੰ ਖੁਦ ਟੈਟੂ ਬਣਵਾਉਣ ਦਾ ਬਹੁਤ ਸ਼ੌਕ ਸੀ। ਉਹਨਾਂ ਦੀ ਬਾਂਹ ‘ਤੇ ਇੱਕ ਟੈਟੂ ਸੀ। ਮੂਸੇਵਾਲਾ ਦਾ ਕਤਲ 29 ਮਈ 2022 ਨੂੰ ਮਾਨਸਾ ਦੇ ਜਵਾਹਰਕੇ ਵਿੱਚ ਹੋਇਆ ਸੀ। ਇਸ ਤੋਂ ਬਾਅਦ ਕਈ ਨੌਜਵਾਨਾਂ ਨੇ ਮੂਸੇਵਾਲਾ ਦੇ ਟੈਟੂ ਬਣਵਾਏ। ਇਸੇ ਤਰ੍ਹਾਂ ਪਿਤਾ ਬਲਕੌਰ ਸਿੰਘ ਨੇ ਵੀ ਆਪਣੇ ਹੱਥ ‘ਤੇ ਮੂਸੇਵਾਲਾ ਦਾ ਟੈਟੂ ਬਣਵਾਇਆ।

ਮੂਸੇਵਾਲਾ ਨੇ ਲਿਖਿਆ ਸੀ ਗੀਤ

ਸਿੱਧੂ ਮੂਸੇਵਾਲਾ ਨੇ 2019 ਵਿੱਚ ‘ਗੋਲੀ’ ਸਿਰਲੇਖ ਵਾਲਾ ਇੱਕ ਗੀਤ ਗਾਇਆ ਸੀ, ਜਿਸ ਵਿੱਚ ਸਿੱਧੂ ਨੇ ਕਿਹਾ ਸੀ ਕਿ ਜਿੰਨਾ ਚਿਰ ਜਿਉਣਾ ਹੈ, ਤਾਂ ਸਿਰ ਉੱਚਾ ਕਰਕੇ ਜਿਉਂਵਾਂਗੇ। ਭਾਵੇਂ ਇਹ ਇੱਕ ਮਿੰਟ ਹੋਵੇ ਜਾਂ ਇੱਕ ਸਾਲ। ਜਦੋਂ ਵੀ ਗੋਲੀ ਚੱਲੇਗੀ, ਪਹਾੜਾਂ ਵਾਂਗ ਮੇਰਾ ਸੀਨਾ ਤਣਿਆ ਰਹੇਗਾ। ਜੇ ਗੋਲੀ ਲੱਗੀ ਤਾਂ ਇਹ ਨਾ ਸੋਚਿਓ ਕਿ ਮੈਂ ਖ਼ਤਮ ਹੋ ਜਾਵਾਂਗਾ। ਮੇਰੇ ਦੋਸਤਾਂ ਦੀਆਂ ਬਾਹਾਂ ਤੇ ਟੈਂਟੂ ਬਣਨਗੇ ਅਤੇ ਸਿੱਧੂ ਮੂਸੇਵਾਲਾ ਆਪਣੀ ਮੌਤ ਤੋਂ ਬਾਅਦ ਵੀ ਦੋਸਤਾਂ ਵਿੱਚ ਜ਼ਿੰਦਾ ਰਹੇਗਾ।

6 ਗੈਂਗਸਟਰਾਂ ਨੇ ਪਾਇਆ ਸੀ ਘੇਰਾ

ਮੂਸੇਵਾਲਾ ਨੂੰ 6 ਸ਼ੂਟਰਾਂ ਨੇ ਗੋਲੀਆਂ ਮਾਰ ਕੇ ਮਾਰ ਦਿੱਤਾ ਸੀ। ਉਦੋਂ ਉਹ 28 ਸਾਲਾਂ ਦੇ ਸਨ। ਇਸ ਕਤਲ ਦੀ ਜ਼ਿੰਮੇਵਾਰੀ ਗੈਂਗਸਟਰ ਲਾਰੈਂਸ ਦੇ ਗੈਂਗ ਨੇ ਲਈ ਸੀ। ਕੈਨੇਡਾ ਸਥਿਤ ਗੈਂਗਸਟਰ ਗੋਲਡੀ ਬਰਾੜ ਨੇ ਸਾਰੀ ਸਾਜ਼ਿਸ਼ ਨੂੰ ਅੰਜਾਮ ਦਿੱਤਾ, ਜਿਸ ਵਿੱਚ ਲਾਰੈਂਸ ਦਾ ਭਰਾ ਅਨਮੋਲ ਅਤੇ ਭਤੀਜਾ ਸਚਿਨ ਥਾਪਨ ਵੀ ਸ਼ਾਮਲ ਸਨ। ਪੁਲਿਸ ਨੇ ਇਸ ਮਾਮਲੇ ਵਿੱਚ 35 ਮੁਲਜ਼ਮਾਂ ਨੂੰ ਨਾਮਜ਼ਦ ਕੀਤਾ ਹੈ। ਇਨ੍ਹਾਂ ਵਿੱਚੋਂ 4 ਦੀ ਮੌਤ ਹੋ ਗਈ ਹੈ। ਕਤਲ ਤੋਂ ਬਾਅਦ ਤੋਂ ਹੀ ਮਾਪੇ ਆਪਣੇ ਪੁੱਤਰ ਲਈ ਇਨਸਾਫ਼ ਪ੍ਰਾਪਤ ਕਰਨ ਲਈ ਸੰਘਰਸ਼ ਕਰ ਰਹੇ ਹਨ।