43 ਸਾਲ ਦੀ ਤਪਸਿਆ ਅਤੇ ਤਿਆਗ ਦਾ ਹੈ ਸਫ਼ਰ, ਕਾਂਗਰਸ ਛੱਡ ਕੇ ਕਦੇ ਨਹੀਂ ਜਾਵਾਂਗਾ, ਟੀਵੀ9 ਦੇ ਸੱਤਾ ਸੰਮੇਲਨ ‘ਚ ਬੋਲੇ ਮਨੀਸ਼ ਤਿਵਾਰੀ
WITT TV9 Satta Sammelan: ਟੀਵੀ 9 ਨੈੱਟਵਰਕ ਵੱਲੋਂ ਚੰਡੀਗੜ੍ਹ 'ਚ WITT ਸੱਤਾ ਸੱਮੇਲਨ 2024 ਕਰਵਾਇਆ ਗਿਆ। ਭਾਰਤ ਦੇ ਨੰਬਰ ਇੱਕ ਨਿਊਜ਼ ਨੈੱਟਵਰਕ TV9 ਦੇ ਇਸ ਖਾਸ ਸਮਾਗਮ ਵਿੱਚ ਰਾਜਨੀਤੀ, ਸ਼ਾਸਨ, ਅਰਥ ਸ਼ਾਸਤਰ, ਸਿਹਤ, ਸੱਭਿਆਚਾਰ ਅਤੇ ਖੇਡਾਂ ਸਮੇਤ ਕਈ ਅਹਿਮ ਵਿਸ਼ਿਆਂ 'ਤੇ ਚਰਚਾ ਕੀਤੀ ਗਈ। ਇਸ ਸੰਮੇਲਨ 'ਚ ਪੰਜਾਬ ਦੇ ਮੁੱਖ ਮੰਤਰੀ ਭਗਵੰਤ ਮਾਨ, ਪੰਜਾਬ ਭਾਜਪਾ ਪ੍ਰਧਾਨ ਸੁਨੀਲ ਜਾਖੜ ਸਮੇਤ ਸੂਬੇ ਦੀਆਂ ਹੋਰ ਕਈ ਪਾਰਟੀਆਂ ਦੇ ਆਗੂਆਂ ਨੇ ਸ਼ਮੂਲੀਅਤ ਕੀਤੀ।
ਚੰਡੀਗੜ੍ਹ ਤੋਂ ਕਾਂਗਰਸ ਦੇ ਉਮੀਦਵਾਰ ਅਤੇ ਸੀਨੀਅਰ ਆਗੂ ਮਨੀਸ਼ ਤਿਵਾਰੀ ਟੀਵੀ9 ਸੱਤਾ ਸੰਮੇਲਨ ਦੇ ਮੰਚ ਤੇ ਪਹੁੰਚੇ। ਉਨ੍ਹਾਂ ਨੇ ਖੁਲ੍ਹਕੇ ਆਪਣੇ ਦਿੱਲ ਦੀਆਂ ਗੱਲਾਂ ਸਾਂਝੀਆਂ ਕੀਤੀਆਂ। ਟੀਵੀ9 ਭਾਰਤਵਰਸ਼ ਨਾਲ ਗੱਲਬਾਤ ਦੌਰਾਨ ਪਹਿਲੀ ਵਾਰ ਚੰਡੀਗੜ੍ਹ ਤੋਂ ਟਿਕਟ ਮਿਲਣ ਤੇ ਭਾਵੁੱਕ ਹੁੰਦੇ ਹੋਏ ਉਨ੍ਹਾਂ ਨੇ ਕਿਹਾ ਕਿ ਚੰਡੀਗੜ੍ਹ ਉਨ੍ਹਾਂ ਦੀ ਜਨਮ ਭੂਮੀ ਹੈ। ਉਨ੍ਹਾਂ ਦੀ ਜੰਮ-ਪਲ ਇੱਥੇ ਹੋਈ। ਇੱਥੇ ਹੀ ਪੜ੍ਹੇ-ਲਿੱਖੇ, ਕਾਲਜ ਦੀ ਸਿਆਸਤ ਤੋਂ ਸਫ਼ਰ ਵੀ ਇਥੋਂ ਹੀ ਸ਼ੁਰੂ ਕੀਤਾ ਅਤੇ ਇਸੇ ਸ਼ਹਿਰ ਵਿੱਚ ਹੀ ਉਨ੍ਹਾਂ ਦੇ ਪਿਤਾ ਦੀ ਸ਼ਹਾਦਤ ਹੋਈ। ਉਨ੍ਹਾਂ ਦੇ ਪਰਿਵਾਰ ਦਾ ਖੂਨ ਚੰਡੀਗੜ੍ਹ ਦੀ ਮਿੱਟੀ ਵਿੱਚ ਮਿਲਿਆ ਹੋਇਆ ਹੈ। ਉਨ੍ਹਾਂ ਦੀ ਦਿਲੀ ਇੱਛਾ ਰਹੀ ਹੈ ਕਿ ਉਹ ਚੰਡੀਗੜ੍ਹ ਤੋਂ ਚੋਣ ਲੜਣ, ਪਰ ਪਾਰਟੀ ਨੇ ਉਨ੍ਹਾਂ ਨੂੰ ਵੱਖ-ਵੱਖ ਥਾਵਾਂ ਤੋਂ ਪਰਖਿਆ ਤੇ ਆਜਮਾਇਆ। ਪਰ ਹਰ ਥਾਂ ਤੇ ਉਨ੍ਹਾਂ ਨੂੰ ਲੋਕਾਂ ਦਾ ਭਰਪੂਰ ਪਿਆਰ ਅਤੇ ਸਮਰਥਨ ਮਿਲਿਆ ਅਤੇ ਉਹ ਆਪਣੀ ਹਰ ਕਰਮਭੂਮੀ ਤੋਂ ਜਿੱਤਦੇ ਰਹੇ।
ਬੀਜੇਪੀ ਵੱਲੋਂ ਹਾਰਨ ਦੇ ਡਰ ਤੋਂ ਸੀਟ ਬਦਲਣ ਦੇ ਆਰੋਪ ਤੇ ਮਨੀਸ਼ ਤਿਵਾਰੀ ਨੇ ਕਿਹਾ ਕਿ ਹਾਰ ਦਾ ਡਰ ਤਾਂ ਉਨ੍ਹਾਂ ਨੂੰ ਸੀ ਤਾਂ ਹੀ ਉਨ੍ਹਾਂ ਨੇ ਆਪਣੇ ਉਮੀਦਵਾਰ ਨੂੰ ਬਦਲ ਦਿੱਤਾ। ਨਾਲ ਹੀ ਉਨ੍ਹਾਂ ਨੇ ਚੰਡੀਗੜ੍ਹ ਤੋਂ ਸਾਬਕਾ ਸਾਂਸਦ ਕਿਰਨ ਖੇਰ ਅਤੇ ਮੌਜੂਦਾ ਉਮੀਦਵਾਰ ਸੰਜੇ ਟੰਡਨ ਨੂੰ ਲੈ ਕੇ ਵੀ ਤਿੱਖਾ ਨਿਸ਼ਾਨਾ ਸਾਧਿਆ। ਉਨ੍ਹਾਂ ਨੇ ਕਿਹਾ ਕਿ ਕਿਰਨ ਖੇਰ ਬਾਹਰੋ ਆਏ ਸਨ। ਉਹ ਬੀਤੇ 10 ਸਾਲਾਂ ਦੌਰਾਨ ਚੰਡੀਗੜ੍ਹ ਵਿੱਚ ਘੱਟ ਤੇ ਮੁੰਬਈ ਵਿੱਚ ਹੀ ਜਿਆਦਾ ਰਹੇ। ਜਦਕਿ ਸੰਜੇ ਟੰਡਨ ਵੀ ਅੰਮ੍ਰਿਤਸਰ ਤੋਂ ਹਨ, ਪਰ ਉਨ੍ਹਾਂ ਨੂੰ ਚੰਡੀਗੜ੍ਹ ਤੋਂ ਟਿਕਟ ਦਿੱਤੀ ਗਈ ਹੈ।
ਸਾਈਬੇਰੀਅਨ ਕਰੇਨਸ ਹੁੰਦੇ ਹਨ ਦਲ ਬਦਲੂ
ਕਾਂਗਰਸ ਦੇ ਵੱਡੇ ਆਗੂਆਂ ਵੱਲੋਂ ਭਾਜਪਾ ਅਤੇ ਹੋਰਨਾ ਪਾਰਟੀਆਂ ਵਿੱਚ ਜਾਉਣ ਤੇ ਪੁੱਛੇ ਗਏ ਸਵਾਲ ਤੇ ਮਨੀਸ਼ ਤਿਵਾਰੀ ਨੇ ਕਿਹਾ ਕਿ ਅਜਿਹੇ ਆਗੂ ਸਾਈਬੇਰੀਅਨ ਕਰੇਨਸ ਵਾਂਗ ਹੁੰਦੇ ਹਨ ਜੋ ਮੌਸਮ ਬਦਲਣ ਦੇ ਨਾਲ ਹੀ ਵਾਪਸ ਚੱਲੇ ਜਾਂਦੇ ਹਨ। ਉਨ੍ਹਾਂ ਕਿਹਾ ਕਿ ਜਿਸ ਤਰ੍ਹਾਂ ਨਾਲ ਸਰਦੀਆਂ ਦੇ ਮੌਸਮ ਵਿੱਚ ਰੂਸੀ ਪਰਿੰਦੇ ਪੰਜਾਬ ਦੇ ਵੈਟਲੈਂਡਸ ਆਉਂਦੇ ਹਨ ਤੇ ਥੋੜੇ ਸਮੇਂ ਬਾਅਦ ਵਾਪਸ ਚਲੇ ਜਾਂਦੇ ਹਨ। ਉਸੇ ਤਰ੍ਹਾਂ ਸਿਆਸਤ ਵਿੱਚ ਵੀ ਕੁਝ ਸਾਈਬੇਰੀਅਨ ਕਰੇਨਸ ਹਰ ਪਾਰਟੀ ਵਿੱਚ ਹੁੰਦੇ ਹਨ, ਜੋਂ ਚੋਣਾਂ ਦਾ ਮੌਸਮ ਆਉਂਦਿਆਂ ਹੀ ਫੜ-ਫੜ ਕਰਕੇ ਦੂਜੀ ਪਾਰਟੀਆਂ ਵਿੱਚ ਚੱਲੇ ਜਾਂਦੇ ਹਨ। ਅਤੇ ਉਸਤੋਂ ਬਾਅਦ ਜਦੋਂ ਮਾਯੂਸੀ ਦਾ ਸਾਹਮਣਾ ਕਰਨਾ ਪੈਂਦਾ ਹੈ ਤਾਂ ਜਦੋਂ ਦਿਖਾਏ ਗਏ ਸਬਜ਼ਬਾਗ ਹਕੀਕੀ ਰੂਪ ਨਹੀਂ ਲੈਂਦੇ ਤਾਂ ਵਾਪਸ ਪੁਰਾਣੀ ਪਾਰਟੀ ਵਿੱਚ ਆ ਜਾਂਦੇ ਹਨ।
ਪਵਨ ਬਾਂਸਲ ਦੀ ਨਰਾਜ਼ਗੀ ‘ਤੇ ਕਹੀ ਇਹ ਗੱਲ
ਚੰਡੀਗੜ੍ਹ ਤੋਂ ਪਵਨ ਬਾਂਸਲ ਨੂੰ ਟਿਕਟ ਨਾ ਦੇ ਕੇ ਉਨ੍ਹਾਂ ਨੂੰ ਟਿਕਟ ਦਿੱਤੇ ਜਾਣ ਦੇ ਸਵਾਲ ਤੇ ਮਨੀਸ਼ ਬੰਸਲ ਨੇ ਕਿਹਾ ਕਿ ਤਿਵਾਰੀ ਨੇ ਦਾਅਵਾ ਕੀਤਾ ਕਿ ਉਹ ਬਿਲਕੁੱਲ ਵੀ ਨਰਾਜ਼ ਨਹੀਂ ਹਨ। ਪਵਨ ਬਾਂਸਲ ਨਾਲ ਉਨ੍ਹਾਂ ਦੇ ਬਹੁਤ ਕਰੀਬੀ ਅਤੇ ਪੁਰਾਣੇ ਸਬੰਧ ਹਨ। ਉਨ੍ਹਾਂ ਨਾਲ ਕਿਸੇ ਵੀ ਤਰ੍ਹਾਂ ਦਾ ਕੋਈ ਮਦਭੇਦ ਨਹੀਂ ਹੈ। ਉਨ੍ਹਾਂ ਨੂੰ ਪੂਰੀ ਉਮੀਦ ਹੈ ਕਿ ਉਹ ਉਨ੍ਹਾਂ ਨਾਲ ਚੋਣ ਪ੍ਰਚਾਰ ਵਿੱਚ ਜਰੂਰ ਉੱਤਰਣਗੇ। ਤਿਵਾਰੀ ਨੇ ਕਿਹਾ ਕਿ ਉਹ ਆਉਂਦੀ 14 ਮਈ ਨੂੰ ਨਾਮਜ਼ਦਗੀ ਦਾਖ਼ਲ ਕਰਨ ਜਾ ਰਹੇ ਹਨ ਅਤੇ ਉਸਤੋਂ ਬਾਅਦ ਬਾਂਸਲ ਜੀ ਸਮੇਤ ਬਾਕੀ ਸਾਰੇ ਵੱਡੇ ਆਗੂ ਵੀ ਉਨ੍ਹਾਂ ਨਾਲ ਚੋਣ ਪ੍ਰਚਾਰ ਕਰਨ ਲਈ ਉੱਤਰਣਗੇ। ਪਰ ਨਾਲ ਹੀ ਉਨ੍ਹਾਂ ਨੇ ਇਹ ਵੀ ਕਹਿ ਦਿੱਤਾ ਕਿ ਜਿਹੜੇ ਆਗੂ ਅਜਿਹਾ ਨਹੀਂ ਕਰਦੇ ਹਨ ਤਾਂ ਉਨ੍ਹਾਂ ਨੂੰ ਲੋਕ ਕੋਈ ਚੰਗੀ ਨਜ਼ਰ ਨਾਲ ਨਹੀਂ ਵੇਖਣਗੇ।
ਭਾਜਪਾ ‘ਤੇ ਤਿੱਖੇ ਨਿਸ਼ਾਨੇ
ਬੀਜੇਪੀ ਵੱਲੋਂ 400 ਸੀਟਾਂ ਦੇ ਦਿੱਤੇ ਗਏ ਨਾਅਰੇ ਤੇ ਪੁੱਛੇ ਗਏ ਸਵਾਲ ਤੇ ਮਨੀਸ਼ ਤਿਵਾਰੀ ਨੇ ਕਿਹਾ ਕਿ ਭਾਜਪਾ ਨੂੰ 150 ਸੀਟਾਂ ਵੀ ਨਹੀਂ ਮਿਲ ਰਹੀਆਂ ਹਨ। ਪੀਐਮ ਮੋਦੀ ਨਰੇਂਦਰ ਮੋਦੀ ਰੋਜ਼ਾਨਾ 3-4 ਰੈਲੀਆਂ ਕਰਦੇ ਹਨ। ਉਨ੍ਹਾਂ ਰੈਲੀਆਂ ਵਿੱਚ ਉਹ ਇਹ ਗਾਂਰਟੀ ਨਹੀਂ ਦਿੰਦੇ ਕਿ ਉਹ ਬਾਬਾ ਸਾਹਿਬ ਅੰਬੇਡਕਰ ਵੱਲੋਂ ਬਣਾਏ ਸੰਵਿਧਾਨ ਨੂੰ ਨਹੀਂ ਬਦਲਣਗੇ। ਭਾਜਪਾ ਵੱਲੋਂ ਮੰਗਲਸੂਤਰ ਅਤੇ ਰਾਖਵੇਕਰਨ ਵਾਲਾ ਮੁੱਦਾ ਚੁੱਕਣ ਦੇ ਸਵਾਲ ਉਨ੍ਹਾਂ ਕਿਹਾ ਕਿ ਇਹ ਭਾਜਪਾ ਦੀ ਬੌਖਲਾਹਟ ਹੈ। ਪੀਐਮ ਮੋਦੀ ਨੂੰ ਅਜਿਹੇ ਬਿਆਨ ਬਿਲਕੁੱਲ ਵੀ ਸ਼ੋਭਾ ਨਹੀਂ ਦਿੰਦੇ। ਕਾਂਗਰਸ ਵੱਲੋਂ ਮੁਸਲਮਾਨਾਂ ਨੂੰ ਰਿਜ਼ਰਵੇਸ਼ਨ ਦੇਣ ਦੇ ਭਾਜਪਾ ਦੇ ਆਰੋਪ ਤੇ ਵੀ ਉਨ੍ਹਾਂ ਨੇ ਖੁੱਲ੍ਹ ਕੇ ਜਵਾਬ ਦਿੱਤਾ। ਉਨ੍ਹਾਂ ਕਿਹਾ ਕਿ ਐਸਸੀ, ਐਸਟੀ ਅਤੇ ਓਬੀਸੀ ਲਈ ਰਿਜ਼ਰਵੇਸ਼ਨ ਤਾਂ ਸੰਵਿਧਾਨ ਵਿੱਚ ਲਿਖਿਆ ਹੋਇਆ ਹੈ। ਉਸਨੂੰ ਕੋਈ ਵੀ ਨਹੀਂ ਬਦਲ ਸਕਦਾ।