ਨੌਕਰੀਆਂ ‘ਚ ਹੋ ਸਕਦੀ ਹੈ ਕਟੌਤੀ, ਮੈਨੂਫੈਕਚਰਿੰਗ ਸੈਕਟਰ ਦੇ ਅੰਕੜਿਆਂ ਨੇ ਵਧਾਈ ਚਿੰਤਾ

ਆਰਥਿਕ (Economic) ਮੋਰਚੇ ‘ਤੇ ਸਰਕਾਰ ਲਈ ਲਗਾਤਾਰ ਦੂਜੇ ਦਿਨ ਮਾੜੀ ਖ਼ਬਰ ਆਈ ਹੈ। ਇੱਕ ਦਿਨ ਪਹਿਲਾਂ ਸਤੰਬਰ ਦੇ ਆਈਆਈਪੀ ਦੇ ਅੰਕੜੇ ਚੰਗੇ ਨਹੀਂ ਸਨ। ਅੱਜ ਸਰਕਾਰ ਨੂੰ ਮੈਨੂਫੈਕਚਰਿੰਗ ਸੈਕਟਰ ਤੋਂ ਵੱਡਾ ਧੱਕਾ ਲੱਗਾ ਹੈ। ਜੀ ਹਾਂ ਦੇਸ਼ ਦੀ ਮੈਨੂਫੈਕਚਰਿੰਗ ਐਕਟੀਵਿਟੀਜ਼ 8 ਮਹੀਨਿਆਂ ‘ਚ ਸਭ ਤੋਂ ਹੇਠਲੇ ਪੱਧਰ ‘ਤੇ ਪਹੁੰਚ ਗਈਆਂ ਹਨ। ਇਸ ਦਾ ਮੁੱਖ ਕਾਰਨ ਮੰਗ ਅਤੇ ਆਰਡਰ ‘ਚ ਭਾਰੀ ਕਮੀ ਦੱਸਿਆ ਜਾ ਰਿਹਾ ਹੈ। ਆਓ ਤੁਹਾਨੂੰ ਇਹ ਵੀ ਦੱਸਦੇ ਹਾਂ ਕਿ ਮੈਨੂਫੈਕਚਰਿੰਗ ਸੈਕਟਰ ਦੇ ਅੰਕੜੇ ਕੀ ਕਹਿ ਰਹੇ ਹਨ।

8 ਮਹੀਨੇ ਦੇ ਹੇਠਲੇ ਪੱਧਰ ‘ਤੇ ਮੈਨੂਫੈਕਚਰਿੰਗ ਸੈਕਟਰ

ਅਕਤੂਬਰ ‘ਚ ਭਾਰਤ ਦੀਆਂ ਨਿਰਮਾਣ ਗਤੀਵਿਧੀ ਅੱਠ ਮਹੀਨਿਆਂ ਦੇ ਹੇਠਲੇ ਪੱਧਰ ‘ਤੇ ਰਹੀਆਂ ਹਨ। ਨਵੇਂ ਆਰਡਰਾਂ ਵਿੱਚ ਸੁਸਤੀ ਕਾਰਨ ਉਤਪਾਦਨ ਵਿੱਚ ਕਮੀ ਆਈ ਹੈ। ਬੁੱਧਵਾਰ ਨੂੰ S&P ਗਲੋਬਲ ਇੰਡੀਆ ਮੈਨੂਫੈਕਚਰਿੰਗ ਪਰਚੇਜ਼ਿੰਗ ਮੈਨੇਜਰਸ ਇੰਡੈਕਸ ਅਕਤੂਬਰ ਵਿੱਚ 55.5 ਤੱਕ ਡਿੱਗਿਆ ਹੈ, ਜੋ ਸਤੰਬਰ ਵਿੱਚ 57.5 ਸੀ। ਅਕਤੂਬਰ ‘ਚ ਇਹ ਅੱਠ ਮਹੀਨਿਆਂ ਦੇ ਸਭ ਤੋਂ ਹੇਠਲੇ ਪੱਧਰ ‘ਤੇ ਰਿਹਾ ਹੈ। ਪਿਛਲੀ ਵਾਰ ਇਹ ਪੱਧਰ ਮਾਰਚ ਵਿੱਚ ਦੇਖਿਆ ਗਿਆ ਸੀ। ਮਾਰਚ ਮਹੀਨੇ ‘ਚ 55.7 ਦਾ PMI ਪੱਧਰ ਦੇਖਿਆ ਗਿਆ ਸੀ, ਜੋ ਕਿ ਸਰਕਾਰ ਲਈ ਬਹੁਤ ਚਿੰਤਾ ਦਾ ਵਿਸ਼ਾ ਹੈ। ਇੱਕ ਦਿਨ ਪਹਿਲਾਂ IIP ਦੇ ਕੋਰ ਸੈਕਟਰ ਦੇ ਅੰਕੜੇ ਵੀ ਸਿੰਗਲ ਡਿਜਿਟ 8.1 ਪ੍ਰਤੀਸ਼ਤ ਤੱਕ ਆ ਗਏ ਸਨ। ਜਦੋਂ ਕਿ ਅਗਸਤ ਮਹੀਨੇ ਵਿੱਚ ਇਹ ਅੰਕੜਾ 12 ਫੀਸਦੀ ਤੋਂ ਵੱਧ ਸੀ।

S&P ਗਲੋਬਲ ਮਾਰਕੀਟ ਇੰਟੈਲੀਜੈਂਸ ਦੇ ਅਰਥ ਸ਼ਾਸਤਰ ਦੀ ਐਸੋਸੀਏਟ ਡਾਇਰੈਕਟਰ ਪੌਲੀਆਨਾ ਡੀ ਲੀਮਾ ਨੇ ਕਿਹਾ ਕਿ ਨਵੇਂ ਆਦੇਸ਼ਾਂ ਦਾ ਸੂਚਕਾਂਕ ਇੱਕ ਸਾਲ ਦੇ ਹੇਠਲੇ ਪੱਧਰ ‘ਤੇ ਆ ਗਿਆ ਹੈ। ਕੁਝ ਕੰਪਨੀਆਂ ਨੇ ਆਪਣੇ ਉਤਪਾਦਾਂ ਦੀ ਮੌਜੂਦਾ ਮੰਗ ਨੂੰ ਲੈ ਕੇ ਚਿੰਤਾ ਜ਼ਾਹਰ ਕੀਤੀ ਹੈ। ਨਵੀਂ ਭਰਤੀ ਦੀਆਂ ਗਤੀਵਿਧੀਆਂ ਮੱਠੀਆਂ ਪਈਆਂ ਹਨ ਅਤੇ ਵਪਾਰੀਆਂ ਦਾ ਭਰੋਸਾ ਪੰਜ ਮਹੀਨਿਆਂ ਦੇ ਹੇਠਲੇ ਪੱਧਰ ‘ਤੇ ਪਹੁੰਚ ਗਿਆ ਹੈ।

ਨੌਕਰੀਆਂ ‘ਚ ਵੀ ਨਿਰਾਸ਼ਾ

ਸਰਵੇਖਣ ਮੁਤਾਬਕ ਅਕਤੂਬਰ ਦੇ ਅੰਕੜਿਆਂ ਨੇ ਸਤੰਬਰ ਤੋਂ ਬਾਅਦ ਵਿਕਾਸ ਦਰ ਵਿੱਚ ਗਿਰਾਵਟ ਦਾ ਸੰਕੇਤ ਦਿੱਤਾ ਹੈ। ਨੌਕਰੀਆਂ ਦੀ ਗੱਲ ਕਰੀਏ ਤਾਂ ਚਾਰ ਫੀਸਦੀ ਤੋਂ ਘੱਟ ਕੰਪਨੀਆਂ ਨੇ ਨਵੇਂ ਕਰਮਚਾਰੀ ਰੱਖੇ ਹਨ ਅਤੇ 95 ਫੀਸਦੀ ਨੇ ਆਪਣੇ ਕਰਮਚਾਰੀਆਂ ਵਿੱਚ ਕੋਈ ਬਦਲਾਅ ਨਹੀਂ ਕੀਤਾ ਹੈ। ਰੋਜ਼ਗਾਰ ਸਿਰਜਣ ਦੀ ਦਰ ਮਾਮੂਲੀ ਹੈ ਅਤੇ ਅਪ੍ਰੈਲ ਤੋਂ ਬਾਅਦ ਸਭ ਤੋਂ ਘੱਟ ਹੈ।