ਵਿਸ਼ਵ ਕੱਪ ‘ਚ ਜੰਮ ਕੇ ਚੱਲ ਰਹੀ ਸੱਟੇਬਾਜ਼ੀ, 3 ਲੱਖ ਕਰੋੜ ਦੇ ਕਾਰੋਬਾਰ ਦਾ ਇਹ ਹੈ ਸੱਚ
ICC World Cup 2023 : ਕ੍ਰਿਕਟ ਅਤੇ ਸੱਟੇਬਾਜ਼ੀ ਨਾਲ-ਨਾਲ ਚੱਲ ਰਹੇ ਹਨ। ਆਈਪੀਐਲ ਹੋਵੇ ਜਾਂ ਵਿਸ਼ਵ ਕੱਪ ਸੱਟੇਬਾਜ਼ ਖੇਡ ਨੂੰ ਨਵੇਂ ਤਰੀਕਿਆਂ ਨਾਲ ਅੰਜਾਮ ਦਿੰਦੇ ਹਨ। ਉਦਯੋਗਿਕ ਸੰਸਥਾ ਫਿੱਕੀ ਦੇ ਮੁਤਾਬਕ ਸੱਟੇਬਾਜ਼ੀ ਦੇ ਇਸ ਕਾਲੇ ਖੇਡ 'ਤੇ 3 ਲੱਖ ਕਰੋੜ ਰੁਪਏ ਤੋਂ ਜ਼ਿਆਦਾ ਦਾ ਖਰਚ ਆਇਆ ਹੈ। ਕਈ ਦੇਸ਼ ਅਜਿਹੇ ਹਨ ਜਿੱਥੇ ਕ੍ਰਿਕਟ ਸੱਟੇਬਾਜ਼ੀ ਕਾਨੂੰਨੀ ਹੈ। ਭਾਰਤ ਵਿੱਚ ਵੱਡੀ ਗਿਣਤੀ ਚ ਕ੍ਰਿਕਟ ਮੁਕਾਬਲਿਆਂ ਦੌਰਾਨ ਸੱਟੇਬਾਜ਼ੀ ਹੁੰਦੀ ਹੈ। ਇਸ ਲਈ ਇਸ ਨੂੰ ਲੀਗਲ ਕਰਨ ਦੀ ਮੰਗ ਕੀਤੀ ਜਾ ਰਹੀ ਹੈ।
ਵਿਸ਼ਵ ਕੱਪ ਦਾ ਬੁਖਾਰ ਹਰ ਕਿਸੇ ਦੇ ਸਿਰ ਚੜ੍ਹ ਕੇ ਬੋਲ ਰਿਹਾ ਹੈ। ਖਾਸ ਕਰਕੇ ਜਦੋਂ ਤੋਂ ਭਾਰਤ ਨੇ ਪਾਕਿਸਤਾਨ (Pakistan) ਨੂੰ ਹਰਾਇਆ ਹੈ। ਹਰ ਭਾਰਤੀ ਨੂੰ ਉਮੀਦ ਹੈ ਕਿ ਭਾਰਤ ਇਹ ਵਿਸ਼ਵ ਕੱਪ ਜਿੱਤੇਗਾ। ਇਸ ਦੌਰਾਨ ਵਿਸ਼ਵ ਕੱਪ ਮੈਚਾਂ ਵਿੱਚ ਆਨਲਾਈਨ ਸੱਟੇਬਾਜ਼ੀ ਦਾ ਪਰਦਾਫਾਸ਼ ਹੋਇਆ ਹੈ। ਇੰਦੌਰ ਪੁਲਿਸ ਨੇ ਆਨਲਾਈਨ ਸੱਟੇਬਾਜ਼ੀ ਦੇ ਇਸ ਘਪਲੇ ਵਿੱਚ ਇੱਕ ਵਿਅਕਤੀ ਨੂੰ ਫੜਿਆ ਹੈ। ਆਓ ਤੁਹਾਨੂੰ ਇਹ ਵੀ ਦੱਸਦੇ ਹਾਂ ਕਿ ਇਹ ਪੂਰੀ ਸੱਟੇਬਾਜ਼ੀ ਦੀ ਖੇਡ ਕਿਵੇਂ ਚੱਲ ਰਹੀ ਹੈ।
ਵਿਸ਼ਵ ਕੱਪ (World Cup) ਦੇ ਚੱਲ ਰਹੇ ਮੈਚਾਂ ‘ਤੇ ਆਨਲਾਈਨ ਸੱਟੇਬਾਜ਼ੀ ਦਾ ਖੁਲਾਸਾ ਕਰਦੇ ਹੋਏ ਇੰਦੌਰ ਪੁਲਿਸ ਨੇ ਇੱਕ 40 ਸਾਲਾ ਵਿਅਕਤੀ ਨੂੰ ਗ੍ਰਿਫਤਾਰ ਕਰ ਲਿਆ ਹੈ। ਉਸ ਕੋਲੋਂ 23 ਲੱਖ ਰੁਪਏ ਦੀ ਨਕਦੀ ਅਤੇ 1.25 ਕਿਲੋ ਵਜ਼ਨ ਦੀ ਸੋਨੇ ਦੀ ਇੱਟ ਬਰਾਮਦ ਹੋਈ ਹੈ। ਇੱਕ ਪੁਲਿਸ ਅਧਿਕਾਰੀ ਨੇ ਮੰਗਲਵਾਰ ਨੂੰ ਇਹ ਜਾਣਕਾਰੀ ਦਿੱਤੀ। ਵਧੀਕ ਡਿਪਟੀ ਪੁਲਿਸ ਕਮਿਸ਼ਨਰ ਅਭਿਨਯ ਵਿਸ਼ਵਕਰਮਾ ਨੇ ਦੱਸਿਆ ਕਿ ਪੁਲਿਸ ਦੀ ਐਂਟੀ ਕ੍ਰਾਈਮ ਬ੍ਰਾਂਚ ਦੀ ਮਦਦ ਨਾਲ ਕੀਤੀ ਗਈ ਸਾਂਝੀ ਛਾਪੇਮਾਰੀ ਦੌਰਾਨ ਇਹ ਮਾਮਲਾ ਸਾਹਮਣੇ ਆਇਆ ਹੈ। ਸੋਮਵਾਰ ਰਾਤ ਨੂੰ ਦਵਾਰਕਾਪੁਰੀ ਇਲਾਕੇ ਤੋਂ ਗ੍ਰਿਫ਼ਤਾਰ ਕੀਤੇ ਗਏ ਮੁਲਜ਼ਮ ਦੀ ਪਛਾਣ ਵਿਸ਼ਾਲ ਮਹਿਤਾ ਵਜੋਂ ਹੋਈ ਹੈ।
ਇਸ ਖੇਡ ਦੀ ਕਿੰਨੀ ਕੀਮਤ?
ਉਦਯੋਗਿਕ ਸੰਸਥਾ ਫਿੱਕੀ ਮੁਤਾਬਕ ਸੱਟੇਬਾਜ਼ੀ ਦੀ ਇਹ ਕਾਲੀ ਖੇਡ 3 ਲੱਖ ਕਰੋੜ ਰੁਪਏ ਤੋਂ ਵੱਧ ਦੀ ਹੈ। ਮਾਹਿਰਾਂ ਅਨੁਸਾਰ ਜਦੋਂ ਸੱਟੇਬਾਜ਼ੀ ਇਸ ਪੱਧਰ ‘ਤੇ ਹੋ ਰਹੀ ਹੈ ਤਾਂ ਇਸ ਨੂੰ ਕਾਨੂੰਨੀ ਬਣਾਇਆ ਜਾਣਾ ਚਾਹੀਦਾ ਹੈ। ਤੁਹਾਨੂੰ ਦੱਸ ਦੇਈਏ ਕਿ ਆਸਟ੍ਰੇਲੀਆ, ਇੰਗਲੈਂਡ, ਦੱਖਣੀ ਅਫਰੀਕਾ, ਸ਼੍ਰੀਲੰਕਾ, ਨਿਊਜ਼ੀਲੈਂਡ ਅਤੇ ਵੈਸਟਇੰਡੀਜ਼ ਵਰਗੇ ਦੇਸ਼ਾਂ ‘ਚ ਕ੍ਰਿਕਟ ਸੱਟੇਬਾਜ਼ੀ ਕਾਨੂੰਨੀ ਹੈ। ਖਾਸ ਗੱਲ ਇਹ ਹੈ ਕਿ ਵੈਸਟਇੰਡੀਜ਼ ਨੂੰ ਛੱਡ ਕੇ ਬਾਕੀ ਸਾਰੇ ਦੇਸ਼ ਵਿਸ਼ਵ ਕੱਪ ਖੇਡ ਰਹੇ ਹਨ। ਅਜਿਹਾ ਨਹੀਂ ਹੈ ਕਿ ਭਾਰਤ ‘ਚ ਸੱਟੇਬਾਜ਼ੀ ਨੂੰ ਲੈ ਕੇ ਪ੍ਰਸ਼ਾਸਨ ਸਖ਼ਤ ਨਹੀਂ ਹੈ। 2015 ਵਿੱਚ ਆਈਪੀਐਲ ਦੇ ਅੱਠਵੇਂ ਸੀਜ਼ਨ ਦੌਰਾਨ, ਈਡੀ ਨੇ ਅਹਿਮਦਾਬਾਦ ਸ਼ਾਖਾ ਤੋਂ 2000 ਕਰੋੜ ਰੁਪਏ ਦੇ ਇੱਕ ਰੈਕੇਟ ਦਾ ਪਰਦਾਫਾਸ਼ ਕੀਤਾ ਸੀ।
ਇਸ ਤਰ੍ਹਾਂ ਹੁੰਦੀ ਹੈ ਸੱਟੇਬਾਜ਼ੀ
ਤਾਜ਼ਾ ਮਾਮਲੇ ‘ਚ ਪੁਲਿਸ ਮੁਤਾਬਕ ਜਿਸ ਮੁਲਜ਼ਮ ਨੂੰ ਗ੍ਰਿਫਤਾਰ ਕੀਤਾ ਗਿਆ ਹੈ, ਉਹ ਬਹੁਤ ਹੀ ਸ਼ਾਤਰ ਢੰਗ ਨਾਲ ਸੱਟੇਬਾਜ਼ੀ ਦਾ ਧੰਦਾ ਕਰਦਾ ਸੀ। ਇਹ ਵਿਅਕਤੀ ਆਪਣੇ ਘਰ ਤੋਂ ਆਨਲਾਈਨ ਸੱਟੇਬਾਜ਼ੀ ਕਰਦਾ ਸੀ। ਇਸ ਦੇ ਲਈ ਉਹ ਕਿਸੇ ਵਿਅਕਤੀ ਤੋਂ ਆਈਡੀ ਅਤੇ ਪਾਸਵਰਡ ਲੈਂਦਾ ਸੀ। ਇਹ ਵਿਅਕਤੀ ਯੂਏਈ ਦੇ ਇੱਕ ਮੋਬਾਈਲ ਨੰਬਰ ਤੋਂ ਵ੍ਹਾਟਸਐਪ ਵਾਇਸ ਕਾਲ ਰਾਹੀਂ ਮਹਿਤਾ ਨਾਲ ਗੱਲ ਕਰਦਾ ਸੀ। ਪੁਲਿਸ ਜਾਂਚ ਤੋਂ ਪਤਾ ਲੱਗਾ ਹੈ ਕਿ ਵਿਸ਼ਵ ਕੱਪ ਦੇ ਮੈਚਾਂ ‘ਤੇ ਇੱਕ ਆਨਲਾਈਨ ਸੱਟੇਬਾਜ਼ੀ ਗਿਰੋਹ ਨੂੰ ਬਹੁਤ ਹੀ ਸੰਗਠਿਤ ਢੰਗ ਨਾਲ ਚਲਾਇਆ ਜਾ ਰਿਹਾ ਹੈ ਜਿਸ ਦੇ ਸਬੰਧ ਵਿਦੇਸ਼ਾਂ ਨਾਲ ਵੀ ਹੋ ਸਕਦੇ ਹਨ।
ਪੁਲਿਸ ਨੂੰ ਸ਼ੱਕ ਹੈ ਕਿ ਮਹਿਤਾ ਦੇ ਕਬਜ਼ੇ ‘ਚੋਂ ਬਰਾਮਦ ਹੋਇਆ 1.25 ਕਿਲੋ ਸੋਨਾ ਵਿਦੇਸ਼ ਤੋਂ ਭਾਰਤ ਤਸਕਰੀ ਕੀਤਾ ਗਿਆ ਹੈ। ਹੁਣ ਪੁਲਿਸ ਇਸ ਮਾਮਲੇ ਦੀ ਜਾਣਕਾਰੀ ਡੀਆਰਆਈ ਅਤੇ ਇਨਕਮ ਟੈਕਸ ਵਿਭਾਗ ਨੂੰ ਦੇਣ ਜਾ ਰਹੀ ਹੈ।
