Budget 2026: ਕੀ ਵੱਧ ਜਾਣਗੀਆਂ ਰੇਲ ਟਿਕਟਾਂ ਦੀਆਂ ਕੀਮਤਾਂ? ਸਰਕਾਰ ਨੇ ਬਜਟ ਵਿੱਚ ਦਿੱਤਾ ਇਹ ਵੱਡਾ ਸੰਕੇਤ

ਵਧਣਗੀਆਂ ਰੇਲ ਟਿਕਟਾਂ ਦੀਆਂ ਕੀਮਤਾਂ?

ਵਿੱਤ ਮੰਤਰੀ ਨਿਰਮਲਾ ਸੀਤਾਰਮਨ ਨੇ 9ਵੀਂ ਵਾਰ ਕੇਂਦਰੀ ਬਜਟ ਪੇਸ਼ ਕੀਤਾ। ਆਪਣੇ ਲਗਭਗ ਡੇਢ ਘੰਟੇ ਦੇ ਭਾਸ਼ਣ ਵਿੱਚ, ਕੇਂਦਰੀ ਵਿੱਤ ਮੰਤਰੀ ਨੇ ਸਿਹਤ ਅਤੇ ਸਿੱਖਿਆ ਤੋਂ ਲੈ ਕੇ ਬੁਨਿਆਦੀ ਢਾਂਚੇ ਤੱਕ ਹਰ ਚੀਜ਼ ਨੂੰ ਕਵਰ ਕਰਦੇ ਹੋਏ ਕਈ ਐਲਾਨ ਕੀਤੇ। ਸਰਕਾਰ ਨੇ ਵੱਖ-ਵੱਖ ਖੇਤਰਾਂ ‘ਤੇ ਟੈਕਸ ਵਧਾਏ ਅਤੇ ਘਟਾਏ। ਦੇਸ਼ ਨੂੰ ਜੋੜਨ ਵਾਲੇ ਰੇਲ ਪ੍ਰੋਜੈਕਟਾਂ ਦਾ ਵੀ ਐਲਾਨ ਕੀਤਾ ਗਿਆ। ਹਾਲਾਂਕਿ, ਬਜਟ ਦੇ ਅੰਕੜਿਆਂ ਵਿੱਚ ਇੱਕ ਅੰਕੜਾ ਸਾਹਮਣੇ ਆਇਆ ਹੈ, ਜਿਸ ਵਿੱਚ ਸੰਕੇਤ ਮਿਲਦਾ ਹੈ ਕਿ ਰੇਲਵੇ ਆਉਣ ਵਾਲੇ ਦਿਨਾਂ ਵਿੱਚ ਰੇਲ ਟਿਕਟਾਂ ਦੀਆਂ ਕੀਮਤਾਂ ਵਧਾ ਸਕਦਾ ਹੈ। ਆਓ ਇਸਦੀ ਵਿਸਥਾਰ ਵਿੱਚ ਪੜਚੋਲ ਕਰੀਏ।

ਪਹਿਲਾਂ, ਦੇਸ ਦਾ ਰੇਲਵੇ ਬਜਟ ਅਤੇ ਆਮ ਬਜਟ ਵੱਖ-ਵੱਖ ਹੁੰਦਾ ਸੀ, ਪਰ ਹੁਣ ਇਹ ਇੱਕੋ ਵਿੱਚ ਹੀ ਆਉਂਦੇ ਹਨ। ਰੇਲਵੇ ਨੂੰ ਬਜਟ ਦਾ ਸਹੋਦਰ ਹੀ ਮੰਨਿਆ ਜਾਂਦਾ ਹੈ। ਇਸ ਵਾਰ, ਰੇਲਵੇ ਦੇ ਨਾਲ, ਬੁਨਿਆਦੀ ਢਾਂਚੇ ਨੂੰ ਕੁੱਲ ਪੂੰਜੀਗਤ ਬਜਟ ਦਾ ਲਗਭਗ 47% ਅਲਾਟ ਕੀਤਾ ਗਿਆ ਹੈ। ਸਰਕਾਰ ਨੇ ਬਜਟ ਵਿੱਚ ਕਿਹਾ ਸੀ ਕਿ ਰੇਲਵੇ ਵਿੱਤੀ ਸਾਲ 2025-26 ਵਿੱਚ ਯਾਤਰੀਆਂ ਦੀ ਆਮਦਨ ਤੋਂ 80,000 ਕਰੋੜ ਕਮਾਏਗਾ। ਇਸ ਤੋਂ ਇਲਾਵਾ, ਮੌਜੂਦਾ ਵਿੱਤੀ ਸਾਲ ਵਿੱਚ 87,000 ਕਰੋੜ ਰੁਪਏ ਕਮਾਉਣ ਦਾ ਅਨੁਮਾਨ ਹੈ। ਇਸ ਲਈ, ਇਹ ਅਨੁਮਾਨ ਲਗਾਇਆ ਜਾ ਰਿਹਾ ਹੈ ਕਿ ਸਰਕਾਰ ਆਉਣ ਵਾਲੇ ਦਿਨਾਂ ਵਿੱਚ ਰੇਲ ਟਿਕਟਾਂ ਦੀਆਂ ਕੀਮਤਾਂ ਵਧਾ ਸਕਦੀ ਹੈ। ਹਾਲਾਂਕਿ, ਇਹ ਸਿਰਫ ਇੱਕ ਅੰਦਾਜ਼ਾ ਹੈ। ਅੰਤਿਮ ਰੂਪ ਵਿੱਚ ਫੈਸਲਾ ਰੇਲਵੇ ਹੀ ਕਰੇਗਾ ਕਿ ਟਿਕਟਾਂ ਦੀਆਂ ਕੀਮਤਾਂ ਵਧਣਗੀਆਂ ਜਾਂ ਨਹੀਂ। ਉਦਾਹਰਣ ਵਜੋਂ, ਜਨਰਲ ਜਾਂ ਸਲੀਪਰ ਕਲਾਸ ਦੇ ਕਿਰਾਏ ਵਧਣਗੇ ਜਾਂ ਨਹੀਂ, ਇਹ ਸਾਰੇ ਫੈਸਲੇ ਰੇਲਵੇ ਦੁਆਰਾ ਹੀ ਕੀਤੇ ਜਾਣਗੇ।

ਬਣਨਗੇ ਰੇਲ ਕੋਰੀਡੋਰ?

ਵਿੱਤ ਮੰਤਰੀ ਨੇ ਇਸ ਵਾਰ ਬਜਟ ਵਿੱਚ ਰੇਲਵੇ ਪ੍ਰੋਜੈਕਟਾਂ ਬਾਰੇ ਇੱਕ ਵੱਡਾ ਐਲਾਨ ਕੀਤਾ ਹੈ। ਦੇਸ਼ ਭਰ ਵਿੱਚ ਸੱਤ ਨਵੇਂ ਹਾਈ-ਸਪੀਡ ਰੇਲ ਕੋਰੀਡੋਰ ਬਣਾਏ ਜਾਣਗੇ। ਵਿੱਤ ਮੰਤਰੀ ਨਿਰਮਲਾ ਸੀਤਾਰਮਨ ਨੇ ਐਤਵਾਰ ਨੂੰ ਇਸਦਾ ਐਲਾਨ ਕੀਤਾ। ਉਨ੍ਹਾਂ ਕਿਹਾ ਕਿ ਇਹ ਰੇਲ ਕੋਰੀਡੋਰ ਦੇਸ਼ ਦੇ ਵੱਖ-ਵੱਖ ਆਰਥਿਕ ਅਤੇ ਸੱਭਿਆਚਾਰਕ ਕੇਂਦਰਾਂ ਵਿਚਕਾਰ ਯਾਤਰਾ ਦੀ ਸਹੂਲਤ ਦੇਣਗੇ। ਬਜਟ ਵਿੱਚ ਕਿਹਾ ਗਿਆ ਹੈ ਕਿ ਹਾਈ-ਸਪੀਡ ਰੇਲ ਕੋਰੀਡੋਰ ਕਈ ਸ਼ਹਿਰਾਂ ਨੂੰ ਜੋੜਣਗੇ। ਉਦੇਸ਼ ਵੱਡੇ ਸ਼ਹਿਰਾਂ ਨੂੰ ਉਦਯੋਗਿਕ ਖੇਤਰਾਂ ਅਤੇ ਧਾਰਮਿਕ ਕੇਂਦਰਾਂ ਨਾਲ ਜੋੜਨਾ ਹੈ।

ਬਜਟ ਵਿੱਚ ਐਲਾਨੇ ਗਏ ਸੱਤ ਹਾਈ-ਸਪੀਡ ਰੇਲ ਕੋਰੀਡੋਰਸ ਵਿੱਚ ਦੇਸ਼ ਭਰ ਦੇ ਵੱਡੇ ਸ਼ਹਿਰ ਅਤੇ ਮਹਾਂਨਗਰ ਸ਼ਾਮਲ ਹਨ। ਇਹ ਕੋਰੀਡੋਰ ਮੁੰਬਈ, ਪੁਣੇ, ਹੈਦਰਾਬਾਦ, ਬੰਗਲੁਰੂ, ਚੇਨਈ, ਦਿੱਲੀ, ਵਾਰਾਣਸੀ ਅਤੇ ਸਿਲੀਗੁੜੀ ਨੂੰ ਜੋੜਨਗੇ। ਵਿੱਤ ਮੰਤਰੀ ਦੇ ਅਨੁਸਾਰ, ਇਹ ਰੇਲ ਕੋਰੀਡੋਰ ਦੇਸ਼ ਦੇ ਵਿੱਤੀ ਕੇਂਦਰਾਂ, ਆਈਟੀ ਹੱਬਾਂ ਅਤੇ ਉਦਯੋਗਿਕ ਖੇਤਰਾਂ ਵਿਚਕਾਰ ਬਿਹਤਰ ਸੰਪਰਕ ਪ੍ਰਦਾਨ ਕਰਨਗੇ।