ਇੱਕ ਘੰਟੇ ਵਿੱਚ 17 ਵਾਰ ਹਮਲੇ, ਰੂਸ ਨੇ ਯੂਕਰੇਨ ਦੇ ਜੇਪੋਰਿਜੀਆ ਪਲਾਂਟ ਨੂੰ ਕੀਤਾ ਤਬਾਹ

Russia Ukraine War: ਜੰਗ ਦੇ ਵਿਚਕਾਰ ਰੂਸ ਨੇ ਇੱਕ ਵਾਰ ਫਿਰ ਯੂਕਰੇਨ ਦੇ ਜੇਪੋਰਿਜੀਆ ਸ਼ਹਿਰ ਨੂੰ ਨਿਸ਼ਾਨਾ ਬਣਾਇਆ ਹੈ। ਰੂਸੀ ਸੈਨਿਕਾਂ ਨੇ ਇੱਕ ਘੰਟੇ ਵਿੱਚ 17 ਵਾਰ ਜੇਪੋਰਿਜੀਆਰਮਾਣੂ ਪਾਵਰ ਪਲਾਂਟ ‘ਤੇ ਹਮਲਾ ਕੀਤਾ। ਰੂਸ ਦਾ ਉਦੇਸ਼ ਇਸ ਪਲਾਂਟ ਨੂੰ ਨਸ਼ਟ ਕਰਨਾ ਹੈ। ਰੂਸ ਨੇ ਸ਼ੁੱਕਰਵਾਰ ਸਵੇਰ ਤੋਂ ਹੀ ਇਸ ਪਲਾਂਟ ‘ਤੇ ਹਮਲਾ ਕਰਨਾ ਸ਼ੁਰੂ ਕਰ ਦਿੱਤਾ ਸੀ। ‘ਦਿ ਕੀਵ ਇੰਡੀਪੈਂਡੈਂਟ’ ਨੇ ਜੇਪੋਰਿਜੀਆ ਸਿਟੀ ਕੌਂਸਲ ਦੇ ਸਕੱਤਰ ਅਨਾਤੋਲੀ ਕੁਰਤੀਏਵ ਦੇ ਹਵਾਲੇ ਨਾਲ ਇਹ ਜਾਣਕਾਰੀ ਦਿੱਤੀ ਹੈ।

ਜੇਪੋਰਿਜੀਆ ਵਿੱਚ ਇੱਕ ਘੰਟੇ ਵਿੱਚ 17 ਵਾਰ ਹਮਲਾ

ਉਨ੍ਹਾਂ ਕਿਹਾ ਕਿ ਰੂਸੀ ਸੈਨਿਕਾਂ ਨੇ ਜੇਪੋਰਿਜੀਆ ਵਿੱਚ ਇੱਕ ਘੰਟੇ ਵਿੱਚ 17 ਵਾਰ ਹਮਲਾ ਕੀਤਾ। ਪਿਛਲੇ ਇੱਕ ਸਾਲ ਤੋਂ ਜਾਰੀ ਜੰਗ ਦੌਰਾਨ ਇਹ ਸਭ ਤੋਂ ਵੱਡਾ ਹਮਲਾ ਹੈ। ਖਾਰਕੀਵ ਦੇ ਮੇਅਰ ਇਹੋਰ ਟੇਰੇਖੋਵ ਮੁਤਾਬਕ ਰੂਸੀ ਫੌਜਾਂ ਨੇ ਖਾਰਕੀਵ ਦੇ ਵੀ ਮਹੱਤਵਪੂਰਨ ਬੁਨਿਆਦੀ ਢਾਂਚੇ ‘ਤੇ ਹਮਲਾ ਕੀਤਾ ਹੈ। ਮੇਅਰ ਨੇ ਦੱਸਿਆ ਕਿ ਰੂਸੀ ਫੌਜ ਨੇ ਸਥਾਨਕ ਸਮੇਂ ਮੁਤਾਬਕ ਸਵੇਰੇ 4 ਵਜੇ ਤੋਂ ਹਮਲਾ ਸ਼ੁਰੂ ਕੀਤਾ।

ਯੂਰਪ ਦਾ ਸਭ ਤੋਂ ਵੱਡਾ ਪਰਮਾਣੂ ਪਾਵਰ ਪਲਾਂਟ

ਅਧਿਕਾਰੀਆਂ ਨੇ ਦੱਸਿਆ ਕਿ ਖਾਰਕਿਵ ਜਾਂ ਜੇਪੋਰਿਜੀਆ ‘ਚ ਹੋਏ ਇਸ ਹਮਲੇ ‘ਚ ਫਿਲਹਾਲ ਕਿਸੇ ਜਾਨੀ ਨੁਕਸਾਨ ਦੀ ਕੋਈ ਸੂਚਨਾ ਨਹੀਂ ਹੈ। ਦੱਸ ਦਈਏ ਕਿ ਜੇਪੋਰਿਜੀਆ ਨਿਊਕਲੀਅਰ ਪਾਵਰ ਪਲਾਂਟ ਨਿਪਰੋ ਨਦੀ ‘ਤੇ ਸਥਿਤ ਹੈ। ਇਹ ਪਲਾਂਟ ਯੂਰਪ ਦਾ ਸਭ ਤੋਂ ਵੱਡਾ ਪਰਮਾਣੂ ਪਾਵਰ ਪਲਾਂਟ ਹੈ। ਇਹ ਪਹਿਲੀ ਵਾਰ ਨਹੀਂ ਹੈ ਜਦੋਂ ਰੂਸ ਨੇ ਇਸ ਪਲਾਂਟ ਨੂੰ ਨਿਸ਼ਾਨਾ ਬਣਾਇਆ ਹੈ, ਇਸ ਤੋਂ ਪਹਿਲਾਂ ਵੀ ਕਈ ਵਾਰ ਰੂਸੀ ਸੈਨਿਕ ਇਸ ਪਲਾਂਟ ‘ਤੇ ਹਮਲਾ ਕਰ ਚੁੱਕੇ ਹਨ।

ਪਿਛਲੇ ਇੱਕ ਸਾਲ ਤੋਂ ਚੱਲ ਰਹੀ ਹੈ ਜੰਗ

ਰੂਸ ਅਤੇ ਯੂਕਰੇਨ ਵਿਚਾਲੇ ਪਿਛਲੇ ਇੱਕ ਸਾਲ ਤੋਂ ਜੰਗ ਚੱਲ ਰਹੀ ਹੈ। ਇਸ 24 ਫਰਵਰੀ ਨੂੰ ਦੋਹਾਂ ਦੇਸ਼ਾਂ ਵਿਚਾਲੇ ਜੰਗ ਸ਼ੁਰੂ ਹੋਏ ਨੂੰ ਇਕ ਸਾਲ ਹੋ ਜਾਵੇਗਾ। ਇੰਨੇ ਦਿਨਾਂ ਦੀ ਜੰਗ ਦੌਰਾਨ ਦੋਹਾਂ ਦੇਸ਼ਾਂ ਨੂੰ ਕਾਫੀ ਨੁਕਸਾਨ ਹੋਇਆ ਹੈ। ਰੂਸ ਯੁੱਧ ਦੀ ਸ਼ੁਰੂਆਤ ਤੋਂ ਹੀ ਯੂਕਰੇਨ ‘ਤੇ ਲਗਾਤਾਰ ਹਮਲਾਵਰ ਰਿਹਾ ਹੈ। ਰੂਸ ਨੇ ਯੂਕਰੇਨ ਦੇ ਕਈ ਸ਼ਹਿਰਾਂ ਨੂੰ ਤਬਾਹ ਕਰ ਦਿੱਤਾ ਅਤੇ ਕਈ ਸ਼ਹਿਰਾਂ ਉੱਤੇ ਕਬਜ਼ਾ ਕਰ ਲਿਆ। ਪਰ ਯੂਕਰੇਨ ਵੀ ਇਸ ਜੰਗ ਵਿੱਚ ਡਟਿਆ ਰਿਹਾ ਅਤੇ ਸਮੇਂ-ਸਮੇਂ ‘ਤੇ ਜਵਾਬੀ ਕਾਰਵਾਈ ਕਰਦਾ ਰਿਹਾ।